ຊາວ​ບ້ານ ນາຊາຍທອງ ບໍ່ພໍໃຈ ບໍຣິສັດນໍ້າປະປາ

ໄມຊູລີ
2019-02-25
ອີແມວລ໌
ຄໍາເຫັນ
Share
ພິມ
ໂຮງງານນໍ້າປະປາ ດົງໝາກຄາຍ ນະຄອນຫລວງວຽງຈັນ
ໂຮງງານນໍ້າປະປາ ດົງໝາກຄາຍ ນະຄອນຫລວງວຽງຈັນ
Screen captured: Lao Post

ປະຊາຊົນບ້ານ ສົງເປື່ອຍເໜືອ, ກາງ ແລະ ໃຕ້ ຢູ່ເຂດເມືອງນາຊາຍທອງ ນະຄອນຫລວງ ວຽງຈັນ ບໍ່ພໍໃຈ ທີ່ຣັຖວິສະຫະກິຈ ນໍ້າປະປາ ນະຄອນຫຼວງ ແບ່ງດິນ ໃຫ້ເຂົາເຈົ້າ ແບບບໍ່ມີ ຄຸນນະພາບ ແລະ ໄດ້ມາຕຖານ ຫລັງຈາກໄດ້ຂຸດເຈາະ ແລະ ມີການວາງທໍ່ນໍ້າປະປາແລ້ວ, ຊຶ່ງບໍ່ເປັນໄປຕາມ ທີ່ທາງການ ໄດ້ສັນຍາໄວ້ ກ່ອນເຣີ່ມໂຄງການ ເມື່ອປີກາຍ, ອີງຕາມຄໍາເວົ້າ ຂອງເຈົ້າໜ້າທີ່ ກະຊວງຊັພຍາກອນ ທັມມະຊາດ ແລະ ສິ່ງແວດລ້ອມ ນະຄອນຫຼວງວຽງຈັນ ທ່ານນຶ່ງ ໃນວັນທີ 25 ກຸມພານີ້:

“ເຮົາທີ່ໄປສໍາຣວດ ກໍມີສົງເປື່ອຍເໜືອ ສົງເປືອຍກາງ ແລະ ສົງເປືອຍໃຕ້ ຫລາຍແດ່. ປະຊາຊົນ ກໍມາເວົ້າກັບເຮົາ, ເຮົາເປັນໜ່ວຍກ່ຽວຂ້ອງ ນໍ້າປະປານີ້ ໄປເຈາະ ໄປເຊາະພື້ນເຮືອນເຂົານີ້  ເຂົາບໍ່ພໍໃຈ ແລ້ວບໍ່ໄປແປງ ໃຫ້ເຂົາຫັ້ນນະ ພວກນໍ້າປະປາ ນະຄອນຫລວງ ຕອນເວົ້າ ຄືເວົ້າວ່າ ເຮັດໃຫ້ໝົດ ແຕ່ຕອນນີ້ແລ້ວ ກໍບໍ່ແລ້ວໄປເລີຍ ຄືວ່າບໍ່ມາແປງ ມາປູກາໂຣກໍຍັງບໍ່ໝົດ.”

ຣາຍງານວ່າ ໂຄງການນໍ້າປະປາ ທີ່ວ່ານີ້ ເຣີ່ມຂຶ້ນ ຍ້ອນ ຣັຖບານ ຢາກໃຫ້ປະຊາຊົນ ເມືອງນາຊາຍທອງ ມີນໍ້າປະປາໃຊ້. ໂຄງການນີ້ ໄດ້ເຣີ່ມມາ ໃນເມືອ 2-3 ປີ ຜ່ານມາ, ຊຶ່ງເມື່ອປີກາຍ ກໍຢູ່ໃນຂັ້ນຕອນ ຂຸດເຈາະດິນ ເພື່ອວາງທໍ່ນໍ້າປະປາ ໃຫ້ເຂົ້າເຖິງ 3 ບ້ານນັ້ນ ແຕ່ການເຈາະດິນ ໄປຖືກທັ້ງດິນ ທີ່ຢູ່ໃຕ້ເຮືອນ ທັ້ງດິນທໍາການຜລິດ ຂອງປະຊາຊົນ.

ທ່ານກ່າວຕື່ມວ່າ ໃນໄລຍະທໍາອິດ ປະຊາຊົນ ກໍບໍ່ ໄດ້ຂັດຂ້ອງ ແຕ່ຢ່າງໃດ ຍ້ອນເຫັນວ່າ ເປັນໂຄງການພັທນາ ຂອງພັກ-ຣັຖ ແລະ ຊ່ອຍໃຫ້ ພວກເຂົາເຈົ້າ ສະດວກຂຶ້ນຕື່ມ. ແຕ່ວ່າ ຫລັງຈາກ ທີ່ມີການວາງທໍ່ແລ້ວ ພາກສ່ວນ ທີ່ເຮັດນັ້ນ ພັດປັບໜ້າດິນ ແບບບໍ່ມີຄຸນນະພາບບາງບ່ອນ ທີ່ມີການປູຊີເມນ ກໍປູຄືນແບບຂີ້ຮ້າຍ ຊາວບ້ານ ຈິ່ງໄດ້ຮຽກຮ້ອໃຫ້ ພາກສ່ວນ ທີ່ກ່ຽວຂ້ອງ ເຂົ້າຊ່ອຍແກ້ໄຂ ຊື່ງທາງເຈົ້າໜ້າທີ່ ເວົ້າວ່າ ຕອນນີ້ ທາງກະຊວງ ກໍາລັງຢູ່ໃນຂັ້ນຕອນປຶກສາຫາຣືກັນຢູ່:

"ຕາມທີ່ລົງໄປ ປະຊາຊົນກໍວ່າ ບໍ່ມີບັນຫາເນາະ ເປັນການພັທນາ ຂອງພັກຣັຖ ແຕ່ວ່າ ຢາກໃຫ້ເບິ່ງເຣື່ອງ ຄວາມເໝາະສົມ ເຂົາເຈົ້າ ກໍແຈ້ງກັນໝົດແລ້ວໃດ ພວກກະຊວງ ພວກອິຫຍັງ ໃຫ້ປະຊາຊົນ ສເນີ ຂຶ້ນຕື່ມ ຕ້ອງມີການປັບປ່ຽນແນວໃດ.”

ທ່ານກ່າວວ່າ ໂຄງການນໍ້າປະປານີ້ ເຖິງແມ່ນວ່າ ໂຕໂຄງການ ຈະມີການສ້າງຖືກດິນປະຊາຊົນ ແຕ່ວ່າ ເຣື່ອງຄ່າຊົດເຊີຍນັ້ນ ຄົງຈະບໍ່ມີ ມີແຕ່ວ່າ ພາກສ່ວນກ່ຽວຂ້ອງ ຈະແປງຄືນພື້ນທີ່ດິນ ປະຊາຊົນ ທີ່ຖືກຂຸດເຈາະ ໃຫ້ກັບຄືນສູ່ ສະພາບເດີມ ເທົ່ານັ້ນ ຊຶ່ງປະຊາຊົນ ກໍເຫັນພ້ອມ ຍ້ອນວ່າ ພວກເຂົາເຈົ້າເອງ ເປັນຜູ່ຮ້ອງຂໍ ໃຫ້ທາງການ ເຮັດຣະບົບນໍ້າປະປາ ໃຫ້ເພື່ອຄວາມສະດວກ ສະບາຍ ໃນຊີວິດ ປະຈໍາວັນ.

ຄໍາເຫັນ (0)
Share
ເຕັມຫນ້າ