ສາກົນສເນີຣັຖບານລາວ ທົບທວນ ເຂື່ອນຊະນະຄາມ

ອະວາຣີ
2020-11-27
Share
F-Sanakham ສະພາບ ແມ່ນໍ້າຂອງ ໃນເຂດ ເມືອງຊະນະຄາມ ແຂວງວຽງຈັນ ທີ່ພົບກັບຄວາມແຫ້ງແລ້ງ ເມື່ອປີທີ່ຜ່ານມາ
File photo 2019: RFA

ເຈົ້າໜ້າທີ່ຣັຖບານ ແລະ ອົງການຮັກສາສິ່ງແວດລ້ອມສາກົນ ສເນີໃຫ້ຣັຖບານລາວ ພິຈາຣະນາຄືນໃໝ່ກ່ຽວກັບໂຄງການສ້າງ ເຂື່ອນ ຊະນະຄາມ ຊຶ່ງເປັນເຂື່ອນແມ່ນ້ຳຂອງ ອີກແຫ່ງນຶ່ງຂອງລາວ.

ໃນກອງປະຊຸມທາງໄກ ຂອງຄະນະກັມມາທິການແມ່ນ້ຳຂອງ ສາກົນ ແລະ ບັນດາປະເທດຫຸ້ນສ່ວນເມື່ອວັນ ທີ່ 24 ເດືອນພຶສຈິກາ 2020 ນີ້, ຜູ້ເຂົ້າຮ່ວມທັງໝົດ 200 ຄົນ ໄດ້ສະແດງ ຄວາມເປັນຫ່ວງຕໍ່ ຜົນກະທົບ ຈາກ ເຂື່ອນຊະນະຄາມ ດັ່ງກ່າວ.

ຄະນະກັມມາທິການ ແມ່ນ້ຳຂອງສາກົນ ສເນີວ່າ ກອງປະຊຸມຫາລື ເບື້ອງຕົ້ນ ຄວນເປີດໂອກາດໃຫ້ ເຈົ້າໜ້າທີ່ ແລະ ປະຊາຊົນໄດ້ມີ ໂອກາດ ສະແດງຄວາມຄິດຄວາມເຫັນ ຢ່າງເຕັມທີ່ກ່ຽວກັບຜົນກະທົບ ທີ່ຈະເກີດຂຶ້ນ.

ຜູ້ເຂົ້າຮ່ວມກອງປະຊຸມ ຍັງສເນີໃຫ້ຣັຖບານລາວ ແລະ ບໍຣິສັດດາຖັງຂອງຈີນ ຄວນດຳເນີນ ການສຶກສາສຳຣວດ ຜົນກະທົບຢ່າງກວ້າງ ຂວາງ ໃຫ້ສຶກສາສຳຣວດເຖິງຜົນກະທົບຕໍ່ສິ່ງ ແວດລ້ອມ ແລະ ສັງຄົມ ຢ່າງຮອບດ້ານ. ເຈົ້າຂອງເຂື່ອນ ຕ້ອງເປີດເຜີຍບົດການສຶກສາ ສຳຣວດ ໃຫ້ສາທາຣະນະຮູ້.

ຄະນະກັມມາທິການແມ່ນ້ຳສາກົນ ຍັງຣະບຸວ່າ ເຈົ້າຂອງເຂື່ອນຊະນະຄາມ ໄດ້ສເນີ ວິທີແກ້ໄຂ ແລະ ປ້ອງກັນຜົນກະທົບແດ່ແລ້ວ ແຕ່ວິທີ ເຫລົ່ານັ້ນ ຍັງບໍ່ດີພໍ ເປັນຕົ້ນນະໂຍບາຍ ການໃຫ້ຄ່າຊົດເຊີຍ ຍັງບໍ່ພຽງພໍ ແລະການຊ່ວຍຊາວບ້ານ ທີ່ໄດ້ຮັບຜົນກະທົບ ກໍຍັງບໍ່ສົມເຫດ ສົມຜົນ.

ສະມາຊິກຄະນະກັມມາທິການແມ່ນ້ຳຂອງ ຫລາຍປະເທດ ເຫັນວ່າ ເຂື່ອນຊະນະຄາມ ຍິ່ງເຮັດໃຫ້ຣະດັບນ້ຳຂອງ ປ່ຽນແປງ ຂື້ນໆລົງໆ; ໃນຍາມແລ້ງຕົວຢ່າງ ເມື່ອປີກາຍແລະປີນີ້ ແມ່ນ້ຳຂອງໄດ້ບົກແຫ້ງ ຢ່າງຜິດປົກກະຕິ ເຮັດໃຫ້ການຫາປາ ແລະ ທຳມາຫາກິນຂອງປະຊາຊົນ ໄດ້ຮັບຜົນກະທົບ ຢ່າງແຮງ.

ນອກຈາກນັ້ນ ຜູ້ເຂົ້າຮ່ວມກອງປະຊຸມ ຍັງສເນີໃຫ້ຣັຖບານລາວ ແລະ ບໍຣິສັດສ້າງເຂື່ອນຊະນະຄາມ ເປີດເຜີຍຂໍ້ມູນໃໝ່ເພິ້ມຕື່ມ ກ່ອນຈະມີ ກອງປະຊຸມຫາລືເບື້ອງຕົ້ນ.

ທ່ານ An Pich Hatda ຫົວໜ້າຄະນະບໍຣິຫານງານ ຄະນະກັມມາທິການແມ່ນ້ຳຂອງສາກົນ ກ່າວວ່າ ມາຕການແກ້ໄຂຜົນກະທົບ ເປັນບັນຫາ ສຳຄັນທີ່ສຳຣັບໂຄງການສ້າງ ເຂື່ອນຊະນະຄາມ ເພາະເຂື່ອນ ແຫ່ງນີ້ ບໍ່ພຽງແຕ່ຈະສົ່ງຜົນກະທົບ ຕໍ່ປະຊາຊົນທ້ອງຖິ່ນ ແຕ່ຈະສົ່ງຜົນກະທົບຂ້າມຊາດນຳອີກ.

ສ່ວນຣັຖບານໄທຍ ນັ້ນໄດ້ສະແດງຄວາມເປັນຫ່ວງ ຢ້ານເຂື່ອນຊະນະຄາມ ຈະປ່ຽນແປງເຂດຊາຍແດນ ຕາມລຳແມ່ນ້ຳຂອງ ຣະຫວ່າງ ໄທຍແລະລາວ.

ສຳຣັບ ຍານາງ ບຸນຄຳ ວໍຣະຈິດ ຮອງຣັຖມົນຕຣີ ກະຊວງຊັພຍາກອນ ທັມມະຊາດ ແລະ ສິ່ງແວດລ້ອມຂອງລາວ ກ່າວຕໍ່ ກອງປະຊຸມ ນີ້ວ່າ ພວກເຮົາຈະພຍາຍາມແກ້ໄຂ ທຸກບັນຫາ ທີ່ຜູ້ເຂົ້າກອງປະຊຸມ ໄດ້ສເນີມາ ກ່ອນຈະລົງມືສ້າງ. ໂຄງການເຂື່ອນຊະນະຄາມ ເປັນແຜນ ຂອງຣັຖບານລາວ ທີ່ຈະຜລິດກະແສໄຟຟ້າ ສົ່ງອອກໃຫ້ໄດ້ເຖິງ 20 GW ພາຍໃນປີ 2030.

Anonymous says:
Nov 29, 2020 12:43 PM

ສຳລັບ ການໂຄສະນາ ຂອງທາງການແລ້ວ ໃຫ້ປະຊາຊົນຮັບຮູ້ແລ້ວ ແມ່ນວ່າ ການສ້າງເຂື່ອນເປັນການສ້າງສາພັດທະນາ ປະເທດເຮົາ ປະຊາຊົນ ຈະມີຊີວິດການເປັນຢູ່ທີ່ດີຂຶ້ນ ປະຊາຊົນ ຈະມີອາຊີບໝັ້ນຄົງ ປະເທດຊາດ ກໍມີລາຍຮັບຫລາຍຂຶ້ນ. ແຕ່ໃນສະພາບໂຕຈິງແລ້ວ ປະຊາຊົນລາວ ທຸກຍາກກວ່າເກົ່າຫລາຍເທົ່າ ເນື່ອງຈາກວ່າ ການສ້າງເຂື່ອນຕ້ອງໄດ້ຍ້າຍປະຊາຊົນ ໄປຢູ່ບ່ອນໃໝ່ ທີ່ດິນນັ້ນ ບໍ່ເໝາະສົມ ແກ່ການປູກຝັງ ບໍ່ມີນ້ຳ ບໍ່ມີໄຟ ຢູ່ໄກ ເຂດຊຸມຊົນ ຢູ່ໄກຄວາມສະດວກ ຕ່າງໆ. ການຍ້າຍ ກໍມີການໂກງເງິນໂກງຄຳ ມີການເອົາລັດເອົາປຽບ. ແຕ່ກົງກັນຂ້າມ ເຈົ້າໜ້າທີ່ ທີ່ພົວພັນກັບການສ້າງເຂື່ອນ ມີລາຍໄດ້ ຄໍລັບເຊິ້ນ ການອະນຸມັດ ຈາກການໃຫ້ຄວາມສະດວກ ແກ່ນາຍທຶນ ດັ່ງນັ້ນ ໂຄງການພັດທະນາຕ່າງຈຶ່ງອະນຸຍາດ ໄດ້ງ່າຍ. ອັນນັ້ນ ກໍແມ່ເກີດຈາກ ຜູ້ນຳ ຄໍລັບເຊິ້ນ ຮັບສິນບົນ ເພື່ອສ້າງຮັ່ງຄູນມີ ໃຫ້ແກ່ຕົນ ແລະ ວົງສາຄະນາຍາດພັກລັດເອງ. ຜູ້ນຳລາວ ເຈົ້າໜ້າທີ່ລາວ ໃນຍັກ 2020 ຄວນເຂົ້າໃຈໄດ້ແລ້ວ ໄປຕົວະປະຊາຊົນບໍ່ໄດ້ແລ້ວ ໃຜໆກໍຮູ້. ຖ້າຫາກວ່າ ເຈົ້າພະນັກງານຂັ້ນນ້ອຍ ຂັດຂ້ອງ ກໍຖືກຍ້າຍຕຳແໜ່ງ ຖ້າປະຊາຊົນຂັດຂືນ ກໍເວົ້າວ່າ ກີດຂວາງການພັດທະນາ ແທ້ຈິງມັນບໍ່ແມ່ນ ມັນເປັນການຂັດຂວາງ ການກອບໂກຍ ເອົາຊັບສິນຂອງຊາດ ແລະ ຍຶດເອົາດິນດອນ ຂອງປະຊາຊົນຕ່າງຫາກ. ເຖິງເວລາແລ້ວ ທີ່ທ່ານຜູ້ນຳຄວນຄຳນຶງເຖິງ ຊີວິດການເປັນຢູ່ຂອງປະຊາຊົນ ທີ່ແທ້ຈິງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ