ໄພພິບັດທຳມະຊາດາ ສ້າງຜົນເສັຍຫາຍໃຫ້ລາວ 300 ກ່ວາຕື້ກີບ ການຊ່ວຍເຫຼືອບໍ່ທົ່ວເຖິງ

ຄະນະກໍາມະການ ຄຸ້ມຄອງໄພພິບັດຂັ້ນສູນກາງ ໄດ້ລາຍງານເມື່ອວັນທີ 30 ສິງຫາ 2024 ຜ່ານມາໄພພິບັດທາງທຳມະຊາດ ໄດ້ສ້າງຜົນເສັຍຫາຍໃຫ້ແກ່ປະເທດລາວໄປແລ້ວ 300 ກ່ວາຕື້ກີບ. ຜົນເສັຍຫາຍຈາກໄພພິບັດ ແມ່ນເກີດຈາກພາຍຸດີເປຣຊັນ (Depression), ພາຍຸໝູນເຂດຮ້ອນພຣະພິຣຸນ (Prapiroon) ແລະ ຝົນຕົກໜັກ ໃນລະຫວ່າງເດືອນກໍລະກົດ ຫາ ເດືອນສິງຫາ 2024 ເຊິ່ງມີທັງໝົດ 13 ແຂວງ, 60 ເມືອງ ແລະ 541 ບ້ານ ທີ່ໄດ້ຮັບຜົນເສຍຫາຍຈາກນໍ້າຖ້ວມ.

ດັ່ງເມືອງຄອບ ແຂວງໄຊຍະບູລີ ໃນລະຫວ່າງ 20-21 ສິງຫາ 2024 ຜ່ານມາ ຜົນຈາກຝົນຕົກໜັກຕິດຕໍ່ກັນຫຼາຍວັນເຮັດໃຫ້ແມ່ນໍ້າຄອບ, ນໍ້າພ້າວ, ນໍ້າໂປດ, ນໍ້າປາຍ, ນໍ້າຖານ ແລະ ແມ່ນໍ້າສາຍຕ່າງໆ ເພີ່ມລະດັບຂຶ້ນສູງເຮັດໃຫ້ເກີດນໍ້າຖ້ວມໄຫຼຊຸ ເຂົ້າເນື້ອທີ່ການຜະລິດ, ສຳນັກງານອົງການ, ໂຮງຮຽນ, ໂຮງໝໍ ແລະ ເຮືອນຊານຂອງປະຊາຊົນຈຳນວນ 10 ບ້ານ, ຄອບຄົວທີ່ໄດ້ຮັບຜົນກະທົບ 1,331 ຄອບຄົວ.

ໃນຂະນະທີີ່ການຊ່ວຍເຫຼືອ ທີ່ໄດ້ຮັບຈາກທາງການນັ້ນມີອາຫານແຫ້ງ, ຢາ, ນໍ້າດື່ມ ແລະ ເຂົ້າກ່ອງ. ສ່ວນການຊົດເຊີຍຄວາມເສັຍຫາຍ ບ້ານເຮືອນຂອງປະຊາຊົນທີ່ຖືກນໍ້າຖ້ວມ ໃນແຕ່ລະປີກໍ່ປະມານ 1-2 ລ້ານກີບ ເຊິ່ງບໍ່ຄຸ້ມຄ່າເມື່ອທຽບໃສ່ການສ້ອມແປງເຮືອນ ດັ່ງຊາວບ້ານມ່ວງ ເມືອງຄອບ ແຂວງໄຊຍະບູລີກ່າວຕໍ່ວິທຍຸເອເຊັຽເສຣີວັນທີ 29 ສິງຫານີ້ວ່າ:

“ໜັກແຮງເດີ້ບາງຄົນກໍ່ຝາເຮືອນຫັ້ນນ່າ ໄປເບິດເລີຍໄດ້ຮັບຄວາມເສັຍຫາຍເດີ້ຫຼາຍເຕີບເດີ້ ແຕ່ລະປີກາຊົດເຊີຍໃຫ້ຢູ່ບາງຄອບຄົວໄດ້ລ້ານສອງລ້ານ ບໍ່ຄຸ້ມ ບໍ່ຄຸ້ມນ່າບໍ່ຄຸ້ມເລີຍເພາະວ່າເຮົາເສັຍຫາຍ ໄປຫຼາຍເຕີບຝາຂອງຂ້ອຍຫັ້ນໃດຕົວເກົ່າຕົວໃໝ່ຫັ້ນ ແມ່ນນໍ້າທະລຸຊອດຝາໄປເລີຍຫັ້ນນ່າ ປະຕູກໍ່ໄຫຼຕ້ອງໄດ້ແປງເຮັດໃໝ່ເບິດຫັ້ນນ່າ.”

ຊາວບ້ານເມືອງຄອບ ແຂວງໄຊຍະບູລີອີກຄົນໜຶ່ງກ່າວວ່າທົ່ງນາ ຂອງລາວໄດ້ຮັບຄວາມເສັຍຫາຍເກືອບທັງໝົດແຕ່ກໍ່ຍັງບໍ່ຮູ້ວ່າ ການຊົດເຊີຍຈະເປັນແນວໃດທີ່ຜ່ານມາການຊົດເຊີຍ ຄວາມເສັຍຫາຍກໍ່ຍັງບໍ່ຄຸ້ມຄ່າກັບມູນຄ່າທີ່ເສັຍຫາຍ ໄປດັ່ງທ່ານກ່າວວ່າ:

“ຖືກຜົນກະທົບທົ່ງນາຫັ້ນເບິດເລີຍ ບໍ່ມີຫຍັງຈັກຢ່າງເພິ່ນສິເອົາເປັນແນວພັນມາໃຫ້ ບໍ່ຫຼືວ່າເອົາເງີນຊົດເຊີຍມາໃຫ້ຍັງບໍ່ຮູ້ບາງເທື່ອຜ່ານມາເນາະ ທີ່ວ່າຖືກຜົນກະທົບອັນນີ້ປົກກະຕິ ຈະໄດ້ເກືອບໍ່ ແປ້ງນົວ ເປັນເຄື່ອງໃຊ້ອີ່ຫຍັງຕ່າງຫຼືບໍ່ເຮົາໄດ້ຝາກເງິນ ກັບທະນາຄານບ້ານເຂົາເຈົ້າຈະຕັດເອົາເປີເຊັນ ຫຼືດອກເບັ້ຍທີ່ວ່າເຮົາຝາກຫັ້ນເອົາມາໃຫ້ແຕ່ມັນກໍ່ເປັນມູນຄ່າ ທີ່ບໍ່ຫຼາຍເນາະກັບຜົນທີ່ເຮົາເສັຍໄປຫັ້ນນ່າ.”

ເມືອງຊຽງຮ່ອນແຂວງໄຊຍະບູລີມີ ປະຊາຊົນ 9 ບ້ານ ປະມານ 1,300 ກ່ວາຄົນ ໄດ້ຮັບຜົນກະທົບ ຍ້ອນມີຝົນຕົກໜັກ ຕິດຕໍ່ກັນຫລາຍມື້ ເຮັດໃຫ້ນໍ້າໃນລໍານໍ້າໃຫຍ່ ຄືນໍ້າມ່າວ, ນໍ້າຄ່ອມ, ນໍ້າແໜ່ນ ແລະນໍ້າສາຍ ຮວມເຖິງນໍ້າໃນຫ້ວຍ ມີປາລິມານເພີ້ມຂຶ້ນຫຼາຍ ແລະໄຫລຖ້ວມເນື້ອທີ່ການຜະລິດ ແລະບ້ານເຮືອນຂອງປະຊາຊົນ 300 ປາຍຄອບຄົວ ມູນຄ່າເສັຍຫາຍທັງໝົດ 21ຕື້ກີບ. ດັ່ງຊາວບ້ານລັບ ເມືອງຊຽງຮ່ອນ ແຂວງໄຊຍະບູລີ ກ່າວວ່າ:

“ສະເພາະບ້ານລັບຈະເສັຍບຫາຍ ຄັນນາແຕ່ວ່າໄປທາງບ້ານອື່ນແບບເປັນເຮືອນ ເຂົາກໍ່ຖ້ວມເບິດແລ້ວຍັງຖ້ວມຢູ່ຄືເກົ່າເພາະວ່າຕອນນີ້ ຝົນກໍ່ຍັງຕົກຢູ່ຫັ້ນນ່າຕອນນີ້ໄດ້ລົງຈົດຜົນເສັຍຫາຍ ກັນໄປຮຽບຮ້ອຍແລ້ວແຕ່ລະປີນີ້ສ່ວນໃຫຍ່ກະສິກຳ ເຂົາຊ່ວຍເປັນເຂົ້າສານຫຼາຍກ່ວາ ເຂົ້າປາອາຫານແຫ້ງອີ່ຫຍັງ.”

ສ່ວນເມືອງປາກລາຍ ແຂວງໄຊຍະບູລີ ກໍ່ເປັນອີກເມືອງໜຶ່ງທີ່ຖືກນໍ້າຖວ້ມ ເຊິ່ງມີສາເຫດມາຈາກນໍ້າຂອງເພີ່ມລະດັບສູງຂຶ້ນຍ້ອນຝົນຕົກຕິດຕໍ່ກັນຫຼາຍວັນ ເຮັດໃຫ້ເຂື່ອນໄຊຍະບູລີດຳເນີນການລະບາຍນໍ້າ ອອກຈາກເຂື່ອນເຮັດໃຫ້ລະດັບນໍ້າໃນແມ່ນໍ້າຂອງເພີ່ມສູງຂຶ້ນກ່ວາເກົ່າ. ເຊິ່ງເຮັດໃຫ້ການປູກສາລີ ມັນຕົ້ນ ແລະ ຖົ່ວດິນແຄມຂອງ ຂອງປະຊາຊົນແຂວງໄຊຍະບູລີ ແລະ ເມືອງຊະນະນຄາາມແຂວງວຽງຈັນໄດ້ຮັບຄວາມເສັຍຫາຍຈົມຢູ່ໃຕ້ນໍ້າ. ສ່ວນປາກະຊັງທີ່ລ້ຽງໄວ້ຢູ່ແຄມຂອງກໍ່ໄດ້ຮັບຄວາມເສັຍຫາຍລວມເຖິງທຸລະກິດເຮືອນແພ ຮ້ານອາຫານຂອງຊາວບ້ານກໍ່ຕ້ອງປິດຮ້ານ. ດັ່ງຊາວບ້ານສີສະຫວ່າງ ເມືອງປາກລາຍ ກ່າວວ່າ.

“ຝົນກໍ່ຕົກແນ່ແລ້ວກໍ່ພັດປ່ອຍເຂື່ອນແດ່ ເພິ່ນວ່າຫັ້ນນ່າຖ້ວມຢູ່ຟາກນັ້ນຫັ້ນນ່າ ຝາກຝັ່ງວຽງຈັນມັນກໍ່ຖ້ວມແບບປະເພດສາລີບໍ່ເຮັດສວນລຸ່ມຊີ້ນ່າ ກໍ່ຖ້ວມເພິ່ນເຮັດເຮືອນເຮັດເຮືອນແພຫຍັງຊີ້ນ່າສ່ວນຫຼາຍ ກໍ່ເລີຍວ່າປິດໄວ້ເປັນທິດແລ້ວແມ່ນປາກະຊັງນີ້ ຈະເສັຍຫາຍຫຼາຍເພາະວ່າປີໃດກໍ່ປີລ່ວກໍ່ຂາດທຶນໃດ 2-3 ມື້ນີ້ແບບມັນກໍ່ນອກນໍ້າຫັ້ນແຫຼະ ເພິ່ນກໍ່ຂາຍລັງຂາຍເລອອກແລ້ວກໍ່ເສັຍ.”

ທາງການແຂວງໄຊຍະບູລີລາຍງານ ເມື່ອວັນທີ 21 ສິງຫາ 2024 ເມືອງຄອບ ໄດ້ຮັບຜົນກະທົບເສຍຫາຍກ່ວາ 78 ຕື້ກີບ. ໃນນັ້ນທີ່ຢູ່ອາໄສໄດ້ຮັບຄວາມເສັຍຫາຍທັງໝົດ ກ່ວາ 32 ຕື້ກີບ. ພື້ນຖານໂຄງລ່າງເສັຍຫາຍ ກ່ວາ 34 ຕື້ກີບ, ເນື້ອທີ່ທໍາການຜະລິດ-ສັດລ້ຽງເສັຍຫາຍກ່ວາ 1,6 ຕື້ກີບ. ເນື້ອທີ່ນາກ່ວາ 250 ເຮັກຕ້າຣ໌, ເນື້ອທີ່ສວນ 96 ເຮັກຕ້າຣ໌, ສຳນັກງານອົງການຂອງລັດເສຍຫາຍ ກ່ວາ 9,9 ຕື້ກີບໃນນີ້ມີໂຮງຮຽນ 3 ແຫ່ງ, ໂຮງໝໍຊຸມຊົນເມືອງ 1 ແຫ່ງ, ສະໂມສອນເມືອງ ແລະ ສຳນັກງານອົງການອີກ 5 ແຫ່ງ.

ແຂວງອຸດົມໄຊກໍ່ເປັນອີກແຂວງໜຶ່ງ ທີ່ໄດ້ຮັບຜົນກະທົບຈາກນໍ້າຖ້ວມ. ເມື່ອວັນທີ 19 ກໍລະກົດ 2024 ຜ່ານມາ ເກີດຝົນຕົກໜັກຕິດຕໍ່ກັນຫຼາຍຊົ່ວໂມງ ເຮັດໃຫ້ນໍ້າມາວ, ນໍ້າແບງ, ນໍ້າກໍ ແລະ ສາຍນໍ້າອື່ນໆ ເພີ່ມລະດັບຂຶ້ນໄຫຼເຂົ້າຖ້ວມທີ່ຢູ່ອາໄສ, ເນື້ອທີ່ທຳການຜະລິດ, ລະບົບໄຟຟ້າ, ເສັ້ນທາງຄົມມະນາຄົມ. ດັ່ງຊາວບ້ານຢູ່ເມືອງຮຸນ ແຂວງອຸດົມໄຊກ່າວວ່າ:

“ຫຼາຍນໍ້າຈາກນໍ້າຫ້ວຍເຈົ້າປີນີ້ ຕົກຫຼາຍຖືກນໍ້າຖ້ວມກໍຢູ່ແຖບຕົວເມືອງຫັ້ນແຫຼະ ເພາະວ່າມັນຖືກກັບນໍ້າແບງເດ້ນໍ້າໃຫຍ່ຫັ້ນນ່າ.”

ຄະນະກໍາມະການຄຸ້ມຄອງໄພພິບັດ ແຂວງອຸດົມໄຊລາຍງານເມື່ອວັນທີ 05 ສິງຫາ 2024 ກ່ຽວກັບສະພາບຜົນເສັຍຫາຍຈາກໄພພິບັດວ່າ. ໄພພິບັດຄັ້ງນີ້ໄດ້ຮັບຜົນເສັຍຫາຍມູນຄ່າ 7,6 ຕື້ກ່ວາກີບ.ໃນນີ້ທີ່ຢູ່ອາໄສຂອງປະຊາຊົນເມືອງໄຊ 2 ບ້ານ ລວມ 29 ຫຼັງຄາເຮືອນ ພົນລະເມືອງ 157 ຄົນ, ເຮືອນໄຫຼ 1 ຫຼັງ ແລະ ຖືກຖ້ວມ 26 ຫຼັງ ມູນຄ່າເສັຍຫາຍ 176 ລ້ານກີບ. ເສົາໄຟຟ້າຫັກ 3 ຕົ້ນມູນຄ່າ 34 ລ້ານກີບ, ເສັ້ນທາງຫຼວງແຫ່ງຊາດ ຫຼາຍສາຍເສັຍຫາຍເຊັ່ນເມືອງໄຊ, ເມືອງນາໝໍ້, ເມືອງງາ ເສັຍຫາຍມູນຄ່າ 6,36 ລ້ານກີບ. ເນື້ອທີ່ທຳການຜະລິດ ຂອງປະຊາຊົນເສັຍຫາຍ 1 ເມືອງ, ລວມ 5 ບ້ານ ມີ 166 ຫຼັງຄາເຮືອນ ໃນນີ້ຖືກຜົນກະທົບ 44 ເຮັກຕ້າຣ໌ ແລະ ເສັຍຫາຍ 36 ເຮັກຕ້າຣ໌. 

ທ່ານ ນາງດວງສີ ວື່ ຮອງເຈົ້າເມືອງໜອງແຮັດລາຍງານວ່າ ຜົນກະທົບຈາກນໍ້າຖ້ວມ ໃນປິຮິເເສັ້ນທາງເສັຍຫາຍຈຳນວນຫຼາຍ, ດິນເຈື່ອນຖົມທາງ, ນໍ້າເຊາະໜ້າທາງເປັນຮ່ອງເລິກເຊິ່ງມີ 4 ບ້ານໄດ້ຮັບຜົນກະທົບເຊັ່ນ ບ້ານກໍດູ່, ບ້ານພຽງຫົ່ງ, ບ້ານສົບແຕນ ແລະ ບ້ານພຽງມອນ. ງ ໂດຍລວມມູນຄ່າເສັຍຫາຍທັງໝົດ 5 ຕື້ກີບ. ໃນການຊ່ອຍເຫຼືອເບື້ອງຕົ່ນທາງການນໍາແຂວງຊຽງຂວາງ ໄດ້ມອບເຄື່ອງອຸປະໂພກ ແລະ ບໍລິໂພກ, ແນວພັນພືດ ໃຫ້ປະຊາຊົນບ້ານພຽງມອນຈຳນວນໜຶ່ງ.

ສ່ວນແຂວງຫົວພັນກໍ່ເຊັ່ນດຽວກັນ ຜົນກະທົບຈາກໄພນໍ້າຖ້ວມໄດ້ສ້າງຄວາມເສັຍຫາຍ ໃຫ້ເມືອງຫົວເມືອງ, ເມືອງຮ້ຽມ ແລະ ເມືອງຊ່ອນ ໃນນີ້ມີທັງເຮືອນເປ່ເພ, ເນື້ອທີ່ນາ, ສັດລ້ຽງຈຳນວນຫຼາຍ, ຊົນລະປະທານ, ຝາຍ, ຄອງເໝືອງ ແລະ ເສົາໄຟຟ້າຫັກລົ້ມ ລວມມູນຄ່າການເສັຍຫາຍທັງໝົດແມ່ນ. 37 ກ່ວາຕື້ກີບ.

ຫຼ້າສຸດເມື່ອວັນທີ 30 ສິງຫາ 2024 ຜ່ານມາ ຄະນະກໍາມະການ ຄຸ້ມຄອງໄພພິບັດຂັ້ນສູນກາງລາຍງານວ່າ. ຜົນເສັຍຫາຍຈາກພາຍຸ ດິເປຣສຊັນ, ພາຍຸໝູນເຂດຮ້ອນພຣະພິຣຸນ ແລະ ຝົນຕົກໜັກໃນລະຫວ່າງວັນທີ 18 ກໍລະກົດ ຫາ 21 ສິງຫາ ນັ້ນ. ມີທັງໝົດ 13 ແຂວງໄດ້ຮັບຜົນກະທົບ. ນະຄອນຫຼວງວຽງຈັນ, ສະລະວັນ, ຄຳມ່ວນ, ຫຼວງພະບາງ, ຊຽງຂວາງ, ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄຳໄຊ, ໄຊສົມບູນ ແລະ ອຸດົມໄຊໃນຈຳນວນ 60 ເມືອງ, 541 ບ້ານ, 17,548 ຄອບຄົວ ພົນລະເຮືອນ 36,208 ຄົນ, ເສັຍຊີວິດ 03 ຄົນ ແລະ ສູນຫາຍ 1 ຄົນ, ຄອບຄົວຖືກໂຍກຍ້າຍຊົ່ວຄາວ 72 ຄອບຄົວ, ເຮືອນ 125 ຫຼັງ, ເນື້ອທີ່ທຳການຜະລິດ 9,763 ກ່ວາເຮັກຕ້າຣ໌, ເສັ້ນທາງ 177 ເສັ້ນ, ຂົວ 12 ແຫ່ງ, ຊົນລະປະທານ 79 ແຫ່ງ, ແລະ ສັດລ້ຽງຈໍານວນຫຼາຍລວມມູນຄ່າເສັຍຫາຍທັງໝົດ ກ່ວາ 300 ຕື້ກີບ.

ສ່ວນການຊົດເຊີຍ ໃຫ້ກັບປະຊາຊົນທີ່ໄດ້ຮັບຜົນກະທົບນັ້ນ ຈະມີກະຊວງກະສິກໍາ ແລະ ປ່າໄມ້, ກະຊວງໂຍທາທິການແລະຂົນສົ່ງ ແລະ ກະຊວງແຮງງານແລະສະຫວັດດີການສັງຄົມ ຈະເປັນຜູ້ຕິດຕາມແລະດຳເນີນການຈ່າຍຄ່າຊົດເຊີຍ ໃນແຕ່ລະດ້ານໃຫ້ປະຊະຊົນ.