ເລື່ອນການເປີດໃຊ້ App “One Mekong” ຂອງຄະນະກຳມາທິການແມ່ນ້ຳຂອງສາກົນ

ຄະນະກຳມາທິການແມ່ນ້ຳຂອງສາກົນ ຫຼື MRC ມີແຜນການໃຊ້ Application “One Mekong”ລະຫວ່າງເດືອນກໍລະກົດ ຫາເດືອນສິງຫາ ຜ່ານມາ ແຕ່ມາຮອດປັດຈຸບັນ ແອັບພລິເຄຊັນ ດັ່ງກ່າວ ຖືກເລືອນເວລາການໃຊ້ອອກໄປ ຢ່າງບໍມີກຳໜົດ.

Application “One Mekong” ເປັນ ແອັບພລິເຄຊັນ ໃຫ້ຂໍ້ມູນກ່ຽວກັບແມ່ນ້ຳຂອງເພື່ອແຈ້ງເຕືອນລະດັບຖ້ວມ ແລະໄພແຫ້ງແລ້ງ ຮວມເຖິງການພະຍາກອນອາກາດ ສາມາດໃຊ້ແລະເຂົ້າໃຈ ໃນ 4 ພາສາຂອງປະເທດສະມາຊິກລຸ່ມແມ່ນ້ຳຂອງ ຄື ລາວ, ໄທ, ກຳປູເຈຍ ແລະ ຫວຽດນາມ.

ນັກວິຊາການດ້ານສິ່ງແວດລ້ອມ ທ່ານໜຶ່ງໃຫ້ຄວາມເຫັນວ່າ ຖືເປັນເຮື່ອງທີ່ດີທີ່ MRC ສ້າງ ແອັບພລິເຄຊັນ ດັ່ງກ່າວມາໃຊ້ ເພື່ອການເຕືອນໄພລ່ວງໜ້າ ແກ່ປະຊາຊົນລຸ່ມແມ່ນ້ຳຂອງ ແລະເພື່ອຄວາມປອດໄພຂອງພວກເຂົາເຈົ້າຖ້າເຫດການສຸກເສີນ ເກີດຂຶ້ນ. ດັ່ງທ່ານເວົ້າວ່າ:

“ແອບແນວນີ້ຖືວ່າ ເປັນຜົລດີ ເພາະວ່າເພີ່ນຊີ່ເຮັດເປັນພາສາທອ້ງຖິ່ນ ຈະະເວົ້າກ່ຽວກັບຂໍ້ມູນການປ່ອຍນ້ຳຈາກເຂື່ອນ ການວັດແທກນ້ຳ ແຕ່ວ່າ MRC ບໍ່ໄດ້ເວົ້າເຖິງຂໍ້ມູນຈາກເຂື່ອນໃນແມ່ນ້ຳສາຂາ ຕົວຢ່່າງເຂື່່ອນນ້ຳອູ່ ນ້ຳເທີນ ມີແຕ່ຂໍ້ມູນແບບມະຫາພາກ, ແຕ່ຄັນຊິເວົ້າກ່ຽວກັບທ້ອງຖິ່ນຕ້ອງມີຂໍ້ມູນ ຈາກສຖານທີ່ຍ່ອຍມາປະກອບນຳ.”

ນັກວິຊາການໄທ ນາງໜຶ່ງເວົ້າວ່າ  ການໃຊ້ ແອັບພລິເຄຊັນ ຍັງມີຂໍ້ຈຳກັດຫຼາຍຢູ່ ເປັນຕົ້ນ ຊາວບ້ານຫຼືຊາວປະມົງ ເມື່ອເວລາໄປຫາປາ ຈະບໍ່ສາມາດເຂົ້າເຖິງອິນເຕີແນັດ ຫຼື ວາຍຟາຍ (Wi-Fi) ໄດ້ ແລະຊາວບ້ານສ່ວນໃຫຍ່ ກໍບໍ່ສາມາດເຂົ້າເຖິງອິນເຕີແນັດ ເພື່ອຊອກຫາ ຂໍ້ມູນຈາກແອບປາລິເຄຊັນ ດັ່ງກ່າວ ບາງຄົນບໍ່ມີຮອດ ໂທລະຊັບມືຖື. ດັ່ງຍານາງເວົາວ່າ:

“ຖ້າເປັນມູນມອງຂອງຊາວບ້ານ ມັນມີຂໍ້ຈຳກັດເນາະ ມັນຕ້ອງມີ ສະມາດໂຟນ ຕ້ອງໂລດແອບ ຊາວບ້ານຈື່ງຈະໃຊ້ປະໂຍດໄດ້ຈີງໆ ຄົນທີ່ຈະໃຊ້ປະໂຍດໄດ້ຈາກ ແອບ ຕ້ອງເປັນຄົນລະດັບປານກາງ, ຈາກທີ່ຮູ້ ການໃຊ້ແອບຂອງ MRC ຍັງຍຸ້ງຍາກຢູ່.”

ຍານາງກ່າວຕື່ມວ່າ ການຈະໃຫ້ຊາວບ້ານຫັນມາໃຊ້ ແອັບພລິເຄຊັນ ດັ່ງກ່າວ ຕອ້ງມີການຕິດຕັ້ງເຄື່ອງຮັບສັນຍານໄວຟາຍ ຕາມເຂດຕ່າງຂອງຊຸມຊົນຕາມລຳແມ່ນ້ຳຂອງ ເປັນຕົ້ນຝັ່ງໄທ ຄວນຈະຢູ່ເມືອງຊຽງແສນ ເມືອງສັງຄົມ ແລະເມືອງໜອງຄາຍ ແລະ ທີ່ຝັ່ງລາວກໍຢູ່ເມືອງຫາດຊາຍຟອງ, ນະຄອນຫຼວງວຽງຈັນ.

ຊາວລາວນາງໜຶ່ງເວົ້າວ່າ ກໍເຫັນດີຖ້າຫາກມີ ແອັບພລິເຄຊັນ ດັ່ງກ່າວ ເພື່ອຄວາມປອດໄພຂອງຊາວບ້ານ ໃນເຫດການສຸກເສີນ ດັ່ງນາງເວົ້າວ່າ:

“ກໍອາດຈະດີ ຖ້າມີ ແອບດັ່ງກ່າວ ປັດຈຸບັນຊາວບ້ານ ກໍເບິ່ງຕາມເຟສບຸກ ແລະການປະກາດຂອງອຸຕຸນິຍົມ. ຂະເຈົ້າກໍແຈ້ງເຕືອນ ໃຫ້ລະວັງນ້ຳຊິມາ. ຂະເຈົ້າປ່ອຍເຂື່ອນບໍ, ເຂື່ອນຢູ່ເໜືອ. ຂະເຈົ້າປ່ອຍນ້ຳລົງມາໃສ່ນ້ຳຂອງ.”

ຊາວບ້ານຢູ່ເມືອງຕົ້ນເຜິ້ງ ແຂວງບໍ່ແກ້ວ ທ່ານໜຶ່ງເວົ້າວ່າ ສ່ວນໃຫຍ່ຊາວບ້ານບໍ່ໄດ້ຕິດຕາມ MRC ກ່ຽວກັບສະພາບແມ່ນ້ຳຂອງຂຶ້ນລົງ ຂະເຈົ້າຕິດຕາມແລະຮູ້ຂໍ້ມູນຈາກ WeChat ຂອງຈີນ ຫຼາຍກວ່າ ຍ້ອນ ແອບດັ່ງກ່າວມີການເຕືອນໄພ ແລະອັບເດດທຸກໄລຍະ ກ່ຽວກັບສະພາບການແມ່ນ້ຳຂອງ ນາງເວົ້າວ່າ:

“ນ້ຳຖ້ວມຫຼາຍປີນີ ເພາະວ່າ ເຂື່ອນນ້ຳຂອງຂອງຈີນຢູ່ຫົວນ້ຳເຂົາປອ່ຍນ້ຳລົງມາຫລາຍ ກວ່າທຸກປີ ມັນມີກຸ່ມຂອງ WeChat ຂອງຈີນ ແຈ້ງການກ່ຽວກັບການປ່ອຍນ້ຳຈາກເຂື່ອນຕະຫຼອດ ແລ້ວເຮົາກໍບອກຕໍ່ໆກັນໄປເລີຍ, ຄົນຈີນເຂົາແຈ້ງການມາແລ້ວ ເຮົາກໍເລີຍຕິດຕາມຫັ້ນນ່າ.”

ສາເຫດຫຼັກທີ່ MRC ຕ້ອງການໃຊ້ One Mekong application ກໍເພື່ອແຈ້ງເຕືອນກ່ຽວກັບໄພພິບັດຕ່າງໆທີ່ຈະເກີດຂຶ້ນຕາມລຳແມ່ນ້ຳຂອງ ເປັນຕົ້ນ ນ້ຳຖ້ວມ ໄພແຫ້ງແລ້ງ ສະພາບອາກາດປັ່ນປ່ວນ ຜູ້ໃຊ້ ແອບສາມາດເບີງວິດີໂອ ສະຖານີວັດແທກການທ່າຍທອດສົດໄດ້ທຸກເວລາ ລວມດ້ວຍການອັບໂລດຮູບພາບຕ່າງໆ ນອກຈາກນັ້ນ ຍັງມີການຕອບຄຳຖາມ ແລະຂໍ້ຂ້ອງໃຈທີ່ຊາວບ້ານຕອ້ງການໄດ້ທຸກເວລາ.

ແມ່ນໍ້າຂອງ ເປັນສາຍນໍ້າໃຫຍ່ສາຍນໍ້ານຶ່ງຂອງໂລກ ທີ່ມີຄວາມຫຼາກຫຼາຍທາງດ້ານຊີວະນາໆພັນ ຊຶ່ງໄຫຼຜ່ານ 6 ປະເທດຄື ຈີນ, ມຽນມ້າ, ລາວ, ໄທ, ກໍາປູເຈຍ ແລະຫວຽດນາມ, ມີປະຊາກອນ ຫຼາຍກວ່າ 70 ລ້ານຄົນ ເພິ່ງພາອາໄສ ໃນການທໍາມາຫາລ້ຽງຊີບ.

ປັດຈຸບັນ ຫລາຍປະເທດ ທີ່ນໍ້າຂອງໄຫຼຜ່ານນັ້ນ ມີການພັດທະນາຫຼາຍຢ່າງ ເປັນຕົ້ນກໍແມ່ນການສ້າງເຂື່ອນກັ້ນແມ່ນໍ້າຂອງ, ການຕັດໄມ້ທໍາລາຍປ່າ ເຮັດໃຫ້ແມ່ນໍ້າຂອງ ໂດຍສະເພາະເຂດລຸ່ມແມ່ນໍ້າຂອງ ປະເຊີນກັບບັນຫາ ແລະຄວາມທ້າທາຍຫຼາຍຢ່າງ ທີ່ມີຜົນກະທົບໃສ່ແມ່ນໍ້າຂອງ ຊຶ່ງໃນນັ້ນກໍມີຮວມທັງ ຈໍານວນປະຊາກອນເພີ່ມຫຼາຍຂຶ້ນ, ການພັດທະນາອຸດສາຫະກໍາ ເຂື່ອນໄຟຟ້າ ແລະການຜັນນໍ້າອອກຈາກແມ່ນໍ້າຂອງ, ໂຮງຈັກ ໂຮງງານ, ການຂຸດຄົ້ນແຮ່ທາດ, ຂຸດແຮ່-ຊາຍ, ການທໍາລາຍແກ້ງ ຂຸດຮ່ອງເດີນເຮືອ  ຊຶ່ງລ້ວນແລ້ວແຕ່ເປັນໄພຄຸກຄາມ ຕໍ່ຄວາມຍືນຍົງຂອງແມ່ນນໍ້າຂອງ ແລະການປ່ຽນແປງຂອງດິນຟ້າອາກາດ.

ສໍາລັບແຜນການກໍ່ສ້າງເຂື່ອນ ໃນແມ່ນໍ້າຂອງຕອນລຸ່ມ ທີ່ຈະມີທັງໝົດ 11 ເຂື່ອນ. ໃນຈໍານວນນັ້ນ ຢູ່ລາວຈະສ້າງທັງໝົດ 9 ແຫ່ງ, ສ້າງໄປແລ້ວ 2 ແຫ່ງ ຄືເຂື່ອນໄຊຍະບູລີ ແລະເຂື່ອນດອນສະໂຮງ ແລະຢູ່ໃນລະຫວ່າງການກໍ່ສ້າງ 1 ແຫ່ງ ຄືເຂື່ອນຫຼວງພະບາງ ແລະກຽມທີ່ຈະກໍ່ສ້າງຕື່ມອີກ 2 ແຫ່ງ ຄືເຄື່ອນປາກລາຍ ແລະເຂື່ອນປາກແບງ. ສ່ວນໃນປະເທດກໍາປູເຈຍ ກໍມີແຜນ ທີ່ຈະສ້າງເຂື່ອນໄຟຟ້າແມ່ນໍ້າຂອງ 2 ແຫ່ງ ຄືເຂື່ອນສະຕຣຶງເເຕຣງ ແລະເຂື່ອນຊໍາບໍ ຊຶ່ງມາເຖິງປັດຈຸບັນ ກໍຍັງບໍ່ທັນໄດ້ເລີ່ມດໍາເນີນການຫຍັງເທື່ອ.

ສໍາລັບຢູ່ປະເທດຈີນ ຊຶ່ງເປັນປະເທດຕົ້ນນໍ້າຂອງ ກໍມີເຂື່ອນໄຟຟ້າ ໃນແມ່ນໍ້າຂອງ ທັງໝົດ 14 ເຂື່ອນ. ໃນນັ້ນໄດ້ກໍ່ສ້າງໄປແລ້ວ 12 ເຂື່ອນ ແລະອີກ 2 ເຂື່ອນ ກໍາລັງຢູ່ໃນລະຫວ່າງການກໍ່ສ້າງ.

ສີ່ງດັ່ງກ່າວທັງໝົດສົ່ງຜົລກະທົບ ຕໍ່ແມ່ນ້ຳຂອງແລະຊາວບ້ານ ຜູ້ອາໄສ ຫາລ້ຽງຊີບ ຕາມລຳແມ່ນ້ຳຂອງ ຢ່າງໃຫ່ຍຫຼວງ ແຕ່ລະປີ, ດັ່ງນັ້ນ ການໃຊ້ Application “One Mekong” ຈຶ່ງຖືວ່າສຳຄັນ ໃນການຊ່ອຍຊີວິດຊາວບ້ານ.