ນ້ຳຖ້ວມ ຊັພສິນ ຊາວບ້ານ 3 ແຂວງພາກໃຕ້

ຈຳປາທອງ
2022.09.29
Share on WhatsApp
Share on WhatsApp
ນ້ຳຖ້ວມ ຊັພສິນ ຊາວບ້ານ 3 ແຂວງພາກໃຕ້ ຮູບໂຕຢ່າງ: ສະພາບນ້ຳຂຶ້ນສູງ ຖ້ວມຊັພສິນ ຂອງປະຊາຊົນ ຢູ່ແຂວງພາກໃຕ້ ຂອງລາວ.
ນັກຂ່າວ ພົລເມືອງ

3 ແຂວງພາກໃຕ້ຂອງລາວຄື ສາຣະວັນ, ອັດຕະປື ແລະເຊກອງ ໄດ້ຮັບຜົລກະ ທົບຈາກພະຍຸໂນຣູ, ນໍ້າຫລາຍສາຍລົ້ນຝັ່ງ ໄຫງຖ້ວມທົ່ງນາ, ບ້ານເຮືອນ ແລະ ສັດລ້ຽງ ຂອງປະຊາຊົນ ທີ່ຢູ່ແຄມນໍ້າເສັຍຫາຍຫລາຍ.
ຢູ່ເມືອງສາມັກຄີໄຊ ແຂວງອັດຕະປື  ມີຝົນຕົກໜັກຕັ້ງແຕ່ຄືນວັນທີ 27 ຈົນຮອດ ຕອນເຊົ້າ ຂອງວັນທີ 28 ກັນຍາ, ເຮັດໃຫ້ນໍ້າເຊກອງລົ້ນຝັ່ງ, ຖ້ວມທົ່ງນາ, ເຂົ້າເສັຍຫາຍຫລາຍ, ນໍ້າຖ້ວມເຮືອນຊານ ຈໍານວນນຶ່ງ ແລະສັດລ້ຽງ ຈໍານວນນຶ່ງຖືກນໍ້າພັດໄປ ແຕ່ເຄື່ອງຂອງບໍ່ເສັຍຫາຍຫລາຍ ຍ້ອນປະຊາຊົນ ມ້ຽນມັດທັນ, ອີງຕາມຄໍາ ເວົ້າຂອງຊາວບ້ານ ບ້ານໄຊໂພສີ ເມືອງສາມັກຄີໄຊ ຕໍ່ວິທຍຸ ເອເຊັຽເສຣີ ໃນມື້ວັນທີ 29 ກັນຍານີ້ວ່າ:

ມັນຖ້ວມເຂດບ້ານ ຢູ່ເມືອງສາມັກຄີໄຊ ເຊັ່ນບ້ານໄຊໂພສີ ບ້ານທະລາ ບ້ານທີ່ມີພື້ນທີ່ຕໍ່າ ພື້ນທີ່ທາງການກະເສຕ ຕລາດກໍບໍ່ທັນມີ ພວກອ້າຍກໍກຽມເຄື່ອນຢູ່ເດ໋ ນໍ້າລົງແລ້ວເດ໋.

ຜແນກຊັພຍາກອນທັມມະຊາຕ ແລະສິ່ງແວດລ້ອມ ແຂວງອັດຕະປື ຣາຍງານ ໃນຕອນເຊົ້າຂອງວັນທີ 29 ກັນຍານີ້ວ່າ ຢູ່ຈຸດວັດແທກນ້ຳບ້ານເວີນແຄນ ເມືອງສາມັກຄີໄຊ ລະດັບນໍ້າເຊກອງ ​ຢູ່​ທີ່ 15 ແມັ​ດ ຄື​ຢູ່​ໃນ​ຈຸດ​ເຕືອນ​ພັຍ​ອັນ​ຕ​ຣາຍ. ຖ້າ​ຝົນບໍ່​ຕົກ​ໜັກ​ ແລະ​ເຂື່ອນເຊ​ກະ​ໝານ ບໍ່​ປ່ອຍ​ນ້ຳ, ​​ນ້ຳ​ກໍ​ຈະ​ບໍ່​ຖ້ວມເມືອງ​ສາ​ມັກ​ຄີ​ໄຊ, ເມືອງ​ຊານ​ໄຊ, ເມືອງ​ໄຊ​ເສດ​ຖາ ແລະເມືອງ​ສະ​ໜາມ​ໄຊ ຕື່ມ​ອີກ.

ແຜນປ້ອງ​ກັນ​​ພັຍ​ນ້ຳ​ຖ້ວມ ສຸກ​ເສີນຢູ່​ເມືອງ​ສາ​ມັກ​ຄີ​ໄຊ ໄດ້​ກຳ​ນົດ​ຈຸດ​ອົ​ພ​ຍົບ ​ປະ​ຊາ​ຊົນ​ໄວ້ 10 ປາຍ​ຈຸດ.

ດັ່ງ​ເຈົ້າ​ໜ້າ​ທີ່​ ຄະ​ນະ​ກັມມະ​ການ ​ຄຸ້ມ​ຄອງ​ພັຍ​ພິ​ບັດ ​ເມືອງ​ສາ​ມັກ​ຄີ​ໄຊ ເວົ້າ​ໃນ​ມື້​ດຽວ​ກັນ​ນີ້ວ່າ:

ເຮົາວາງແຜນ ມີຈຸດອັນ...ນ່າທີ່ສູງເນາະ ກໍຢູ່ໃນເທສບານໃນເມືອງເຮົານີ້ ມີຢູ່ 10 ປາຍຈຸດເນາະ ຖືວ່າເປັນພື້ນທີ່ສູງເພື່ອຮອງຮັບ ແລະຢູ່ໃນນັ້ນເຮົາກໍໄດ້ແບ່ງແຕ່ລະບ້ານ ແຕ່ລະບ້ານເນາະ ໂຕຢ່າງຄື ໃນເທສບານນີ້ເນາະ ສ່ວນຫລາຍແມ່ນ ຈະໄປຈຸດຫລັກ 3 ຫັ້ນແຫລະ ແຕ່ປະຊາຊົນໃນເຂດບ້ານສະເພົາ ໄປໂນນສະເພົາຈັ່ງຊີ້ນ່າ ແລະເຂົ້າເຊກະໝານ ໄປແຖວກຸ່ມໜອງເດີ່ນ ຖືວ່າເປັນເຂດສູງ ແລະຈຸດອື່ນໆ.

ຢູ່ບ້ານວັງ​ຊ້າງ ເມືອງ​ລະ​ມາມ ແຂວງ​ເຊກອງ ນ້ຳ​ເຊກອງ​ລົ້ນ​ຝັ່ງ, ໄຫລ​ເຂົ້າ​ຖ້ວມ​ບາງ​ເຂດ ຂອງ​ເມືອງ ຈົນ​ເຮັດ​ໃຫ້​ຕ້ອງ​ໄດ້​ໂຈະ ​ການ​ຮຽນ ການ​ສອນ​ທົ່ວ​ເມືອງ​ໃນ​ມື້​ວັນ​ທີ 28 ກັນ​ຍາ ຍ້ອນ​ມີ​ພາ​ຍຸ​ໝົດ​ມື້ ​ໝົດ​ຄືນ, ແຕ່​ຕໍ່​ມາ ນ້ຳ​ເຊກອງ​ໄດ້​ລົດ​ລົງ ແລະ​ໄດ້​ກັບ​ມາ​ເປີດ​ຮຽນ ​ເປັນ​ປົກ​ກະ​ຕິ​ແລ້ວ.

ດັ່ງ​ນາຍ​ຄ​ຣູ ​ຢູ່​ບ້ານ​ວັງ​ຊ້າງ ເວົ້າ​ໃນ​ມື້​ວັນ​ທີ 29 ກັນ​ຍານີ້​ວ່າ:

ໂນຮູນີ້ແຫລະ ເຊົ້າມື້ວານນີ້ແລ້ວມື້ວານນີ້ ໝົດມື້ທັງລົມທັງຝົນ ແລະຄືນຂອງມື້ວານນີ້ຄືກັນ ເຮົາໂຈະບໍ່ໄດ້ຈັດການຮຽນ-ການສອນ ມື້ວານນີ້ໝົດ ທົ່ວເມືອງມື້ນີ້ດໍາເນີນການຮຽນ-ການສອນປົກກະຕິ ມີບາງໂຮງຮຽນຖືກຜົນກະທົບນີ້ແຫລະ ໄດ້ຮັບຜົນກະທົບຈາກພະຍຸ ເພດານຫລຸດ.

ຢູ່ບ້ານນາດອນແກ້ວ, ບ້ານທົ່ງຂາມ ແລະບ້ານໜອງໄຫ ເມືອງ ແລະ ແຂວງສາຣະວັນ ກໍໄດ້ຮັບຜົກະທົບຈາກພະຍຸນີ້ເຊັ່ນກັນ, ຝົນຕົກໜັກຕິດຕໍ່ກັນ ແຕ່ຄືນວັນທີ 27 ເຖິງຕອນແລງວັນທີ 28 ກັນຍາ ເຮັດໃຫ້ນ້ຳເຊໂດນລົ້ນຝັ່ງ ໄຫລຖ້ວມທົ່ງນາ ແຕ່ນ້ຳກໍຂຶ້ນຮອດເຂດເຕືອນພັຍບໍ່ຮອດເຂດອັນຕຣາຍ ບໍ່ເຖິງລະດັບເຕືອນພັຍ 10 ແມັດເຄິ່ງ.

ດັ່ງຊາວບ້ານ ບ້ານນາດອນແກ້ວ ເວົ້າໃນມື້ດຽວກັນນີ້ວ່າ:

ສ່ວນຫລາຍ ກະທົບແຕ່ພື້ນທີ່ ການຜະລິຕເນາະ ກໍຍ້ອນພະຍຸເນາະ ໂຕນີ້ລະດັບນໍ້າມັນກໍ ກໍາລັງອັນນັ້ນ ເຊໂດນເຮົາ ກໍຮອດແຕ່ເຂດເຕືອນພັຍຊື່ໆ ແຕ່ຍັງບໍ່ທັນຮອດເຂດອັນຕຣາຍ.

ໃນ 3 ບ້ານ​ດັ່ງ​ກ່າວ ​ນໍ້າ​ຖ້ວມ​ບ້ານ​​ເຮືອນ ໂດຍ​ສະ​ເພາະ​ປະ​ຊາ​ຊົນ ​ຢູ່​ບ້ານ​ແສນ​ວັງ ໄດ້​ພາ​ກັນ​ໄປ​ຂໍ​ອາ​ໃສ​ຢູ່​ນຳ​ພີ່​ນ້ອງ.

ທາງ​ເມືອງ​ສາ​ຣະ​ວັນ ກໍ​ມີ​ແຜນ​ປ້ອງ​ກັນ​ພັຍ​ ນ້ຳ​ຖ້ວມ​ສຸກ​ເສີນ ດ້ວຍ​ການ​ຕຣຽມ​ແຜນ ​ອົ​ພ​ຍົບ​ປະ​ຊາ​ຊົນ, ສະ​ບຽງ​ອາ​ຫານ ແລະ​ເຮືອ​ຊ່ອຍ​ເຫລືອ.

ດັ່ງ​ເຈົ້າ​ໜ້າ​ທີ່​ຄະ​ນະ​ກັມ​ມະ​ການ​ ຄຸ້ມ​ຄອງ​ພັຍ​ພິ​ບັດ​ເມືອງນີ້ ເວົ້າ​ໃນ​ມື້​ດຽວ​ກັນ​ນີ້​ວ່າ:

1 ມາເຮົາກໍມີເຣື່ອງຫັ້ນແຫລະເນາະ ເຮືອທີ່ວ່າທາງແຂວງເຮົາມອບໃຫ້ ເຮືອ 6 ລໍາ ມື້ວານນີ້ເຮົາກໍໄດ້ເອົາເຮືອຂຶ້ນຣົຖກຽມໄວ້ ແລ້ວກໍເອົາລົງ 2 ລໍາ, ເຮືອ 6 ລໍາ. 2 ລໍາປັດຈຸບັນນີ້ ເຮົາກໍໄດ້ເອົາຂຶ້ນແລ້ວເນາະ ເອົາຂຶ້ນກະກຽມ ມັນກໍມີກູ້ພັຍ ອາສາສມັກກູ້ພັຍ ຂອງເມືອງເຮົາ 26 ຄົນມີເສື້ອຊູຊີບ ແຄ່ 100 ກວ່າໂຕ ມີໂຄມໄຟ 6 ຫົວເນາະ ຄັງແຮວຽກງານສຸກເສີນຫັ້ນ ກໍບໍ່ຣິການເລັກໆນ້ອຍໆ ກໍຈໍາກັດຫັ້ນແຫລະເນາະ ເຮົາກໍໄດ້ຊື້ໝີ່ໃຫ້ທະຫານຫັ້ນ ເຮືອ 6 ລໍາ, ທະຫານເຂົາກໍລົງໄປຊ່ວຍ.

ກ່ຽວກັບເຣື່ອງທີ່ວ່ານີ້ ວິຍຸ ເອເຊັຽເສຣີ ກໍໄດ້ຕິດຕໍ່ໄປຫາ ທາງການ 3 ແຂວງດັ່ງກ່າວ, ແຕ່ບໍ່ສາມາດຕິດຕໍ່ ກັບແຂວງເຊກອງ ແລະແຂວງອັດຕະປືໄດ້, ມີແຕ່ແຂວງສາຣະວັນ ເວົ້າວ່າ ຊາວບ້ານ ຍັງບໍ່ທັນໄດ້ໂທຣະສັບ ແຈ້ງພັຍພິບັດ ມາຍັງທາງແຂວງເທື່ອ, ມີແຕ່ທາງເມືອງ ໄດ້ຣາຍງານກ່ຽວກັບ ຜົກະທົບຈາກພັຍນ້ຳຖ້ວມ ໃຫ້ຊາບແລ້ວ.

ແລະທາງຄະນະຄຸ້ມຄອງ ຕ້ານພັຍພິບັດແຂວງສາຣະວັນ ກໍໄດ້ປະສານຫາຄະນະຄຸ້ມຄອງ ຕ້ານພັຍພິບັດທັງ 6 ເມືອງ​​ ໃຫ້ເຝົ້າລະວັງ ແລະຕຣຽມພ້ອມແລ້ວ.

ດັ່ງເຈົ້າໜ້າທີ່ ຮັບແຈ້ງພັຍພິບັດ ແຂວງສາຣະວັນ ກ່າວຕໍ່ວິຍຸ ເອເຊັຽເສຣີ ໃນມື້ວັນທີ 29 ກັນນານີ້ວ່າ:

ແຕວ່າໂທມາຫາ ທາງໄທເຮົາ ບໍ່ມີເນາະ ເຂົາຈະຣາຍງານຫາ ປະສານຫາກອງເລຂາ ຂັ້ນເມືອງຫັ້ນ ການກໍານົດ ເຮົາຈະໄດ້ກໍານົດ ບ່ອນຈຸດຫລົບພັຍໃຫ້ເຂົາ ບ່ອນທີ່ປອດພັຍ ແລ້ວກໍອີກຈຸດນຶ່ງ ແມ່ນເຂົາເຈົ້າ ຈະກໍານົດບ່ອນຫລົບພັຍ ຂອງເຂົາເຈົ້າເອງ ແລະກໍອີກປະຊາຊົນ ຈໍານວນນຶ່ງ ໄປຢູ່ນໍາພີ່ນ້ອງຂອງເຂົາເຈົ້າ.

ທ່ານ​ກ່າວ​ຕື່ມ​ວ່າ ໂດຍ​ສະ​ເພາະ​ເມືອງວາ​ປີ ແລະ​ເມືອງ​ຄົງ​ເຊ​ໂດນ ແມ່ນ​ໜ້າ​ເປັນ​ຫ່ວງກວ່າ​ໝູ, ຈະ​ໄດ້​ເຝົ້າ​ລະ​ວັງ​ຢ່າງ​ໃກ້​ຊິດ ຍ້ອນນ້ຳ​ເຊ​ໂດນ​ຖ້ວມ​ທົ່ງ​ນາ ແລະ​ບ້ານ​ເຮືອນ​ປະ​ຊາ​ຊົນ ​ເສັຍ​ຫາຍ​ກາຍ​ເຄິ່ງ​ແລ້ວ. ເມືອງວາ​ປີ ມີ​ທັງ​ໝົດ 55 ບ້ານ, ໃນ​ນັ້ນ​ນ້ຳ​ຖ້ວມ​ແລ້ວ 28 ບ້ານ ແລະ​ເມືອງ​ຄົງ​ເຊ​ໂດນ ມີ 54 ບ້ານຖືກ​ນ້ຳ​ຖ້ວມ.

ຢູ່ເມືອງ​ຄົງ​ເຊ​ໂດນ ວັນ​ທີ 29 ກັນ​ຍາ ເວ​ລາ 13:00 ໂມງ ລະ​ດັບ​ນ້ຳ​ ຢູ່​ແກ້ງ​ຫວດ ເພີ່ມ​ສູງ​ຂຶ້ນ ຖ້ວມ​ນາເສັຍ​ຫາຍ ​ປະ​ມານ 70% ຄື​ໄດ້​ຮັບ​ຜົ​ລ​ກະ​ທົບ ​ໜັກ​ກວ່າ​ປີ​ກາຍ.

ດັ່ງ​ປະ​ຊາ​ຊົນ​ ຢູ່​ບ້ານ​ແກ້ງ​ຫວດ ເວົ້າ​ໃນ​ມື້​ດຽວ​ກັນ​ນີ້​ວ່າ:

ກໍຍັງຂຶ້ນຍັງແຮງຢູ່ ເຈົ້າ. ສ່ວນຫລາຍກໍແມ່ນ ຜົນຜະລິຕຫັ້ນແຫລະ ຜົນຜະລິຕ ເປັນເຂົ້ານາປີ ແລ້ວມາຢູ່ເສັ້ນທາງເລກທີ 13 ເຈົ້າ. ແລ້ວທາງໃກ້ແຖວນັ້ນ ເຂົາກໍມີບ່ອນລີ້ພັຍ ຂຶ້ນໄປຫັ້ນແຫລະ ເພາະການນໍາເພິ່ນ ເພິ່ນກໍບໍ່ໃຫ້ຢູ່ແຫລະເນາະ ມັນອັນຕຣາຍຫັ້ນນ່າ.

ຝົນ​ຕົກ​ໜັກ​ຕິດ​ຕໍ່​ກັນ​ຫລາຍ​ມື້ ເຮັດ​ໃຫ້​ເຂື່ອນ​ໄຟ​ຟ້າ​ ຫ້ວຍ​ລຳ​ພັນ​ໃຫ​ຍ່ ​ແຈ້ງ​ການໃຫ້​ອຳ​ນາດ​ ການ​ປົກ​ຄອງ​ເມືອງ​ທ່າ​ແຕງ ແລະ​ເມືອງ​ລະ​ມາມ​ຊາບ ວ່າ​ຈະ​ປ່ອຍ​ນ້ຳ​ອອກ​ຈາກ​ເຂື່ອນ ແຕ່​ວັນ​ທີ 29 ກັນ​ຍາ ຫາ​ວັນ​ທີ 13 ຕຸ​ລາ 2022 ເພື່ອ​ຮັກ​ສາ​ລະ​ດັບ​ນ້ຳ ​ໃນ​ໜ້າ​ເຂື່​ອນ ບໍ່​ສູງ​ເກີນ​ລະ​ດັບ​ເຕືອນ​ພັຍ ແລະ​ເຂື່ອນ​ໄຟ​ຟ້າ​ອາ​ເລື້ອຍ ​ຢູ່​ວຽດ​ນາມ ກໍ​ເປີດ​ປະ​ຕູ​ລະ​ບາຍ​ນ້ຳ​ ອອກ​ຂາກ​ເຂື່ອນ​ລົງ​ມາ ແຕ່​ວັນ​ທີ 27 ຫາ 30 ກັນ​ຍານີ້.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.