ຜູ້ເຄາະຮ້າຍຜ້ານກາງ ຍ້ອນເຂື່ອນ ຍັງຖ້າ ຄ່າຊົດເຊີຍ

ສຸພັດຕາ
2019-11-01
ອີແມວລ໌
ຄໍາເຫັນ
Share
ພິມ
ບ້ານໃຫຍ່ແທ ເມືອງສນາມໄຊ ແຂວງອັດຕະປື ຮູບນໍ້າຖ້ວມ ຕອນ ເຂື່ອນເຊນໍ້ານ້ອຍ ແຕກ ຖ່າຍວັນທີ 07-26-2018
ບ້ານໃຫຍ່ແທ ເມືອງສນາມໄຊ ແຂວງອັດຕະປື ຮູບນໍ້າຖ້ວມ ຕອນ ເຂື່ອນເຊນໍ້ານ້ອຍ ແຕກ ຖ່າຍວັນທີ 07-26-2018
Citizen Journalist

ປະຊາຊົນຜູ້ປະສົບພັຍ ເຂື່ອນເຊປຽນ-ເຊນໍ້ານ້ອຍ ແຕກ ໃນເມືອງສນາມໄຊ ແຂວງອັດຕະປື ທີ່ໄດ້ຮັບຜົນກະທົບເບົາ ແລະ ກາງຈໍານວນ ນຶ່ງໝື່ນຄົນໃນ 13 ບ້ານ ຍັງບໍ່ທັນໄດ້ຮັບເງິນຊົດເຊີຍ ຄ່າຊັບສິນ, ເຮືອນ, ດິນທໍາການຜລິດ ແລະ ຍານພະນະ ທີ່ໄດ້ຮັບ ຄວາມເສັຽຫາຍ ຈາກເຂື່ອນແຕກນັ້ນເທື່ອ ທັ້ງໆທີ່ທາງການ ໄດ້ສໍາພາດເອົາຂໍ້ມູນ ຄວາມເສັຽຫາຍໄປໝົດແລ້ວ ແຕ່ການຊົດເຊີຍ ຍັງມິດງຽບຢູ່ ບໍ່ຮູ້ວ່າຈະ ໄດ້ຮັບມື້ໃດ ແລະຈະຊົດເຊີຍໃຫ້ແບບໃດ, ດັ່ງປະຊາຊົນບ້ານໃຫຍ່ແທ ເມືອງສນາມໄຊ ຊຶ່ງເປັນບ້ານນຶ່ງ ໃນ 13 ບ້ານນັ້ນ ໄດ້ກ່າວຕໍ່ວິທຍຸ ເອເຊັຽເສຣີ ໃນວັນທີ 30 ຕຸລາ ຜ່ານມາວ່າ:

“ໂອ້ ບໍ່ທັນໄດ້ຮັບຄໍາຕອບເທື່ອນ່າ ສັມພາດຢູ່ ຂໍ້ມູນຫັ້ນ ເງິນເທົ່າດຽວນີ້ ກະບໍ່ທັນໄດ້ ແຕ່ວ່າເປີດບັນຊີ ເພິ່ນກະເປິດບັນຊີໃຫ້ຢູ່ ເຫັນແຕ່ວ່າ ເປີດບັນຊີ ແຕ່ບໍ່ເຫັນໂຕເລຂ ຢູ່ໃນປື້ມຫັ້ນ ໄດ້ແຕ່ປື້ມຊື່ືືໆ ແລະບໍ່ທັນໄດ້ຮູ້ຄໍາຕອບ ວ່າຊິໃຫ້ມື້ໃດກະບໍ່ໄດ້ບອກ ໂຕເຂົ້າສານອາຫານແຫ້ງ ແມ່ນເພິ່ນໂຈະ ເດືອນ 12 ນິ້ ຕົ່ວຫວະ ຕໍ່ໄປນີ້ເພິ່ນຈະບໍ່ໄດ້ລ້ຽງ.”

ສໍາລັບຊາວບ້ານຜູ້ນີ້ ຜົນເສັຍຫາຍທັງໝົດປະມານ 130 ລ້ານກີບ ໃນຂນະດຽວກັນ ປະຊາຊົນຜູ້ໄດ້ຮັບຜົນກະທົບ ອີກຄົນນຶ່ງ ກໍກ່າວວ່າ ນອກຈາກຄ່າຊົດເຊີຍ ບໍ່ຮູ້ຂ່າວວ່າຈະໄດ້ຮັບມື້ໃດ ແລະຮັບແນວໃດແລ້ວນັ້ນ ເຂົ້າສານ ແລະເຄື່ອງໃຊ້ສອຍອື່ນໆ ທີ່ທາງການວ່າຈະສນອງ ໃຫ້ທຸກໆເດືອນນັ້ນ ໝົດທ້າຍເດືອນ 12 ນີ້ ກໍຈະບໍ່ໄດ້ຮັບແລ້ວ:

“ພວກເອື້ອຍຫັ້ນເຫັນ ເຫັນແຕ່ເຂົ້າ ຫາກແຕ່ວ່ານາຍບ້ານຫັ້ນ ເດືອນ 12 ແມ່ນເບິດກໍານົດ ແບບວ່າເພິ່ນຈ່າຍລ່ວງໜ້າເລີຍ ວ່າຈັ່ງຊັ້ນບໍ ເພິ່ນວ່າ ບາດເຄື່ອງອື່ນໆຫັ້ນ ເອື້ອຍບໍ່ໄດ້ເຫັນ ເຫັນແຕ່ເຂົ້າຫັ້ນແຫຼະ.”

ກ່ຽວກັບການຊົດເຊີຍ ໃຫ້ຜູ້ປະສົບພັຍ 13 ບ້ານ ທີ່ີຮັບຜົນກະທົບເບົາ ແລະກາງ ຈາກເຂື່ອນແຕກນັ້ນ ທ່ານ ບຸນໂຮມ ພົມມະສານ ເຈົ້າເມືອງ ເມືອງສນາມໄຊ ໄດ້ກ່າວຕໍ່ວິທຍຸເອເຊັຽເສຣີ ວ່າ, ເມື່ອທ້າຍເດືອນ ກໍຣະກະດາ ທີ່ຜ່ານມາວ່າ:

“13 ບ້ານ ຖືວ່າເປັນບ້ານທີ່ ຖືກຜົນກະທົບກາງ ແລະກະຜົນກະທົບເບົາ ວ່າຊັ້ນຊະ ຕ້ອງຊົດເຊີຍ ເຊັ່ນດຽວກັນ ແຕ່ວ່າດຽວນີ້ ກະຍັງບໍ່ໄດ້ ຮັບການຊົດເຊີຍ ເຮົາຊົດເຊີຍບ້ານທີ່ໄດ້ຮັບຜົນກະທົບໜັກ ນິ້ກ່ອນ ດໍາເນີນໄປເປັນໄລຍະໄລຍະ ຊັ້ນຊະ 13 ບ້ານ ນິ້ກະໄດ້ຮັບ ນະໂຍບາຍ ເລື່ອງເຂົ້າກິນຫັ່ນແຫຼະເນາະ ເປັນຕົ້ນຕໍ, ເຄື່ອງນຸ່ງຮົ່ມ, ເຄື່ອງອຸປໂພຄ ບໍຣິໂພຄ ແມ່ນຖືວ່າໄດ້ຮັບນະໂຍບາຍ ໃຫ້ເປັນປົກກະຕິວ່າຊັ້ນຊະ.”

ນອກຈາກເຣື່ອງຄ່າຊົດ ທີ່ຍັງບໍ່ຮູ້ຂ່າວວ່າຈະໄດ້ຮັບແນວໃດ ແລະໄດ້ຮັບມື້ໃດແລ້ວນັ້ນ ປະຊາຊົນ ບ້ານໃຫຍ່ແທ ເມືອງສນາມໄຊ ຢາກ ຮຽກຮ້ອງໃຫ້ ພາກສ່ວນກ່ຽວຂ້ອງ ລົງຢ້ຽມຢາມເບິ່ງຕົວຈິງ ວ່າປະຊາຊົນເດືອດເຮືອນຫຼາຍ ດິນທີ່ເຄີຍທໍາການຜລິດໄດ້ ດຽວນີ້ບໍ່ສາມາດ ປູກເຂົ້າ ໄດ້ເລີຍ ຍ້ອນຂີ້ຕົ້ມຈາກເຂື່ອນແຕກ ນັ້ນຖົມໝົດ.

ເຕັມຫນ້າ