ໂຮງງານຜລິດເຈັ້ຽເຮັດໃຫ້ ນໍ້າທຸງ ມີມົລພິດ

ໄຊຍາ
2018-03-27
ອີແມວລ໌
ຄໍາເຫັນ
Share
ພິມ
ໂຮງງານຜລິດເຈັ້ຽເຊິນລີ ຂອງຈີນ ທີ່ຕັ້ງຢູ່ບ້ານຕີນຕົກ ເມືອງຫລວງນໍ້າທາ ແຂວງຫລວງນໍ້າທາ. ຮູປຖ່າຍວັນທີ 23 ມິນາ ໂດຍ: ເອເຊັຍເສຣີ
ໂຮງງານຜລິດເຈັ້ຽເຊິນລີ ຂອງຈີນ ທີ່ຕັ້ງຢູ່ບ້ານຕີນຕົກ ເມືອງຫລວງນໍ້າທາ ແຂວງຫລວງນໍ້າທາ. ຮູປຖ່າຍວັນທີ 23 ມິນາ ໂດຍ: ເອເຊັຍເສຣີ
RFA/VD

ໂຮງງານຜລິດເຈັ້ຽ ເຊິນລີ ຂອງຈີນ ທີ່ຕັ້ງຢູ່ບ້ານຕີນຕົກ ເມືອງຫຼວງນໍ້າທາ ແຂວງຫຼວງນໍ້າທາ ປ່ອຍນໍ້າເສັຽລົງໃສ່ນໍ້າທຸງ ຊຶ່ງເປັນແຫຼ່ງນໍ້າ ທີ່ປະຊາຊົນຫລາຍບ້ານ ໃຊ້ໃນຊີວິດປະຈຳວັນ ແລະໃຊ້ຜລິດເປັນນໍ້າປະປາ ພາຍໃນແຂວງ.ເຈົ້າໜ້າທີ່ ຫ້ອງການ ສິ່ງແວດລ້ອມ ແຂວງ ຫລວງນໍ້າທາ ໄປກວດກາ ເມື່ອວັນທີ 23 ມິນາ ຜ່ານມາພົບວ່າໂຮງງານ ບໍ່ມີລະບົບບຳບັດນໍ້າເສັຽ ມີພຽງແຕ່ອ່າງເກັບນໍ້າເສັຽເທົ່ານັ້ນ. ເວລານໍ້າເສັຽລົ້ນອ່າງກໍ່ຈະໄຫລລົງໃສ່ ນໍ້າທຸງ. ດັ່ງເຈົ້າໜ້າທີ່ ຈາກຫ້ອງການສິ່ງແວດລ້ອມ ກ່າວຕໍ່ ວິທຍຸເອເຊັຽເສຣີ ວ່າ:

"ອ່າງເກັບນໍ້າເສັຽມັນເປັນອ່າງແບບທັມມະດາ ມັນບໍ່ແມ່ນອ່າງບໍາບັດ ມັນບໍ່ໄດ້ເປັນລະບົບ ເວລາມັນເຕັມອ່າງ ມັນກະໄຫລລົງໃສ່ ນໍ້າທຸງ ໝົດ ຫລັງຈາກທີ່ເຮົາໄດ້ລົງກວດກາ ເຮັດບົດບັນທຶກ ແລະ ກຳນົດໃຫ້ 3 ເດືອນ ໃຫ້ປັບປຸງ ອ່າງບໍາບັດ ເຮັດເປັນລະບົບ ເພື່ອຮັບປະກັນ ບໍ່ໃຫ້ນໍ້າເສັຽໄຫລລົງໄປເລີຍໂດຍບໍ່ໄດ້ບຳບັດ."

ໂຮງງານດັ່ງກ່າວມີອ່າງເກັບນໍ້າເສັຽທັງໝົດ 3 ອ່າງ ແຕ່ລະອ່າງມີຂນາດ 3X3 ແມັດເທົ່ານັ້ນ ນໍ້າເສັຽລົ້ນອ່າງ ແລ້ວໄຫລລົງສູ່ ນໍ້າຄັນທຸງ ມາແຕ່ທ້າຍປີ 2017 ເປັນຕົ້ນມາ ມີປະຊາຊົນ 3 ບ້ານ ທີ່ໄດ້ຮັບຜົນກະທົບ ຄື; ບ້ານຕີນຕົກ ບ້ານຕີນສານ ແລະບ້ານນາເຕີຍ ລວມມີ ທັງໝົດ 200 ຄອບຄົວ. ຕໍ່ບັນຫາດັ່ງກ່າວ ປະຊາຊົນ ມີຄວາມກັງວົນວ່າ ມັນຈະສົ່ງຜົນກະທົບ ຕໍ່ສຸຂພາບ, ດັ່ງປະຊາຊົນໃນເຂດບ້ານ ກ່າວຕໍ່ ວິທຍຸເອເຊັຽເສຣີ ໃນວັນທີ 25 ມິນາ ຜ່ານມາວ່າ:

"ຢ້ານມັນມີຜົນສະທ້ອນ ກັບສຸຂພາບຂອງເດັກນ້ອຍແດ່ ເພາະວ່ານໍ້າເປື້ອນມັນໄຫຼລົງໃສ່ນໍ້າເລີຍ ບາງເທື່ອກໍ່ມີກີ່ນເໝັນ ຈົນບໍ່ເປັນຕາໃຊ້."

ໂຮງງານຜລິດເຈັ້ຽ ເຊິນລີ ຂອງຈີນ ໄດ້ເລີ້ມກໍ່ສ້າງມາແຕ່ປິ 2013 ຜລິດເຈັ້ຽເພື່ອນຳໃຊ້ເຂົ້າ ໃນສວນກ້ວຍ ແລະ ເປັນໂຮງງານຂນາດໃຫຍ່ ຕັ້ງຕິດກັບສາຍນໍ້າທຸງ. ປັດຈຸບັນ ເຈົ້າໜ້າທີ່ຫ້ອງການສິ່ງແວດລ້ອມ ເມືອງຫຼວງນໍ້າທາ ກຳລັງເອົາຕົວຢ່າງນໍ້າ ໄປກວດ ຫາສານປົນເປື້ອນ ແລະ ກຳລັງຢູ່ໃນຂັ້ນຕອນ ການກວດກາແລະການວິຈັຍ.

ຄໍາເຫັນ (1)
Share

(

It's really too bad for you. I hope your government will come to rescue you.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 30, 2018 05:52 AM

ເຕັມຫນ້າ