ບໍລິສັດ ທີ່ຂຸດຄົ້ນແຮ່ຫາຍາກ ຢູ່ແຂວງຫົວພັນ ບໍ່ຈ່າຍຄ່າແຮງງານ ໃຫ້ຄົນງານລາວ

ຄົນງານລາວ ປະມານ 30-40 ຄົນ ທີ່ເຮັດວຽກ ຢູ່ໂຄງການຂຸດຄົ້ນແຮ່ຫາຍາກ ຂອງບໍລິສັດ ຮົວລີ ຂຸດຄົ້ນແຮ່ຫາຍາກ ຈໍາກັດ ຢູ່ບ້ານ ໜອງແຮດ ເມືອງຊໍາໃຕ້ ແຂວງຫົວພັນ ໄດ້ໂຮມຕົວກັນປະທ້ວງ ຢູ່ຕໍ່ໜ້າບໍລິສັດດັ່ງກ່າວເພື່ອທວງເອົາເງິນຄ່າແຮງງານ ເມື່ອວັນທີ່ 27 ສິງຫາທີ່ຫາກໍຜ່ານມານີ້ ພາຍຫລັງທີ່ບໍ່ໄດ້ຮັບເງິນຄ່າແຮງງານ ມາເປັນເວລາປະມານ 3-4 ເດືອນແລ້ວ. ແຕ່ຈົນມາຮອດມື້ນີ້ ບັນຫານັ້ນ ກໍຍັງບໍ່ໄດ້ຮັບການແກ້ໄຂ ແລະຄົນງານກຸ່ມດັ່ງກ່າວ ກໍໄດ້ເຊົາເຮັດວຽກ ແລະເດີນທາງກັບໄປຢູ່ບ້ານແລ້ວ, ອີງຕາມຄໍາເວົ້າຂອງຊາວບ້ານຜູ້ນຶ່ງ ທີ່ຮູ້ກ່ຽວກັບເຫດການທີ່ວ່ານີ້ ຕໍ່ວິທຍຸເອເຊັຽເສຮີ ໃນມື້ວັນທີ 2 ກັນຍານີ້.

“ບໍ່ໄດ້ເຮັດແລ້ວ ກັບບ້ານໝົດແລ້ວ ຂອງ ໂຄງການຊື່ບໍລິສັດຮວາລີຂຸດຄົ້ນແຮ່ຫາຍາກຈໍາກັດ ກະໄດ້ລົມນໍາກໍາມະກອນເພິ່ນແຫລະ ຍິນວ່າເພິ່ນເປັນກໍາມະກອນເຈາະອຸມົງເນາະ ຄ່າຈ້າງຮັບເໝົານີ້ເພິ່ນໄລ່ເປັນແມັດລະ 2 ແສນປາຍນີ້ ເພິ່ນບໍ່ໄດ້ເລີຍ ມີແຕ່ວ່າໄດ້ຄົນລະ 3 ແສນ.”

ກ່ຽວກັບເຫດການດັ່ງກ່າວ ຊາວບ້ານອີກຜູ້ນຶ່ງ ທີ່ຮູ້ເລື້ອງທີ່ເກີດຂຶ້ນນັ້ນ ກໍເວົ້າວ່າ ທາງຫົວໜ້າ ທີ່ເປັນຄົນຈີນ ຢູ່ໃນບໍລິສັດດັ່ງກ່າວ ບໍ່ຢາກຈ່າຍເງິນຄ່າແຮງງານໃຫ້ຄົນງານລາວ ແບບບໍ່ຮູ້ສາເຫດຄັກແນ່ວ່າ ເປັນຍ້ອນຫຍັງກັນແທ້. ແລະວ່າມາຮອດມື້ນີ້ ຄົນງານ ຊຶ່ງສ່ວນຫຼາຍເປັນຊົນເຜົ່າມົ້ງນັ້ນ ກໍຍັງບໍ່ທັນໄດ້ຮັບເງິນຄ່າຈ້າງເທື່ອ ແລະຫລາຍຄົນ ກໍໄດ້ກັບຄືນເມືອບ້ານ ທັງຜູ້ທີ່ຢູ່ແຂວງຫົວພັນ ແລະຢູ່ແຂວງຊຽງຂວາງ ດັ່ງທີ່ລາວເວົ້າໃນມື້ດຽວກັນນີ້ວ່າ:

“ຫົວໜ້າຫັ້ນເຂົາບໍ່ຢາກຈ່າຍເງິນເນາະ ກໍາມະກອນນີ້ເຂົາກໍບໍ່ມີເງິນຈ່າຍ ເຂົາກໍທວງຫລາຍຄົນແລ້ວໃດ໋ ເພິ່ນຍັງບໍ່ທັນໄດ້ຈ່າຍເດ້ດຍວນີ້ ຍັງຄາຢູ່ໃດ໋ ກໍາມະກອນຍັງບໍ່ໄດ້ເງິນໃຊ້ ກໍາມະກອນມາຫລາຍຕາງແຂວງ ກໍາມະກອນກະຫລາຍເດ້ ເຂົາກະບໍ່ຈ່າຍເງິນ ດຽວນີ້ຍັງຄ້າງຢູ່ບໍລິສັດພຸ້ນນ່າ.”

ເພື່ອຂໍຮູ້ກ່ຽວກັບເລື້ອງນີ້ຕື່ມ ວິທຍຸເອເຊັຽເສຮີ ພະຍາຍາມຕິດຕໍ່ ໄປຍັງກຸ່ມຄົນງານດັ່ງກ່າວ, ແຕ່ກໍຍັງບໍ່ສາມາດຕິດຕໍ່ຫາໄດ້.

ກ່ຽວກັບເຫດການໂຮມຕົວກັນ ຂອງກຸ່ມຄົນງານເທື່ອນີ້ ຜູ້ໃຊ້ສື່ສັງຄົມອອນລາຍ ຈໍານວນນຶ່ງ ກໍໄດ້ເຜີຍແຜ່ ຄລິບວິດິໂອ ກ່ຽວກັບເຫດການທີ່ວ່ານັ້ນ, ໄດ້ເຫັນຄົນງານ ທີ່ໄປທວງເອົາເງິນ ຢູ່ຕໍ່ໜ້າບໍລິສັດຈີນດັ່ງກ່າວ ແລະໄດ້ພາກັນຖືໄມ້ ເພື່ອໄວ້ປ້ອງກັນຕົວເອງ ໃນກໍລະນີ ທີ່ທາງນາຍຈ້າງຈີນ ສັ່ງໃຫ້ພະນັກງານຂອງເຂົາ ມາຂັບໄລ່ໜີອອກໄປ. ແຕ່ກໍບໍ່ມີເຫດການຫຍັງຮຸນແຮງເກີດຂຶ້ນ. ແລະນາຍຈ້າງ ກໍບໍ່ໄດ້ອອກມາໂອ້ລົມນໍາພວກຄົນງານແຕ່ຢ່າງໃດ.   

ກ່ຽວກັບເຫດການທີ່ເກີດຂື້ນນີ້ ເຈົ້າໜ້າທີ່ຜະແນກແຮງງານ ແລະສະວັດດິການສັງຄົມ ແຂວງຫົວພັນ ທ່ານນຶ່ງ ເວົ້າຕໍ່ວິທຍຸເອເຊັຽເສຣີ ໃນມື້ວັນທີ 2 ກັນຍານີ້ ວ່າ ຍັງບໍ່ທັນໄດ້ຮັບແຈ້ງຢ່າງຄັກແນ່ເທື່ອ ແລະຄົນງານລາວນັ້ນ ກໍບໍ່ໄດ້ຮ້ອງຮຽນມາຫາ. ແຕ່ເຖິງຢ່າງ ໃດກໍຕາມ ກໍຈະມີການກວດສອບ ຄືນອີກເທື່ອນຶ່ງ.

“ທາງເຮົາກໍຍັງບໍ່ທັນໄດ້ຮັບຂໍ້ມູນເທື່ອ ໂຕນີ້ນ່າ ຖືວ່າບໍ່ຮູ້ນ່າຂໍ້ມູນໂຕນີ້ ລອງຖາມຂໍ້ມູນເບິ່ງຄືນວ່າ ແມ່ນແທ້ບໍ່ ເພາະ ວ່າໂຕນີ້ເຮົາກໍຍັງບໍ່ທັນມີຂໍ້ມູນເທື່ອ ແລ້ວກໍຍັງບໍ່ເຫັນເຂົາເຈົ້າລາຍງານມາເທື່ອນ່າ.”

ໃນໄລຍະນີ້ ໂຄງການຂຸດຄົ້ນແຮ່ຫາຍາກ ຢູ່ແຂວງຫົວພັນ ຫລາຍໂຄງການ ບໍ່ໄດ້ເຮັດວຽກເປັນປົກກະຕິ, ໄດ້ຫຼຸດຜ່ອນໜ້າວຽກ ແລະຫຼຸດຜ່ອນການຈ້າງຄົນງານລົງ ເນື່ອງຈາກເປັນໄລຍະລະດູຝົນ. ແລະອີກຢ່າງນຶ່ງ ກໍອາດເປັນຍ້ອນ ທາງບໍລິສັດ ມີບັນຫາທາງການເງິນ ດັ່ງຄົນງານລາວຜູ້ນຶ່ງ ທີ່ເຮັດວຽກ ຢູ່ໃນໂຄງ ການຂຸດຄົ້ນແຮ່ຫາຍາກ ໃນເຂດເມືອງຊໍາເໜືອ ເວົ້າໃນມື້ດຽວກັນນີ້ວ່າ:

“ບໍ່ ບໍ່ໄດ້ດໍາເນີນວຽກປົກກະຕິນ່າ ເພາະວ່າໂຄງການເຮົາບໍ່ໄດ້ເຮັດວຽກປົກກະຕິ ກະບໍ່ເຖິງຂັ້ນວ່າຢຸດ ເຮົາເຮັດປົກກະຕິແຕ່ວ່າເຮົາຫລຸດຈໍານວນ ຫລຸດປາລິມານລົງ ເລື້ອງເງິນເຮົາກໍບໍ່ຮູ້ນໍາລະບົບຂອງບໍລິສັດ ບໍ່ຮູ້ນ່າ.”

ໂຄງການຂຸດຄົ້ນແຮ່ຫາຍາກ ຢູ່ບ້ານໜອງແຮດນີ້ ກວມເອົາເນື້ອທີ່ທັງໝົດ  5 ກິໂລຕາແມັດ ໂດຍໄດ້ເລີ້ມຂຸດຄົ້ນມາແຕ່ປີ 2023 ຊຶ່ງແມ່ນກະຊວງພະລັງງານແລະບໍ່ແຮ່ ເປັນຜູ້ຄຸ້ມຄອງໂດຍກົງ.

ເຫດການຄົນງານລາວ ຖືກນາຍຈ້າງທີ່ເປັນຄົນຈີນ ເອົາລັດເອົາປຽບ, ບໍ່ຈ່າຍຄ່າແຮງງານນີ້ ກໍເຄີຍເກີດຂຶ້ນຫລາຍເທື່ອແລ້ວ, ໄດ້ມີການເຜີຍແຜ່ຄລິບວິດິໂອ ຜ່ານສື່ສັງຄົມອອນລາຍ ເປັນຕົ້ນ ເມື່ອວັນທີ 29 ມິຖຸນາທີ່ຜ່ານມາ ໄດ້ເກີດເຫດການຄົນງານລາວ ປະມານ 100 ຄົນ ຫລືຫລາຍກວ່ານັ້ນ ໄດ້ໂຮມຕົວກັນ ຢູ່ຕໍ່ໜ້າບໍລິສັດແຫ່ງນຶ່ງ ໃນເຂດເສດຖະກິດພິເສດບໍ່ເຕັນແດນງານ ແຂວງຫລວງນໍ້າທາ ເພື່ອທວງເອົາເງິນຄ່າແຮງງານ ຈາກນາຍຈ້າງຈີນ ຈົນເກີດເຫດການຕີກັນ ລະ ຫວ່າງ ຝ່າຍນາຍຈ້າງ ແລະຄົນງານ.

ແລະເມື່ອກ່ອນໜ້ານັ້ນ ໃນປີ 2022 ຄົນງານລາວ ທີ່ເຮັດວຽກໃນໂຄງການຂຸດຄົ້ນບໍ່ເກືອກາລີ ຂອງບໍລິສັດ ຊີໂນອາກຣີ -ໂປຕາສ ຈໍາກັດ ຂອງຈີນ ຢູ່ບ້ານດົງໃຕ້ ເມືອງທ່າແຂກ ແຂວງຄໍາມ່ວນ ໄດ້ພາກັນປະທ້ວງນາຍຈ້າງ ທີ່ບໍ່ຈ່າຍເງິນ ເດືອນໃຫ້ ຈົນເຈົ້າໜ້າທີ່ ຕ້ອງໄດ້ໄປລະງັບເຫດການວຸ້ນວາຍນັ້ນ ດ້ວຍການຍິງປືນຂຶ້ນຟ້າ ເພື່ອໃຫ້ເຫດການສະຫງົບລົງ.