ຊາວບ້ານ ໃນແຂວງຫຼວງນ້ຳທາ ປະສົບໄພນ້ຳຖ້ວມ ໜັກໜ່ວງ

ນັບແຕ່ວັນທີ 9 ກັນຍາ 2024 ເປັນຕົ້ນມາ, ຊາວບ້ານຫຼາຍເຂດ ຢູ່ເມືອງຫຼວງນ້ຳທາ ແຂວງຫຼວງນ້ຳທາ ປະສົບໄພນ້ຳຖ້ວມ ແບບກະທັນຫັນ ເປັນຕົ້ນ ຢູ່ເຂດເສດຖະກິດພິເສດ ບໍ່ເຕັນແດນງາມ, ບ້ານບໍ່ເຕັນ, ບ້ານນາເຕີຍ, ບ້ານໂພນໄຊ ແລະ ອີກຫຼາຍບ້ານ ຍ້ອນໄດ້ຮັບຜົນກະທົບ ຈາກພາຍຸຢາກິ ແລະ ມວນນ້ຳ ຈຳນວນມະຫາສານ ໄດ້ລົ້ນອອກຈາກ ເຂື່ອນໄຟຟ້ານ້ຳທາ 3 ແລ້ວໄຫຼຖ້ວມ ເທດສະບານ ເມືອງຫຼວງນ້ຳທາ, ເຊິ່ງມາຮອດປັດຈຸບັນ ຊາວບ້ານ ທີ່ໄດ້ຮັບຜົນກະທົບ ຍັງລໍຖ້າການຊ່ອຍເຫຼືອຢູ່. ດັ່ງຊາວບ້ານ ທີ່ປະສົບໄພນ້ຳຖ້ວມ ນາງໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 10 ກັນຍາ ນີ້ວ່າ:

“ແຖວໆທີ່ວ່າ ເອື້ອຍຢູ່ນີ້ ແມ່ນມັນມາແຕ່ມື້ວານນີ້, ນ້ຳຖ້ວມແຕ່ມື້ວານ. ດຽວນີ້ ມັນຈະໄປຖ້ວມ ຢູ່ແຖວສະໜາມບິນ. ສະໜາມບິນ ກະຖືວ່າ ຍັງເຫຼືອແຕ່ຫຼັງຄາໜ້ອຍດຽວ ມັນຍັງມີຕົກໜັກຢູ່ ແລ້ວກໍບໍ່ມີຄົນເຂົ້າໄປຊ່ອຍ, ຍັງມີຄົນຕິດຢູ່ຫັ້ນຫຼາຍຢູ່.”

ໃນຂະນະດຽວກັນ, ຊາວບ້ານ ຢູ່ເມືອງຫຼວງນ້ຳທາ ອີກນາງໜຶ່ງ ກ່າວວ່າ ເຫດການນ້ຳຖ້ວມ ໃນເທື່ອນີ້ ຖືວ່າໜັກ ຫຼາຍກວ່າປີຜ່ານມາ ແລະ ມາຮອດປັດຈຸບັນ ທັງຄອບຄົວ ຂອງຕົນເອງ ແລະ ຊາວບ້ານ ອີກຫຼາຍຄອບຄົວ ກໍຍັງບໍ່ທັນໄດ້ ກັບເຂົ້າໄປເຮືອນເທື່ອ ເນື່ອງຈາກໃນເຮືອນ ຍັງມີນ້ຳ ແລະ ຂີ້ຕົມ, ແຕ່ກໍມີຄວາມຕ້ອງການ ຢາກໄດ້ການຊ່ອຍເຫຼືອ ແບບຮີບດ່ວນ. ດັ່ງຍານາງກ່າວວ່າ:

“ຖ້ວມໆ, ນ້ຳຖ້ວມຄືກັນ, ບົກ ກໍຍັງບໍ່ບົກດີເທື່ອ. ຖ້ວມມື້ວານນີ້, ໂອ, ຖ້ວມຫຼາຍ ຖ້ວມສູງ. ທາງເມືອງນ້ຳທານີ້, ໂອ້ຍ, ຖ້ວມໜັກ ຖ້ວມຢູ່ແຖວລຽບນ້ຳທາຫັ້ນ. ບໍ່ມີໃຜຢູ່ແລ້ວຕິ ຢູ່ບ້ານ, ໃຜກະອອກມາ ແຕ່ມື້ວານນີ້.”

ຈາກສະພາບນ້ຳຖ້ວມໜັກ ຢູ່ເມືອງຫຼວງນ້ຳທາ ລວມໄປຈົນເຖິງ ສະໜາມບິນແຂວງຫຼວງນ້ຳທາ ນັ້ນ, ກໍເຮັດໃຫ້ ສາຍການບິນຕ່າງໆ ຕ້ອງໄດ້ຍົກເລີກຖ້ຽວບິນ ມາແຂວງຫຼວງນ້ຳທາ ເນື່ອງຈາກເຮືອບິນ ບໍ່ສາມາດແລ່ນລົງຈອດໄດ້ ແລະ ກໍຍັງບໍ່ມີກຳນົດເທື່ອວ່າ ຈະກັບມາເປີດໃຫ້ບໍລິຫານ ໃນມື້ໃດ. ດັ່ງພະນັກງານ ສາຍການບິນລາວ ນາງໜຶ່ງ ກ່າວວ່າ:

“ບໍ່ສາມາດລົງໄດ້ເທື່ອເດີ້, ຍົກເລີກເດີ້. ລະດັບນ້ຳຍັງສູງ ຍັງບໍ່ສາມາດລົງໄດ້ ບໍ່ຮູ້ມື້ວ່າ ຈະຮອດມື້ໃດ, ອີງຕາມສະພາບນ້ຳເລີຍ.”

ນອກຈາກນີ້, ຍັງມີລາຍງານຕື່ມວ່າ ຢູ່ເຂດສະໜາມບິນ ແຂວງຫຼວງນ້ຳທາ ກໍມີຊາວບ້ານ ຫຼາຍຄອບຄົວ ທີ່ຕິດຄ້າງ ຢູ່ໃນເຮືອນ ແລະ ບໍ່ສາມາດແລ່ນໜີນ້ຳ ອອກນອກເຮືອນໄດ້, ແຕ່ກໍມີເຈົ້າໜ້າທີ່ ໄດ້ຂີ່ເຮືອ ເຂົ້າໄປຊ່ອຍເຫຼືອ ຢ່າງປອດໄພແລ້ວ ຈຳນວນໜຶ່ງ. ອີກທັງ ຜູ້ປະສົບໄພ ອີກຈຳນວນໜຶ່ງ ກໍໄດ້ປະກາດ ຂໍຄວາມຊ່ອຍເຫຼືອ ໂດຍການໂພສຂໍ້ຄວາມ ຜ່ານສື່ສັງຄົມອອນລາຍ.

ສ່ວນຢູ່ເຂດເສດຖະກິດພິເສດ ບໍ່ເຕັນແດນງາມ, ບ້ານບໍ່ເຕັນ, ບ້ານນາເຕີຍ ແລະ ບ້ານໃກ້ຄຽງ ທີ່ຖືກນ້ຳຖ້ວມໜັກ ໃນວັນທີ 9 ກັນຍາ ທີ່ຜ່ານມານັ້ນ, ປັດຈຸບັນ ລະດັບນ້ຳ ກໍໄດ້ຫຼຸດລົງແລ້ວ, ແຕ່ເສັ້ນທາງຫຼາຍແຫ່ງ ໄດ້ຖືກຕັດຂາດ ແລະ ບໍ່ສາມາດ ໃຊ້ເດີນທາງສັນຈອນ ໄປມາໄດ້ ຍົກເວັ້ນແຕ່ເສັ້ນທາງ ລົດໄຟລາວ-ຈີນ ທີ່ຍັງພໍສາມາດ ແລ່ນໄດ້ຕາມປົກກະຕິ. ດັ່ງຊາວບ້ານ ຢູ່ເຂດບໍ່ເຕັນ ທ່ານໜຶ່ງ ກ່າວວ່າ:

“ເລີ້ມຫຼຸດລົງແລ້ວ, ແຕ່ວ່າບໍ່ແນ່ໃຈວ່າ ຝົນຕົກອີກ ມັນຊິຖ້ວມອີກບໍ່? ມັນຖ້ວມຕອນ 4 ໂມງເຊົ້ານີ້ນ່າ. ເລີ້ມມາຕອນເຊົ້າບໍ່ ຝົນຕົກ ມັນບໍ່ເຊົາ ມັນກໍເຂົ້າມາເລື້ອຍໆ. ຄັນຢາກມາບໍ່ເຕັນ ກະໄດ້ຂີ່ລົດໄຟມາ, ຄັນວ່າຂີ່ລົດປະຈຳທາງຫັ້ນ, ຖືວ່າທາງຕັດຂາດໝົດ.”

ກ່ຽວກັບເລື້ອງນີ້, ວິທຍຸເອເຊັຽເສຣີ ໄດ້ຕິດຕໍ່ໄປຍັງ ຫ້ອງວ່າການປົກຄອງ ແຂວງຫຼວງນ້ຳທາ ເພື່ອສອບຖາມ ກ່ຽວກັບແຜນການຊ່ອຍເຫຼືອ ຜູ້ປະສົບໄພນ້ຳຖ້ວມ, ເຊິ່ງເຈົ້າໜ້າທີ່ ທ່ານໜຶ່ງ ໄດ້ຊີ້ແຈງ ໃນເບື້ອງຕົ້ນວ່າ ທາງຄະນະກຳມະການ ທີ່ກ່ຽວຂ້ອງ ກຳລັງມີການປະຊຸມ ປຶກສາຫາລື ແບບຮີບດ່ວນ ເພື່ອວາງແຜນ ຊ່ອຍເຫຼືອຜູ້ປະສົບໄພ ຕາມເຂດຕ່າງໆ ແລະ ກໍຍັງບໍ່ທັນໃຫ້ຮູ້ ລາຍລະອຽດ ເພີ່ມຕື່ມໄດ້ເທື່ອ.

ຢ່າງໃດກໍຕາມ, ໃນວັນທີ 10 ກັນຍາ ນີ້, ພາກປະຊາສັງຄົມ ຈຳນວນໜຶ່ງ ຢູ່ນະຄອນຫຼວງວຽງຈັນ ກໍໄດ້ຈັດຕັ້ງ ສູນຮັບບໍລິຈາກ ເຄື່ອງຂອງ, ເຄື່ອງໃຊ້, ອາຫານແຫ້ງ ແລະ ອື່ນໆ ເພື່ອຈະນຳສົ່ງມອບ ໃຫ້ແກ່ຜູ້ປະສົບໄພນ້ຳຖ້ວມ ຢູ່ແຂວງຫຼວງນ້ຳທາ ເພື່ອເປັນການຊ່ອຍເຫຼືອ ແກ່ຊາວບ້ານ ຢູ່ແຂວງດັ່ງກ່າວ ໃຫ້ຫຼຸດຜ່ອນ ຄວາມເດືອດຮ້ອນ. ດັ່ງເຈົ້າໜ້າທີ່ ພາກປະຊາສັງຄົມ ນາງໜຶ່ງ ກ່າວວ່າ:

“ໂຕນີ້ຍັງ, ຫາກໍເປີດຮັບນີ້ແຫຼະ. ເຮົາກຳລັງລະດົມຮ່ວມກັນ ເພາະວ່າ ພວກເຮົານີ້ນ່າ ຮ່ວມກັນ. ໂຕນີ້ ເຮົາຈະຝາກໄປ. ໂຕນີ້ ຖ້າວ່າລວບລວມໄດ້ ສ່ວນໃດສ່ວນໜຶ່ງ ເຮົາຈະທະຍອຍສົ່ງໄປເລີຍ.”

ຫຼ້າສຸດນີ້, ສູນກາງຊາວໜຸ່ມລາວ ກໍໄດ້ເປີດຮັບບໍລິຈາກເຄື່ອງ ຢູ່ຈຸດບ້ານໂພນທັນ, ເມືອງໄຊເສດຖາ ນະຄອນຫຼວງວຽງຈັນ ເພື່ອນຳໄປຊ່ອຍເຫຼືອ ຜູ້ປະສົບໄພນ້ຳຖ້ວມ ຢູ່ແຂວງຫຼວງນ້ຳທາ ແລະ ແຂວງອື່ນໆ ທີ່ຖືກນ້ຳຖ້ວມ. ອີກທັງ ມີລາຍງານຕື່ມວ່າ ກອງພັນໃຫຍ່ 703 ຂອງກອງບັນຊາການ ທະຫານອາກາດ ກໍໄດ້ນຳກຳລັງທະຫານ ແລະ ເຮືອບິນ ອີກ 4 ລຳ ພ້ອມດ້ວຍເຮືອ ອີກຈຳນວນໜຶ່ງ ເພື່ອໄປຊ່ອຍເຫຼືອ ຜູ້ປະສົບໄພນ້ຳຖ້ວມ ທີ່ແຂວງຫຼວງນ້ຳທາ.

ສຳລັບເຫດການນ້ຳຖ້ວມ ຢູ່ແຂວງຫຼວງນ້ຳທາ ຍັງບໍ່ທັນມີລາຍງານ ມູນຄ່າຄວາມເສັຽຫາຍເທື່ອ, ແຕ່ໃນເບື້ອງຕົ້ນ ມີຊາວບ້ານ ເສຍຊີວິດ 1 ຄົນ ຍ້ອນຖືກນ້ຳພັດໄຫຼ ຈາກການທີ່ພະຍາຍາມ ເຂົ້າໄປຊ່ອຍ ຜູ້ປະສົບໄພນຳກັນ. ອີກທັງ ເຂື່ອນໄຟຟ້ານ້ຳທາ 3 ກໍຖືກນ້ຳຖ້ວມ ຈົນລົ້ນ ແລະ ໄດ້ເກີດຄວາມເສຍຫາຍ ແກ່ເຮືອນຈັກ ບາງສ່ວນ.

ຫຼ້າສຸດນີ້, ມີ 35 ບ້ານ ປະສົບໄພພິບັດນ້ຳຖ້ວມ ໃນຄັ້ງນີ້, ອີງຕາມການລາຍງານ ຂອງຫ້ອງວ່າການປົກຄອງ ແຂວງຫຼວງນ້ຳທາ ໃນຕອນແລງ ຂອງວັນທີ 10 ກັນຍາ ນີ້.