ເຂື່ອນໄຟຟ້ານໍ້າຄານ 2-3 ລະບາຍນ້ຳ ປະຊາຊົນ ເລີ່ມໄດ້ຮັບຜົນກະທົບ

ປະຊາຊົນຈໍານວນນຶ່ງ ທີ່ອາໄສຢູ່ແຄມນໍ້າຄານ ໃນເຂດເມືອງຊຽງເງິນ ແລະນະຄອນຫຼວງພະບາງ ແຂວງຫລວງພະບາງ ເລີ່ມໄດ້ຮັບຜົນກະທົບ ພາຍຫລັງເຂື່ອນໄຟຟ້ານໍ້າຄານ 2 ແລະ 3 ປ່ອຍນໍ້າອອກຈາກເຂື່ອນ ຕັ້ງແຕ່ວັນທີ 8 ກັນຍານີ້ ເປັນຕົ້ນມາ ຊຶ່ງມີສ່ວນເຮັດໃຫ້ ນໍ້າໃນນໍ້າຄານ ເພີ່ມສູງຂຶ້ນ ແລະນໍ້າຂຸ່ນ ສົ່ງຜົນໃຫ້ຊາວບ້ານ ບໍ່ສາມາດຫາປາ ໄດ້ຕາມປົກກະຕິ. ພ້ອມດຽວກັນນັ້ນ ຊາວບ້ານ ທີ່ປູກຝັງຢູ່ຕາມແຄມນໍ້າຄານ ກໍພາກັນຢ້ານວ່າ ນໍ້າຈະໄຫຼລົ້ນຕາຝັ່ງ ເຂົ້າຖ້ວມບ່ອນປູກຝັງ ຮວມທັງບ້ານເຮືອນຂອງພວກເຂົາເຈົ້າ ນໍາດ້ວຍ, ອີງຕາມຄໍາເວົ້າຂອງຊາວບ້ານ ຢູ່ເມືອງຊຽງເງິນ ຕໍ່ວິທຍຸເອເຊັຽເສຣີ ໃນມື້ວັນທີ 9 ກັນຍານີ້.

“ປະຊາຊົນທີ່ຢູ່ແຄມນໍ້າອິຍັງຈັ່ງຊີ້ ກະຫາກທີຜົນກະທົບຢູ່ ຮໍ້າຂຶ້ນສູງຫລາຍປີນີ້ ແຕ່ລະປີກໍບໍ່ຫລາຍເນາະ ແຕ່ງ່າປີນີ້ນິຂ້ອນຂ້າງໜັກ ເພາະວ່າຊ້ວງນີ້ມັນຝົນຕົກ ມື້ນີ້ 2 ມື້ 3 ມື້ລຽນຕິດແລ້ວບໍ່ເຊົາ ປັດຈຸບັນນີ້ກະຍັງຕົກຢູ່ ຫະຂຶ້ນຢູ່ ເຈົ້າ.”

ໃນຂະນະດຽວກັນ ຊາວບ້ານ ທີ່ຢູ່ແຄມນໍ້າຄານ ໃນເຂດນະຄອນຫຼວງພະບາງ ຜູ້ນຶ່ງກໍເວົ້າວ່າ ພາຍຫລັງທີ່ມີການລະບາຍນໍ້າ ອອກຈາກເຂື່ອນໄຟຟ້າ ທັງ 2 ແຫ່ງ ທີ່ວ່ານັ້ນ ລະດັບນໍ້າໃນນໍ້າຄານ ກໍເພີ່ມສູງຂຶ້ນ, ເຮັດໃຫ້ຊາວບ້ານ ແລະຜູ້ປະກອບການຮ້ານອາຫານ ຢູ່ຕາມແຄມນໍ້າ ຕ້ອງໄດ້ເຝົ້າລະວັງຢ່າງໃກ້ຊິດ ເພື່ອບໍ່ໃຫ້ເກີດຄວາມເສຽຫາຍຫລາຍ ໃນກໍລະນີທີ່ນໍ້າຄານ ໄຫຼລົ້ນຕາຝັ່ງ ດັ່ງທີ່ທ່ານກ່າວວ່າ:

“ສ່ວນຫລາຍກິປ່ອຍ ເລີ້ມປ່ອຍມື້ວານນີ້ມາ ນໍ້າມີລະດັບຂຶ້ນສູງແລ້ວ. ໂອ໋ ດຽວນີ້ມັນຢູ່ລະດັບການສັງເກດ ແຕ່ວ່າບໍ່ຮູ້ວ່າມື້ອື່ນມັນຂຶ້ນບໍ່ ຫລືສິລົງຫາກໍ່ຂຶ້ນແຕ່ກາງຄືນນີ້ ນໍ້າຂຶ້ນແລ້ວມັນມີຜົນກະທົບ ມີຜົນເສຍຫັ້ນແຫລະ ເພາະວ່າເປັນໄພທໍາມິຊາດເດ້.”

ຕໍ່ສະພາບການຄືແນວນີ້ ທາງການແຂວງຫຼວງພະບາງ ກໍໄດ້ແຈ້ງເຕືອນ ໄປຍັງປະຊາຊົນ ທີ່ອາໄສ ຢູ່ແຄມນໍ້າຄານ ຮວມທັງຜູ້ທີ່ຂີ່ເຮືອຫາປາ ໃຫ້ລະມັດລະວັງເປັນພິເສດ ເນື່ອງຈາກນໍ້າຄານ ຍັງເພີ່ມສູງຂຶ້ນນໍາເລື້ອຍໆ ຍ້ອນໃນໄລຍະນີ້ເຂື່ອນໄຟຟ້ານໍ້າຄານ 2 ແລະ 3 ລະບາຍນໍ້າອອກຈາກເຂື່ອນ ຫຼາຍກວ່າທີ່ຜ່ານມາ ຍ້ອນຝົນຕົກໜັກ ດັ່ງເຈົ້າໜ້າທີ່ທີ່ກ່ຽວຂ້ອງທ່ານນຶ່ງເວົ້າວ່າ:

“ນໍ້າຄານກໍາລັງຂຶ້ນຢູ່ດຽວນີ້ນ່າ ເຮົາກະເຕືອນໃຫ້ປະຊາຊົນຢູ່ແຄມນໍ້າແຄມຫຍັງຕ່າງໆ ໃຫ້ມີສະຕິລະວັງຕົວຫັ້ນແຫລະ ບາງເທື່ອມັນຈະຂຶ້ນເກີນ ຍັງຝົນຢູ່ນີ້ ປ່ອຍນໍ້າເຂື່ອນໜ້ອຍນຶ່ງແດ່ເພາະວ່າ ມັນຝົນຫລາຍເດ້ ມັນຕົກ 2-3 ມື້ມັນບໍ່ໄດ້ເຊົາເລີຍ.”

ເພື່ອຂໍຮູ້ລາຍລະອຽດ ກ່ຽວກັບເລື້ອງທີ່ວ່ານີ້ ວິທຍຸເອເຊັຽເສຣີ ໄດ້ຕິດຕໍ່ໄປຍັງ ບໍລິສັດຜະລິດໄຟຟ້າລາວ ມະຫາຊົນ ທີ່ເປັນຜູ້ຄຸ້ມຄອງເຂື່ອນໄຟຟ້ານໍ້າຄານ 2 ແລະ 3, ແຕ່ເຈົ້າໜ້າທີ່ຜູ້ຮັບຜິດຊອບເລື່ອງນີ້ ຍັງບໍ່ສະດວກທີ່ຈະໃຫ້ຄໍາເຫັນ.

ແຕ່ເຖິງຢ່າງໃດກໍຕາມ ເມື່ອກ່ອນໜ້ານີ້ ບໍລິສັດຜະລິດໄຟຟ້າລາວ ມະຫາຊົນ ກໍໄດ້ເຮັດໃບສະເໜີ ໄປຍັງກົມຄຸ້ມຄອງຄວາມປອດໄພ ອຸດສາຫະກໍາພະລັງງານ ໃນມື້ວັນທີ 5 ສິງຫາທີ່ຜ່ານມາ ເພື່ອຂໍເປີດປະຕູລະບາຍນໍ້າລົ້ນ ຂອງເຂື່ອນໄຟ ຟ້ານໍ້າຄານ 2 ແລະ 3 ເພື່ອຍບໍລິຫານຈັດການນໍ້າໃນອ່າງ ຍ້ອນຄາດຄະເນວ່າ ລະດັບນໍ້າຈະເພີ່ມຂຶ້ນເຕັມອ່າງ ໃນວັນທີ 6 ສິງຫາ, ດັ່ງນັ້ນຈຶ່ງຕ້ອງໄດ້ມີການລະບາຍນໍ້າອອກ.

ນອກຈາກເຂື່ອນໄຟຟ້ານໍ້າຄານ 2 ແລະ 3 ທີ່ລະບາຍນໍ້າອອກຈາກເຂື່ອນແລ້ວ  ເຂື່ອນໄຟຟ້ານໍ້າລີກ 1 ແລະ 2 ທີ່ຕັ້ງຢູ່ແຂວງວຽງຈັນ ກໍໄດ້ລະບາຍ ນໍ້າອອກຈາກເຂື່ອນ ຜ່ານອຸມົງລະບາຍນໍ້າລົ້ນ ໃນມື້ວັນທີ 7 ກັນຍານີ້ ຊຶ່ງກໍໄດ້ມີການແຈ້ງເຕືອນປະຊາຊົນ ແລະຜູ້ປະກອບການຕ່າງໆ ຢູ່ຕາມແຄມນໍ້າລີກ ໃນເຂດເມືອງເຟືອງ ໃຫ້ເຝົ້າລະວັງນໍ້າ ທີ່ອາດຈະຂຶ້ນຖ້ວມຢ່າງໃກ້ຊິດ. ແຕ່ມາເຖິງປັດຈຸບັນ ນໍ້າກໍຍັງບໍ່ທັນລົ້ນຕາຝັ່ງເທື່ອ, ມີແຕ່ນໍ້າຂຸ່ນ ດັ່ງເຈົ້າໜ້າທີ່ກະຊວງ ພະລັງງານ ແລະບໍ່ແຮ່ ທ່ານນຶ່ງເວົ້າວ່າ:

“ໝາຍເຖິງວ່າຮັບມວນນໍ້າ ຫັ້ນນ່າ ຊິເຂົ້າມາຫັ້ນນ່າ ແລ້ວເພິ່ນປະເມີນແລ້ວ ກະເພິ່ນພະຍາຍາມຫລຸດຜ່ອນນໍ້າມັນລົງ ເລື້ອງການຂຶ້ນລົງຂອງນໍ້າ ມັນກະຂຶ້ນທໍາມະດາ ບໍ່ຖ້ວມດອກ ມາແລ້ວເພິ່ນປ່ອຍກ່ອນ ເພິ່ນຜ່ອນຜົນກະທົບຫັ້ນນ່າ.”

ແລະເຈົ້າໜ້າທີ່ເມືອງເຟືອງທ່ານນຶ່ງ ກໍເວົ້າວ່າ ພາຍຫຼັງທີ່ເຂື່ອນໄຟຟ້ານໍ້າຄານ 2 ແລະ 3 ປ່ອຍນໍ້າອອກຈາກເຂື່ອນລົງມາ, ໃນໄລຍະນີ້ ນໍ້າລີກ ຂຶ້ນລົງບໍ່ເປັນໄປຕາມທໍາມະຊາດ ດັ່ງນັ້ນຈຶ່ງມີການແຈ້ງເຕືອນນັກທ່ອງທ່ຽວ ທີ່ພັກຢູ່ເຮືອນແພ ແຄມນໍ້າລີກ ໃຫ້ລະມັດລະວັງ, ບໍ່ຢາກໃຫ້ພັກຢູ່ທີ່ນັ້ນ ດັ່ງທີ່ທ່ານກ່າວວ່າ:

“ຄັນຫລີກໄດ້ຫັ້ນຫລີກກ່ອນ ການພັກຢູ່ເຮືອນແພເພາະວ່າລະດັບນໍ້າ ມັນບໍ່ປົກກະຕິ ປີຜ່ານມາເຮົາກະມີບົດຮຽນເດ້ ເຮືອນແພໄຫລບໍ່ ປະມານນີ້ ມັນກະທົບ ຊ້ວງນີ້ພວກເຮົາແມ່ນໄດ້ຕິດຕາມຕະຫລອດ ມື້ວານນີ້ເປີດແມັດນຶ່ງ ແຕ່ມື້ນີ້ປິດ.”

ການປ່ອຍນໍ້າ ອອກເຂື່ອນໄຟຟ້ານໍ້າຄານ 2 ແລະ 3 ໄດ້ຮັບການອະນຸມັດ ຈາກກົມຄຸ້ມຄອງ ຄວາມປອດໄພ ອຸດສາຫະກໍາພະລັງງານ ໃນມື້ວັນທີ 6 ກັນຍາ 2024 ແລະກ່ອນຈະປ່ອຍນໍ້າອອກຈາກເຂື່ອນ ລົງມານັ້ນ ກໍໄດ້ມີການແຈ້ງເຕືອນປະຊາຊົນ ແລະນັກທຸລະກິດ ຮວມທັງໂຄງການກໍ່ສ້າງຕ່າງໆ ທີ່ຢູ່ລຸ່ມເຂື່ອນ ໃຫ້ກຽມຄວາມພ້ອມ ໃນການເຄື່ອນຍ້າຍເຄື່ອງຂອງອັນມີຄ່າຕ່າງໆ ເພື່ອຫຼຸດຜ່ອນຄວາມເສຍຫາຍ ທີ່ອາດຈະເກີດຂຶ້ນ.