ປະຊາຊົນ ຈຳນວນນຶ່ງ ທີ່ ເມືອງຊຽງຮ່ອນ ແຂວງ ໄຊຍະບູຣີ ໄດ້ຮັບຄວາມ ເດືອດຮ້ອນ ຈາກການທີ່ ໃຫ້ຈີນ ເຊົ່າດີນ ປູກໝາກໂມ ຍ້ອນ ຊາວຈີນ ໄດ້ທຳລາຍ ຄັນນາ ຂອງ ພວກຂະເຈົ້າ ເພື່ອ ເຮັດເນື້ອທີ່ ປູກໝາກໂມ ຂນາດໃຫຍ່ ເຮັດໃຫ້ ຂະເຈົ້າ ສັບສົນ ບໍ່ສາມາດ ເຮັດນາ ໄດ້ ເພາະທົ່ງນາ ຂອງຂະເຈົ້າ ຖືກຕັດອອກໄປ ໃນຫຼາຍຈຸດ. ດັ່ງ ເຈົ້າຫນ້າທີ່ ຫ້ອງການ ຊັພຍາກອນ ທັມມະຊາດ ແລະ ສິ່ງແວດລ້ອມ ເມືອງຊຽງຮ່ອນ ກ່າວໃນ ວັນທີ 29 ພຶສຈິກາ ນີ້ວ່າ:
"ຂະເຈົ້າມາເຮັດກະມາທຳລາຍ ຄັນນາ ຂະເຈົ້ານີ້ນະ ແບບວ່າ ນາທົ່ງນຶ່ງ ກໍມີຫຼາຍເຈົ້າ ເນາະ ບາດນີ້ ເຂົາໄຖແລ້ວ ໄຖປົນກັນ ໄປຫມົດ ຫັ້ນນະ ຊາວບ້ານ ສັບສົນ ຊາວບ້ານ ກໍຟ້ອງມາທັງບ້ານ ທາງເມືອງ ທາງເມືອງ ໄປແກ້ແລ້ວ ດຽວນີ້ນະ".
ທ່ານກ່າວຕື່ມວ່າ ຫລັງຈາກ ເກີດບັນຫາ ດັ່ງກ່າວ ເຈົ້າຫນ້າທີ່ ກໍໄດ້ລົງໄປ ບອກໃຫ້ ເຈົ້າຂອງ ໝາກໂມ ສ້ອມແປງ ຄັນນາ ໃຫ້ຊາວບ້ານ ຄືນໃຫມ່ ພວກຂະເຈົ້າ ກໍຍອມເຮັດ ຈົນກັບຄືນສູ່ ສະພາບເດີມ ແລ້ວ. ເຈົ້າຫນ້າທີ່ ຍັງບອກ ໃຫ້ນັກລົງທືນ ຈີນ ບໍ່ໃຫ້ທຳລາຍ ຄັນນາ ຂອງ ຊາວບ້ານ ອີກ.
ທ່ານວ່າ ການປູກໝາກໂມ ຂອງຄົນຈີນ ທີ່ເມືອງຊຽງຮ່ອນ ແຂວງ ໄຊຍະບູຣີ ຍັງໃຊ້ ສານເຄມີ ຫຼາຍຢູ່ ໂດຍໄດ້ນຳ ເຂົ້າມາ ຈາກຈີນ ເຖິງແມ່ນວ່າ ໃນ ປະຈຸບັນ ຍັງບໍ່ມີ ຜົລກະທົບ ຕໍ່ ຊາວບ້ານ ແລະ ສີ່ງແວດລ້ອມ ແຕ່ ໃນອະນາຄົດ ເຊື່ອວ່າ ຈະເກີດຂຶ້ນ ຢ່າງແນ່ນອນ. ປະຈຸບັນ ມີຊາວຈີນ ເຂົ້າມາ ປູກໝາກໂມ ຢູ່ ເມືອງຊຽງຮ່ອນ ໃນເນື້ອທີ່ ປະມານ 200 ຫາ 300 ເຮັກຕາ ເລີ້ມແຕ່ປີ 2014 ເປັນຕົ້ນມາ ໄດ້ເຊົ່າດິນ ຊາວບ້ານ ປູກ ໃນຣາຄາ ປະມານ 2-3 ລ້ານ ປາຍກີບ ຕໍ່ເຮັກຕາ ຕໍ່ປີ.