ເນື້ອທີ່ນາ 100 ເຮັກຕ້າຣ໌ ເມືອງຊະນະຄາມ 400 ຄອບຄົວຖືກນໍ້າຖ້ວມ

ໃນວັນທີ 25-26 ກັນຍາ 2024 ມີຝົນຕົກໜັກເຮັດໃຫ້ສາຍນໍ້າມີ້ ເພີ່ມຂຶ້ນສູງ ແລະ ໄຫຼຖ້ວມເນື້ອທີ່ນາ 98 ເຮັກຕ້າຣ໌ ຂອງປະຊາຊົນບ້ານນາສັກ ແລະ ບ້ານນາປາຝາ ຈຳນວນ 401 ຄອບຄົວ. ມາຮອດປັດຈຸບັນນໍ້າໄດ້ຫຼຸດລົງແລ້ວ ເຊິ່ງຄາດວ່າ ຜົນຜະລິດເຂົ້າປີ້ນີ້ຈະບໍ່ໄດ້ເຕັມເມັດເຕັມໜ່ວຍ ດັ່ງນັ້ນຊາວນາຈຶ່ງສະເໜີຂັ້ນເທິງໃຫ້ຊ່ວຍເຂົ້າກິນ ເພື່ອບັນເທົາທຸກຊາວນາ ທີ່ຖືກຜົນກະທົບ ແລະຊ່ວຍແນວພັນເຂົ້າປູກ ເພື່ອຟື້ນຟູຜົນເສັຍຫາຍ.

ດັ່ງຊາວບ້ານນາປາຝາກ່າວ ຕໍ່ວິທຍຸເອເຊັຽເສຣີ ໃນວັນທີ 30 ກັນຍານີ້ວ່່າ:

“ເຂົ້າຫັ້ນກໍາລັງມານນ່າ 100% ມັນເສັຍຫາຍຢູ່ແລ້ວຈະເຕັມ 100 ຫຼືບໍ່ເຕັມ 100 ເລື່ອງໄດ້ຫັ້ນນ່າມັນຊ່ວຍຫຍັງບໍ່ໄດ້ເດ້. ເຂົ້າກຳລັງມານຊ່ວງເຮົາບົວລະບັດ ເຕັມທີ່ແຫຼະ ຊ່ວງນີ້ແຫຼະຊ່ວງຊິໄດ້ແລ້ວ ມັນນໍ້າຖ້ວມຈັ່ງຊິແລ້ວມັນຊິບໍ່ໂຂ່ງເລີຍບໍ່ອັນຜົນຜະລິດ ສະຫຼຸບບໍ່ໄດ້ເຕັມເມັດເຕັມໜ່ວຍຫັ້ນກໍ່. ກໍ່ຢາກໄດ້ເປັນເຂົ້າຫັ້ນແຫຼະທຸກໆ ປີ ເພິ່ນກໍ່ສົ່ງມາເນາະ ມາຍັງຫ້ອງການແຮງງານນ່າ.”

ຊາວບ້ານນາປາຝາອີກທ່ານກ່າວ ຕົນເອງກໍ່ມີຄວາມຕ້ອງການ ຢາກໃຫ້ຂັ້ນເທິງຊ່ວຍເຂົ້າກິນ ແລະແນວພັນເຂົ້າປູກຄືກັນ ຍ້ອນນໍ້າຖ້ວມດົນ. ຍິ່ງໄປກ່ວານັ້ນບາງຄອບຄົວ ທີ່ມີເນື້ອທີ່ນາທົ່ງດຽວ ແລ້ວຖືກນໍ້າຖ້ວມໝົດ ກໍ່ຈຳເປັນຕ້ອງໄດ້ຊື້ເຂົ້າກິນແທນ.

“ມີຄວາມຕ້ອງການຢູ່່ແລ້ວເນາະ ເລື່ອງໄຮ່ນານີ້ເພາະວ່ານໍ້າມັນຖ້ວມ ມັນໃຊ້ເວລາມັນດົນເຕີບເນາະ ແລ້ວນາມັນກໍາເນົ່າບາງເທື່ອ ມັນຖ້ວມບ່ອນທີ່ຢູ່ອ່າວໄກແດ່ ນໍ້າມັນແຫ້ງລົງບຶດດຽວ ມັນກໍ່ເຫັນຍອດຢູ່ມັນກໍ່ຍັງພໍໄດ້ຮັບອົກຊີໄດ້ຮັບແສງແດດ ມັນກໍ່ຍັງໄດ້ຢູ່ຫັ້ນນ່າແຕ່ວ່າທີ່ຢູ່ໄກ້ ກັບແມ່ນໍ້າຫັ້ນນ່າ. ມັນກໍ່ອາດຈະໝົດແທ້ບາງເທື່ອ ທົ່ງນີ້ມັນເທື່ອແຕ່ວ່າທົ່ງໃໝ່ ມັນບໍ່ຖ້ວມມັນກໍ່ພໍຈຸນເຈືອກັນ ໄປແຕ່ບາງຄອບຄົວ ບາງເທື່ອກໍ່ມີທົ່ງດຽວມັນຖ້ວມໝົດ ກໍ່ຈຳເປັນຕ້ອງໄດ້ຊື້ກິນເດ້.”

ຊາວບ້ານນາສັກກ່າວວ່າ ຢູ່ບ້ານນາສັກແລະບ້ານນາປາຝານິຍົມ ປູກເຂົ້າເພື່ອກິນ ເຫຼືອກິນຈຶ່ງເອົາເຂົ້າໄປຂາຍ ເປັນຕົ້ນເຂົ້າໃໝ່ຊິອອກມາແລ້ວ ມາປະເມີນຢູ່ເລົ້າເຂົ້າ ຍັງຫຼາຍກໍ່ຈຳເປັນຕ້ອງໄດ້ຂາຍເຂົ້າເກົ່າອອກ. ນອກນັ້ນນໍ້າຖ້ວມເທື່ອນີ້ ຕ້ອງໄດ້ຖ້າເບິ່ງອີກ 1 ເດືອນວ່າ ເຂົ້າທີ່ຖືກນໍ້າຖ້ວມ ຈະອອກໝາກຜົນຫຼາຍ-ໜ້ອຍສໍ່າໃດ.

“ເບິ່ງໂຕຈິງ ເບິ່ງເຂົ້າຖອກ ເຂົ້າອອກd ບ້ານເຮົາມັນບໍ່ໜັກໜ່ວງຫຼາຍເນາະ ເພາະວ່າຖ້ວມແຕ່ລະມື້ຫັ້ນ ເວົ້າເລື່ອງຜົນເສັຍຫາຍນີ້ ມັນກໍ່ບໍ່ຫຼາຍປານໃດຈັ່ງຊີ້ ເພາະວ່າຄັນວ່າເຂົ້າມານີ້ຄັນຖ້ວມ ກໍ່ຫາກພໍໄດ້ຈັ່ງຊີ້ນ່າ ມັນບໍ່ກະທົບຫຼາຍ ຍ້ອນມັນບໍ່ແມ່ນນໍ້າປ່າ ມັນເປັນນໍ້າເໝືອງ ນໍ້າຝາຍ ຈັ່ງຊີ້ນ່າ ມັນເປັນນໍ້າມີ້.”

ກ່ຽວກັບເລື່ອງນີ້ ເຈົ້າໜ້າທີ່ເມືອງຊະນະຄາມ ໄດ້ເຮັດບົດລາຍງານໄປຍັງຄະນະກໍາມະການ ຄຸ້ມຄອງໄພພິບັດ ຂັ້ນແຂວງ ໂດຍສະເໜີໃຫ້ຂັ້ນເທິງຊ່ວຍເຂົ້າກິນ ແລະຊ່ວຍແນວພັນເຂົ້າປູກ 5 ຕັນ ເພື່ອບັນເທົາທຸກ ໃຫ້ປະຊາຊົນທີ່ຖືກຜົນກະທົບແລ້ວ. ດັ່ງເຈົ້າໜ້າທີ່ເມືອງຊະນະຄາມກ່າວວ່າ:

“ອັນນີ້ເຮົາສັງລວມ ໃຫ້ຄະນະກໍາມະການ ໄພພິບັດຂັ້ນແຂວງເອົາຂຶ້ນໄປໃຫ້ເຂົ້າເຈົ້າຢູ່ເພິ່ນສິມີຂໍ້ໃນການແກ້ໄຂບັນຫາຕ່າງໆ ນີ້ແນວໃດເນາະດຽວນີ້ ຄະນະກຳມະການໄພພິບັດ ເຂົ້າເຈົ້າລົງເອົາຂໍ້ມູນຢູ່ ຊ່ວງນໍ້າຖ້ວມທຳອິດຫັ້ນ ກໍ່ມີຢູ່ຄະນະກຳມະການ ເຂົາລົງໄປຢູ່ໄປຊ່ວຍເຫຼືອ ເລື່ອງນໍ້າໃຊ້ນໍ້າຫຍັງນ່າ. ເຂົາກໍ່ລົງໄປຕິດຕັ້ງເຄື່ອງຈັກ ເຄື່ອງຫຍັງຢູ່ລະ ເລື່ອງອາຫານການກິນ ເຂົາກໍ່ມີເປັນໂຮງຖອກໂຮງທານ ເຂົາກໍ່ເຮັດຄືຊະນະຄາມຫັ້ນ ເຂົາກໍ່ເປັນຂະບວນການໃຫຍ່.”

ນໍ້າຖ້ວມເມືອງຊະນະຄາມເທື່ອນີ້ ຍັງມີເລົ້າເຂົ້າຖືກນໍ້າຖ້ວມ 32 ໜ່ວຍ, ມີຊົນລະປະທານ ຝາຍນໍ້າພາດ ຢູ່ບ້ານນາສັກ, ຝາຍນໍ້າມີ້ ຢູ່ບ້ານນາດີ, ບ້ານນາເດື່ອ ແລະບ້ານນາມອຍ ເປ່ເພທັງໝົດ 4 ແຫ່ງ, ລວມໄປເຖິງເສັ້ນທາງ ແລະຂົວໄມ້ ຂ້າມນໍ້າມີ້ໄປຫາເຂດທຳການຜະລິດ ຂອງປະຊາຊົນ ກໍ່ຖືກນໍ້າຊຸເສັຍຫາຍໃຊ້ການບໍ່ໄດ້. ອີງຕາມຂໍ້ມູນ ຈາກຫ້ອງວ່າການປົກຄອງ ເມືອງຊະນະຄາມ.