ໄທຍ ບໍ່ຮັບຮອງຣາຍງານ ດ້ານເຕັກນິກ ເຂື່ອນ ຊະນະຄາມ

ສໍານັກງານຊັພຍາກອນນໍ້າ ແຫ່ງ ປະເທດໄທຍ, ຍັງບໍ່ຮັບຮອງເອົາຣາຍງານ ທົບທວນດ້ານເຕັກນິກ ຂອງໂຄງການສ້າງເຂື່ອນ ຊະນະຄາມ, ທີ່ຢູ່ຣະຫວ່າງ ແຂວງໄຊຍະບູຣີ ກັບ ແຂວງວຽງຈັນ, ທີ່ທາງຜູ້ພັທນາເຂື່ອນ ດັ່ງກ່າວ, ໄດ້ສເນີຕໍ່ກອງປະຊຸມ 4 ປະເທດ ລຸ່ມນໍ້າຂອງ ຜ່ານຣະບົບອອນລາຍ ເມື່ອວັນທີ 15 ມົກກະຣາ ທີ່ຜ່ານມານີ້, ດັ່ງ ທ່ານ ສົມກຽດ ປຣະຈໍາວົງ ເລຂາທິການສໍານັກງານ ຊັພຍາກອນນໍ້າ ແຫ່ງປະເທດໄທຍ ກ່າວຕໍ່ ວິທຍຸ ເອເຊັຽເສຣີ ໃນວັນທີ 19 ມົກກະຣາ ນີ້ວ່າ:

“ທ່ານກ່າວວ່າ; ເຮົາຍັງບໍ່ຮັບຮອງການທົບທວນຂໍ້ມູລທາງເຕັກນິກ, ຂອງຜູ້ພັທນາເຂື່ອນຊະນະຄາມ, ທີ່ສົ່ງມາໃຫ້ທາງເລຂາທິການ ຄະນະກັມມາທິການແມ່ນໍ້າຂອງ, ຊຶ່ງ ທາງເລຂາທິການ ຄະນະກັມມາທິການແມ່ນໍ້າຂອງ, ກໍມີຂໍ້ສລຸບເຊັ່ນດຽວກັນວ່າ, ຂໍ້ມູລຕ່າງໆ ຍັງບໍ່ພຽງພໍ ທີ່ຈະນໍາໄປສູ່ການຫາຂໍ້ສລຸບ, ຍັງຕ້ອງມີການສຶກສາເພີ່ມຕື່ມ, ເພື່ອທີ່ຈະນໍາ ຂໍ້ມູລເຫຼົ່ານັ້ນໄປແຈ້ງພາກ ປະຊາຊົນ ຫຼື ໜ່ວຍງານຕ່າງໆ.”

ທ່ານກ່າວຕື່ມວ່າ ສໍາລັບຂໍ້ມູລດ້ານຜົລກະທົບ ທີ່ຈະເກີດຂຶ້ນ ຈາກການສ້າງເຂື່ອນຊະນະຄາມ, ກໍຍັງບໍ່ເປັນທີ່ຈະແຈ້ງເທື່ອ ວ່າຈະສົ່ງ ຜົລກະທົບແນວໃດ, ຕໍ່ປະຊາຊົນຝັ່ງໄທຍ ຫາກມີການສ້າງເຂື່ອນ, ແລະ ປ່ອຍນໍ້າໃນອະນາຄົດ, ແລະ ໃນຣາຍງານດ້ານເຕັກນິກ ທີ່ລາວ ໄດ້ສເນີມານັ້ນ, ກໍຍັງບໍ່ທັນຄວບຄຸມພື້ນທີ່ທ້າຍນໍ້າ ທີ່ຈະໄດ້ຮັບຜົລກະທົບ ຈຶ່ງຕ້ອງໃຫ້ຜູ້ ພັທນາໂຄງການເຂື່ອນຊະນະຄາມ ໄປເຮັດການສຶກຂໍ້ມູລເພີ້ມຕື່ມ, ແລະ ປັບປຸງຣາຍງານ ທາງດ້ານເຕັກນິກ ໂດຍຈະມີການປະຊຸມ ຮ່ວມກັນອີກ ໃນອີກບໍ່ດົນນີ້.

ກ່ຽວກັບເຣື່ອງນີ້ ວິທຍຸເອເຊັຽເສຣີ ໄດ້ຕິດຕໍ່ຫາກະຊວງພະລັງງານ ແລະບໍ່ແຮ່, ເພື່ອຖາມຣາຍຣະອຽດເພີ້ມຕື່ມ, ແຕ່ເຈົ້າໜ້າທີ່ ກ່ຽວຂ້ອງ ຍັງບໍ່ສະດວກໃຫ້ສັມພາດໄດ້.

ເຖິງຢ່າງໃດກໍຕາມ ເມື່ອເດືອນ ທັນວາ ປີ 2020, ເຈົ້າໜ້າທີ່ ກົມນະໂຍບາຍ ແລະແຜນພະລັງງານ ຂອງກະຊວງພະລັງງານ ແລະບໍ່ແຮ່ ທ່ານນຶ່ງ ຊີ້ແຈງວ່າ: ຫຼັງຈາກທີ່ທາງລາວ ໄດ້ນໍາຂໍ້ມູລ ໂຄງການເຂື່ອນຊະນະຄາມ ແລະ ບົດປະເມີນ ດ້ານຜົລກະທົບ ຕໍ່ສິ່ງແວດລ້ອມ ເຂົ້າສູ່ຂບວນການປຶກສາຫາລືລ່ວງໜ້າ ແລ້ວກໍກໍາລັງລໍຖ້າຄວາມເຫັນ ຈາກ ບັນດາ ປະເທດ ສະມາຊິກແມ່ນໍ້າຂອງ ກ່ຽວກັບບົດທີ່ສເນີໄປ ເພື່ອນໍາມາປັບແກ້ໃນພາຍຫຼັງ, ດັ່ງທ່ານກ່າວວ່າ:

“ກໍາລັງສເນີເຂົ້າ PNPCA ນະ, ໝາຍຄວາມວ່າ ບັນດາບົດຫຍັງຕ່າງໆຫັ້ນ, ເຮົາກະປະຕິບັດຕາມເງື່ອນໄຂຫັ້ນເນາະ, ແຕ່່ວ່າດຽວນີ້ ເຂົາກໍາລັງເອົາເຂົ້າສເນີ ຢູ່ໃນຂບວນ PNPCA ກະລໍຖ້າບັນດາ ປະເທດສະມາຊິກ ມີຄໍາເຫັນ ຕໍ່ກັບບົດຫັ້ນນະ, ຕ້ອງໄດ້ລໍຖ້າ ໂຕນັ້ນກ່ອນ.”

ໃນຂນະດຽວກັນ ວິທຍຸເອເຊັຽເສຣີ ກໍໄດ້ຕິດຕໍ່ຫາ ຄະນະກັມມາທິການແມ່ນໍ້າຂອງ ຫຼື MRC ທີ່ມີຫ້ອງການໃຫຍ່ ຕັ້ງຢູ່ນະຄອນຫຼວງ ວຽງຈັນ, ແຕ່ເຈົ້າໜ້າທີ່ ບໍ່ສະດວກໃຫ້ສັມພາດ ຜ່ານທາງໂທຣະສັບໄດ້.

ຖ້າເຂື່ອນຊະນະຄາມ ເກີດຂຶ້ນແທ້ ຊາວບ້ານຫຼາຍຄົນ ຢູ່ເມືອງແກ່ນທ້າວ, ແຂວງໄຊຍະບູຣີ ເວົ້າວ່າ ກັງວົນ ເຣື່ອງທີ່ຢູ່ອາສັຍ ແລະ ການຫາປານໍ້າຂອງ ໃນອະນາຄົດກໍຈະກະທົບ ຄືກັນ, ດັ່ງຊາວເມືອງແກ່ນທ້າວ ຄົນນຶ່ງ ເວົ້າຕໍ່ ວິທຍຸເອເຊັຽເສຣີ ໃນວັນທີ 19 ມົກກະຣາ ນີ້ວ່າ:

“ຄັນຖ້າວ່າ ມີການເກີດຂຶ້ນ ສ້າງເຂື່ອນຖືວ່າ ໄດ້ຍ້າຍວ່າຊັ່ນເນາະ, ເຣື່ອງຫາປາ ກະຄືວ່າມີການກະທົບແດ່ຫັ່ນແຫຼະເນາະ, ຊົດເຊີຍນີ້ ເພິ່ນຊິເຮັດແນວໃດ ກະຍັງບໍ່ທັນຮູ້ເນາະ.”

ຊາວບ້ານຢູ່ເມືອງແກ່ນທ້າວ ອີກຄົນນຶ່ງ ເວົ້າວ່າ ກໍມີຄວາມກັງວົນ ກ່ຽວກັບເຣື່ອງທີ່ຈະຖືກໂຍກຍ້າຍ ຈາກການສ້າງເຂື່ອນຊະນະຄາມ, ໂດຍຍັງບໍ່ມີຣາຍຣະອຽດເທື່ອວ່າ ທາງໂຄງການ ຈະຊົດເຊີຍໃຫ້ແນວໃດ ແລະສົມເຫດສົມຜົລຫຼືບໍ່:

“ຜົລກະທົບ ຕໍ່ວັດຖຸສິ່ງຂອງ ເປັນຊັພ, ເປັນເຮືອນ, ເປັນໄຮ່່ເປັນນາຫັ່ນແຫຼະ, ແຕ່ວ່າ ຊິໃຊ້ຢູ່ ຊິໃຊ້ສໍ່າໃດ ກະຍັງບໍ່ທັນຮູ້ຫັ່ນນະ, ເພິ່ນມາກວດ ມາສໍາຣວດແລ້ວ, ຂໍ້ມູນເບື້ອງຕົ້ນ ເພິ່ນກະເອົາໄປແລ້ວ.”

ໂຄງການເຂື່ອນຊະນະຄາມ ມີກໍານົດສ້າງຢູ່ກາງແມ່ນໍ້າຂອງ ຢູ່ເໜືອເຂດບ້ານເວີນຄໍາ ເມືອງແກ່ນທ້າວ, ແຂວງໄຊຍະບູຣີ, ທີ່ຢູ່ຕິດ ກັບເມືອງປາກລາຍ ແລະ ເມືອງຊະນະຄາມ ແຂວງວຽງຈັນ, ຊຶ່ງຈະເຮັດໃຫ້ຊາວບ້ານ ໄດ້ຮັບຜົລກະທົບ ແລະຖືກໂຍກຍ້າຍທັງໝົດ ປະມານ 600 ຄອບຄົວ ມີພົລເມືອງເກືອບ 3,000 ຄົນ ຢູ່ໃນບັນດາ 13 ບ້ານ ຂອງ 3 ເມືອງ ດັ່ງກ່າວ.

ໂຄງການສ້າງເຂື່ອນຊະນະຄາມ ຈະຖືກພັທນາ ໂດຍບໍຣິສັດ ໄຊນ່າ ຕ້າຖັັງ ຄຣໍເພຣີຊັ້ນ ຈໍາກັດ ຈາກປະເທດຈີນ, ເຂື່ອນແຫ່ງນີ້ ຈະມີຂນາດ 684 ເມກາວັດ, ໃຊ້ມູລຄ່າການລົງທຶນ ຫຼາຍກວ່າ 2,000 ຕື້ໂດລ່າ ສະຫະຣັຖ ໂດຍມີເປົ້າໝາຍ ສົ່ງອອກໄຟຟ້າໃຫ້ ປະເທດໄທຍ ເປັນຫຼັກ.

ປັດຈຸບັນ ຍັງບໍ່ມີກໍານົດເທື່ອວ່າ ຈະເຣີ່ມສ້າງໃນປີໃດ, ແຕ່ຫາກລົງມືສ້າງແທ້ ກໍຈະໃຊ້ເວລາໃນການກໍ່ສ້າງທັງໝົດ 8 ປີ.