ຜູ້ປະສົບພັຍເຂື່ອນແຕກ ຍັງບໍ່ໄດ້ຮັບຄ່າຊົດເຊີຽ ຣາຍການທີ 6

ຊາວບ້ານຜູ້ປະສົບພັຍເຂື່ອນແຕກ ໃນເມືອງສນາມໄຊ ແຂວງອັດຕະປື ຫຼາຍຄົນ ເວົ້າວ່າ ເງິນຊົດເຊີຽຣາຍການທີ 6 ເຊິ່ງແມ່ນຄ່າຊົດເຊີຽໂຕສຸດທ້າຍ ທີ່ເປັນຄ່າເຄື່ອງຕົກຫຼົ່ນ ແລະສເນີໃໝ່ ເປັນຕົ້ນ: ຜົລປູກໃນດິນ, ຕົ້ນໄມ້ອຸດສາຫະກັມ, ໜອງປາ, ຖຽງໄຮ່-ຖຽງນາ ແລະ ໄມ້ເຄື່ອງເຮືອນຕ່າງໆ ທີ່ກໍາລັງກະກຽມປຸກເຮືອນໃໝ່ ທີ່ຖືກນໍ້າຈາກເຂື່ອນແຕກພັດໄປ ເຊິ່ງມາຮອດປັດຈຸບັນ ກໍຍັງບໍ່ທັນໄດ້ຮັບເທື່ອ ແລະບໍ່ຮູ້ວ່າ ຍັງຂ້ອງຄາຢູ່ນໍາພາກສ່ວນໃດກັນແທ້.

ດັ່ງຜູ້ປະສົບພັຍເຂື່ອນແຕກຜູ້ທີ 1 ກ່າວຕໍ່ວິທຍຸ ເອເຊັຽ ເສຣີ ໃນວັນທີ 26 ມົກກະຣາ 2023 ວ່າ:

“ກະຄືເກົ່າຫັ້ນແຫຼະ ເວົ້າເຣື່ອງເງິນນິ່ ເພິ່ນກະມີແຕ່ວ່າ ເອກກະພາບບໍ່ທັນໄດ້ ເວົ້າເລີຍໆ ກະບໍ່ຮູ້ນໍາເພິ່ນແຫຼະ ປະຊາຊົນເບິດຄວາມຫວັງ ຄວາມຄອງຄອຍລະ ເດືອນ 3 ເດືອນ 4 ນິ່ ຄັນໄດ້ນິ່ ພວກເຮົາຍັງວ່າຊິ ມີບຸນຫຼາຍເຕີບແລ້ວ.”

ທ່ານກ່າວຕື່ມວ່າ ກ່ອນໜ້ານີ້ ເຈົ້າໜ້າທີ່ທາງການ ກໍເຄີຍເວົ້າວ່າ ຈະຈ່າຍໃຫ້ ໃນທ້າຍປີ 2022 ແຕ່ກໍຍັງບໍ່ທັນໄດ້ຮັບເທື່ອ:

“ເພິ່ນກະເວົ້າໄປຊື່ໆຫັ້ນແຫຼະ ເພິ່ນວ່າຄາດວ່າສູ້ຊົນໃຫ້ມັນໄດ້ ໃນທ້າຍປີ 2022 ຕາມແຜນເພິ່ນຫັ້ນນ່າ ບາດມາສໍາຣວດແລ້ວ ຫັ້ນມາເບິ່ງ ເພິ່ນວ່າຂໍ້ມູນມັນໄດ້ຕື່ມຫຼາຍ ທາງໂຄງການບໍ່ຍອມຮັບ ເພິ່ນວ່າແນວນັ້ນ ຄັນບໍ່ຍອມຮັບແຫຼະ ກະຄືບໍ່ເຮັດມັນໄວຊັ້ນນ່າ ເຮົາຄຶດວ່ານີ້ ຕາມແຜນເພິ່ນນິ່ ໄດ້ລົງມາສໍາຣວດໃໝ່ເບິດ.”

ຜູ້ປະສົບພັຍເຂື່ອນແຕກຜູ້ທີ 2 ກໍເວົ້າໃນທໍານອງດຽວກັນວ່າ:

“ຍັງໆ. ຍັງບໍ່ທັນໄດ້ຍິນຂ່າວຊໍ້ານ່າ. ອື່ ເລື່ອນເລີຍໆ.”

ໃນຂະນະດຽວກັນ ຜູ້ປະສົບພັຍເຂື່ອນແຕກຜູ້ທີ 3 ກໍເວົ້າວ່າ ເມື່ອວັນທີ 10 ປາຍ ຂອງເດືອນນີ້ ນາຍບ້ານແຕ່ລະບ້ານ ແລະຊາວບ້ານ ກໍໄດ້ມີການປະຊຸມກັນ ກ່ຽວກັບເຣື່ອງເງິນຊົດເຊີຽ ຣາຍການທີ 6:

“ລວມກັບນາຍບ້ານ ລວມເບິດປະຊາຊົນນີ້ແຫຼ້ວ ວ່າເຮັດແນວໃດ ຊິແກ້ໄຂແນວໃດ ມັນເປັນແນວນີ້ ປຶກສາປະຊາຊົນນີ້ແຫຼະ ພໍ່ບ້ານອີ່ຫຍັງນີ້ແຫຼະ ຊິເຮັດແນວໃດເງິນນິ່ ຄືບໍ່ເຫັນມີຂ່າວຄາວ ອິຫຍັງຫັ້ນນ່າ ກະບໍ່ຈັກຊິວ່າຄືກັນແຫຼະ ແນວຂັ້ນເທິງ ເພິ່ນບໍ່ວ່າແນວໃດ ແນວມັນບໍ່ໄດ້ ຢ້ານວ່າປະຊາຊົນ ຊິເວົ້າໃຫ້ພໍ່ບ້ານ ອີ່ຫຍັງນີ້ແຫຼະ ພໍ່ບ້ານກະເລີຍວ່າລວມກັນເບິ່ງ ວ່າຈັ່ງໃດ ມີຄວາມຄິດຄວາມເຫັນແນວໃດ ຊິສຶກສາໂອ້ລົມ ເອົາເງິນເອົາທອງນີ້ຊິເວົ້າກັນແນວໃດ ອີ່ຫຍັງຫັ້ນນ່າ ມັນດົນນານມັນບໍ່ໄດ້ນິ່ ຊິເຮັດຈັ່ງໃດມາຈັ່ງໃດ ປຶກສາປະຊາຊົນ ປະຊາຊົນກະຄືປະຊາຊົນຫັ້ນແຫຼະປະຊາຊົນກະວ່າສຸດພໍ່ບ້ານ ພວກຂ້ອຍເປັນປະຊາຊົນນິ່ ກະຢ້ານໄດ້ຫັ້ນແຫຼະ ມາເຮັດມາຫາ ມື້ຊື້ກິນຊື້ຢາກ ເຮັດຫັ້ນເຮັດນີ້ ພໍໄດ້ມີທຶນມີຮອນ ກະຈັ່ງຊັ້ນແຫຼະຈັກຊິເຮັດແນວໃດ ມິດໆເງິນນີ້ເປັນຈັ່ງໃດ ພໍຊິໄດ້ບໍ່ ຫຼືຈັ່ງໃດຢູ່ບໍ່ ໃຜກະວ່າ.”

ກ່ຽວກັບເຣື່ອງເງິນຊົດເຊີຽ ຣາຍການທີ 6 ທີ່ປະຊາຊົນຜູ້ປະສົບພັຍເຂື່ອນແຕກ ຍັງບໍ່ທັນໄດ້ຮັບນີ້ ທາງເຈົ້າໜ້າທີ່ຂັ້ນທ້ອງຖິ່ນ ທ່ານທີ 1 ກໍກ່າວວ່າ:

“ໂອ້ຍ...ຍັງບໍ່ທັນໄດ້ຮັບຊໍ້າດອກ ເພິ່ນກະຍັງບໍ່ທັນໄດ້ໃຫ້ຄໍາຕອບ ວ່າຊິເຮັດຈັ່ງໃດມາຈັ່ງໃດ ເພາະວ່າ ທາງບ້ານນີ້ກະ ໄດ້ຖາມເພິ່ນຢູ່ ກະວ່າຍັງ ຍັງບໍ່ທັນຮູ້ ລະຍັງບໍ່ທັນໄດ້ຄົ້ນຄວ້າ ຈັກຊິຄົ້ນກັນຈັ່ງໃດນິ່.”

ທ່ານກ່າວຕື່ມອີກວ່າ ທຸກມື້ນີ້ ບໍ່ມີຄໍາຕອບໃຫ້ຊາວບ້ານເລີຍ ກ່ຽວກັບເງິນດັ່ງກ່າວ:

“ຈັກຊິເອົາໂຕໃດຕອບ ເພາະວ່າ ຄັນຕອບໄປແລ້ວ ບາດເງິນບໍ່ແມ່ນ ຢູ່ນໍານາຍບ້ານເອງຫັ້ນຕິ ຕອບໄປມັນກະຊິພາດ ບາດເທື່ອເພິ່ນບໍ່ທັນໃຫ້ ຫຼືວ່າເພິ່ນຊິໃຫ້ຊ້າໃຫ້ໄວ ມັນກະບໍ່ທັນຈັກ ເພິ່ນບໍ່ໄດ້ແຈ້ງ ເປັນນິຕິກັມຄັກແນ່ຫັ້ນນ່າ ຄັນເວົ້າເຣື່ອງໂທຣະສັບ ກະຈົນບໍ່ທັນໄດ້ຮັບພຸ້ນແຫຼະ ຜູ້ບໍ່ເຫັນກະໂທມາ ຜູ້ພໍໜ້າກະຖາມຫັ້ນແຫຼ້ວ ເຮັດຈັ່ງໃດກະບໍ່ຕິເຂົາແຫຼະ ເຂົາກະໂອ້ຍໂຍກຍ້າຍຄອບຄົວເຮືອນຊານ ຍ້າຍບ້ານຍ້າຍເມືອງມັນທຸກໃດ໋ ມັນບໍ່ແມ່ນອັນນີ້ ເຂົາກະຢາກໄດ້ ບໍ່ແມ່ນກະບໍ່ຕິເຂົາແຫຼະໂວ່ຍ ເຂົາຖາມກະບໍ່ຕິເຂົາດອກ.”

ເຈົ້າໜ້າທີ່ຂັ້ນທ້ອງຖິ່ນ ທ່ານທີ່ 2 ກໍກ່າວໃນທໍານອງດຽວກັນວ່າ:

“ລົງປະຊຸມຍາມໃດ ປະຊາຊົນຖາມວ່າ ຈັ່ງໃດຣາຍການທີ 6 ຖາມເລີຍໆ ເຮົາກະເມື່ອຕອບ ເຂົາກະວ່າ ລໍ ກະລໍຄືກັນຫັ້ນແຫຼະ ຈັ່ງໃດ ແນວໝູ່ວ່າແນວນັ້ນ ກະວ່າໄປ ຊິບໍ່ໄດ້ 400 ຄົນລະບໍ ເຂົາຕາຍປະເງິນນ່າ ຕາຍຄູ່ມື້ ຄູ່ມື້ຢູ່.”

ສ່ວນເຈົ້າໜ້າທີ່ ເຈົ້າໜ້າທີ່ຂັ້ນທ້ອງຖິ່ນ ທ່ານທີ 3 ກໍກ່າວວ່າ:

“ສໍາລັບຣາຍການທີ 6 ນີ້ ແມ່ນບໍ່ໄດ້ຍິນຂ່າວຄາວ ຍັງຄ້າງຢູ່ ຈັກຍາມໃດເພິ່ນຊິໃຫ້ ຈັກຍາມໃດ ເພິ່ນຊິອະນຸຍາດ ໃຫ້ປະຊາຊົນ ສນອງຂໍ້ມູນອີກຢູ່ຫ້ອງການຫັ້ນນ່າ ເພິ່ນວ່າມັນມີຜົລກະທົບ ຫຼາຍສິ່ງຫຼາຍຢ່າງໄປຊັ້ນ ທາງແຂວງ ວ່າແຂວງບໍ່ທັນອະນຸຍາດ ບໍ່ທັນໄດ້ອັນນັ້ນ ເຊັນໂຕຂໍ້ມູນ ທີ່ປະຊາຊົນທີ່ສນອງໃຫ້.”

ພ້ອມດຽວກັນນີ້ ເຈົ້າໜ້າທີ່ຂັ້ນທ້ອງຖິ່ນ ທ່ານທີ່ 4 ທີ່ບໍ່ປະສົງອອກສຽງ ກໍກ່າວວ່າ:

“ຄວາມຫວັງຂອງປະຊາຊົົນ ກະຍັງຢູ່ນໍາທີ່ນາຍບ້ານ ລະທາງບ້ານ ກະໄດ້ຂຶ້ນໄປຂໍຄໍາແນະນໍາຈາກທ່ານເຈົ້າເມືອງ ເຮົາກະບໍ່ໄດ້ວ່າອິສັງດອກ ເຮົາຢາກຮູ້ ຢາກຖາມ ຢາກຊາບຫັ້ນແຫຼະ ວ່າຂໍ້ມູນມັນຂ້າງຢູ່ໃສ ລະມັນເປັນຈັ່ງໃດ ລະເມື່ອໃດຊິມີຄໍາຕອບ ເພິ່ນກະວ່າ ມັນຄານໍາຣາຍການໂຕນີ້ໂຕນັ້ນ ເພິ່ນວ່າຍັງ 3 ຣາຍການນີ້ ທີ່ເພິ່ນບໍ່ຢາກຍອມຮັບ ເພາະວ່າ ມັນມີໂຕເລຂທີ່ເພີ່ມນີ້ 500 ປາຍຄອບຄົວ ທັງປະສົບພັຍໜັກ ລະກະຊິມີທັງ ຜົລກະທົບເບົາຫັ້ນ ມັນຕົກຢູ່ 500 ປາຍຄອບຄົວຫັ້ນ ທາງໂຄງການເພິ່ນກະບໍ່ຢາກຍອມຮັບ.”

ທ່ານກ່າວຕື່ມອີກວ່າ:

“ປະຊາຊົນ ທີ່ລໍຖ້າເງິນຣາຍການທີ 6 ນີ້ ແຕ່ລະຄົນ ກໍມີຄວາມເດືອດຮ້ອນຮຸນແຮງຫັ້ນແຫຼ້ວ ປະຊາຊົນບາງຄົນ ກະຈ່າວຂາຍເຮືອນຂາຍຊານແຫຼະ ບາງຄົນ ກະຜົວຕາຍຈາກ ຍັງແຕ່ເມັຽ ຕິດໜີ້ຕິດສິນ ກະບໍ່ປັນຍາສິຫາໃຊ້ ຖ້າຣາຍການທີ 6 ນີ້ ກະບໍ່ອອກມາຈັກເທື່ອ ຕອນເຣີ່ມກູ້ຢືມກະໃສ່ວ່າ ຜົລເສັຽຫາຍຣາຍການທີ 6 ມາພໍບັນເທົາ ຈັ່ງຊີ້ ພໍໄດ້ໃຊ້ໜີ້ໃຊ້ສິນ ສຸດທ້າຍມາ ລະມັນບໍ່ອອກຈັ່ງຊີ້ ມັນກະຈ່າວຂາຍເຮືອນຂາຍຊານ ໄປຊັ້ນແຫຼ້ວ ດອກເບັ້ຽທະນາຄານຈຸຣະພາກເດ້ 2-3% ຢູ່ດອກ ແຕ່ 10-20 ລ້ານ ມັນກະເພີ່ມຂຶ້ນບັກຫຼາຍໆ.”

ໃນມື້ວັນທີ 27 ມົກກະຣາ 2023 ວິທຍຸເອເຊັຽເສຣີ ໄດ້ພຍາຍາມໂທຫາ ເຈົ້າເມືອງ ເມືອງສນາມໄຊ ແຂວງອັດຕະປື ເພື່ອສອບຖາມກ່ຽວກັບ ເຣື່ອງເງິນຣາຍການທີ 6 ທີ່ຊາວບ້ານ ຜູ້ປະສົບພັຍເຂື່ອນແຕກຄອງຄອຍ ປະກົດວ່າ ໂທໄປຕິດສຽງດັງ ແຕ່ບໍ່ມີຜູ້ຮັບສາຍ.

ຈາກນັ້ນ ວິທຍຸເອເຊັຽເສຣີ ຈຶ່ງໄດ້ຕິດຕໍ່ສອບຖາມເຣື່ອງດັ່ງກ່າວ ໄປຍັງເຈົ້າໜ້າທີ່ ທີ່ກ່ຽວຂ້ອງ ໃນເມືອງສນາມໄຊ ທ່ານນຶ່ງ ທີ່ບໍ່ປະສົງອອກຊື່ ແລະສຽງ ໄດ້ກ່າວ ກ່ຽວກັບເຣື່ອງນີ້ວ່າ:

“ໃນມື້ວັນທີ 25 ຜ່ານມານີ້ ທາງກັມມະການຂອງແຂວງ ທີມງານທີ່ເພິ່ນແຕ່ງຕັ້ງໃໝ່ ເພິ່ນລົງມາເອົາຂໍ້ມູນ ເອົາບົດສັງລວມຂອງພວກເຮົາຮຽບຮ້ອຍແລ້ວ ຜ່ານມາ ແມ່ນພວກເຮົາໄດ້ປະຊຸມກັນຫຼາຍຄັ້ງແລ້ວ ແຕ່ວ່າກະຍັງວ່າ ການນໍາຂອງແຂວງ ຍັງບໍ່ທັນຮັບຮູ້ ເຣື່ອງລະອຽດຈະແຈ້ງຕື່ມ ເປັນຈັ່ງຊັ້ນແລ້ວ ເພິ່ນລະແຕ່ງຕັ້ງໜ່ວຍງານໃໝ່ອີກ ທີມງານໃໝ່ອີກ ຈໍາເປັນ ເຂົາເຈົ້າກະເລີຍມາເອົາຂໍ້ມູນນີ້ ລະກະເມືອເຮັດວິເຄາະວິຈັຍຜົລ ກະລະມາສາຍເປັນ LCD ຄັກແນ່ ໃຫ້ການນໍາເພິ່ນເຫັນ ລະກະເພິ່ນເຫັນວ່າແນວໃດໆ ລະເພິ່ນຈັ່ງຊິໄດ້ ແຈ້ງຕອບໄທເຮົາທາງພີ້ ເພາະວ່າໄທເຮົາທາງພີ້ ກະບໍ່ມີບັນຫາແລ້ວ ພວກເຮົາ ກະເຮັດສັງລວມເໝິດແລ້ວ ມີແຕ່ລໍຖ້າຄໍາເຫັນຈາກເພິ່ນ.”

ແລະໃນມື້ດຽວກັນນີ້ ວິທຍຸເອເຊັຽເສຣີ ກໍໄດ້ໂທຫາ ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານຄະນະກັມມະການຄຸ້ມຄອງພັຍພິບັດຂັ້ນແຂວງ ເຊິ່ງທ່ານໄດ້ກ່າວ ກ່ຽວກັບເຣື່ອງເງິນຊົດເຊີຽຣາຍການທີ 6 ຂອງຜູ້ປະສົບພັຍເຂື່ອນແຕກ ນັ້ນວ່າ:

“ຣາຍການທີ 6 ນີ້ ກະຊິບໍ່ມີສັງດອກ ກໍາລັງວິເຄາະຂໍ້ມູນເດີ້ ວິເຄາະໂຕໃດມັນເປັນຄວາມຈິງ ໂຕໃດບໍ່ເປັນຄວາມຈິງຫັ້ນ ມັນເປັນຂໍ້ມູນເບື້ອງຕົ້ນ ມັນຕ້ອງໄດ້ວິເຄາະຄັກແນ່ຂໍ້ມູນຫັ້ນ ມັນກະຕ້ອງໃຊ້ເວລາແນ່ ອື່ ໂອ້ຊິອະທິບາຍມື້ນີ້ ບໍ່ໄດ້ດອກ ມີແຕ່ຊິລົງໄປກວດກາເບິ່ງກ່ອນ ວ່າແມ່ນໃຜແທ້ ເປັນຜູ້ສເນີອິຫຍັງຫັ້ນນ່າ ທໍ່ນັ້ນເດີ້.”

ເຖິງແນວກໍດີ ອີງຕາມ ທີ່ໄດ້ລົມກັບຜູ້ປະສົບພັຍ ເຂື່ອນແຕກຫຼາຍຄົນ ຮວມທັງເຈົ້າໜ້າທີ່ທ້ອງຖິ່ນ ຫຼາຍທ່ານ ໃນເມືອງສນາມໄຊ ແຂວງອັດຕະປື ແລ້ວແມ່ນວ່າ ພວກເຂົາເຈົ້າ ຢາກໃຫ້ທາງການແຂວງ ແລະພາກສ່ວນທີ່ກ່ຽວຂ້ອງ ພິຈາຣະນາ ຈ່າຍເງິນຊົດເຊີຽຣາຍການທີ 6 ນີ້ ໃຫ້ໂດຍໄວ ເນື່ອງຈາກຊາວບ້ານ ມີຄວາມຈໍາເປັນຕ້ອງໃຊ້ຈ່າຍ ໃນຊີວິດປະຈໍາວັນ ແລະບໍ່ຢາກໄປກູ້ຢືມຜູ້ອື່ນ ມາໃຊ້ຈ່າຍ. ສະບາຍດີ