ຕຳຣວດ ມ.ໄຊເສດຖາ ສືບຫາ ຄົນປຸ້ນ ຮ້ານຄ້າ

ສຸພັດຕາ
2018-03-22
ອີແມວລ໌
ຄໍາເຫັນ
Share
ພິມ
ເຈົ້າໜ້າທີ່ຕໍາຣວດ ເຂົ້າຈັບກຸມ ຄົນຮ້າຍທີ່ປຸ້ນຮ້ານຄ້າ ຢູ່ບ້ານໂພນທັນ ເມືອງໄຊເສດຖາ.
ເຈົ້າໜ້າທີ່ຕໍາຣວດ ເຂົ້າຈັບກຸມ ຄົນຮ້າຍທີ່ປຸ້ນຮ້ານຄ້າ ຢູ່ບ້ານໂພນທັນ ເມືອງໄຊເສດຖາ.
Screen captured: laophattananews

ປັດຈຸບັນ ເຈົ້າໜ້າທີ່ຕຳຣວດ ນະຄອນຫຼວງວຽງຈັນ ກຳລັງຕິດຕາມຫາຄົນຈີນ ອີກ 2 ຄົນ ໃນຈຳນວນ 4 ຄົນ ທີ່ປຸ້ນ ຮ້ານຄ້າສະດວກຊື້ ຂອງ ຄົນລາວ ຢູ່ບ້ານໂພນທັນ, ເມືອງໄຊເສດຖາ ເມື່ອວັນທີ 20 ມີນາ ທີ່ຜ່ານມາ.

ສອງຄົນຖືກຈັບໄດ້ໃນມື້ເກີດເຫດ ເຈົ້າໜ້າທີ່ເອົາຕົວໄປສືບສວນສອບສວນ ພ້ອມກັບຍຶດຣົດຕູ້ ທີ່ກຸ່ມຄົນຮ້າຍ ໃຊ້ເປັນພາຫະນະ ຮວມທັງ ໂທຣະສັບມືຖື ຫຼາຍໜ່ວຍ ແລະ ເງິນສົດ ໄວ້ເປັນຂອງກາງ, ດັ່ງເຈົ້າໜ້າທີ່ ເມືອງໄຊເສດຖາ ທ່ານນຶ່ງ ກ່າວຕໍ່ເອເຊັຽ ເສຣີ ໃນວັນທີ 22 ມີນາ ນີ້ວ່າ:

“ຈຳນວນສີ່ຄົນຫັ້ນແຫຼະ ອ້າຍນ້ອງ ປກສ ພວກເຮົາຈັບໄດ້ 2 ຄົນ 2 ຄົນໜີໄດ້ ຍັງໜີຍັງບໍ່ທັນໄດ້ເທຶື່ອ ຕຳຣວດຍັງຕາມຢູ່ ເວົ້າບໍ່ໄດ້ແຫຼະ ວ່າ ຢູ່ໃນລາວ ຫຼືບໍ່ ຫຼືວ່າແນວໃດ ເພາະວ່າມື້ນັ້ນ ໄດ້ຍ່າງຜ່ານບ້ານນີ້ ອອກໄປແລ້ວ 2 ຄົນຫັ້ນ ພ້ອມດ້ວຍຣົດຫັ້ນ ສົ່ງໃຫ້ ສັນຕິບານ ນະຄອນຫຼວງ ເພີ່ນສິໄປສືບສວນຕໍ່.”

ເຈົ້າໜ້າທີ່ ເລົ່າສູ່ຟັງວ່າ ຄົນຮ້າຍທັງສີ່ຄົນ ຂີ່ຣົດຕູ້ Starex ມາ. ເມື່ອມາຮອດໜ້າຮ້ານ ຮອດຄ້າ ກໍພາກັນລົງຈາກຣົດ ພ້ອມກັບເອົາຜ້າ ອັດປາກອັດດັງ ປິດບັງໃບໜ້າ ຈາກນັ້ນກໍໃຊ້ມີດ ຂົ່ມຂູ່ຄົນພາຍໃນຮ້ານ, ຈັບແມ່ຍິງ ກັບ ເດັກນ້ອຍ ມັດມື ມັດຂາ ແລ້ວກໍເອົາເງິນ ແລະ ເຄື່ອງມີຄ່າ. ແຕ່ໃນຣະຫວ່າງນັ້ນ ພົລເມືອງດີ ທີ່ຍ່າງຜ່ານຮ້ານ ໄດ້ໂທຣະສັບແຈ້ງ ເຈົ້າໜ້າທີ່ບ້ານ ແລະເຈົ້າໜ້າທີ່ບ້ານ ຈຶ່ງໄດ້ປະສານກັບ ເຈົ້າໜ້າທີ່ຕຳຣວດ ນຳກຳລັງໄປອ້ອມຈຸດດັ່ງກ່າວ ຈາກນັ້ນຄົນຮ້າຍທັງສີ່ ໄດ້ໜີອອກທາງ ຫຼັງຮ້ານ ແຕ່ສອງຄົນຖືກຈັບ ແລະ ອີກສອງຄົນ ແມ່ນໄດ້ຫລົບໜີ.

ທ່ານກ່າວອີກວ່າ ໃນເບື້ອງຕົ້ນ ຍັງບໍ່ສາມາດຣະບຸໄດ້ວ່າ ກຸ່ມຄົນຮ້າຍຊາວຈີນ ດັ່ງກ່າວ ແມ່ນເຂົ້າມາອອກແຮງງານ ຫຼືເຂົ້າມາທ່ຽວ ຢູ່ລາວ ແຕ່ເຊື່ອວ່າ ຫຼັງຈາກເຫດການນີ້ ເຈົ້າໜ້າກ່ຽວຂ້ອງທຸກພາກສ່ວນ ຈະຕ້ອງເຂັ້ມງວດ ແລະກວດກາຄົນຈີນ ທີ່ເຂົ້າມາ ລາວ ໃຫ້ຫຼາຍຂຶ້ນ ເພາະຢ້ານ ກຸ່ມມິດສາຊີບຊາວຈີນ ເຂົ້າມາລາວເປັນຂບວນການ.

ກ່ຽວກັບເຣື້ອງນີ້ ເອເຊັຍເສຣີ ໄດ້ໂທຣະສັບໄປຫາຫ້ອງການ ກອງບັນຊາການຕຳຣວດ ນະຄອນຫຼວງວຽງຈັນ ເພື່ອສອບຖາມຂໍ້ມູນຂອງຄົນ ຮ້າຍ ເພີ້ມຕື່ມ ແຕ່ເຈົ້າໜ້າທີ່ ສອບສວນ ຍັງບໍ່ສາມາດໃຫ້ຣາຍຣະອຽດໄດ້.

ຢ່າງໃດກໍຕາມ ກ່ອນໜ້ານີ້ ເຈົ້າໜ້າທີ່ກົມໃຫຍ່ຕຳຣວດທ່ານນຶ່ງ ເຄີຍກ່າວວ່າ ສຳລັບ ຄົນຕ່າງປະເທດ ທີ່ເຂົ້າມາກໍເຫດອາຊຍາກັມ ຢູ່ລາວ ຫາກຖືກຈັບໄດ້ ຈະຕ້ອງຖືກດຳເນີນຄະດີ ຕັດສິນໂທດ ຢູ່ລາວ ເມື່ອຮັບໂທດ ຄົບກຳນົດແລ້ວ ກໍຈະຖືກຜັກດັນ ກັບປະເທດຂອງພວກເຂົາ.

ອີກເຫດການນຶ່ງ, ເມື່ອວັນທີ 7 ຕຸລາ ປີ 2017 ຄົນຮ້າຍ ຊາວຈີນ 2 ຄົນ ຂີ່ຣົດຈັກໃຊ້ປືນຍິງ ທ້າວຊູ ນັກທຸຣະກິດຊາວໃຕ້ຫວັນອາຍຸ 70 ປີ ຢູ່ໜ້າສູນການຄ້າ ສີໄຄພຣາຊາ ບ້ານນາແຮ່ ເມືອງສີໂຄດຕະບອງ ນະຄອນຫຼວງວຽງຈັນ ຫຼັງຈາກນັ້ນທາງການ ລາວ ໄດ້ປະສານຂໍ ຄວາມຊ່ວຍເຫຼືອໄປຍັງ ຈີນ ແລະ ເຈົ້າໜ້າທີ່ຕຳຣວດຈີນ ສາມາດຈັບຄົນຮ້າຍໄວ້ໄດ້ ແຕ່ບໍ່ມີຣາຍຣະອຽດວ່າ ໄດ້ສົ່ງຄົນຮ້າຍມາໃຫ້ລາວ ດຳເນີນຄະດີ ຫຼືບໍ.

ຄໍາເຫັນ (2)
Share

(

Good afternoon Laos. How are you doing these days? Since your beloved government let the mobs into your country and this is the outcome of the party and the state's policy. Do they care for you Lao people? I think not. With these gangsters on the loose they will eat you up bit by bit until there's no more of you. The land that you live in, the streets that you walk on soon nothing of it won't belong to Laos. You must rise up and speak up for your right. Get rid of the blood-sucking and dollars-hungry monsters that have been gorverning your country for 43 years. Enough is enough.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 23, 2018 10:38 AM

ບົວສະຫວ່າງ

ຈາກ ໄຊຖານີ

ປະຊາຊົນລາວທັງຊາດ, ເມືອ່ໃດເສັ້ນທາງລົດໄຟຄວາມໄວສູງເສື່ອມຕໍ່ລາວ ແລະຜູ້ນາມສປປລາວຈະອານຸຍາດໃຫ້ຄົນເຈັກຄົນຈິນ ຫລັງໄຫລມາລາວຢ່າງສະດວກສະບາຍ ຕາມສັນຍາມິດຕະພາບ ສປປຈິນ ແລະສປປລາວທີ່ ສະຫາຍຈູມມະລີໄຊຍະສອນ ໄປເຊັນທີ່ກົງປັກກີ່ງ ເມືອສາມປິມາແລ້ວນັ້ນ. ຄິດວ່າການປູ້ນຈິໃນລາວຕາມຮ້ານຄ້າ ແລະໃນຕົວເມືອງຢູ່ລາວ ເຮົາຈະເພີມຂື້ນ, ເຈົ້າໜ້າທີ່ຮັກສາຄວາມສະຫງົບກໍ່ບໍ່ພຽງພໍ, ຄວາມຮູ້ຄວາມສາມາດຂອງເຈົ້າໜ້າທີ່ລາວ ຍັງບໍ່ມີຄຸນນະພາບທຽບກັບສະພາບ ການລັກລອບຂອງນັກເລັງປູ້ນຈິຊາດຕ່າງດ້າວ. ແນ່ນອນ ປະຊາຊົນລາວຈະໄດ້ຮັບເຄາະຮ້າຍ ແຕ່ພັກລັດຈະໄດ້ຢູ່ສະບາຍ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 23, 2018 10:37 AM

ເຕັມຫນ້າ