ຄວາມຊ່ວຍເຫຼືອຜູ້ຖືກຜົນກະທົບ ຈາກໄພນໍ້າຖ້ວມ ຢູ່ຫຼວງພຣະບາງ

ທ່ານ ບຸນເລື່ອມ ມະນີວົງ ຮອງເຈົ້າແຂວງແຂວງຫຼວງພຣະບາງ ໄດ້ມອບເຄື່ອງຊ່ວຍເຫລືອ ໃຫ້ຜູ້ປະສົບໄພນໍ້າຖ້ວມ ແລະເງິນສົດໃຫ້ທາງເມືອງ ຊ່ອຍປະຊາ ຊົນ ຢູ່ເມືອງວຽງຄໍາ ທັງໝົດ 106,500,000 ກີບ ໃນວັນທີ 30 ກໍລະກົດທີ່ຜ່ານມາ ຊຶ່ງຫຼາຍຄົນເວົ້າວ່າ ເຄື່ອງຊ່ວຍເຫຼືອເຫຼົ່ານັ້ນ ຊ້າເກີນໄປ ແລະບໍ່ກຸ້ມພໍເທົ່າໃດມື້.​

ປະຊາຊົນບ້ານເມືອງໝ້ວຍ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 2 ສິງຫານີ້ວ່າ ເຄື່ອງຊ່ອຍເຫຼືອ ທີ່ຄະນະກໍາມະການຄຸ້ມຄອງໄພພິບັດແຂວງ ໄດ້ມອບໃຫ້ປະ ຊາຊົນນັ້ນ ສ່ວນຫຼາຍເປັນນໍ້າດື່ມ, ເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິໂພກ, ມູນຄ່າທັງໝົດ 36,500,000 ກີບ.

“ກໍາລັງເບິ່ງເຍົ້າ, ເບິ່ງເຮືອນ ເພິ່ນຫໍມາຊ່ວຍຢູ່ເກືອບວ່າ ທຸກອາທິດ ທຸກມື້ນີ້1 ກໍແມ່ນເຂົ້າ 2 ມາກໍເຄື່ອງນຸ່ງ 3 ມາກໍອາຫານການຢູ່ການກິນນັ້ນແຫລະ ເປັນເກືອ ເຂົາເຈົ້າກໍມາ ເຂົ້າເຄື່ອງນຸ່ງ ເປັນມີ່ເປັນໄຂ່ ຖ້າວ່າຢາກໃຫ້ກຸ້ມ ມັນກໍບໍ່ຢາກກຸ້ມເພາະວ່າແຕ່ລະບ່ອນ ມັນກໍບໍ່ຢາກກຸ້ມ ເພາະ ວ່າແຕ່ລະບ່ອນ ຊ່ວຍສຸດຄວາມສາມາດຂອງເຂົາເຈົ້າ ຫັ້ນ ກໍ່ສິບໍ່ພຽງພໍ ເພິ່ນກໍກໍາລັງສືບຕໍ່ລະດົມຕໍ່.”

ຄວາມເສັຍຫາຍຈາກນໍ້າຖ້ວມທົ່ວແຂວງຫຼວງພຣະບາງເທື່ອນີ້ ຈາກການປະເມີນເບື້ອງຕົ້ນ ລວມມູນຄ່າ 7 ຕື້ປາຍກີບ. ເມືອງວຽງຄໍາ ໄດ້ຮັບຜົນກະທົບຈາກໄພນໍ້າຖ້ວມ ແຕ່ວັນທີ 23 ຫາວັນທີ 27 ກໍລະກົດທີ່ຜ່ານມາ ຊຶ່ງຄະນະກໍາມະການຄຸ້ມຄອງໄພພິບັດ ໄປຢ້ຽມຢາມ ແລະມອບເຄື່ອງຊ່ອຍເຫຼືອໃຫ້ ໃນວັນທີ 30 ກໍລະກົດ.

ແລະໃນມື້ດຽວກັນນັ້ນ ທາງຄະນະນີ້ ກໍໄດ້ມອບເງິນສົດໃຫ້ທາງເມືອງ 70 ລ້ານກີບ ເພື່ອໃຊ້ຈ່າຍໃນການຈົກດິນທີ່ຖົມເຮືອນປະຊາຊົນອອກ ເພື່ອໃຫ້ສາມາດກັບມານອນເຮືອນຂອງຕົນເອງໄດ້ ຊຶ່ງບາງຄອບຄົວໄດ້ໄປນອນຢູ່ວັດ ດັ່ງປະຊາຊົນບ້ານເມືອງໝ້ວຍ ອີກຜູ້ນຶ່ງເວົ້າວ່າ:

“ເງິນສົດສ່ວນຫລາຍ ຈະບໍ່ໄດ້ເນາະເພາະວ່າເງິນນີ້ຈະມອບໃຫ້ຄະນະຄຸ້ມຄອງໄພພິບັດຂັ້ນເມືອງໄປບໍລິຫານຕໍ່ເລີຍ ເພິ່ນມາຊື້ນໍ້າມັນເນາະ ແລ້ວກໍຈ້າງລົດຈັກ ຈົກດິນອອກຈາກເຮືອນປະຊາຊົນຫັ້ນ ເພິ່ນກໍມີແຕ່ເຂົ້າກັບນໍ້າ ນີ້ແຫລະກັບອາຫານປ່ອງປາບໍ່ ເປັນມີ່ເປັນຫຍັງ ໄດ້ປະມານ 10-20 ມື້ບໍ່ຕໍ່ຄອບຄົວ ອັນນີ້ເປັນານແກ້ສຸກເສີນ.”

ນອກຈາກການຊ່ອຍເຫຼືອຜູ້ປະສົບໄພນໍ້າຖ້ວມ ຢູ່ເມືອງວຽງຄໍາ 106,500,000 ກີບນັ້ນແລ້ວ ຫ້ອງການປົກຄອງແຂວງຫຼວງພຣະບາງ ກໍເວົ້າວ່າ ທາງຄະນະກໍາມະການຄຸ້ມຄອງໄພພິບັດ ຍັງຈະຊ່ອຍຊອກແນວພັນເຂົ້າ, ແນວພັນສາລີ ແລະມັນດ້າງ ໃຫ້ປະຊາຊົນຕື່ມອີກ.

ເຈົ້າໜ້າທີ່ກຸ່ມບ້ານເມືອງໝ້ວຍ ເວົ້າວ່າ ເມື່ອກ່ອນໜ້ານັ້ນ ຫຼາຍພາກສ່ວນ ບໍ່ວ່າຈະແມ່ນພະແນກແຮງງານ ແລະສະຫວັດດິການສັງຄົມ ຫຼືພະແນກສຶກສາທິການ ແລະກິລາ ກໍໄດ້ມອບເຄື່ອງຊ່ອຍເຫຼືອ ໃຫ້ຜູ້ປະສົບໄພນໍ້າຖ້ວມນັ້ນ.

“ໄດ້ຮັບການຊ່ວຍເຫລືອໃນເບື້ອງຕົ້ນ ກໍໄດ້ແລ້ວ ນໍ້າດື່ມອິຫຍັງປະມານນີ້ນ່າ ແລ້ວກໍເປັນເຄື່ອງຜ້າຫົ່ມຈັ່ງຊີ້ ເພິ່ນເອົາລົງໄປຊ່ວຍກ່ອນແລ້ວ ຊ່ວຍຕັ້ງແຕ່ມື້ທີ່ເກີດເຫດການມື້ທໍາອິດ ມື້ທີ 2 ເພິ່ນກໍລົງ ເພິ່ນກໍໄດ້ລົງໄປແລ້ວ.”

ແລະເຈົ້າໜ້າທີ່ໜ່ວຍງານທີ່ກ່ຽວຂ້ອງ ກໍພວມຕິດຕາມເລື່ອງພະຍາດ ທີ່ມານໍານໍ້າຖ້ວມ ແລະກະກຽມຢາປົວພະຍາດ ຊຶ່ງຖືວ່າ ເປັນສິ່ງທີ່ຈໍາເປັນນໍາດ້ວຍ ດັ່ງເຈົ້າໜ້າທີ່ຄະນະຄຸ້ມຄອງໄພພິບັດ ນາງນຶ່ງເວົ້າວ່າ:

“ແຕ່ວ່າຕໍ່ມານີ້ ຕ້ອງແມ່ນມາປົວພະຍາດນໍາ ດຽວນີ້ນ່າ ເພາະວ່າເຂົາເຈົ້າແຊ່ນໍ້າຫລາຍແລ້ວ ..ຕີນມືເລີ້ມເປັນຫໍ້ເປັນຫຍັງຫັ້ນນ່າ ບາດນີ້ນໍ້າອິຫຍັງກໍບໍ່ສະອາດ ຈັ່່ງຊີ້ ຖອກທ້ອງອິຫຍັງກໍເລີ້ມສິມາແລ້ວ ໄຂ້ຍຸງອີກບາດນີ້. ”

ເພື່ອຂໍຮູ້ກ່ຽວກັບເລື່ອງທີ່ວ່ານີ້ຕື່ມ ວິທຍຸເອເຊັຍເສຣີ ໄດ້ຕິດຕໍ່ໄປຫາ ຫ້ອງການສາທາລະນະສຸກ ເມືອງວຽງຄໍາ, ເຈົ້າໜ້າທີ່ບອກໃຫ້ຮູ້ວ່າ ຍັງບໍ່ມີລາຍງານ ວ່າ ມີປະຊາຊົນເຈັບເປັນຍ້ອນພະຍາດ ທີ່ມາກັບນໍ້າຖ້ວມນັ້ນເທື່ອ.

ນໍ້າຖ້ວມຢູ່ແຂວງຫຼວງພຣະບາງ ໃນເທື່ອນີ້ ເມືອງວຽງຄໍາ ໄດ້ຮັບຜົນກະທົບໜັກທີ່ສຸດ, 648 ຄອບຄົວໄດ້ຮັບຄວາມເສຍຫາຍ, ຂາດທີ່ຢູ່ອາໄສ 72 ຄອບຄົວ, ໄຮ່ນາ, ສັດລ້ຽງ, ເສັ້ນທາງເສຍຫາຍ. ລວມແລ້ວ ເສຍຫາຍທັງໝົດ 5,679,000,000 ປາຍກີບ.

ຮອງລົງມາ ກໍແມ່ນເມືອງປາກແຊງ ເສຍຫາຍ 1,953,000,000 ປາຍກີບ: 96 ຄອບຄົວໄດ້ຮັບຄວາມເສຍຫາຍ, ເຮືອນຖືກນໍ້າຊຸໄປ 6 ຫຼັງ ແລະເມືອງໂພນທອງ ເສຍຫາຍ 141 ລ້ານກີບ, 13 ຄອບຄົວໄດ້ຮັບຜົນກະທົບ, ອີງຕາມຄໍາເວົ້າຂອງທ່ານ ສຸລິສັກ ພົມມາລີ ຫົວໜ້າພະແນກແຮງງານ ແລະສະຫວັດດິການສັງຄົມແຂວງຫຼວງພຣະບາງ ຕໍ່ນັກຂ່າວ ວາລະສານ Target ອອນລາຍ ວັນທີ 1 ສິງຫານີ້.