ນ້ຳຂອງ, ນ້ຳສາຂາ ຢູ່ແຂວງຄຳມ່ວນ ຍັງເພີ່ມຂຶ້ນ ຖ້ວມບາງເມືອງແລ້ວ

ໃນມື້ວັນທີ 17 ກັນຍາ 2024 ນີ້, ລະດັບນ້ຳ ໃນແມ່ນ້ຳຂອງ ຢູ່ເຂດແຂວງຄຳມ່ວນ ຍັງຄົງເພີ່ມລະດັບ ສູງຂຶ້ນເລື້ອຍໆ ວັດແທກໄດ້ 10.4 ແມັຕ ແລະ ລະດັບນ້ຳ ໃນນ້ຳເຊບັ້ງໄຟ ກໍເພີ່ມລະດັບສູງ 15 ແມັຕ ເຮັດໃຫ້ນ້ຳຖ້ວມ ເຂດທີ່ຊາວບ້ານ ອາໄສຢູ່ແລ້ວ ໃນບາງເມືອງ, ໂດຍສະເພາະເມືອງໜອງບົກ, ເຊິ່ງມີຊາວບ້ານ ຫຼາຍຄອບຄົວ ຢູ່ເຂດບ້ານດອນປາແດກ ແລະ ບ້ານໃກ້ຄຽງ ໄດ້ຮັບຜົນກະທົບ ລວມທັງເຂດເມືອງຫີນບູນ ພ້ອມ. ໃນຂະນະທີ່ ທາງການແຂວງຄຳມ່ວນ ໄດ້ອອກແຈ້ງການ ໃຫ້ປະຊາຊົນທົ່ວແຂວງ ກຽມຮັບມື ຈາກໄພນ້ຳຖ້ວມ. ດັ່ງເຈົ້າໜ້າທີ່ ອາສາກູ້ໄພ ແຂວງຄຳມ່ວນ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 17 ກັນຍາ ນີ້ວ່າ:

“ແມ່ນແລ້ວ, ຂຶ້ນຢູ່. ປັດຈຸບັນນີ້, ກະນ້ຳຖ້ວມຢູ່ ປະມານ 70% ແລ້ວ ປັດຈຸບັນນີ້. ມີຢູ່ໜອງບົກ ແນ່ ເມືອງຫີນບູນ ແນ່. ຢູ່ເມືອງຫີນບູນ ກະຢູ່ແຖວ ປາກນ້ຳຫີນບູນ ເຂົ້າມາ. ນ້ຳມັນຈະເຂົ້າ ຢູ່ບ່ອນທີ່ວ່າ ມັນຕ່ຳແລ້ວ, ປັດຈຸບັນນີ້. ນ້ຳຂຶ້ນມື້ນີ້.”

ໃນຂະນະທີ່ ຊາວບ້ານ ຢູ່ເມືອງໜອງບົກ ທ່ານໜຶ່ງ ກໍຢືນຢັນວ່າ ລະດັບນ້ຳ ໃນແມ່ນ້ຳຂອງ ໄດ້ເພີ່ມສູງຂຶ້ນເລື້ອຍໆ ຈົນໄດ້ລົ້ນຕາຝັ່ງ ເຂົ້າຖ້ວມບາງບ້ານ ທີ່ຕິດແຄມແມ່ນ້ຳຂອງ ເປັນຕົ້ນ ບ້ານດອນປາແດກ, ແຕ່ເຂດບ້ານ ທີ່ທ່ານອາໄສຢູ່ ກໍບັງບໍ່ທັນໄດ້ ຖືກນ້ຳຖ້ວມເທື່ອ, ແຕ່ທາງເຈົ້າໜ້າທີ່ ກໍໄດ້ແຈ້ງເຕືອນ ໃຫ້ຊາວບ້ານ ພາກັນເຝົ້າລະວັງ ແລະ ມີສະຕິ ຕະຫຼອດ 24 ຊົ່ວໂມງ ເນື່ອງຈາກມີໂອກາດ ທີ່ຈະເກີດນ້ຳຖ້ວມ ແບບກະທັນຫັນ. ດັ່ງທ່ານກ່າວວ່າ:

“ແມ່ນແຫຼະ ດອນປາແດກ ຫັ້ນ, ມັນຢູ່ໃກ້, ຕິດຂອງເລີຍ. ບ້ານດອນ ແລ້ວມັນກໍມີລົງໄປ ກະໜອງລົມ ບ້ານດອນປາແດກ, ໜອງລົມ, ບ້ານປາກເຊ, ບ້ານເດື່ອ, ບ້ານນັ້ນແຫຼະ ຫຍັບລົງໄປທາງພຸ້ນກະດາຍ. ເພິ່ນກະແຈ້ງໄວ້ຢູ່, ແຕ່ວ່າທາງບ້ານຂ້ອຍ ລະມັນໄກກັບຂອງ, ຫັ້ນນ່າ, ໄກກັບຂອງ ກັບເຊ.”

ວິທຍຸເອເຊັຽເສຣີ ພະຍາຍາມຕິດຕໍ່ ຫາຊາວບ້ານ ໃນເຂດບ້ານດອນປາແດກ ເພື່ອສອບຖາມ ລາຍລະອຽດເພີ່ມຕື່ມ, ແຕ່ຍັງບໍ່ສາມາດ ຕິດຕໍ່ຊາວບ້ານ ທີ່ຢູ່ໃນເຂດນ້ຳຖ້ວມ ນັ້ນໄດ້ເທື່ອ.

ທາງດ້ານເຈົ້າໜ້າທີ່ ຫ້ອງວ່າການປົກຄອງ ເມືອງໜອງບົກ ນາງໜຶ່ງ ກ່າວວ່າ ລະດັບນ້ຳ ໃນແມ່ນ້ຳຂອງ ຢູ່ເຂດເມືອງໜອງບົກ ຍັງສືບຕໍ່ ເພີ່ມຂຶ້ນເລື້ອຍໆ ພ້ອມທັງສືບຕໍ່ ໄຫຼເຂົ້າຖ້ວມບາງບ້ານ ທີ່ຢູ່ຕິດແຄມນ້ຳຂອງ ນັ້ນ, ແຕ່ໃນເບື້ອງຕົ້ນ ຍັງບໍ່ມີລາຍງານ ຢ່າງຄັກແນ່ເທື່ອ ກ່ຽວກັບຈຳນວບ້ານ ແລະ ຄອບຄົວ ທີ່ໄດ້ຮັບຜົນກະທົບ, ເຊິ່ງກຳລັງຢູ່ ໃນລະຫວ່າງ ການລົງສຳຫຼວດ ຂອງເຈົ້າໜ້າທີ່. ດັ່ງນາງກ່າວວ່າ:

“ບາງບ້ານກະຖ້ວມແນ່, ບາງບ້ານກະຍັງບໍ່ໄດ້ຖ້ວມ. ໂຕແຄມຂອງນີ້ ສ່ວນຫຼາຍຈະຖ້ວມ, ແຕ່ແຖວຫາດ ແຖວອັນນັ້ນ. ເພິ່ນແຈ້ງການຢູ່ ໃຫ້ເຝົ້າລະວັງ ລະດັບນ້ຳ, ເຝົ້າລະວັງນ້ຳຖ້ວມ ແບບກະທັນຫັນ.”

ສ່ວນລະດັບນ້ຳ ໃນແມ່ນ້ຳຂອງ ຢູ່ເຂດເມືອງທ່າແຂກ ກໍຍັງເພີ່ມລະດັບຂຶ້ນ ເຊັ່ນດຽວກັນ, ແຕ່ກໍຍັງບໍ່ຮອດ ຈຸດອັນຕະລາຍ ແລະ ຍັງບໍ່ໃກ້ລະດັບ ທີ່ຈະໄຫຼລົ້ນ ຕາຝັ່ງເທື່ອ, ແຕ່ຊາວບ້ານ ທີ່ຢູ່ແຄມນ້ຳຂອງ ເມືອງທ່າແຂກ ກໍມີການເຝົ້າລະວັງ ຢ່າງໃກ້ຊິດ ແລະ ກຽມພ້ອມຮັບມື ຫາກເກີດເຫດ ແມ່ນ້ຳຂອງ ໄຫຼລົ້ນຕາຝັ່ງ. ດັ່ງຊາວບ້ານ ຢູ່ເມືອງທ່າແຂກ ທ່ານໜຶ່ງ ກ່າວວ່າ:

“ເຫຼືອປະມານອີກ 1 ແມັຕ 30 ຫາ 1 ແມັຕ 40 ພຸ້ນແຫຼະ ຈຶ່ງຊິຮອດລະດັບຖ້ວມ. ເຮົາຢູ່ນີ້ ປະມານ 1 ແມັຕ 50. ເຝົ້າລະວັງ, ແຕ່ມື້ນີ້ ກັບມື້ອື່ນນີ້ແຫຼະ. ຄັນໝົດມື້ນີ້ ມື້ອື່ນ, ແຕ່ວ່ານ້ຳເໜືອມາ ມັນກະໝົດ ແລະ ກໍຖືວ່າ ໄປຮອດສະຫວັນນະເຂດ ແລ້ວກໍຜ່ານ ພວກເຮົາໄປ. ມັນຈະຖ້ວມ ຢູ່ແຖວພຸ້ນ ແຖວໜອງບົກ, ເຊບັ້ງໄຟ, ແຖວທ່າແຂກ ບໍ່ເຫັນຖ້ວມຈັກເທື່ອ.”

ກ່ອນໜ້ານີ້, ເມື່ອວັນທີ 15 ກັນຍາ ທີ່ຜ່ານມາ ຫ້ອງວ່າການປົກຄອງ ແຂວງຄຳມ່ວນ ໄດ້ອອກແຈ້ງການ ໄປຍັງບັນດາເມືອງ ແລະ ຊາວບ້ານ ທີ່ອາໄສລຽບ ແຄມແມ່ນ້ຳຂອງ ໃຫ້ເຝົ້າລະວັງ ລະດັບນ້ຳ ໃນແມ່ນ້ຳຂອງ ແລະ ລຳນ້ຳສາຂາ ຢ່າງໃກ້ຊິດ ເນື່ອງຈາກມວນນ້ຳ ຈາກພາກເໜືອ ແລະ ນະຄອນຫຼວງວຽງຈັນ ຈະໄຫຼມາຍັງ ແຂວງຄຳມ່ວນ ຈົນສົ່ງຜົນ ອາດເຮັດໃຫ້ ເກີດນ້ຳຖ້ວມ ແບບກະທັນຫັນ.

ນອກຈາກນີ້, ສະພາບນ້ຳຖ້ວມ ຢູ່ບາງບ້ານ ໃນບາງເມືອງ ຂອງແຂວງບໍລິຄຳໄຊ ເມື່ອວັນທີ 16 ກັນຍາ ທີ່ຜ່ານມານີ້ ເປັນຕົ້ນ ຢູ່ບ້ານປ່າໄລ່ ເມືອງທ່າພະບາດ, ມາຮອດປັດຈຸບັນ ລະດັບນ້ຳ ກໍໄດ້ຫຼຸດລົງ ເປັນບາງສ່ວນແລ້ວ, ແຕ່ຊາວບ້ານ ກໍຍັງມີການເຝົ້າລະວັງຢູ່. ດັ່ງເຈົ້າໜ້າທີ່ຂັ້ນບ້ານ ທ່ານໜຶ່ງ ກ່າວວ່າ:

“ແມ່ນແຫຼະ ຖ້ວມຢູ່, ຫຼຸດລົງໜ້ອຍໜຶ່ງແລ້ວ. ນ້ຳແຫ້ງລົງແດ່ແລ້ວ, ແຕ່ວ່າ ຍັງບໍ່ທັນຫຼຸດລົງຫຼາຍເທື່ອ ລົງປະມານ 10 ເຊັນນີ້ແຫຼະ. ເພິ່ນກະແຈ້ງເຕືອນຫັ້ນແຫຼະ.”

ຢ່າງໃດກໍຕາມ, ເຖິງແມ່ນວ່າ ສະພາບນ້ຳຖ້ວມ ຢູ່ແຂວງພາກເໜືອ ແລະ ນະຄອນຫຼວງວຽງຈັນ ລວມເຖິງບາງແຂວງ ທາງພາກໃຕ້ ຈະຄ່ອຍໆຫຼຸດລະດັບລົງ ແລ້ວກໍຕາມ, ແຕ່ລະດັບນ້ຳ ໃນແມ່ນ້ຳຂອງ ໃນບາງແຂວງ ກໍຍັງຢູ່ ໃນລະດັບສູງຢູ່ ເປັນຕົ້ນ ລະດັບນ້ຳ ໃນແມ່ນ້ຳຂອງ ຢູ່ແຂວງຫຼວງພຣະບາງ ມີລະດັບຢູ່ທີ່ 14.9 ແມັຕ, ລະດັບນ້ຳ ໃນແມ່ນ້ຳຂອງ ເຂດນະຄອນຫຼວງວຽງຈັນ ມີລະດັບຢູ່ທີ່ 12.2 ແມັຕ ແລະ ລະດັບນ້ຳ ໃນແມ່ນ້ຳຂອງ ຢູ່ເຂດເມືອງປາກຊັນ ແຂວງບໍລິຄຳໄຊ ມີລະດັບ 13.3 ແມັຕ, ອີງຕາມຂໍ້ມູນ ຈາກກອງເລຂາຄະນະກຳມາທິການ ແມ່ນ້ຳຂອງສາກົນ ໃນວັນທີ 17 ກັນຍາ 2024.

ແລະ ຫຼ້າສຸດ ໃນວັນທີ 17 ກັນຍາ ນີ້, ກົມອຸຕຸນິຍົມວິທະຍາ ໄດ້ອອກແຈ້ງເຕືອນ ເຝົ້າລະວັງ ພາຍຸໝູນເຂດຮ້ອນ ໃນລະຫວ່າງ ວັນທີ 18 ຫາ 21 ກັນຍາ 2024, ເຊິ່ງຈະອ່ອນຕົວ ແລະ ເຄື່ອນທີ່ຜ່ານ ແຂວງຄຳມ່ວນ ແລະ ແຂວງສະຫວັນນະເຂດ ໃນວັນທີ 20 ຫາ 21 ກັນຍາ ນີ້, ເຊິ່ງໄດ້ມີການເຕືອນ ໃຫ້ຊາວບ້ານ ໃນ 2 ແຂວງດັ່ງກ່າວ ກຽມພ້ອມຮັບມື ໄພນ້ຳຖ້ວມ.