5 ບ້ານ ໃນເມືອງໄຊທານີ ໄດ້ຮັບຜົລກະທົບ ຈາກຄວັນພິດ ໂຮງງານອຸດສາຫະກັມ

ປະຊາຊົນ ທີ່ອາໄສຢູ່ເຂດ ໂຄກສະອາດ-ສະພັງຄະນົງ ເມືອງໄຊທານີ ນະຄອນຫລວງວຽງຈັນ ໄດ້ສເນີໄປຍັງພາກສ່ວນທີ່ກ່ຽວຂ້ອງ ເມື່ອວັນທີ 12 ຕຸລານີ້ ເພື່ອຂໍໃຫ້ຊ່ອຍແກ້ໄຂບັນຫາ ການປ່ອຍຄວັນພິດຂອງໂຮງງານຊິລິຄັອນ, ໂຮງງານເຫລັກ ທີ່ຕັ້ງຢູ່ເຂດນັ້ນ. ໂຮງງານແຫ່ງນີ້ ມີການຜລິດ ແລະປ່ອຍຄວັນ ອອກມາທຸກມື້ ທັງກາງເວັນ ແລະກາງຄືນ, ສົ່ງຜົລກະທົບຕໍ່ສະພາບແວດລ້ອມ ແລະສຸຂພາບຂອງປະຊາຊົນ.

ປະຊາຊົນໃນເຂດນັ້ນ ໂດຍສະເພາະຜູ້ເຖົ້າ ແລະເດັກນ້ອຍ ຕ່າງກໍໄດ້ຮັບຜົລກະທົບ ທາງດ້ານສຸຂພາບເຮັດໃຫ້ມີອາການແສບດັງ, ອ່ອນເພັຽງ່າຍ, ເປັນຫວັດ, ເປັນໄອ, ມີບັນຫາ ລະບົບທາງເດີນຫາຍໃຈ,​ ອີງຕາມຄໍາເວົ້າ ຂອງຊາວບ້ານ ບ້ານໂຄກສະອາດ ນາງນຶ່ງ ຕໍ່ວິທຍຸ ເອເຊັຽ ເສຣີ ໃນມື້ວັນທີ 13 ຕຸລານີ້.

“ແມ່ນ ຂະເຈົ້າເຮັດໂຮງງານຫລາຍເນາະ ແຖວນັ້ນ ມີໂຮງງານມັນມີຂີ້ຝຸ່ນ ມັນມີຄວັນ ຄິດວ່າເຂົາເຮັດມາດົນແລ້ວ ເຂົາເຮັດມາຕັ້ນແຕ່ປີໃດກະບໍ່ຮູ້ ແລ້ວຮູ້ວ່າເອີ ໄປຢູ່ຫັ້ນມາໄດ້ 4-5 ປີແລ້ວ ເດັກນ້ອຍໆເປັນຫວັດເປັນໄອຫລາຍ. ເອື້ອຍຄິດວ່າຜູ້ເຖົ້າຢູ່ແຖວນັ້ນອາຍຸບໍ່ຍືນ. ເອີ ອາຍຸບໍ່ຍືນ ເອີຄິດວ່າສະເລັ່ຽປະມານ 50 ປາຍ 60 ກໍເສັຽຊີວິດແລ້ວ ທີ່ເຫັນຄວັນຫລາຍຫັ້ນໆ ເພິ່ນຫລອມຊິລິຄັອນເນາະ ແລ້ວກໍໂຮງງານເຫລັກ ເອີ ແຕ່ທີ່ເຮັດແນວນັ້ນເຫັນວ່າ ເປັນຂອງຄົນຈີນເນາະ ຂອງຄົນຈີນ.”

ຊາວບ້ານ ຢູ່ບ້ານສະພັງຄະນົງ ຜູ້ນຶ່ງເວົ້າວ່າ ປະຊາຊົນຢູ່ໃນເຂດນັ້ນ ໄດ້ຮວມຕົວກັນ ຮ້ອງຮຽນໄປຫາພາກສ່ວນທີ່ກ່ຽວຂ້ອງ ເພື່ອໃຫ້ພວກເພີ່ນລົງກວດກາ ແລະແກ້ໄຂຢ່າງຮີບດ່ວນ ຍ້ອນຄວັນພິດຈາກຫລາຍໂຮງງານ ນິຄົມອຸດສາຫະກັມ ໄດ້ສ້າງຄວາມເດືອດຮ້ອນ ໃຫ້ປະຊາຊົນຫລາຍ ມາໄດ້ຫລາຍປີແລ້ວ ແຕ່ບໍ່ໄດ້ຮັບການແກ້ໄຂ.

“ຢູ່ບ້ານສະພັງຄະນົງ ຢູ່ຕິດກັບບ້ານໂຄກໃຫຍ່ຫັ້ນແຫລະ ມັນຕິດຢູ່ກັນເລີຍ ແຖວໂຄກສະອາດໂຄກໃຫຍ່ປະມານນີ້ແຫລະ ບໍ່ຫ່າງກັນຫລາຍ ຕິດກັນເລີຍນະ ຕິດກັນເລີຍຕິດກັບໂຄກສະອາດເລີຍ ຕິດກັຍເລີຍມັນຈະມີໂຮງງານ ນິຄົມອຸດສາຫະກັມຢູ່ໃນຫັ້ນ ນິຄົມອຸດສາຫະກັມ ໂອ້ ມີຫລາຍມີຫລາຍໂຕຢູ່ ມີພວກເສື້ອຜ້າ ແລ້ວມີພວກອີ່ຫຍັງຫລາຍຢ່າງຢູ່.”

ຊາວບ້ານ ຢູ່ບ້ານອ້ອມຂ້າງ ທີ່ໄດ້ຮັບຜົລກະທົບ ຈາກການປ່ອຍຄວັນພິດ ຜູ້ນຶ່ງເວົ້າຕໍ່ວິທຍຸເອເຊັຽເສຣີ ໃນມື້ດຽວກັນນີ້ ເຖິງໂຮງງານ ທີ່ສ້າງບັນຫານັ້ນວ່າ ເປັນໂຮງງານ ທີ່ກ່ຽວຂ້ອງກັບການແປຮູບຊິລິຄັອນ, ແຕ່ບໍ່ຮູ້ວ່າ ໂຮງງານນີ້ ໄດ້ເປີດໃຊ້ມາແຕ່ປີໃດ ຮູ້ແຕ່ວ່າ ການປ່ອຍຄວັນພິດ ມີມາແຕ່ກ່ອນເກີດການແຜ່ຣະບາດຂອງໂຄວິດ-19 ນັ້ນແລ້ວ ແລະມີແນວໂນ້ມປ່ອຍຄວັນພິດຮຸນແຮງຂຶ້ນນໍາເລື້ອຍໆ ເມື່ອການແຜ່ຣະບາດຂອງໂຄວິດ-19 ຫລຸດຜ່ອນລົງ, ສົ່ງຜົລໃຫ້ 5 ບ້ານ ໃນເຂດເມືອງໄຊທານີ ໄດ້ຮັບຜົລກະທົບທຸກມື້.

“ຮູ້ ຢູ່ບ້ານຄະນົງຫັ້ນແຫລະ ສະພັງຄະນົງ ປ່ອຍທຸກມື້ເລີຍ ເອໍ ເຂດນັ້ນມັນກໍມີຫລາຍບ້ານຢູ່ເດ້ ມັນມີບ້ານສະພັງຄະນົງ ບ້ານໂຄກນ້ອຍ ບ້ານໂຄກໃຫຍ່ ແລ້ວກໍບ້ານໂຄກສະອາດ ອ່າ ມັນໃກ້ກັນກັບເຂດເສຖກິຈພິເສດກວມລວມໄຊເສຖາ, ແຕ່ມັນບໍ່ໄດ້ຢູ່ໃນພື້ນທີ່ນັ້ນ ແຕ່ວ່າບ້ານເຮົາມັນຫ່າງຈາກນັ້ນ ແຕ່ວ່າບ້ານຕິດຫັ້ນແມ່ນມີປະມານ 5 ບ້ານນີ້ແຫລະ.”

ພ້ອມດຽວກັນນັ້ນ ຊາວບ້ານ ທີ່ຍ້າຍອອກຈາກບ້ານສະພັງຄະນົງ ນາງນຶ່ງເວົ້າເຖິງໂຮງງານຊິລິຄັອນ ວ່າ ຕັ້ງຢູ່ໃນເຂດນິຄົມ ອຸດສາຫະກັມ, ຢູ່ໄກ້ກັບເຂດເສຖກິຈພິເສດ ກວມລວມ ໄຊເສດຖາ ແລະວ່າ ຍ້ອນໄດ້ຮັບຜົລກະທົບ ຈາກ ຄວັນພິດ ທີ່ພາກສ່ວນກ່ຽວຂ້ອງ ບໍ່ມີມາຕການແກ້ໄຂ ເຮັດໃຫ້ຊາວບ້ານຈໍານວນນຶ່ງ ຈໍາຕ້ອງໄດ້ຕັດສິນໃຈຂາຍດິນ ແລ້ວອອກໄປຢູ່ບ່ອນອື່ນ.

“ອ່າ ນອກເຂດຫັ້ນນ່າ ແມ່ນໆ ກໍແຖວໃກ້ໆກັນ ກັບເຂດເວຖກິຈພິເສດກວມລວມ ໄຊເສຖາ ບໍ່ ບໍ່ອີ່ຫລີກໍບໍ່ໄດ້ຄ່ອຍຢູ່ຫັ້ນນ່າເພາະວ່າ ມາຢູ່ນາທົ່ມ ບໍ່ຮູ້ຄືກັນ ເພາະວ່າຂ້ອຍບໍ່ໄດ້ຢູ່ແຖວນັ້ນ.”

ເຈົ້າໜ້າທີ່ຜູ້ນຶ່ງ ຢູ່ນະຄອນຫລວງວຽງຈັນ ເວົ້າເຖິງການປ່ອຍຄວັນພິດ ຂອງໂຮງງານຊິລິຄັອນ ຕໍ່ວິທຍຸເອເຊັຽເສຣີ ໃນມື້ວັນທີ 13 ຕຸລານີ້ວ່າ ໄດ້ປ່ອຍຄວັນພິດ ມາດົນແລ້ວ ມີຜົລກະທົບຕໍ່ສິ່ງແວດລ້ອມ ແລະປະຊາຊົນ ແລະວ່າ ໂຮງງານນັ້ນ  ກໍາລັງຈະຍ້າຍໄປຢູ່ບ່ອນໃກໆແລ້ວ.

“ເຂົາກໍາລັງສິຍ້າຍແລ້ວ ຍ້າຍໄປຢູ່ໄກໆແລ້ວ ເຂົາຍ້າຍໄປຍ້າຍໄປປະມານ ຫ່າງຈາກນະຄອນຫລວງວຽງຈັນໄປ 80 ກິໂລແມັດພຸ້ນແຫລະ ຍ້າຍໂຮງງານແມ່ນແຫລະ ສະພັງຄະນົງໂຮງງານຊີລີຄັອນ ມີຄວັນຫລາຍດົນແລ້ວ.”

ອີງຕາມປະມວນກົດໝາຍອາຍາ ມາຕຣາ 346 ວ່າດ້ວຍການກໍ່ໃຫ້ເກີດມົລພິດ ທາງອາກາດ, ບຸກຄົນໃດ ຫາກໄດ້ປ່ອຍຄວັນ, ຝຸ່ນລະອອງ, ສານພິດ, ລັງສີຫລືອົງປະກອບອື່ນໆ ທີ່ເປັນອັນຕະລາຍ ສູ່ອາກາດ ໃນຊັດສ່ວນທີ່ເກີນກວ່າມາຕຖານ ທີ່ກໍານົດໄວ້ ຊຶ່ງກໍ່ໃຫ້ເກີດຄວາມເສັຽຫາຍຮ້າຍແຮງ ຈະຖືກລົງໂທດຕັດອິສຣະພາບແຕ່ 6 ເດືອນຫາ 3 ປີ ຫລືດັດສ້າງ ໂດຍບໍ່ຕັດອິສຣະພາບ ແລະຈະຖືກປັບໄໝແຕ່ 5 ລ້ານກີບ ຫາ 50 ລ້ານກີບ.