ການກວດກາ ຄຸນນະພາບຂອງເຄື່ອງດື່ມທາດເຫຼົ້າ ຕາມຮ້ານຕ່າງໆ ຢູ່ເມືອງວັງວຽງ ແຂວງວຽງຈັນ ຍັງບໍ່ທັນໄດ້ປະຕິບັດຈິງຈັງ ແລະທົ່ວເຖິງເທື່ອ

ໄລຍະຜ່ານມາ ເຈົ້າໜ້າທີ່ ທີ່ກ່ຽວຂ້ອງ ໃນເມືອງວັງວຽງ ແຂວງວຽງຈັນ ບໍ່ໄດ້ລົງກວດກາຄຸນນະພາບ ຂອງເຄື່ອງດື່ມທາດເຫຼົ້າ ຕາມຮ້ານບັນເທີງ ແລະ ຮ້ານກິນດື່ມ ຕ່າງໆເທື່ອ ໂດຍສະເພາະຮ້ານບາ ທີ່ຈຳໜ່າຍ ຂາຍເຫຼົ້າ ຂາຍເບຍຕ່າງໆ ຈົນກະທັ້ງເກີດເຫດ ນັກທ່ອງທ່ຽວຕ່າງປະເທດ ດື່ມສິ່ງມຶນເມົາທາດເຫຼົ້າ ທີ່ມີສານປົນເປື້ອນທາດເບື່ອ ຈົນເສຍຊີວິດ ຢູ່ໂຮງແຮມໃນເມືອງວັງວຽງ ຂອງຄົນຫວຽດນາມ ທີ່ມາເຊົ່າສຳປະທານ. 

ທາງເຈົ້າໜ້າທີ່ ຈຶ່ງໄດ້ມີການລົງກວດກາ. ດັ່ງ ເຈົ້າຂອງບາ ແຫ່ງໜຶ່ງ ໃນເມືອງວັງວຽງ ແຂວງວຽງຈັນ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 26 ພະຈິກ ນີ້ວ່າ:

"ຈຸຂ້ອຍບໍ່ໄດ້ຂາຍເຫຼົ້າມີແຕ່ເບຍ ຊ່ວງມັນມີບັນຫາເຂົາກໍລົງ ແລ້ວກະປິດປະມານທ່ຽງຄືນ ເພາະໂຕບ້ານພັກຂອງຫວຽດຫັ້ນມັນມີແຕ່ຄົນຝະລັ່ງແບບເມົາ ຂີ້ເມົາ ແບບກິນເຫຼົ້າ ເພາະມີບັນຫາເພິ່ນຈັ່ງລົງປິດ."

ຂະນະທີ່ ພະນັກງານປະຈຳບາ ທີ່ຢູ່ພາຍໃນໂຮງແຮມແຫ່ງໜຶ່ງ ໃນເມືອງວັງວຽງ ກ່າວວ່າ ປັດຈຸບັນ ທາງການກໍຍັງບໍ່ທັນໄດ້ມາກວດກາເທື່ອ ແຕ່ເຫັນວ່າ ທາງການກຳລັງກວດຮ້ານອື່ນໆ ທີ່ຢູ່ໃນເມືອງກ່ອນ ແລ້ວຈຶ່ງຄ່ອຍມາກວດເຂດນອກ ເພາະສ່ວນໃຫຍ່ເຄື່ອງດື່ມທາດເຫຼົ້າ ທີ່ນຳມາຂາຍຢູ່ຮ້ານຕ່າງໆ ແມ່ນຈະນຳເຂົ້າມາຈາກຕ່າງປະເທດ.

"ກຳລັງໄລ່ມາຈາກຮ້ານໃນເມືອງ ແຕ່ລະບ່ອນເພິ່ນກໍກຳລັງກວດກາຢູ່ເຈົ້າ ນັບຕັ້ງແຕ່ຄຸນນະພາບເຫຼົ້າເລີຍ ເພາະທາງຜູ້ໃຫຍ່ກໍຈະໃຊ້ນຳເຂົ້າຈາກຕ່າງປະເທດຢູ່."

ພ້ອມດຽວກັນນີ້ ທ່ານບຸນທາມ ພຸດທະວົງສາ ສະມາຊິກສະພາແຫ່ງຊາດເຂດເລືອກຕັ້ງທີ 1 ນະຄອນຫຼວງວຽງຈັນ ໄດ້ສະເໜີຕໍ່ກອງປະຊຸມ ສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ 9 ວ່າ ໃຫ້ພາກສ່ວນກ່ຽວຂ້ອງ ມີການລົງກວດກາຢ່າງເຂັ້ມງວດ ໂດຍສະເພາະເຫຼົ້າເຖື່ອນ ຫຼືເຫຼົ້າທີ່ບໍ່ໄດ້ຜ່ານ ອຢ ທີ່ຍັງມີຫຼາຍ ໂດຍສະເພາະຢູ່ວັງວຽງ ທີ່ນັກທ່ອງທ່ຽວດື່ມສິ່ງມຶນເມົາ ປະສົມສານປົນເປື້ອນ ແລ້ວເສຍຊີວິດ, ດັ່ງທ່ານກ່າວຕໍ່ກອງປະຊຸມສະພາ ຕອນໜຶ່ງວ່າ:

"ກົດໝາຍຂອງເຮົາກໍບັນຍັດໄວ້ຢູ່ ແຕ່ຍັງບໍ່ໄດ້ເຂັ້ມງວດປານໃດ ຕໍ່ກັບການຄຸ້ມຄອງເຄື່ອງດື່ມທີ່ມີທາດເຫຼົ້າ ໂດຍສະເພາະການຜະລິດ ການຈຳໜ່າຍ ການບໍລິການ ການບໍລິໂພກເຫຼົ້າເຖື່ອນນີ້ ຢູ່ບ້ານເຮົານີ້ຖືວ່າຫຼາຍທີ່ສຸດ ຢາກໃຫ້ພວກເຮົານີ້ເບິ່ງຄືນ ເບິ່ງໂຕຢ່າງເກີດຂຶ້ນໃໝ່ໆ ຍັງບໍ່ເປັນທາງການ ຈາກການຊີ້ແຈງ ຂອງພາກລັດເຮົານີ້ ຢູ່ວັງວຽງນີ້."

ນອກຈາກນີ້ ທ່ານຄຳປະເສີດ ເທບວົງສາ ສະມາຊິກສະພາແຫ່ງຊາດ ເຂດເລືອກຕັ້ງທີ 16 ແຂວງເຊກອງ ກໍໄດ້ກ່າວຢູ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ 9 ວ່າ ບັນຫາດັ່ງກ່າວ ໄດ້ເກີດຂຶ້ນມາແຕ່ດົນແລ້ວ ກ່ຽວກັບການນຳເຫັດເມົາ ຫຼືສານອື່ນໆ ມາປະສົມກັບເຫຼົ້າ ແຕ່ບໍ່ໄດ້ຮັບການຄຸ້ມຄອງ ກວດກາ ຫຼືປະຕິບັດຈິງຈັງ.

"ມັນເກີດແຕ່ດົນ ແຕ່ໃດແລ້ວ ຢູ່ວັງວຽງນີ້ ກ່ຽວກັບປັ່ນເຫັດເບື່ອນີ້ນ່າ ໃສ່ກັບເຫຼົ້າ ກ່ຽວກັບທາດເບື່ອ ທາດຫຍັງຕ່າງໆ ດຽວນີ້ປາກົດການຮ້ອນຮົນຫຼາຍ ຢູ່ລັດຖະສະພາ ຢູ່ອອສເຕຣເລຍ ກໍກ່າວເຖິງເຮົາ ຂ່າວ BBC ກໍເວົ້າເຖິງ ຫາງເສຍຂອງເຮົາທຸກຮອບດ້ານ ແກ້ໂຕຈັ່ງໃດກໍຍາກ ພວກເຮົາບໍ່ເຮັດແຕ່ທຳອິດແລ້ວ."

ໃນຂະນະດຽວກັນ ເຈົ້າໜ້າທີ່ເມືອງວັງວຽງ ແຂວງວຽງຈັນ ທ່ານໜຶ່ງ ກ່າວວ່າ ທີ່ຜ່ານມາ ທາງເຈົ້າໜ້າທີ່ ທີ່ກ່ຽວຂ້ອງ ໃນເມືອງວັງວຽງ ກໍໄດ້ມີການລົງກວດກາມາໂດຍຕະຫຼອດ ແຕ່ກໍບໍ່ສາມາດປ້ອງກັນການເກີດເຫດການດັ່ງກ່າວໄດ້ ແລະໃນຕໍ່ໜ້າ ກໍຈະກວດກາເຂັ້ມງວດຂຶ້ນຕື່ມ.

"ໄລຍະຜ່ານມາ ພວກເຮົາກໍເຮັດຢູ່ ກະປົກກະຕິຫັ້ນແຫຼະ ວຽກອັນນີ້ນ່າ ວ່າຊັ້ນສາ ແຕ່ມັນກໍເກີດຫັ້ນນ່າ ຂະແໜງການທີ່ກ່ຽວຂ້ອງຫັ້ນແຫຼະ ຕ້ອງໄດ້ເຂັ້ມງວດ ໃນການຕິດຕາມກວດກາ ຮ້ານບໍລິການຕ່າງໆຫັ້ນແຫຼະ ໃຫ້ມັນເຂັ້ມງວດຕື່ມ ເພື່ອບໍ່ຢາກໃຫ້ມັນເກີດ ບໍ່ຢາກໃຫ້ມັນເປັນຄືແນວນີ້ຫັ້ນແຫຼະ.”

ເຖິງຢ່າງໃດກໍຕາມ ວິທຍຸເອເຊັຽເສຣີ ໄດ້ຕິດຕໍ່ ໄປຍັງເຈົ້າໜ້າທີ່ທ່ອງທ່ຽວ ແລະ ປກສ ໃນເມືອງວັງວຽງ ເພື່ອສອບຖາມເພີ່ມເຕີມ ແຕ່ບໍ່ສາມາດຕິດຕໍ່ໄດ້.

ຫຼ້າສຸດ ພັນໂທ ບົວທອງ ບໍລິບານ ຫົວໜ້າກອງບັນຊາການ ປກສ ເມືອງວັງວຽງ ໄດ້ໃຫ້ສໍາພາດຕໍ່ສື່ມວນຊົນ ປ້ອງກັນຄວາມສະຫງົບ ໃນວັນທີ 25 ພະຈິກ ວ່າ ໄດ້ປິດບໍລິການຂອງໂຮງແຮມ NANA Backpacker Hotel ແລ້ວ ສະຖານທີ່ເກີດເຫດ ທີ່ນັກທ່ອງທ່ຽວ ຕ່າງປະເທດ ດື່ມສິ່ງມຶນເມົາທາດເຫຼົ້າ ທີ່ມີສານປົນເປື້ອນທາດເບື່ອ ຈົນເສຍຊີວິດ,

ແລະໄດ້ກັກຕົວ ຜູ້ບໍລິຫານ ແລະ ພະນັກງານ ພາຍໃນໂຮງແຮມ ຈໍານວນ 8 ຄົນ ມາສືບສວນ-ສອບສວນ ຄື: 

ທ້າວ ເຢືອງວັນຮ່ວນ ອາຍຸ 34 ປີ

ທ້າວ ຫງຽງແມນຮຸ່ງ ອາຍຸ 38 ປີ

ທ້າວ ບູຍວັນດັດ ອາຍຸ 35 ປີ

ທ້າວ ຟາມດຶງຈິງ ອາຍຸ 42 ປີ

ທ້າວ ຈິກກວັກຕ່ວນ ອາຍຸ 23 ປີ

ທ້າວ ເຢືອງດຶກຕ່ວນ ອາຍຸ 47 ປີ

ທ້າວ ຫງຽງຊຸຍແອ້ງ ອາຍຸ 28 ປີ

ທ້າວ ກວາງຊຸງ ອາຍຸ 44 ປີ

ທັງໝົດໄດ້ພັກເຊົ່າ ຢູ່ບ້ານວຽງແກ້ວ ເມືອງວັງວຽງ ແຂວງວຽງຈັນ.

ສໍາລັບສາເຫດໃນເບື້ອງຕົ້ນ ຂອງການເສຍຊີວິດນັກທ່ອງທ່ຽວຕ່າງປະເທດ ຄາດການວ່າ ຍ້ອນດື່ມເຄື່ອງດື່ມ ທີ່ມີສານເຈືອປົນ ແລະບັນຫາອື່ນໆ.

ສ່ວນສາເຫດທີ່ແທ້ຈິງ ແມ່ນຢູ່ໃນຂັ້ນຕອນ ຂອງການປະສານສົມທົບ ກັບກະຊວງ ແລະພາກສ່ວນກ່ຽວຂ້ອງ ເກັບຂໍ້ມູນ ແລະເກັບຕົວຢ່າງຕ່າງໆ ເພື່ອໄປຊອກຄົ້ນຫາຂໍ້ມູນ ທີ່ຍັງບໍ່ທັນຈະແຈ້ງ ກ່ຽວກັບເຫດການເສຍຊີວິດນັກທ່ອງທ່ຽວຕ່າງປະເທດ ໃນຄັ້ງນີ້ ໃຫ້ມີຄວາມຊັດເຈນໂດຍໄວ ແລະຢັ້ງຢືນຂອງການວິໄຈທາງດ້ານວິທະຍາສາດ.