ຄົນງານລາວຢູ່ໄທຍຢ້ານ ໂຄວິິດ-19 ຮອບໃຫມ່

ສິດນີ
2021-04-13
Share
ຄົນງານລາວຢູ່ໄທຍຢ້ານ ໂຄວິິດ-19 ຮອບໃຫມ່ ໜ່ວຍແພດ ຕັ້ງສູນຊົ່ວຄາວກວດເຂື້ອ ໂຄວິດ-19 ຢູ່ ດ່ານສາກົລວັງເຕົ່າ ໃນໄລຍະປີໃຫມ່ ລາວ ພສ 2564
ພາບປະກອບ: ນັກຂ່າວພົລເມືອງ

ຄົນງານລາວຢູ່ໄທຍ ຮູ້ສຶກຢ້ານກົວ ແລະ ຕ້ອງຣະວັງໂຕຫລາຍຂຶ້ນ ຍ້ອນຢູ່ໄທຍມີການຣະບາດ ຂອງໂຄວິດ-19 ຮອບໃຫມ່ເຮັດ ໃຫ້ມີຄົນຕິດເຊື້ອຫຼາຍຄົນ ດັ່ງຄົນງານລາວຜູ້ນຶ່ງທີ່ ເຮັດວຽກຢູ່ໄທຍ ກ່າວຕໍ່ເອເຊັຽເສຣີິ ໃນມື້ວັນທີ 13 ເມສາ ປີ 2021 ນີ້ວ່າ:

“ຢ້ານຫັ້ນແຫລ້ວ ຢ້ານຢູ່ ແຕ່ວ່າ ກໍບໍ່ໄດ້ໄປໃສ ເພາະວ່າ ມັນດາຣາຕິດໄປຫມົດ ທັງແພດ ທັງຫມໍ ທັງຕຳຣວດກໍໃສ່ແມັສຢູ່ຕລອດ ບໍ່ໄດ້ຖອດຈັກເທື່ອເລີຍ.”

ຄົນງານລາວ ອີກຜູ້ນຶ່ງເວົ້າວ່າ ປັດຈຸບັນຕົນເອງ ກໍບໍ່ໄດ້ຢ້ານປານໃດ ຕໍ່ການແຜ່ຣະບາດ ຂອງເຊື້ອໂຄວິດ-19 ແຕ່ເມືອເວລາອອກ ໄປບ່ອນຊຸມຊົນ ກໍຕ້ອງປະຕິບັດຕາມຣະບຽບ ຂອງທາງການ ເປັນຕົ້ນໃສ່ ຜ້າອັດປາກອັດດັງ ແລະລ້າງມື ຮ່ວມດ້ວຍຕິດຕາມ ຂ່າວສານ ຈາກທາງການຕລອດ ດັ່ງທ່ານກ່າວວ່າ.

“ບໍ່ຢ້ານປານໃດ ເພາະວ່າ ບໍ່ໄດ້ອອກໄປໃສຫັ້ນນ່າ ໃສ່ແມັສປ້ອງກັນ ກ່ອນຊິເຂົ້າຮ້ານ ຕ້ອງລ້າງມືຫັ້ນນ່າ ຕາມຮ້ານຕາມອີ່ຫຍັງ ຈະມີເຈວລ້າງມື ໃຫ້ລູກຄ້າ ກອ່ນຊີ່ເຂົ້າຮ້ານ ກະສ່ວນຫຼາຍກໍເບິ່ງຂ່າວ ນາຍຈ້າງກໍບໍ່ຄ່ອຍປານໃດ ເບິ່ງຕາມຂ່າວຕາມອັນນັ້ນເຂົາ ຫັ້ນແຫລະ.”

ຄົນງານລາວຜູ້ນີ້ກ່າວຕື່ມວ່າ ກ່ຽວກັບໂຄວິດ-19 ກໍບໍ່ຕ້ອງການຄວາມຊ່ອຍເຫລືອຫຍັງ ເພາະໄດ້ປ້ອງກັນຕົນເອງ ຕາມແຈ້ງການ ຂອງທາງການ ແຕ່ຢາກໃຫ້ດ່ານເປີດໄດ້ ຕາມປົກກະຕິ ຍ້ອນຢາກໄປ-ມາສະດວກ ຣະຫວ່າງໄທຍກັບລາວ ຄືເກົ່າ.

“ບໍ່ໄດ້ຢ້ານໃສ່ຜ້າປິດປາກໄວ້ ເພິ່ນກໍໃຫ້ປ້ອງກັນໃຜ ປ້ອງກັນມັນຫັ້ນແຫຼ້ວ ກໍໃຫ້ໃສ່ຜ້າປິດປາກ ກໍໃຫ້ທຳງານຕາມປົກກະຕິຫັ້ນແຫຼະ.”

ເຈົ້າຫນ້າທີ່ພແນກແຮງງານ ແລະ ສວັດດີການສັງຄົມ ແຂວງວຽງຈັນເວົ້າວ່າ ກໍເປັນຫ່ວງຄົນງານລາວຢູ່ຕ່າງປະເທດ ໂດຍສະເພາະ ຢູ່ປະເທດໄທຍ ຢາກໃຫ້ເພິ່ນປະຕິບັດຕາມ ຂໍ້ກໍານົດຂອງຄະນະສເພາະກິດ ໃນປະເທດທີ່ເພິ່ນຢູ່ ທ່ານເວົ້າວ່າ.

“ເພິ່ນກໍເປັນຫ່ວງແຫຼະເນາະ ເປັນຫ່ວງແຕ່ວ່າກໍໃຫ້ປະຕິບັດຕາມ ຄະນະສະເພາະກິດຢູ່ຕົ້ນທາງ ຄັນຢູ່ໄທຍ ກໍແມ່ນຢູ່ໄທຍເນາະ.”

ກ່ຽວກັບການຣະບາດຂອງໂຄວິດ-19 ຮອບໃຫມ່ໃນໄທຍ ວິທຍຸເອເຊັຽເສຣີ ກໍໄດ້ຕິດຕໍ່ໄປທັງ ສະຖານທູດລາວຢູ່ບາງກອກ ຮວມເຖິງ ເຈົ້າຫນ້າທີ່ກ່ຽວຂ້ອງຢູ່ໄທຍ ແຕ່ບໍ່ສາມາດ ຕິດຕໍ່ໄດ້ ຍ້ອນວັນພັກພິເສດ ຂອງທາງການ.

ດຣ. ສຸພະໄຊ ອິນທະວົງ ເຈົ້າຫນ້າທີ່ສະເພາະກິດ ເຝົ້າຣະວັງໂຄວິດ-19 ຂອງກະຊວງແຮງງານໄທຍ ໃນ 19 ແຂວງພາກອີສານ ຂອງໄທຍ ກ່າວວ່າທາງການໄທຍ ກໍໄດ້ເຝົ້າຣະວັງ ໃນກຸ່ມຄົນງານຕ່າງດ້າວ ທີ່ເດີນທາງໄປມາຢ່າງໃກ້ຊິດເໝືອນກັນ ດັ່ງທ່ານໃຫ້ ສຳພາດຕໍ່ເອເຊັຽເສຣີໃນມື້ວັນທີ 13 ເມສາ ປີ 2021 ນີ້ວ່າ:

“ການແຜ່ຣະບາດ ສຳລັບຮອບ 3 ທາງຣັຖບານໄທຍ ກໍໄດ້ມີການເຝົ້າຣະວັງ ແລະປ້ອງກັນການເດີນທາງຂອງພີ່ນ້ອງຄົນງານຄວນ ຈະມີນາຍຈ້າງ ຫລືການແຈ້ງຄວາມ ປະສົງຂອງທີ່ຢູ່ໃຫ້ຈະແຈ້ງ ຄວນໃສ່ຫນ້າຜ້າປິດປາກ ຫຼືບໍ່ໃຫ້ເຂົ້າໄປໃນເຂດທີ່ສ່ຽງ ໃນຊ່ວງ ເທສການບຸນປີໃຫມ່ ແລະ ກໍບໍ່ພຍາຍາມເດີນທາງ ໄປແຂວງອື່ນ.”

ອິງຕາມການຣາຍງານຂອງຂ່າວທ້ອງຖິ່ນໃນໄທ ໃນມື້ວັນທີ 7 ເມສາ ປີ 2021 ຜ່ານມາ ຍານາງ ຣັຊດາ ທະນາດິເຣກ ກ່າວວ່າ ທາງການໄທຍ ໄດ້ຂຍາຍເວລາໃນການກວດເຊື້ອ ໂຄວິດ-19 ຮວມທັງການພິສູດ ອັດຕະລັກ ຂອງຄົນງານລາວ ທັງສາມຊາດ ຄື ລາວ ພະມ້າ ແລະ ກຳພູຊາ ຈາກເດີມສິ້ນສຸດລົງ ໃນວັນທີ 16 ເມສາ ປີ 2021 ປ່ຽນມາເປັນ ວັນທີ 16 ມິຖຸນາ ປີ 2021 ຍ້ອນ ມີຄວາມກັງວົນ ຈາກຫລາຍພາກສ່ວນເຫັນວ່າ ຖ້າຫາກໃຊ້ກຳນົດເດີມ ຄືວັນທີ 16 ເມສາ ປີ 2021 ນັ້ນ ທາງນາຍຈ້າງ ແລະ ຜູ້ປະກອບການ ອາດຈະພາລູກຈ້າງ ໄປດຳເນີນການ ຕາມຂັ້ນຕອນບໍ່ທັນເວລາ ທີ່ກຳນົດໃຫ້ໄດ້.

ຍານາງ ຣັຊດາ ກ່າວຕື່ມວ່າ ຈາກຂໍ້ມູນກະຊວງສາທາຣະນະສຸຂ ແລະສຳນັກງານກວດຄົນເຂົ້າເມືອງ ໃນມື້ວັນທີ 5 ເມສາ ປີ 2021 ມີຄົນຕ່າງດ້າວ ກວດເຊື້ອ ໂຄວິດ-19 ແລະ ລົງທະບຽນປະກັນ ສຸຂພາບແລ້ວ ປະມານ 170,000 ຄົນ ແລະ ມີຄົນຕ່າງດ້າວ ທີ່ ດຳເນີນການເກັບອັດຕະລັກ ບຸກຄົນ ຫລື biometrics ແລ້ວປະມານ 442,000 ຄົນ ຈາກຈຳນວນ ຄົນຕ່າງດ້າວທັງຫມົດ 654,864 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ