10 ມິຖຸນາ ຜູ້ຕິດເຊື້ອໂຄວິດ-19 ເພີ່ມ 4 ຄົນ

ສຸພັດຕາ
2021-06-11
Share
10 ມິຖຸນາ ຜູ້ຕິດເຊື້ອໂຄວິດ-19 ເພີ່ມ 4 ຄົນ ສປປລາວ ຕຽມຕ້ອນຮັບວັກຊີນ SINOPHARM 500,000 ໂດສ ,ເພີ່ມຕື່ມ ຈາກ ສປ.ຈີນ
ພາບ: ແອໂຣລາວ

ທາງການລາວ ກວດພົບຜູ້ຕິດເຊື້ອ ໂຄວິດ-19 ຣາຍໃໝ່ ເພີ່ມອີກ 4 ຄົນ ຈາກຜົນການກວດວິເຄາະຫາເຊື້ອທັງໝົດ 1,410 ຕົວຢ່າງ ຂອງມື້ວັນທີ 9 ມິຖຸນາ 2021 ນີ້, ສົ່ງຜົລໃຫ້ ປະເທດລາວ ມີຜູ້ຕິດເຊື້ອສະສົມທັງໝົດ 1,975 ຄົນ, ດັ່ງທ່ານ ດຣ. ສີສະຫວາດ ສຸດທານີລະໄຊ, ຮອງຫົວໜ້າກົມຄວບຄຸມ ພຍາດຕິດຕໍ່ ກະຊວງສາທາຣະນະສຸຂ ແລະ ຕາງໜ້າ ຄະນະສະເພາະກິຈ ປ້ອງກັນ ໂຄວິດ-19 ກ່າວໃນພິທີຖແລງຂ່າວ ຕໍ່ສື່ມວນຊົນ ໃນມື້ວັນທີ 10 ມິຖຸນາ ນີ້ວ່າ:

“ສໍາລັບຢູ່ ສປປລາວ ຂອງພວກເຮົາ ໃນວັນທີ 9 ມິຖຸນານີ້, ພວກເຮົາໄດ້ເກັບຕົວຢ່າງ ມາກວດວິເຄາະຢູ່ໃນຂອບເຂດທົ່ວປະເທດ ແມ່ນ 1,410 ຕົວຢ່າງ. ກວດພົບຜູ້ຕິດເຊື້ອທັງໝົດ ແມ່ນ 4 ກໍຣະນີ. ຈາກນະຄອນຫຼວງວຽງຈັນ ແມ່ນ 2 ກໍຣະນີ ແລະ ຈຳປາສັກ 2 ກໍຣະນີ.”

ທ່ານກ່າວຕື່ມວ່າ ສຳລັບຜູ້ຕິດເຊື້ອໂຄວິດ-19 ຈຳນວນ 1 ຣາຍ ທີ່ກວດພົບໃນນະຄອນຫຼວງວຽງຈັນ ໃນວັນທີ 8 ມິຖຸນາ, ແຕ່ຍັງບໍ່ ສາມາດຕິດຕໍ່ຫາໄດ້ນັ້ນ, ຫຼ້າສຸດນີ້ ແມ່ນສາມາດຕິດຕໍ່ຫາໄດ້ແລ້ວ ແລະ ໄດ້ນຳໂຕຜູ້ກ່ຽວມາປິ່ນປົວ ຕາມຂະບວນການແລ້ວ:

“ສຳລັບຄົນເຈັບກໍຣະນີມື້ວານນີ້ ພວກເຮົາໄດ້ປະກາດຫາ ວ່າແມ່ນບໍ່ພົບຫັ້ນ, ດຽວນີ້ພວກເຮົາໄດ້ພົບຜູ້ກ່ຽວແລ້ວ. ເນື່ອງຈາກວ່າ ຜູ້ກ່ຽວຫັ້ນ ໄປເຂົ້າໂຮງໝໍ ເນື່ອງຈາກວ່າບໍ່ສະບາຍ ກະເລີຍຂາດການຕິດຕໍ່ໃນເບື້ອງຕົ້ນ. ທາງສື່ອອນລາຍ ກະໄດ້ປະກາດຕາມຫາ, ຕອນນີ້ໄດ້ພົບຄົນເຈັບ ແລ້ວໄດ້ເຂົ້າປິ່ນປົວຢູ່ໂຮງໝໍ ເປັນທີ່ຮຽບຮ້ອຍແລ້ວ.”

ຂະນະດຽວກັນ, ເຈົ້າໜ້າທີ່ ກະຊວງສາທາຣະນະສຸຂ ທ່ານນຶ່ງ ກໍຢັ້ງຢືນຕໍ່ຜູ້ສື່ຂ່າວ ວິທຍຸເອເຊັຽເສຣີ ໃນວັນທີ 10 ມິຖຸນາ ນີ້ວ່າ ສາເຫດທີ່ບໍ່ສາມາດນຳຫາໂຕຜູ້ກ່ຽວ ມາປິ່ນປົວໃຫ້ທັນ ເວລາໄດ້ນັ້ນ, ຍ້ອນວ່າມີການໃຫ້ຂໍ້ມູນທີ່ບໍ່ຈະແຈ້ງບາງຢ່າງ ແລະ ຜູ້ກ່ຽວ ກໍເກີດອາການເຈັບປ່ວຍກະທັນຫັນແດ່ ຈຶ່ງຂາດການຕິດຕໍ່ກັນ. ແຕ່ໃນທີ່ສຸດ, ກໍສາມາດນຳໂຕຜູ້ກ່ຽວ ມາປິ່ນປົວຢູ່ໂຮງໝໍໃນ ນະຄອນຫຼວງວຽງຈັນ ເປັນທີ່ຮຽບຮ້ອຍແລ້ວ:

“ເຫັນແລ້ວ ເຫັນແລ້ວ, ພວກເຮົາເອົາເຂົ້າໂຮງໝໍແລ້ວ. ທຳອິດລາວບໍ່ໃຫ້ຂໍ້ມູນ. ແມ່ນໆ ແມ່ນຜູ້ຕິດເຊື້ອນັ້ນແຫຼະ ເຮົາເອົາເຂົ້າ ໂຮງໝໍແລ້ວ ໃນນະຄອນຫຼວງວຽງຈັນ.”

ຫຼ້າສຸດນີ້, ພາຍຫຼັງທີ່ປະເທດອ່າຊ້ຽນ ແລະ ຈີນ ໄດ້ປະຊຸມຮ່ວມມືກັນ ເພື່ອສືບຕໍ່ຊ່ອຍເຫຼືອ ໃນການຕ້ານ ແລະ ຮັບມືກັບການ ຣະບາດ ຂອງໂຄວິດ-19 ເມື່ອ 2-3 ມື້ກ່ອນນັ້ນ, ອີງຕາມການຣາຍງານ ຈາກເຟສບຸກແຟນເພຈ “ເອໂຣລາວ” ໃນວັນທີ 10 ມິຖຸນາ 2021 ນີ້, ກໍໄດ້ຢືນຢັນວ່າ ຣັຖບານຈີນ ພວມຈັດສົ່ງວັກຊິນ ປ້ອງກັນໂຄວິດ-19 ຍີ່ຫໍ້ຊິໂນຟາມ ຈຳນວນ 500,000 ໂດສ ໃຫ້ແກ່ ຣັຖບານລາວ ແລະ ຈະສົ່ງຈາກນະຄອນຫຼວງປັກກິ່ງ ມາເຖິງນະຄອນຫຼວງວຽງຈັນ ໃນມໍ່ໆນີ້ ແລະ ຈະມີພິທີມອບຮັບ ຢ່າງເປັນ ທາງການ ທີ່ສນາມບິນສາກົລວັດໄຕ ໃນນະຄອນຫຼວງວຽງຈັນ, ອັນເປັນສ່ວນນຶ່ງ ໃນການສ້າງພູມຄຸ້ມກັນ ໃຫ້ແກ່ປະຊາຊົນລາວ ບັນດາເຜົ່າ. ການຈັດສົ່ງວັກຊິນ ປ້ອງກັນໂຄວິດ-19 ຈາກຣັຖບານຈີນ ໃຫ້ແກ່ຣັຖບານລາວ ໃນຊຸດທີ່ຈະມາເຖິງນີ້, ຖືເປັນວັກຊິນ ຈຳນວນທັງໝົດ 1,900,000 ໂດສ ທີ່ຣັຖບານລາວ ໄດ້ຮັບຈາກຣັຖບານຈີນ, ຈາກທີ່ກ່ອນໜ້ານີ້ ໄດ້ຮັບແລ້ວ ຈຳນວນ 1,400,000 ໂດສ.

ອີງຕາມການຣາຍງານ ຂອງຄະນະສະເພາະກິຈ ປ້ອງກັນໂຄວິດ-19 ໃນມື້ວັນທີ 10 ມິຖຸນາ 2021 ນີ້, ຣາຍງານວ່າ ມາຮອດ ປັດຈຸບັນ ມີຜູ້ໄດ້ຮັບການກວດວິເຄາະ ຫາເຊື້ອໂຄວິດ-19 ທັງໝົດ 266,459 ຄົນ ໃນນັ້ນ ພົບຜູ້ຕິດເຊື້ອສະສົມ 1,975 ຄົນ, ເສັຽຊີວິດ 3 ຄົນ, ປິ່ນປົວເຊົາແລ້ວ 1,807 ຄົນ, ກໍາລັງປິ່ນປົວ ແລະຕິດຕາມອາການຢູ່ໂຮງໝໍ 165 ຄົນ.

ສ່ວນການສັກວັກຊິນ ປ້ອງກັນໂຄວິດ-19 ປັດຈຸບັນ ມີຜູ້ໄດ້ຮັບການສັກວັກຊິນແລ້ວ ໂດຍແຍກເປັນເຂັມທີ 1 ຈໍານວນ 698,503 ຄົນ ແລະເຂັມທີ 2 ຈໍານວນ 355,853 ຄົນ.

ຄໍາເຫັນ (0)

ເບິ່ງຄວາມເຫັນທັງໝົດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ