ການສັກຢາປ້ອງກັນ ເຊື້ອໂຄວິດ-19 ຢູ່ລາວ

ໄຊຍາ
2021-05-12
Share
ການສັກຢາປ້ອງກັນ ເຊື້ອໂຄວິດ-19 ຢູ່ລາວ ຜູ້ໄດ້ສັກຢາ ປ້ອງກັນເຊື້ອໂຄວິດ-19 ຢູ່ລາວ ມາຮອດວັນທີ 10 ພຶສພາ ໄດ້ສັກເຂັມທີ 1 ຈຳນວນ 418,277 ຄົນ. ແລະ ສັກເຂັມທີ 2 ຈຳນວນ 84,438 ຄົນ.
ຮູບຈາກ : ນັກຂ່າວພົລເມືອງ

ການສັກວັກຊີນ ໃນລາວ ເປັນວຽກຈຳເປັນເລັ່ງດ່ວນ ເຊິ່ງມາພ້ອມກັບມາຕການປິດເມືອງ ຈາກຄວາມຮຸນແຮງ ຂອງສະຖານະການ ການຣະບາດຮອບສອງ ທີ່ຣະບາດເຂົ້າຊຸມຊົນ. ການສັກວັກຊີນໂຄວິດ-19 ທີ່ທາງການລາວຈັດຫາໃຫ້ນັ້ນ ສ່ວນຫຼາຍແມ່ນ ການຊ່ອຍ ເຫຼືອເຊັ່ນ: ຊິໂນຟາມ ມາຈາກຈີນ, ເອສຕຣາເຊເນກາ ຈາກອົງການ ໂຄແວັກ, ສະປູດນິກ ຈາກ ຣັດເຊັຽ.

ການສັກວັກຊີນ ໂຄວິດ-19 ແມ່ນເຣີ້ມແຕ່ເດືອນ ເມສາເປັນຕົ້ນມາ ເນື່ອງຈາກສະຖານະການ ການຣະບາດຮອບສອງ ຮຸນແຮງກວ່າ ຄັ້ງທີ່ນຶ່ງຫຼາຍເທົ່າ. ແຕ່ການສັກວັກຊີນຫຼັກໆ ກໍມີແຕ່ຊີໂນຟາມ ກັບແອສຕຣາເຊນິກາ ເຊິ່ງປະຊາຊົນບໍ່ມີທາງເລືອກ ກໍຈຳເປັນຕ້ອງ ໄດ້ສັກ ເພາະວັກຊີນທີ່ຊ່ອຍເຫຼືອລາວ ແມ່ນໄດ້ຮັບຮອງຈາກ ອົງການອານາມັຍໂຣກແລ້ວ, ດັ່ງປະຊາຊົນທ່ານນຶ່ງ ໄດ້ກ່າວຕໍ່ເອເຊັຽ ເສຣີ ເມື່ອສັປດາ ທີ່ຜ່ານມາວ່າ ການສັກວັກຊີນເທື່ອນີ້ ເປັນທັງເຣື່ອງການເມືອງ ແລະ ຖ້າເກີດຫຍັງຂຶ້ນ ຕ້ອງຮັບຜິດຊອບຕົນເອງ:

 “ຄວາມໝາຍທີ່ວ່າ ເພິ່ນເຮັດໄດ້ໄວ ແມ່ນມີປະສິຕິຜົລເນາະ ກ່ອນໜ້ານີ້ກະມີຫຼາຍຫາງສຽງ ຄືຄົນອາຈຄິດວ່າ ມັນເປັນພຽງແຕ່ ເກມ ອັນນຶ່ງ ຂອງການເມືອງການແພດໂຕນຶ່ງ. ຄັນຜູ້ໃດໄປສັກກໍຈະມີຄວາມສ່ຽງ ໂດຍສະເພາະ ທາງຜູ້ຜລິດ ແລະ ທັງຣັຖບານຫຼາຍໆ ປະເທດ ກະບໍ່ໄດ້ມາຮັບຮອງວ່າ ສັກໄປ ມີອາການແຊກຊ້ອນ ຫຼືວ່າເຖິງຂັ້ນຕ້ອງເສັຽຊີວິດ ແມ່ນໃຜຈະຮັບຜິດຊອບ ເຊິ່ງບໍ່ມີອົງກອນ ໃດອອກມາຮັບຜິດຊອບ ສະນັ້ນການສັກວັກຊີນ ກໍເປັນຄວາມສ່ຽງ.”

ຄວາມຈິງກ່ອນໄປສັກ ວັກຊີນໂຄວິດ-19 ປະຊາຊົນລາວຫຼາຍຄົນ ກໍຢ້ານເກີດຜົລຂ້າງຄຽງ. ເພາະວັກຊີນທີ່ລາວໄດ້ຮັບການຊ່ອຍເຫຼືອ ກໍມີກະແສຂ່າວເກີດຜົລຂ້າງຄຽງ ຢູ່ປະເທດອື່ນ. ໃນຂນະທີ່ຂ່າວຫຼ້າສຸດ ຍິງວັຍ 63 ປີ ຢູ່ບ້ານນາຄູນ ເມືອງນາຊາຍທອງ ນະຄອນ ຫຼວງວຽງຈັນ ພາຍຫຼັງທີ່ໄດ້ສັກວັກຊີນໄດ້ພຽງວັນດຽວ ກໍເສັຽຊີວິດ. ເຊິ່ງກໍຣະນີນີ້ ຄອບຄົວຂອງຜູ້ເສັຽຊີວິດໄດ້ເວົ້າເຖິງອາການວ່າ ຫຼັງຈາກສັກມາແລ້ວແມ່ຕູ້ ມີອາການປວດຕົນໂຕ, ຕາມແຂນຂາ ຮາກອອກເລືອດ ຈາກນັ້ນ ພໍຕົກຕອນແລງ ກໍໄດ້ນຳສົ່ງໄປ ໂຮງໝໍ ເມືອງນາຊາຍທອງ ແຕ່ເພິ່ນກໍເສັຽຊີວິດແລ້ວ.

ເຫດການຍິງວັຍ 63 ປີ ເສັຽຊີວິດພາຍຫຼັງສັກວັກຊີນນັ້ນ ທາງຄະນະເພາະກິຈ ກໍໄດ້ອອກມາຖແລງຂ່າວເມື່ອວັນທີ 11 ພຶສພາ ໂດຍ ດຣ ບັນດິດ ຊຸມພົນພັກດີ ຄະນະກັມການທີ່ປຶກສາແຫ່ງຊາດ ໃນການສັກວັກຊີນ ຢັ້ງຢືນວ່າ ກໍຣະນີເສັຽຊີວິດ ຍັງບໍ່ທັນມີຂໍ້ມູລໃດ ທີ່ຊີ້ ບອກວ່າ ຜູ້ກ່ຽວສັກວັກຊີນແລ້ວເສັຽຊີວິດ. ເຊິ່ງທາງວິຊາການ ຂແນງທີ່ກ່ຽວຂ້ອງຈະຊອກຫາຂໍ້ມູລຕໍ່ໄປ:

 “ພວກເຮົາສລຸບກັນວ່າ ການເສັຽຊີວິດຂອງແມ່ຕູ້ ຍັງບໍ່ມີຂໍ້ສັມພັນໃດໆ ກ່ຽວກັບການໃຫ້ວັກຊີນ ແອສຕຣາເຊເນກາ. ຫຼອດວັກຊີນ ທີ່ ໃຫ້ແມ່ຕູ້ນີ້ ກ່ອງນຶ່ງມີ 10 ໂດສ ໃນຫັ້ນສັກໃຫ້ຄົນອື່ນ 9 ຄົນ ນັ້ນຈະບໍ່ມີອາການໃດໆ ນອກຈາກແມ່ຕູ້ຄົນດຽວ. ສະນັ້ນຂໍ້ຫ້າມ ຂອງ ວັກຊີນນີ້ ເຮົາກໍຮູ້ກັນດີແລ້ວ ບໍ່ມີຂໍ້ຫ້າມຫຼາຍເນາະ ສາມາດສັກໃຫ້ໄດ້ ຜູ້ມີອາຍຸ 18 ປີຂຶ້ນໄປ ແລະ ອາຍຸສູງເກີນ 60 ປີຂຶ້ນໄປ. ຜູ້ທີ່ ມີພຍາດປະຈຳໂຕ ແຕ່ບໍ່ໄດ້ຮັບການປີ່ນປົວນະປັຈຈຸບັນ ຫຼືບໍ່ມີອາການຮ້າຍແຮງ ພວກເຮົາກໍສາມາດໃຫ້ໄດ້ ຫຼືແມ່ຍິງທີ່ຖືພາ ຫຼືຍັງໃຫ້ ນົມ ພວກເຮົາກໍສາມາດສັກໃຫ້ໄດ້.”

ເຖິງວ່າທາງການລາວ ເລັ່ງສັກວັກຊີນເຊື້ອໂຄວິດ-19 ໃຫ້ກັບປະຊາຊົນ ແລະໂຄສະນາ ປະຊາສັມພັນໃຫ້ເຂົ້າມາສັກ ຕາມໜ່ວຍ ຈຸດ ບໍຣິການທົ່ວປະເທດ. ອີງຕາມປະຊາຊົນ ທີ່ໄດ້ຮັບການສັກວັກຊີນ ໄດ້ເວົ້າວ່າກໍຍັງມີປະຊາຊົນຈຳນວນຫຼາຍ ຍັງກັງວົນຊນິດ ຂອງ ວັກຊີນ ຢ້ານຜົລຂ້າງຄຽງ:

“ການສັກວັກຊີນຢູ່ບ້ານເຮົາ ກໍຍັງມີປະຊາຊົນຈຳນວນຫຼາຍບໍ່ມາສັກ ຍ້ອນເຂົ້າໃຈທີ່ບໍ່ຖືກຕ້ອງ ຄືຢ້ານສັກໄປແລ້ວ ຢ້ານມີຜົລຂ້າງຄຽງ ຢ້ານນັ້ນຢ້ານນີ້ ຢ້ານຍີ້ຫໍ້ນັ້ນບໍ່ດີ ຍີ່ຫໍ້ນີ້ບໍ່ດີ ການສັກວັກຊີນ ເປັນວິທີທາງດຽວ ທີ່ຈະເຮັດໃຫ້ເຮົາກັບມາໃຊ້ຊີວິດປົກກະຕິ ຍົກໂຕຢ່າງ ສະຫະຣັຖອາເມຣິກາແລະ ອີສສາຣາເອວ ປັຈຈຸບັນ ເຂົາຈະເປີດປະເທດ ຈະຖອດແມັສ.”

ທາງດ້ານແພດ ຜູ້ປະຈຳການຈຸດບໍຣິການ ທີ່ໄດ້ສັກວັກຊີນ ໃຫ້ກັບຄົນທົ່ວໄປ ກໍໄດ້ກ່າວວ່າ ເທົ່າທີ່ສັງເກດ ກໍຍັງບໍ່ທັນເຫັນຜູ້ທີ່ ມາຮັບ ການສັກວັກຊີນ ເຊື້ອໂຄວິດ-19 ມີອາການໃດໆ ເຊີ່ງເຣີ້ມສັກມາ ກໍເປັນເວລາເກືອບສອງເດືອນແລ້ວ:

“ທີ່ພວກເຮົາສັກໄປນີ້ ທີ່ຜ່ານມາປະມານເດືອນປາຍ ສິຮອດສອງເດືອນລະເນາະ ພວກເຮົາ ສັກໄປກໍບໍ່ເຫັນປະກົດການແບບໃດເທື່ອ ຕໍ່ທີ່ວ່າ ຢາພວກເຮົາສັກໄປນີ້ ກະບໍ່ມີວ່າເປັນນັ້ນເປັນນີ້ເທື່ອ.”

ດຣ ປານອມ ຟອງມະນີ ຮອງຫົວໜ້າກົມອານາມັຍ ແລະສົ່ງເສີມສຸຂພາບ ໄດ້ຢັ້ງຢືນວ່າ ພາຍໃນປີ 2021 ນີ້ ການສັກວັກຊີນ ໃຫ້ ກັບປະຊາຊົນໄດ້ພຽງ 22% ແລະ ໃນປີ 2022 ຈະໃຫ້ໄດ້ 50% ຂອງປະຊາກອນລາວ:

“ສຳລັບຄາດໝາຍ ທີ່ພວກເຮົາຈະໄດ້ປະຕິບັດ ໃນຂອບເຂດທົ່ວປະເທດ ເຣີ້ມຕົ້ນກໍໄດ້ປຶກສາຫາລື ກັບຄູ່ຮ່ວມພັທນາ ໃນປີ 2021 ນີ້ ກໍຕ້ອງໄດ້ໃຫ້ປະຊາກອນ ສປປລາວ ຂອງພວກເຮົາໄດ້ຮັບວັກຊີນ 22% ໃນເບື້ອງຕົ້ນ ແລະ ປີ 2022 ຈະໃຫ້ເພີ່ມຂຶ້ນ ເປັນ 50% ເພື່ອເຮັດໃຫ້ຄວບຄຸມການຣະບາດ. ອີງໃສ່ສະພາບການຣະບາດ ໃນຄັ້ງທີສອງ ການຣະບາດໜັກໜ່ວງຫຼາຍ ໃນ 22% ຖືວ່າຍັງຕໍ່າ ຫຼາຍຕາມຄາດໝາຍແທ້ໆ ຢາກໄດ້ 50% ໃນປີ 2021 ເພື່ອຈະໄດ້ຄວບຄຸມການຣະບາດ."

ເຖິງແນວໃດກໍຕາມ ປະຊາຊົນລາວ ກໍພໍມີທາງເລືອກ ໃນສັກວັກຊີນປ້ອງກັນເຊື້ອໂຄວິດ-19 ຊນິດອື່ນທີ່ມີປະສິດຕິຜົລ ການປ້ອງກັນ ດີກວ່າສອງຊນິດ ທີ່ຣັຖບານຈັດສັນມາໃຫ້ ໂດຍໄດ້ຮັບການຊ່ອຍ ຈາກຈີນ ຄືວັກຊີນ ຊີໂນຟາມ ສອງຊຸດ ຮວມ 1,420,000 ໂດສ. ວັກຊີນ ແອສຕຣາເຊເນກາ ຈາກອົງການ ໂຄແວັກ 132,000 ໂດສ ແລະອື່ນໆ . ໂດຍທ່ານ ພັນຄຳ ວິພາວັນ ນາຍົກຣັຖມົນຕຣີ ໄດ້ປະກາດອະນຸຍາດ ໃຫ້ບໍຣິສັດເອກະຊົນ ສາມາດນໍາເຂົ້າວັກຊີນໄດ້.

ຫຼ້າສຸດ ຍອດໂຕເລຂຜູ້ທີ່ຮັບສັກວັກຊີນ ປ້ອງກັນເຊື້ອໂຄວິດ-19 ໃນລາວ ຕາມການຣາຍງານເມື່ອວັນທີ 10 ພຶສພາ ຜູ້ໄດ້ຮັບວັກຊີນ ເຂັມທີ 1 ຈຳນວນ 418,277 ຄົນ. ແລະ ເຂັມທີ 2 ຈຳນວນ 84,438 ຄົນ. ໃນຂນະດຽວກັນ ໃນວັນທີ 12 ພຶສພາ ຜ່ານມາ ຣັຖບານ Australia ໄດ້ມອບການຊ່ອຍເຫຼືອວັກຊີນ ໃຫ້ແກ່ລາວ.

ຕາງໜ້າຣັຖບານ Australia ທ່ານ ໂພລ ແຄລີ ເອກອັກຄະຣັຖທູດ ວິສາມັນຜູ້ມີອຳນາດເຕັມ ປະຈຳລາວ ໄດ້ກ່າວວ່າ ການຊ່ອຍ ເຫຼືອຄັ້ງນີ້ ເປັນບູຣິມະສິດ ແລະ ເລັ່ງດ່ວນ ຂອງຣັຖບານ Australia ໃນນີ້ ຈະສນອງວັກຊີນຈໍານວນ 1 ລ້ານໂດສ, ການຝຶກ ອົບຮົມໃຫ້ແກ່ແພດ ໝໍ ໃນວຽກງານ ການບໍຣິຫານ ການສັກວັກຊີນທີ່ປອດພັຍ ແລະການຊ່ອຍເຫຼືອ ດ້ານວິຊາການ ຈາກສະຖາບັນ ການຄຸ້ມຄອງດ້ານສຸຂພາບ.

ການຊ່ອຍເຫຼືອຂອງຣັຖບານ Australia ຄັ້ງນີ້ ຈະຊ່ອຍໃຫ້ເພີ່ມອັດຕຣາພົລເມືອງລາວ ໄດ້ສັກວັກຊີນປ້ອງກັນ ໂດຍບໍ່ເສັຽຄ່າໃຊ້ຈ່າຍ ເຊິ່ງຕົກເປັນມູລຄ່າ 4,8 ລ້ານໂດລາ Australia.

ປັຈຈຸບັນເຫັນໄດ້ວ່າລາວ ໄດ້ຮັບການຊ່ອຍເຫຼືອ ສະເພາະວຽກງານ ຕ້ານແລະສະກັດກັ້ນ ເຊື້ອໂຄວິດ-19 ຈາກຫຼາຍປະເທດເຊັ່ນ: ອົງການໂຄແວັກ, ວຽດນາມ, ຈີນ, ໄທຍ, ຣັດເຊັຽ ແລະ ອອສເຕຣເລັຽ. ຕາມການຣາຍງານຂອງວິຊາການຄາດວ່າ ສະເພາະໃນປີນີ້ ການສັກວັກຊີນເຊື້ອໂຄວິດ-19 ບໍ່ເຖິງເຄິ່ງນຶ່ງຂອງປະຊາກອນລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ