ຊາວບ້ານນາບວຍ ເມືອງປາກກະດິງ ເດືອດຮ້ອນຈາກເສັ້ນເປ່ເພ

ຊາວບ້ານນາບວຍ ເມືອງປາກກະດິງ ແຂວງບໍລິຄໍາໄຊ ໄດ້ຮັບຄວາມເດືອດຮ້ອນ ໃນການສັນຈອນເຂົ້າ-ອອກ ເຂດບ້ານ ຍ້ອນເສັ້ນທາງເປ່ເພ ຈາກລົດບັນທຸກແກ່ຫີນ ຂອງບໍລິສັດ ຂຸດຄົ້ນຫີນປູນ 2-3 ບໍລິສັດ ໃນເຂດບ້ານດັ່ງກ່າວ ໃນໄລຍະລະດູຝົນ ເຮັດໃຫ້ເສັ້ນທາງ ກາຍເປັນຂຸມ ເປັນບວກ ແລະ ການສັນຈອນລໍາບາກຫຼາຍກວ່າເກົ່າ.

ຊາວບ້ານ ທົ່ງນາມີ ເມືອງປາກກະດິງ ແຂວງບໍລິຄໍາໄຊ ທີ່ສັນຈອນຜ່ານເສັ້ນທາງນັ້ນ ໄດ້ກ່າວຕໍ່ເອເຊັຽເສຣີ ໃນວັນ 26 ກັນຍາ 2024 ວ່າ:

“ທາງເປເພຫຼາຍ ຂຸມໃຫຍ່ຫຼາຍ ຈົນບໍ່ມີບ່ອນຫຼີກພຸ້ນແຫຼະ ລົດຈັກກໍ ລົດໃຫຍ່ໄປ ບາງເທື່ອກໍຄາເນາະ ປິນຫຼັງປິນໜ້າ ບາງເທື່ອກໍເງິ່ງໄປນີ້ໄປບໍ່ໄດ້ ເປັນມາດດົນແລ້ວ ຕັ້ງແຕ່ເລີ່ມບໍລິສັດ ຂະເຈົ້າຂົນຫີນມາເຮັດ ແລ້ວມັນເລີ່ມເປ່ເພ ແລ້ວຂະເຈົ້າບໍ່ແປງຫັ້ນນ່າ ກໍມີເອົາຫີນໃຫຍ່ມາຖອກມັນກໍຄືວ່າຫັ້ນແຫຼະ ລົດຂະເຈົ້າລົດໃຫຍ່ ທຽວໄປທຽວມາມັນກໍເພຄືເກົ່າ.”

ໃນການສັນຈອນເຂົ້າ-ອອກບ້ານ ໄລນະນີ້ ຊາວບ້ານມີຄວາມລໍາບາກໃນຍາມຝົນເສັ້ນທາງ ເປັນຂີ້ຕົມ ແລະ ໃນຍາມແລ້ງ ເສັ້ນທາງກໍເປັນຂີ້ຝຸ່ນ ເຖິງວ່າ ຊາວບ້ານຈະຮຽກຮ້ອງບໍລິສັດ ແລະ ພາກສ່ວນກ່ຽວຂ້ອງມາແກ້ໄຂ-ສ້ອມແປງ ແຕ່ກໍຍັງບໍ່ມີການແກ້ໄຂ.

ກ່ອນໜ້ານີ້ ບໍລິສັດ ເຄີຍສ້ອມແປງ ເສັ້ນທາງນີ້ ດ້ວຍການນໍາເອົາຫີນ ຂະໜາດໃຫຍ່ມາຖົມທາງ ແຕ່ກໍມີສະເພາະລົດໃຫຍ່ເທົ່ານັ້ນ ທີ່ໄປໄດ້ ຂະນະທີ່ລົດນ້ອຍ ກໍຍັງສັນຈອນລໍາບາກ ຄືເກົ່າ.

ຊາວບ້ານນາບວຍ ເມືອງປາກກະດິງ ໄດ້ກ່າວວ່າ:

“ລໍາບາກຫຼາຍເປັນແຕ່ຄົນແລ້ວ ເປັນທຸກປີ ຮອດຍາມນີ້ ກໍເປັນທຸກ ຂະເຈົ້າແກ່ຫີນແດ່ ປະຊາຊົນເຄີຍອັດທາງເທື່ອນຶ່ງແລ້ວ ແລ້ວທາງເມືອງກໍລົງມາຊອກມາເຊັນ ຫຍັງສຸດທ້າຍກໍຄືເກົ່າ ແປງກໍເອົາຂີ້ຫີນໃຫຍ່ໆ ອີ່ຫຍັງມາໃສ່ແລ້ວ ກໍມັນກໍໄປບໍ່ໄດ້ບາດນີ້ ຫັ້ນນ່າ ມັນແຮງໄປບໍ່ໄດ້ເລີຍ ພວກລົດເກ໋ງ ລົດເຕັ້ຍນີ້ແຮງໄປບໍ່ໄດ້ເລີຍ.”

ເຂດບ້ານນາບວຍ ນີ້ ມີບໍລິສັດ ຂຸດຄົ້ນຫີນປູນ ແລະ ໂຮງງານໂມ້ຫີນ ເຖິງ 3 ບໍລິສັດ ແລະ ທັງ 3 ບໍລິສັດ ແມ່ນໃຊ້ເສັນທາງນີ້ ໃນການແກ່ຫີນປູນ ເຂົ້າ-ອອກ ເຂດບ້ານ.

ໄລຍະທີ່ຜ່ານມາ ບໍລິສັດດັ່ງກ່າວ ກໍໄດ້ມີການສ້ອມແປງ ເສັ້ນທາງນີ້ ມາເລື້ອຍໆ ຢູ່ ແຕ່ຕົກມາໃນຍາມຝົນນີ້ ບໍ່ສາມາດເຮັດໄດ້ ຈຶ່ງໄດ້ປະຖິ້ມການສ້ອມແປງ ໄວ້ກ່ອນ.

ຊາວບ້ານນາບວຍ ອີກທ່ານນຶ່ງ ໄດ້ກ່າວວ່າ:

“ຂອງບໍລິສັດ ໂຮງໂມ້ຫີນ ລັດຖະບານເພິ່ນບໍ່ມີງົບ ມີແຕ່ວ່າເພິ່ນລະດົມບໍລິສັດຫັ້ນມາ ຊ່ວຍຮອດຍາມຝົນແລ້ວ ເຂົາກຊເຮັດບໍ່ໄດ້ ຕົກແລ້ງມາເຂົາກໍແປງຕໍ່ ຖົມດິນແປງຄືນ ຍາມຝົນມາກໍຝົນຕົກ ເພກໍໄດ້ໄປໄປຕາມນັ້ນກ່ອນແປງບໍ່ໄດ້.”

ກ່ຽວກັບເລື່ອງນີ້ ຕາງໜ້າ ຂອງບໍລິສັດພາຍຸ ພັດທະນາ ຂຸດຄົ້ນຫີນປູນ ຊຶ່ງເປັນ 1 ໃນ 3 ບໍລິສັດ ທີ່ຢູ່ໃນເຂດບ້ານນາບວຍ ກໍຢືນຢັນວ່າ ຈະມີການສ້ອມແປງ ເສັ້ນທາງດ່ັງກ່າວ ປະມານຕົ້ນເດືອນຕຸລາ ທີ່ຈະມາເຖິງນີ້ ຍ້ອນມີການແກ່ຫີນ ເຂົ້າອອກເຂດບ້ານຕະຫຼອດ ໂດຍບໍລິສັດ ຈະນໍາຫີນມາປູທາງ ເພື່ອໃຫ້ລົດແລ່ນໄດ້ສະດວກຕະຫຼອດປີ.

ກ່ອນໜ້ານີ້ ກໍເຄີຍມີການປະຖິ້ມການສ້ອມແປງ ຍ້ອນວ່າ ທັງ 3 ບໍລິສັດ ມີຂໍ້ຂັດແຍ່ງກັນ ວ່າ ບໍລິສັດໃດຈະສ້ອມແປງ ເສັ້ນທາງດັ່ງກ່າວໃນເດືອນ 5 ຫາ ເດືອນ 6 ຊຶ່ງເປັນໄລຍະທີ່ເຂົ້າສູ່ລະດູຝົນ ແຕ່ ກໍບໍ່ມີການສ້ອມແປງເນັ້ນທາງນັ້ນ.

ຕາງໜ້າ ຂອງບໍລິສັດພາຍຸ ພັດທະນາ ຂຸດຄົ້ນຫີນປູນ ໄດ້ກ່າວວ່າ:

“ແຕ່ຊ້ວງເດືອນ 8 ຫັ້ນນ່າ ປະສານກັນແລ້ວທັ້ງ 3 ບໍລິສັດເນາະ ຕົກລົງວ່າໝົດຝົນກໍຮ່ວມມືກັນສ້ອມແປງນີ້ນ່າ ໝົດຝົນກໍຄືວ່າເດືອນ 10 ຕາມສັນຍາ ທາງເຈົ້າເມືອງເພິ່ນ ຊີ້ນໍາວ່າໃຫ້ປະມານຕົ້ນເດືອນ 10 ໃຫ້ລົງມືສ້ອມແປງຫັ້ນນ່າ ໝົດຝົນກໍສ້ອມແປງເພາະວ່າ ຊ້ວງນີ້ເມື່ອກີ້ນີ້ເນາະ ມັນຝົນຕົກສ້ອມແປງກໍບໍ່ໄດ້ ເພາະວ່າ ມັນກໍຕ້ອງໄດ້ສ້ອມແປງ ເພາະວ່າ ລົດໜັກຫັ້ນມັນແລ່ນຕະຫຼອດ ມັນກໍເພເນາະ.”

ບັນຫາເສັ້ນທາງເປ່ເພ ໃນປະເທດລາວ ເປັນບັນຫາທີ່ແກ້ໄຂບໍ່ຕົກ ແລະ ເກີດຂຶ້ນທຸກປີ. ໃນຕົ້ນປີ 2024 ນີ້, ຊາວບ້ານຂັນໝາກ ແລະ ບ້ານໂພນຊູ ທີ່ອາໄສຢູ່ແຄມທາງ ທີ່ຢູ່ໃກ້ເຂດໂຮງງານຊີມັງ 3 ຢູ່ເມືອງວັງວຽງ ແຂວງວຽງຈັນ ກໍໄດ້ຮັບຜົນກະທົບ ເລື້ອງຂີ້ຝຸ່ນ ແລະ ມົນລະພິດ ທາງອາກາດຈາກລົດບັນທຸກ ແກ່ຫີນ-ແກ່ຊາຍ ທີ່ແລ່ນເຂົ້າ-ອອກໂຮງງານ.