ການສລອງປີໃໝ່ 2022 ທີ່ ສະຫະຣັຖອາເມຣິກາ

ປີ​ໃໝ່ສາກົລ ແລະບຸນປີ​ໃໝ່ສາກົລ ບໍ່ວ່າປີໃດໃນຍາມປົກຕິທົ່ວໄປ ​ຜູ້​ຄົນທັງ ຫລາຍ​ໃນ​ທົ່ວ​ໂລກ ຮວມທັງຊາວອາເອຣິກັນ ແລະ​ຊຸມຊົນຊາວ​ລາວຢູ່ສະຫະຣັຖອາເມຣິກາ ພາກັນສເລີມສລອງຢ່າງເບີກບານມ່ວນຊື່ນ ຍ້ອນຖືກັນວ່າເປັນບຸນສໍາຄັນ ທີ່ສົ່ງທ້າຍປີເກົ່າ ຕ້ອນຮັບປີໃໝ່ ຄືປີນີ້ກໍແມ່ນສົ່ງທ້າຍປີ 2021, ຕ້ອນຮັບປີ 2022 ຊຶ່ງເປັນປີ ທີ່ທຸກຄົນພາວະນາໃຫ້ໂຄວິດ-19 ຈືດຈາງຫາຍໄປຈາກໂລກນີ້.ແຕ່ໃນໄລຍະໂຄວິດ-19 ຍັງຣະບາດ, ການສລອງກໍບໍ່ຄຶກຄື້ນຄືເມື່ອກ່ອນ ຍ້ອນແຕ່ລະຄົນມີສະຕິລະວັງຕົວ, ປະຕິບັດຕາມມາຕການປ້ອງກັນຂອງທາງການເພື່ອບໍ່ໃຫ້ຕິດເຊື້ອ ແລະບໍ່ໃຫ້ເຊື້ອນີ້ຣະບາດອອກໄປຫລາຍຂຶ້ນຕື່ມອີກ. ດັ່ງນັ້ນ ໃນການສເລີມສລອງບຸນສົ່ງທ້າຍປີເກົ່າຕ້ອນຮັບປີ  ໃໝ່ປີນີ້ ຈຶ່ງບໍ່ຄືກ ຄື້ນມ່ວນຊື່ນຄືກັນກັບທຸກປີປົກກະຕິຜ່ານມາ ຊຶ່ງມີທັງການປະ ດັບປະດາຕາມບ້ານເຮືອນ, ຕາມຮ້ານຄ້າ, ຮ້ານອາຫານ, ສະຖານທີ່ສາທາຣະນະ, ຖນົນຫົນ ທາງຢ່າງສວຍສົດງົດງາມ, ມີໄຟແສງສີອ້ອມຕົ້ນຄຣິສມາສ ແລະສຽງເພັງປີໃໝ່ຢູ່ໄປທົ່ວ ອັນເປັນບັນຍາກາດ ມີຊີວິດຊີວາທີ່ຫາໄດ້ຍາກ ເປັນຕົ້ນໃນມື້ວັນທີ 31 ທັນວາ ຄືກ່ອນໜ້າມື້​ບຸນປີ​ໃໝ່.

ເວົ້າເຖິງເຣື່ອງການສລອງບຸນສົ່ງທ້າຍປີເກົ່າ 2021 ຕ້ອນຮັບປີໃໝ່ປີ 2022 ນີ້ ທ່ານ ສີວອນ ຈັນທະກຸມມານ ທີ່ເມືອງ ນົດຕິງແຮມ ຣັຖນິວແຮມເຊີ ສະຫະຣັຖອາເມຣິກາ ກ່າວຕໍ່ວິທຍຸເອເຊັຍເສຣີວ່າ ສລອງຢູ່ພາຍໃນຄອບຄົວ ບໍ່ຄຶກຄື້ນຄືທີ່ຜ່ານມາ ຍ້ອນໂຄວິດ-19 ຣະບາດ, ໃຜໆກໍລະມັດລະວັງ.

ເມື່ອທີ່ຄາວຍັງໜຸ່ມ ທ່ານເວົ້າວ່າ ກໍໄດ້ໄປຮ່ວມສລອງນໍາເພິ່ນຢູ່.

ສໍາລັບການສລອງໃນປີນີ້ ທ່ານເວົ້າວ່າ ສລອງຮ່ວມກັບພວກລູກໆຫລານໆ ຄືຊຸມປີທ່າຜ່ານໆມາ.

ໃນຕອນທ້າຍຂອງການສໍາພາດ ທ່ານ ສີວອນ ຈັນທະກຸມມານ ກໍໄດ້ຖືໂອກາດອວຍພອນໄຊປີໃໝ່ໃຫ້ຊາວລາວ ທັງຢູ່ຕ່າງປະເທດ ແລະຢູ່ພາຍໃນປະເທດ ໃນຖານະເປັນຄົນລາວຜູ້ນຶ່ງວ່າ:

ແລະຍານາງ ແພງສີ ສຸວັນນະວົງ ທີ່ເມືອງສະປ໊ອດສິລເວເນັຍ ຣັຖເວີຈິເນັຍ ສະຫະຣັຖອາເມຣິກາ ກໍກ່າວຕໍ່ວິທຍຸເອເຊັຍເສຣີວ່າ ການສເລີມສລອງບຸນປີໃໝ່ສາກົລປີ 2022 ນີ້ ບໍ່ໄດ້ໄປສລອງໃສ, ປີກາຍກໍຄືກັນ ຍ້ອນຢ້ານໂຄວິດ-19.

ແລະທ່ານ ສີເຫລືອງ ກິດຕະວົງ ທີ່ຣັຖວິສຄອນຊິນ ສະຫະຣັຖອາເມຣິກາກໍເວົ້າວ່າ ບໍ່ໄດ້ສລອງຫຍັງ ຍ້ອນໂຄວິດ-19 ຣະບາດ.

ຕາມປົກກະຕິ ການສລອງບຸນປີໃໝ່ສາກົລ,​ ເປັນທີ່ຮູ້ຈັກກັນດີໂດຍທົ່ວໄປວ່າ ການນັບຖອຍຫລັງສັ່ງລາປີເກົ່າ ຕ້ອນຮັບປີໃໝ່ ບໍ່ແມ່ນວ່າທຸກປະເທດ ຈະໄດ້ ສລອງພ້ອມກັນ ໃນເວລາດຽວກັນ ຄືຢູ່ເກາະນ້ອຍໆ Kirimati ໃນໝູ່ເກາະ ຄຣິສມາສ ຢູ່ມະຫາສະມຸດອິນເດັຍ ຕ້ອນຮັບປີໃໝ່ກ່ອນໝູ່, ຕໍ່ມາກໍແມ່ນປະເທດ ນິວຊີແລັນ, ອອສເຕຣເລັຍ ທີ່ໄດ້ຈັດງານສລອງບຸນປີໃໝ່ຢ່າງຄຶກຄື້ນ ມີທັງຈູດໝາກກະໂພກ, ຈູດບັ້ງໄຟດອກ ແຈ້ງສວ່າງທົ່ວທ້ອງຟ້າ. ຕໍ່ມາແມ່ນບັນດາປະ ເທດເອເຊັຍ-ປາຊີຟິກ ຮວມທັງຍີ່ປຸ່ນ, ເກົາຫລີໃຕ້ ແລະປະເທດອື່ນໆ ທັງ ລາວນໍາດ້ວຍ.

ເວົ້າເຖິງການນັບຖອຍຫລັງ ຕ້ອນຮັບປີໃໝ່ທີ່ຍິ່ງໃຫຍ່ໃນສະຫະຣັຖອາເມຣິກາ ແມ່ນຢູ່ຈັດຕຸຣັດ Times Square ທີ່ມະຫານະຄອນ New York ຊຶ່ງມີຣາຍການຕ່າງໆຄຶກຄື້ນເປັນພິເສດ ທຽບໃສ່ແຫ່ງອື່ນໆ ຮວມທັງການປະດັບປະດາ ເອ້ ຍ້ອງ ແລະດົນຕຣີທີ່ມີຊື່ສຽງໂດ່ງດັງ ໃຫ້ຜູ້ຄົນທັງຫລາຍ ທີ່ລໍຄອຍເບິ່ງ​ລູກໝາກ​ໂປ່​ງໃນ​ກວດ​ແກ້ວ​ຄຣິສຕອລ ​ທີ່​ເຫຼື້ອມ​ໃສ​ ຢ່ອນ​ລົງ​ມາ​ໃນ​ເວລາ​ທ່ຽງ​ຄືນນັ້ນ ຊົມ ແລະຟັງຢ່າງ​ສະໜຸກ​ສະໜາ​ນ ໃນສະພາບ​ອາກາດໜາວ​ເຢັນ ເວລາ 12:00 ໂມງກາງຄືນຂອງມື້ວັນທີ 31 ທັນວາ ກົງກັບເວລາ 12:00 ໂມງຕອນທ່ຽງຂອງວັນທີ 1 ມົກກະຣາ ທີ່ປະເທດລາວ.

ຜູ້ທີ່ບໍ່ມີໂອກາດໄດ້ໄປເຫັນຕົວຈິງຢູ່ Times Square ກໍພາກັນເບິ່ງທາງ​ໂທຣະທັດ ​ທີ່ລູກໝາກ​ໂປ່​ງໃນ​ກວດ​ແກ້ວ​ຄຣິສຕອລ ຖືກ​ປ່ອຍ​ລົງມາ​ຈາກ​ຕຶກສູງ ​ໃນ​ຕອນກາງຄືນ ເວລາ 11 ​ໂມງ 59 ນາທີ ຄື 60 ວິນາທີສຸດທ້າຍ ​ຂອງມື້ວັນທີ 31 ທັນວາ ເພື່ອນັບຖອຍຫລັງ ​ເຂົ້າຫາມື້​​ປີ​ໃໝ່ ທີ່ຕົກລົງ​ສູ່​ພຶ້ນ​ໃນຕອນທ່ຽງຄືນ ​ເວລາ 12:00 ​ໂມງ ຄືຕົກໃສ່ມື້ໃໝ່ - ວັນທີ 1 ມົກກະຣາ​ ຊຶ່ງ​ເປັນ​ນາທີ ທີ່​ຜູ້​ຄົນທັງຫລາຍ​ຕ່າງ​ກໍ​ຕື່ນ​ເຕັ້ນ, ​ເປີດ​ແກ້ວ​ເຫລົ້າ​ແຊມ​ເພນ ​ເຍັ້ນ​ໃສ່​ຈອກແກ້ວຕໍາ​ກັນ ​ອວຍພອນໄຊໃຫ້​ກັນ​ແລະ​ກັນ.

ມາເຖິງປີນີ້ ກໍເປັນເວລາ 117 ປີທີ່ Times Square ເປັນສູນກາງຂອງທົ່ວໂລກສົນໃຈໃນມື້ສົ່ງທ້າຍປີເກົ່າ ນັບຕັ້ງແຕ່ໄດ້ເລິ້ມປະຕິບັດມາເມື່ອປີ 1904 ໃນການຈັດງານສລອງບຸນ ຊັ້ນດາດຟ້າ ເພື່ອຕ້ອນຮັບປີໃໝ່ ໂດຍໄດ້ປ່ອຍລູກໂປ່ງທີ່ມີແສງສະຫວ່າງຂນາດໃຫຍ່ ຈາກຄວາມສູງ 70 ຟຸດ ຫລື 21 ແມັດປາຍ ຄັ້ງທໍາອິດລົງມາໃນປີ 1907. ເຖິງເວລາທ່ຽງຄືນ ໄຟລູກໂປ່ງສົ່ງທ້າຍປີເກົ່າຈະປິດລົງ ເມື່ອໂຕເລກຂອງປີໃໝ່ “2022” ແຈ້ງສະຫວ່າງຢ່າງມີຊີວິດຊີວາເທິງ Times Square ແລະປະເພນີນີ້ກາຍເປັນສັນຍາລັກສາກົລ ຂອງຊາວໂລກ ທີ່ຮັກຫອມສັນຕິພາບ, ຄວາມຮັກ, ສຸຂພາບດີ, ອະນາຄົດແຈ່ມໃສ ແລະດີກວ່າເກົ່າໃນປີໃໝ່ນີ້.

ຫລັງຈາກນັ້ນຢູ່ຕາມຣັຖຕ່າງໆ ຂອງສະຫະຣັຖອາເມຣິກາ ທີ່ເວລາແຕກຕ່າງກັນ ໃນແຕ່ລະເຂດນັ້ນ ກໍພາກັນນັບຖອຍຫລັງ ຕ້ອນຮັບປີໃໝ່ຕາມເວລາຂອງຕົນ,  ຣັຖທີ່ນັບຖອຍຫລັງລຸນຣັຖອື່ນໆກໍມີ 2 ຣັຖ ຄືຣັຖ Alaska ແລະຣັຖ Hawaiiຊຶ່ງເປັນຣັຖ ທີ່ຢູ່ນອກແຜ່ນດິນໃຫຍ່ຂອງສະຫະຣັຖ.

ໃນໂອກາດບຸນສົ່ງທ້າຍປີເກົ່າ 2021 ຕ້ອນຮັບປີໃໝ່ 2022 ນີ້ ​ຂໍ​ອວຍພອນໄຊອັນປະເສີດ ໃຫ້ທຸກທ່ານຈົ່ງມີສຸຂພາບເຂັ້ມແຂງ, ມີຄວາມສຸກກາຍສະບາຍໃຈ, ປຣາຖນາອັນໃດທີ່ເປັນທໍາ ກໍຂໍໃຫ້ໄດ້ດັ່ງຫວັງ. ສະບາຍດີປີໃໝ່ Happy New Year.