ທາງການແຂວງຈໍາປາສັກ ແລະ ຊຽງຂວາງ ອອກແຈ້ງການ ຫ້າມຮ້ານອາຫານ ແລະ ສະຖານບັນເທີງ ຈໍາໜ່າຍ ຫຼື ນໍາໃຊ້ສານເສບຕິດ ຢ່າງເດັດຂາດ

ທາງການແຂວງຈໍາປາສັກ ແລະ ຊຽງຂວາງ ໄດ້ອອກແຈ້ງການ ຫ້າມຮ້ານອາຫານ ແລະ ສະຖານບັນເທີງທຸກແຫ່ງ ຈໍາໜ່າຍ ຫຼື ນໍາໃຊ້ສານເສບຕິດ ຢ່າງເດັດຂາດ, ພາຍຫຼັງເກີດເຫດ ນັກທ່ອງທ່ຽວຕ່າງປະເທດ 6 ຄົນ ເສຍຊີວິດ ຫຼັງຈາກດື່ມເຫຼົ້າ ທີ່ຄາດວ່າ ມີສານເມທານອລປະສົມ, ຢູ່ທີ່ເມືອງວັງວຽງ ແຂວງວຽງຈັນ ເມື່ອບໍ່ດົນມານີ້.ກ່ຽວກັບເລື່ອງນີ້ ຜູ້ປະກອບການ ດ້ານການທ່ອງທ່ຽວ ຢູ່ເມືອງໂຂງ ແຂວງຈໍາປາສັກ ນາງໜຶ່ງ ກ່າວວ່າ ປັດຈຸບັນ ຍັງບໍ່ເຫັນພາກສ່ວນທີ່ກ່ຽວຂ້ອງ ລົງມາກວດກາເທື່ອ ແຕ່ເພື່ອຫຼີກລ້ຽງ ບໍ່ໃຫ້ເກີດເຫດການດັ່ງກ່າວ ກໍຢາກແນະນໍາ ນັກທ່ອງທ່ຽວ ໃຫ້ຊື້ເຄື່ອງດື່ມມາດື່ມເອງ ຫຼື ຊື້ເຄື່ອງດື່ມທີ່ມີການຮັບຮອງ ມາດຕະຖານສາກົນ ເພື່ອຄວາມປອດໄພ ຍ້ອນ ບາ ຫຼື ຮ້ານນັ່ງດື່ມບາງຮ້ານ ກໍຍັງຂາຍຄັອກເທວ ທີ່ບໍ່ສາມາດຮູ້ສ່ວນປະສົມຢ່າງຄັກແນ່ໄດ້.

ດັ່ງ ຍານາງ ກ່າວຕໍ່ ວິທຍຸເອເຊັຽເສຣີ ໃນມື້ວັນທີ 25 ພະຈິກ 2024 ນີ້ວ່າ:

"ໂອ ຕອນນີ້ ຝັ່ງນ້ອງກໍບໍ່ແນ່ຄືກັນ ວ່າຕອນນີ້ ເຂົາຈັດແຈງກັນແນວໃດ ແຕ່ວ່າ ສ່ວນຫຼາຍ ຄັນວ່າເປັນແນະນໍາປອດໄພ ກໍຄືແນະນໍາວ່າຮັບປະທານເປັນເບຍແຫຼະ ດີກວ່າ ເອີ ບາງຮ້ານເຂົາອາດຈະມີຂາຍເປັນຄັອກເທວ ແຕ່ວ່າເຂົາຈະໃສ່ອີ່ຫຍັງ ຝັ່ງນ້ອງກໍບໍ່ຮູ້ຕົວນີ້."

ກ່ຽວກັບເລື່ອງນີ້ ແຂວງຈໍາປາສັກ ໄດ້ລົງພື້ນທີ່ກວດກາຮ້ານອາຫານ ແລະ ສະຖານບັນເທີງ ໃນລັກສະນະດັ່ງກ່າວ ຢູ່ເລື້ອຍໆ ເພື່ອຮັບປະກັນຄວາມປອດໄພ ໃຫ້ແກ່ປະຊາຊົນ ແລະນັກທ່ອງທ່ຽວຊາວຕ່າງປະເທດ.

ສໍາລັບປີນີ້ ຂັ້ນເມືອງໄດ້ຮັບແຈ້ງການຈາກຂັ້ນແຂວງແລ້ວ ແລະ ກໍາລັງຢູ່ໃນຂັ້ນຕອນຈັດຕັ້ງປະຕິບັດ, ອີງຕາມຄໍາເວົ້າຂອງ ເຈົ້າໜ້າທີ່ຫ້ອງການຖະແຫຼງຂ່າວ ວັດທະນະທໍາ ແລະທ່ອງທ່ຽວ ຢູ່ເມືອງໂຂງ ແຂວງຈໍາປາສັກ ທ່ານໜຶ່ງ ທີ່ກ່າວວ່າ:

"ເມືອງເຮົາບໍ່ເຄີຍມີບັນຫາ ເລື່ອງອັນນີ້ຈັກເທື່ອເນາະ ແຕ່ວ່າປີໜຶ່ງ ເຮົາຕ້ອງໄດ້ເຮັດ ໄດ້ລົງເບິ່ງ ກວດກາເພື່ອຄວາມປອດໄພ ຄວາມເປັນລະບຽບ ຮຽບຮ້ອຍໃຫ້ນັກທ່ອງທ່ຽວທີ່ມາບ້ານເຮົາ ເຈົ້າ ແມ່ນໆ ໄປເບິ່ງວ່າ (ເຫຼົ້າ) ໝົດອາຍຸບໍ່ ເຮົາຕ້ອງໄດ້ກວດກາເບິ່ງ."

ຢູ່ແຂວງຊຽງຂວາງ ພາກສ່ວນທີ່ກ່ຽວຂ້ອງ ກໍໄດ້ລົງພື້ນທີ່ກວດກາ ຄວາມຮຽບຮ້ອຍຂອງຮ້ານອາຫານ ແລະ ສະຖານບັນເທີງ. ປັດຈຸບັນ ຍັງບໍ່ທັນພົບຄວາມ ຜິດປົກກະຕິຫຍັງເທື່ອ. ດັ່ງ ເຈົ້າໜ້າທີ່ຫ້ອງການຖະແຫຼງຂ່າວ ວັດທະນະທໍາ ແລະທ່ອງທ່ຽວ ຢູ່ເມືອງແປກ ແຂວງຊຽງຂວາງ ທ່ານໜຶ່ງ ກ່າວວ່າ:

"ບໍ່ໆ ໄດ້ໆ ຢູ່ຊຽງຂວາງເຮົາ ໄດ້ ຄືຈະກິນເຫຼົ້າແບບຢູ່ຮ້ານແມ່ນຫຍັງທົ່ວໄປກໍໄດ້ ຫ້າມເກີນໂມງ ເກີນໂມງຄື 12 ໂມງສູງສຸດ ໂອ ຕອນນີ້ ກໍມີທີມງານກວດ ກໍເລື່ອງໄປກວດແບບກິນເຫຼົ້າ ກິນຫຍັງນີ້ກໍ ມີແຕ່ໄປກວດຄວາມເປັນລະບຽບຮຽບຮ້ອຍ ຊື່ໆ ດອກ."

ເຖິງແມ່ນວ່າ ຈະເກີດເຫດນັກທ່ອງທ່ຽວ ອາການໂຄມ່າ ແລະ ເສຍຊີວິດ ຈາກການດື່ມເຫຼົ້າ ທີ່ຄາດວ່າ ຈະມີສານເມທານອລປະສົມຢູ່ ແຕ່ສະພາບການທ່ອງທ່ຽວໃນພາບລວມ ຢູ່ແຂວງຊຽງຂວາງ ກໍຍັງບໍ່ທັນໄດ້ຮັບຜົນກະທົບປານໃດ, ດັ່ງ ຊາວລາວທີ່ເຮັດວຽກ ໃນຂະແໜງການທ່ອງທ່ຽວ ຢູ່ແຂວງຊຽງຂວາງ ທ່ານໜຶ່ງ ກ່າວວ່າ:

"ໂອ້ ມາຫຼາຍໆ ຄົນໄທ ຄົນຢູໂຣບ ກໍມາເບິດຫັ້ນແຫຼະ ມີໆ ເຈົ້າໜ້າທີ່ ກໍລົງກວດຕະຫຼອດຫັ້ນແຫຼະ ຜ່ານມາ ກໍບໍ່ມີນ່າ (ສານເສບຕິດ) ຍັງບໍ່ເຄີຍມີຫັ້ນນ່າ."

ອີງຕາມແຈ້ງການ ຂອງແຂວງຈໍາປາສັກ ໃນມື້ວັນທີ 22 ພະຈິກ 2024 ລະບຸວ່າ ໄດ້ມອບໝາຍໃຫ້ພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວ ແລະ ອົງການສາທາລະນະສຸກ ທົ່ວແຂວງ ແຕ່ງຕັ້ງພະນັກງານກວດກາ ມາດຕະຖານ ຮ້ານອາຫານ ແລະ ຄຸນນະພາບເຄື່ອງດື່ມ ເພື່ອຮັບປະກັນຄວາມປອດໄພໃຫ້ແກ່ຜູ້ບໍລິໂພກ.

ຕໍ່ມາໃນມື້ວັນທີ 24 ພະຈິກ 2024, ທາງການແຂວງຊຽງຂວາງ ກໍໄດ້ສັ່ງຫ້າມ ຮ້ານອາຫານ ແລະ ສະຖານບັນເທີງ ຈໍາໜ່າຍສິ່ງເສບຕິດ ເຊັ່ນ: ນໍ້າກະທ່ອມ, ປູມເປົ້າ, ບາຣາກູ, ສານລະເຫີຍ, ຢາບ້າ, ກັນຊາ ແລະ ອື່ນໆ ຢ່າງເດັດຂາດ.