ບໍລິສັດຈີນ ກັ່ນນ້ຳມັນເຕົາ, ອົບຢາງລົດເກົ່າ ສົ່ງກິ່ນຂິວ ຢ່າງໜັກ

ບໍລິສັດ ຟໍຈູນ ຈຳກັດ ຂອງນັກລົງທຶນຈີນ ທີ່ເປັນເຈົ້າຂອງໂຮງງານ 2 ແຫ່ງ ທີ່ຜະລິດນ້ຳມັນເຕົາ ທີ່ເອົານ້ຳມັນເຄື່ອງເກົ່າ ມາຜະລິດຄືນ ແລະ ໂຮງງານອົບຢາງຕີນລົດເກົ່າ ເພື່ອແຍກອອກໄປຕົ້ມ ແລະ ກັ່ນເປັນນ້ຳມັນເຕົາ, ຖ່ານກາກບອນ ແລະ ເຫຼັກລວດ ຢູ່ບ້ານດົງຄຳຫຼວງ, ນະຄອນໄກສອນພົມວິຫານ ແຂວງສະຫວັນນະເຂດ ເພື່ອສົ່ງຂາຍ ໃຫ້ໂຮງງານອຸດສາຫະກຳ ຜະລິດຊີມັງ ແລະ ໂຮງງານເຫຼັກ ສົ່ງກິ່ນຂິວ ກະທົບຕໍ່ຄວາມເປັນຢູ່ ຂອງຊາວບ້ານ ຢ່າງໜັກໜ່ວງ. ດັ່ງຊາວບ້ານ ຢູ່ບ້ານດົງຄຳຫຼວງ, ນະຄອນໄກສອນພົມວິຫານ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ວັນທີ 2 ກັນຍາ 2024 ນີ້ວ່າ:

“ຊ່ວງນີ້ ຄືວ່າເພິ່ນສັ່ງໃຫ້ປິດຢູ່ໄດ໋ລະ. ແມ່ນ, ຄືວ່າມັນກະທົບກັບປະຊາຊົນບໍ ເຂົາວ່າ. ຈັ່ງວ່າ ມັນບໍ່ຮູ້ນຳເພິ່ນໄດ໋ ຄືວ່າເພິ່ນສັ່ງປິດ ແລ້ວກໍບໍ່ໄດ້ເຮັດຫຍັງ. ບໍ່, ປະມານເດືອນນີ້ແຫຼະ. ໂອ້, ຂິວ ໃນຂອບເຂດບ້ານນັ້ນແຫຼະ, ແຕ່ມັນຂິວແຮງ.”

ເນື່ອງຈາກໂຮງງານດັ່ງກ່າວນີ້, ໄດ້ສ້າງຜົນກະທົບ ຕໍ່ສະພາບການເປັນຢູ່ ຂອງພວກຊາວບ້ານ ໃນເຂດບ້ານດັ່ງກ່າວ ໂດຍກົງ ຈຶ່ງເຮັດໃຫ້ ຄະນະສະເພາະກິດ ແລະ ຜະແນກອຸດສາຫະກຳ ແລະ ການຄ້າ ແຂວງສະຫວັນນະເຂດ ລົງໄປກວດສອບ ແລະ ດຳເນີນການ ສັ່ງໂຈະກິດຈະການໄປ ໃນຮອບສັບປະດາ ທີ່ຜ່ານມາ. ດັ່ງຊາວບ້ານ ຢູ່ບ້ານດົງຄຳຫຼວງ, ນະຄອນໄກສອນພົມວິຫານ ອີກທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເອີ, ເພາະວ່າໂຕຢູ່ໂຮງງານໂຕນັ້ນ ອັນວ່າກິ່ນຂິວຫັ້ນ ເປັນມົນລະພິດ ເຂົາໜ້າຈະສັ່ງປິດແລ້ວຕິບໍ, ວ່າຊັ້ນນ່າ. ເປັນສະເພາະຈຸດຊື່ໆ.”

ທີ່ຜ່ານມາ, ພາຍໃນຂອບເຂດ ບ້ານດົງຄຳຫຼວງ, ນະຄອນໄກສອນພົມວິຫານ ແມ່ນມີໂຮງງານ ທີ່ເຮັດກິດຈະການ ກ່ຽວກັບນ້ຳມັນ ພຽງແຕ່ແຫ່ງດຽວ, ເຊິ່ງເປັນຂອງນັກທຸລະກິດ ຊາວຈີນ ແລະ ໄດ້ສົ່ງກິ່ນຂິວ, ໂດຍສະເພາະ ໃນເຂດອ້ອມຂ້າງໂຮງງານ. ສ່ວນໃນເຂດອື່ນໆ ເປັນຕົ້ນ ບໍລິເວນທີ່ມີບ້ານຈັດສັນ ຫຼາຍຫຼັງຄາເຮືອນ ແມ່ນບໍ່ທັນໄດ້ຮັບ ຜົນກະທົບ ພໍເທົ່າໃດ. ດັ່ງຊາວບ້ານ ຢູ່ບ້ານດົງຄຳຫຼວງ, ນະຄອນໄກສອນພົມວິຫານ ອີກທ່ານໜຶ່ງ ກ່າວວ່າ:

“ເວົ້າເລື້ອງສາງນ້ຳມັນແທ້ ມັນກໍບໍ່ໄດ້ແມ່ນ ຊິສົ່ງກິ່ນຫຍັງ ເອົາແທ້ເອົາວ່າ, ມັນກໍມີລະບຽບການ ດ້ານສິ່ງແວດລ້ອມ ຂອງເຂົາເຈົ້າເດ້ ເພາະວ່າ ເຮົາກໍເຄີຍຢູ່ໃກ້ ສາງນ້ຳມັນມາກ່ອນ. ຄັນວ່າຢູ່ດົງຄຳຫຼວງ ມັນມີສາງນ້ຳມັນໂຕໜຶ່ງ ເພິ່ນກໍກຳລັງສ້າງ, ກໍມີແຕ່ໂຕດຽວຫັ້ນແຫຼະ.”

ໃນໄລຍະທີ່ຜ່ານມາ, ໂຮງງານດັ່ງກ່າວນີ້ ໄດ້ຖືກສັ່ງປິດ ຍ້ອນຂະບວນການຜະລິດ ຂອງເຂົາເຈົ້າ ຂາດມາດຕະຖານ ທາງດ້ານເຕັກນິກ ແລະ ສິ່ງແວດລ້ອມ ຈຶ່ງເຮັດໃຫ້ມີກິ່ນຂິວ. ຖ້າຫາກຜູ້ລົງທຶນ ບໍ່ດຳເນີນການ ຮີບຮ້ອນຟື້ນຟູຄືນ ສະພາບແວດລ້ອມ ພາຍໃນໄລຍະເວລາ ທີ່ກຳນົດ, ທາງການຈັດຕັ້ງພາກລັດ ໃນແຂວງສະຫວັນນະເຂດ ຈະດຳເນີນການຕື່ມ ໃນຂັ້ນຕໍ່ໄປ. ດັ່ງເຈົ້າໜ້າທີ່ ທີ່ເຮັດວຽກ ກ່ຽວກັບການກວດກາໂຮງງານ ຢູ່ນະຄອນໄກສອນພົມວິຫານ ແຂວງສະຫວັນນະເຂດ ນາງໜຶ່ງ ກ່າວວ່າ:

“ຢູ່ນະຄອນໄກສອນ ເຂົາເຈົ້າສັ່ງອັນນັ້ນແລ້ວ, ສັ່ງປິດແລ້ວ ໂຕນ້ຳມັນເຕົາຫັ້ນ. ໂຕນີ້ກໍບໍ່ແນ່ໃຈ (ວ່າຊິເປີດຄືນໄດ້ ໄລຍະໃດ) ເພາະວ່າ ຫາກໍຊ່ວງທິດຫຼັງນີ້ນ່າ.”

ກ່ອນໜ້ານີ້, ໃນລະຫວ່າງວັນທີ 26-28 ສິງຫາ 2024, ຄະນະສະເພາະກິດ ແຂວງສະຫວັນນະເຂດ ແລະ ພາກສ່ວນທີ່ກ່ຽວຂ້ອງ ໄດ້ລົງຕິດຕາມ ໂຮງງານຜະລິດນ້ຳມັນເຕົາ ຂອງບໍລິສັດ ຟໍຈູນ ຈຳກັດ ຢູ່ບ້ານດົງຄຳຫຼວງ, ນະຄອນໄກສອນພົມວິຫານ ແຂວງສະຫວັນນະເຂດ ພາຍຫຼັງໄດ້ຮັບການຮ້ອງຮຽນ ມາຈາກຊາວບ້ານ ໃຫ້ເລັ່ງແກ້ໄຂ ແບບຮີບດ່ວນ ເພາະຂະບວນການຜະລິດ ຂອງໂຮງງານ ແມ່ນສົ່ງກິ່ນຂິວ ຢ່າງຮຸນແຮງ ສົ່ງຜົນກະທົບ ຕໍ່ສະພາບແວດລ້ອມ ແລະ ຊີວິດການເປັນຢູ່ ຂອງປະຊາຊົນ ຢ່າງຕໍ່ເນື່ອງ.

ຂະນະດຽວກັນ, ທາງຄະນະສະເພາະກິດ ດັ່ງກ່າວ ກໍໄດ້ລົງຕິດຕາມ ໂຮງງານຜະລິດເມັດຢາງ ຢູ່ຫຼັກ 11 ບ້ານບ້ານດົງນາຄຳ, ນະຄອນໄກສອນພົມວິຫານ, ໂຮງງານລາວຊູຢວນ ພລາສຕິກ ແລະ ປຸງແຕ່ງຢາງພາລາ ຢູ່ບ້ານນາຈະຫຼີດ, ນະຄອນໄກສອນພົມວິຫານ, ໂຮງງານຜະລິດເມັດຢາງ ໂຊກມີໄຊ ຢູ່ບ້ານທ່າຊະໂນ, ນະຄອນໄກສອນພົມວິຫານ, ເຊິ່ງບັນດາໂຮງງານ ດັ່ງກ່າວນີ້ ໃນໄລຍະຜ່ານມາ ແມ່ນມີການນຳເຂົ້າ ແລະ ເກັບຊື້ສິ່ງເສດເຫຼືອ ເພື່ອມາຣີໄຊເຄິລ ຜະລິດເປັນເມັດຢາງ ເພື່ອສົ່ງຂາຍ ທັງພາຍໃນ ແລະ ຕ່າງປະເທດ.