ເມືອງເຟືອງບໍ່ມີນໍ້າສະອາດໃຊ້

ມະນີຈັນ
2015-11-23
ອີແມວລ໌
ຄໍາເຫັນ
Share
ພິມ
ຊາວບ້ານ ທີ່ໄດ້ຍ້າຍມາຢູ່ ເມືອງເຟືອງ ແຂວງວຽງຈັນ
ຊາວບ້ານ ທີ່ໄດ້ຍ້າຍມາຢູ່ ເມືອງເຟືອງ ແຂວງວຽງຈັນ
Wikipedia

ປະຊາຊົນ ກວ່າ 6 ພັນ ຄົນ ຢູ່ບ້ານ ໂພນສະຫວາດ ເມືອງ ເຟືອງ ແຂວງ ວຽງຈັນ ທີ່ ຖືກໃຫ້ ຍ້າຍອອກ ຈາກ ໂຄງການ ເຂື່ອນ ໄຟຟ້າ ນໍ້າງື່ມ2 ແຕ່ດົນນານ ແລ້ວນັ້ນ ຈົນ ຮອດ ປັຈຈຸບັນ ພວກເຂົາເຈົ້າ ກໍຍັງບໍ່ມີ ນໍ້າ ປະປາ ຫຼື ນໍ້າ ສະອາດ ໃຊ້ ຍ້ອນ ຣັຖບານ ບໍ່ມີ ໂຄງການ ຊ່ວຍເຫລືອ, ປະຊາຊົນ ຕ້ອງໄດ້ ໃຊ້ນໍ້າ ຈາກຫ້ວຍ ທີ່ ບໍ່ສະອາດ ທັງຂຸ່ນ ໃນ ເວລາ ຝົນຕົກ. ຕາມຄໍາເວົ້າ ຂອງ ເຈົ້າໜ້າທີ່ ຜແນກ ສາທາຣະນະສຸກ ແຂວງ ວຽງຈັນ:

"ບໍ່ ບໍ່ທັນໄດ້ ເຮັດແນວນັ້ນ ຂະເຈົ້າ ປໍ້ານໍ້າ ຈາກ ຫ້ວຍຫັ້ນ ຂຶ້ນ ໄປເລີຍນະ ກະເຮັດ ອ່າງລະກະ ປ່ອຍໄປຕາມ ເລີຍຫັ້ນນະ ສ່ວນຫລາຍ ຂະເຈົ້າ ນໍ້າດື່ມ ກະຕົ້ມ ກິນນະ ກະບໍ່ຢາກ ສະອາດ ແຫຼະ ຂະເຈົ້າ ກະທວງກັນ ຢູ່ຫັ້ນ ຍາມຝົນກໍ໊".

ທ່ານກ່າວ ຕື່ມວ່າ ໃນ ຣະຍະ ຜ່ານມາ ປະຊາຊົນ ທີ່ໃຊ້ນ້ຳ ໃນເຂດນັ້ນ ມັກເຈັບເປັນ ຢູ່ເລື້ອຍ, ຫຼາຍຄົນ ມັກເປັນ ຕຸ່ມ ຄັນ ຕາມໂຕ ແລະ ອີກ ຈໍານວນ ນຶ່ງ ກໍມັກ ຖອກທ້ອງ ຍ້ອນກິນນໍ້າ ບໍ່ ສະອາດ ເຖິງແມ່ນ ວ່າຈະຕົ້ມສຸກ ແລ້ວ ແຕ່ກໍ ອາຈຂ້າ ເຊື້ອພຍາດ ບໍ່ໝົດ. ດັ່ງນັ້ນ ປະຊາຊົນ ຈຶ່ງຕ້ອງທົນ ກັບຄວາມ ເດືອດຮ້ອນ ຕໍ່ໄປ.

ເມື່ອເດືອນ ກໍຣະກະດາ ຜ່ານມາ ມີຂ່າວວ່າ ບໍຣິສັດ ເອກກະຊົນ ແຫ່ງນຶ່ງ ໃນລາວ ໄດ້ ເຊັນ ສັນຍາ ກັບທາງການ ແຂວງ ວຽງຈັນ ເພື່ອ ສ້າງ ຣະບົບ ນໍ້າປະປາ ໃຫ້ ປະຊາຊົນ ບ້ານ ໂພນສະຫວາດ ໂດຍໃຊ້ ງົບປະມານ ຂອງ ບໍຣິສັດ ກ່ອນ 1 ແສນ ໂດລາ ສະຫະຣັຖ. ແຕ່ມາຮອດ ປັຈຈຸບັນ ຂ່າວນີ້ ກໍ ມິດງຽບໄປ.

ນອກຈາກ ນັ້ນແລ້ວ ເຂດຫ່າງໄກ ໃນອີກຫຼາຍ ແຂວງ ຂອງລາວ ກໍຍັງຂາດ ນໍ້າສະອາດ ໃຊ້ ເພາະ ທາງການລາວ ບໍ່ມີ ງົບປະມານ ສ້າງຣະບົບ ນໍ້າສະອາດ, ຕ້ອງໄດ້ ອາສັຍ ການຊ່ວຍເຫລືອ ຈາກ ອົງການ ຈັດຕັ້ງ ສາກົລ ຕ່າງໆ.

ຄໍາເຫັນ (1)
Share

ຄ.ນະຄຳມ່ວນ

ຈາກ ທ່າແຂກ

ຣັຖບານລາວ ຖືທິດສະດີ ສລາດສ່ອງໃສ ໄວໄຟຮອບດ້ານ ແກ້ບັນຫາຂ້າທາດ ໃຫ້ໄດ້ກ່ອນ ຈຶ່ງກ່າວເຖິງຄວາມ ຈຳເປັນຂອງ ປະຊາຊົນ, ພິດສັຈຈະ ກັບ ປະຊາຊົນ ແຕ່ຮັກສາຫນ້າ, ພັກ-ຣັຖ ທັງຫລາຍ ກໍ່ຄາຍຄວາມຢາກ ໄດ້ຕາມ ປະຊາທິປະໄຕ ລວມສູນ ແນວໄດ ກໍ່ແນວນັ້ນ ຫັ້ນແລ້ວ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Dec 13, 2015 02:46 PM

ເຕັມຫນ້າ