ປະຊາຊົນ ຕ້ອງການ ວິດຖ່າຍ ຫຼັງ​ໄຟ​ໄໝ້

ໄມຊູລີ
2018-05-30
ອີແມວລ໌
ຄໍາເຫັນ
Share
ພິມ
ສະພາບຂອງບ້ານເຮືອນ ທີ່ຖືກທໍາລາຍຈາກອັຄຄີພັຍ ເມື່ອວັນທີ 7 ພຶສພາ 2018 ບ້ານສັນແຟນ ເມືອງຄໍາ ແຂວງຊຽງຂວາງ
ສະພາບຂອງບ້ານເຮືອນ ທີ່ຖືກທໍາລາຍຈາກອັຄຄີພັຍ ເມື່ອວັນທີ 7 ພຶສພາ 2018 ບ້ານສັນແຟນ ເມືອງຄໍາ ແຂວງຊຽງຂວາງ
Screen captured: Laos update

ຫ້ອງການ ກາແດງ ເມືອງຄໍາ ແຂວງຊຽງຂວາງ ເປັນຫ່ວງນໍາ ປະຊາຊົນ ບ້ານສັນແຟນ ຈໍານວນ 40 ຄອບຄົວ, ປະ​ມານ 300 ຄົນ, ທີ່ເຮືອນຖືກໄຟໄໝ້ ຊຶ່ງຕ້ອງ ໄດ້ປຸກເຮືອນໃໝ່ ຢູ່ນັ້ນ ໄດ້ປຸກຕູບ ຢູ່ຊົ່ວຄາວ. ຂະນະນີ້ ຍັງບໍ່ມີວິດຖ່າຍ ແລະ ນໍ້າໃຊ້ ບໍ່ພຽງພໍ ອັນມີຄວາມສ່ຽງສູງ ທີ່ຈະເປັນພຍາດໄດ້, ດັ່ງ ເຈົ້າໜ້າທີ່ ຫ້ອງການກາແດງ ກ່າວຕໍ່ ວິທຍຸ ເອເຊັຽ ເສຣີ ໃນມື້ວັນທີ 25 ພຶສພານີ້ວ່າ:

"ຄວາມຕ້ອງການ ຂອງຂະເຈົ້າ ຍາມນີ້ລະແມ່ນ ເຣຶ່ອງສຸຂອະນາມັຍ ເປັນຕົ້ນແມ່ນ ເຣື່ອງວິດຖ່າຍເນາະ ແລ້ວກໍ ນໍ້າໃຊ້ ຜ່ານມາຫັ້ນ ທາງ ອົງການກາແດງ ຂອງໄທເຮົາ ເຄີຍໄດ້ໄປເຮັດນໍ້າລິນມາເນາະ ໃຊ້ໄດ້ສອງຫົວຂຶ້ນມາບ້ານ ແລ້ວບາດນີ້ ໄຟໄໝ້ທໍ່ມັນຫັ້ນແຫລະ ເອີ້ນວ່າ ໃຊ້ບໍ່ໄດ້ຫົວນຶ່ງແລ້ວ ຍັງໃຊ້ໄດ້ ແຕ່ຫົວດຽວ ເຣື່ອງອື່ນໆ ຫລາຍພາກສ່ວນ ເຂົ້າມາຊ່ວຍຫລາຍແລ້ວ.”

ນາງກ່າວອີກວ່າ ທຸກມື້ນີ້ ຊາວບ້ານດັ່ງກ່າວ ຍັງມີສຸຂພາບແຂງແຮງດີ ບໍ່ເຈັບບໍ່ເປັນ ພຽງແຕ່ ເປັນຫ່ວງນໍາ ເຣື່ອງສຸຂອະນາມັຍ ຂອງພວກ ເຂົາເຈົ້າ ເພາະຍັງບໍ່ມີວິດຖ່າຍ ແລະ ເວລາອາບນໍ້າ, ລ້າງໜ້າ, ຊັກເຄື່ອງ ແລະ ອື່ນໆ ກໍບໍ່ມີນໍ້າພຽງພໍ, ເຮັດໃຫ້ຊາວບ້ານສ່ວນຫຼາຍ ຈໍາຕ້ອງ ໄດ້ໄປຕັກນໍ້າຫ້ວຍ ມາໃຊ້.

ປັດຈຸບັນ ປະຊາຊົນ ບ້ານສັນແຟນ 300 ຄົນ ທີ່ໄຟໄໝ້ເຮືອນນັ້ນ ໄດ້ຮັບການຊ່ອຍເຫລືອ ເປັນເຄື່ຶອງອຸປະໂພກ-ບໍຣິໂພກ ເປັນຕົ້ນ ເຂົ້າສານ, ນໍ້າດື່ມ, ເຄື່ອງນຸ່ງຫົ່ມ ແລະ ຢາຮັກສາພຍາດ ຈາກຫຼາຍພາກສ່ວນ ຮວມທັງ ໂຄງການ ຫຼຸດຜ່ອນ ຄວາມທຸກຍາກ ແລະ ອົງການກາແດງ ຢູ່ແຂວງຊຽງຂວາງ ແລະ ຈາກ ນະຄອນຫລວງວຽງຈັນ.

ໄຟໄໝ້ເຮືອນປະຊາຊົນ ບ້ານສັນແຟນ ເກີດຈາກ ໄຟຟ້າລັດວົງຈອນ, ໃນນັ້ນ ໄໝ້ເໝິດຫລັງ ມີ 30 ຫລັງ ແລະ ເສັຽຫາຍໜັກ 10 ຫລັງ. ຄວາມເສັຽຫາຍທັງໝົດ ຫຼາຍກວ່າ 1,2 ຕື້ກີບ. ໄຟໄໝ້ ເກີດຂຶ້ນເວລາ 4 ໂມງແລງ ຂອງມື້ວັນທີ 7 ພຶສພາ 2018 ຜ່ານມາ  ໃນຂະນະທີ່ ຊາວບ້ານສ່ວນຫຼາຍ ອອກໄປເຮັດໄຮ່ ເຮັດສວນ ບໍ່ມີໃຜຢູ່ເຮືອນ. ດັ່ງນັ້ນ ຈຶ່ງບໍ່ມີຄົນຄຸມໄຟໄດ້ ເຮັດໃຫ້ໄຟ ລຸກລາມ ໄປເຮືອນໃກ້ຄຽງ ໄດ້ຢ່າງໄວວາ.

ຕາມຣາຍງານວ່າ  ເຣື່ອງການປຸກເຮືອນ ຂຶ້ນໃໝ່ນັ້ນ ທາງການເມືອງຄໍາ ແຂວງຊຽງຂວາງ  ຈະຊ່ອຍປຸກໃຫ້ຊາວບ້ານ ພາຍໃນກາງປີນີ້ ແລະ ຈະມີການຈັດສັນ ເຣື່ອງນໍ້າປະປາ ແລະ ໄຟຟ້າ ເພື່ອປ້ອງກັນ ບໍ່ໃຫ້ເກີດໄຟໄໝ້ ຂຶ້ນຕື່ມອີກ.

ຄໍາເຫັນ (0)
Share
ເຕັມຫນ້າ