ຜູ້ເສັຽຊີວິດສະສົມ 2 ຄົນ ຍ້ອນ ເຊື້ອໂຄວິດ-19

ອຸ່ນແກ້ວ ສຸກສະຫວັນ
2021-05-14
Share
ຜູ້ເສັຽຊີວິດສະສົມ 2 ຄົນ ຍ້ອນ ເຊື້ອໂຄວິດ-19 ຮສ ດຣ ບົວເທບ ພູມິນ ຮອງຫົວໜ້າກົມປິ່ນປົວ ແລະ ຟື້ນຟູໜ້າທີ່ການ ກະຊວງສາທາຣະນະສຸຂ ໄດ້ກ່າວຕໍ່ສື່ມວລຊົນ ໃນວັນທີ 14 ພຶສພາ ກ່ຽວກັບ ອາການຂອງຜູ້ເສັຽຊີວິດ ຍ້ອນເຊື້ອໂຄວິດ-19 ທັງສອງຄົນ.
ພາບຈາກ: ສູນຂ່າວສານ ການແພດ ສຸຂສຶກສາ

ທາງການລາວ ກວດພົບຜູ້ຕິດເຊື້ອ ໂຄວິດ-19 ເພີ່ມອີກ 16 ຄົນ ສົ່ງຜົນເຮັດ ໃຫ້ຜູ້ຕິດເຊື້ອສະສົມທັງໝົດເກືອບ 1,500 ຄົນ ແລະ ເສັຽຊີວິດສະສົມ ທັງໝົດ 2 ຄົນ. ຈຳນວນ 16 ຄົນ ທີ່ເຈົ້າໜ້າທີ່ຢືນຢັນໃນວັນທີ 14 ພຶສພາ ມາຈາກຜົນກວດທັງໝົດ 1,200 ຄົນ ໃນວັນທີ 13 ພຶສພາ.

ດຣ ຣັດສະໝີ ວົງຄຳຊາວ ຮອງຫົວໜ້າກົມຄວບຄຸມພຍາດຕິດຕໍ່ ກະຊວງສາທາຣະນະສຸຂ ແລະຕາງໜ້າຄະນະສະເພາະກິດຄວບຄຸມ ໂຄວິດ-19 ໄດ້ຖແລງຕໍ່ ສື່ມວນຊົນ ໃນວັນທີ 14 ພຶສພາ ວ່າ:

"ມີຜູ້ຕິດເຊື້ອໃໝ່ ທັງໝົດສຳລັບມື້ນີ້ແມ່ນ 16 ຄົນເນາະ ຈຳນວນສະສົມທັງໝົດແມ່ນ 1,498 ຄົນ ສຳລັບເສັຽຊີວິດເພີ່ມໃໝ່ລະແມ່ນ 1 ຄົນເນາະ."

ທ່ານກ່າວຕື່ມວ່າ ຜູ້ຕິດເຊືອໂຄວິດ-19 ກໍຣະນີໃໝ່ ແມ່ນພົບຢູ່ນະຄອນຫຼວງວຽງຈັນ 1 ຄົນ ແລະ ຈຳປາສັກ 15 ຄົນ ທັງໝົດໄດ້ຮັບ ການປິ່ນປົວ ແລະ ຕິດຕາມອາການ ຢູ່ໂຮງໝໍ. ສ່ວນກໍຣະນີເສັຽຊີວິດ ຄົນທີ 2 ຍ້ອນຕິດເຊື້ອໂຄວິດ-19 ນັ້ນມີຄົນວຽດນາມ 1 ຄົນ ແລະ ຄົນລາວ 1 ຄົນ.

ຄົນລາວຜູ້ທຳອິດທີ່ເສັຽຊີວິດ ເພດຊາຍອາຍຸ 29 ປີ ແຕ່ຜູ້ເສັຽຊີວິດ ບໍ່ໄດ້ສຳຜັດກັບກໍຣະນີ ທີ 59 ຫຼື ນາງ ຕິນາ ແຕ່ຜູ້ເສັຽຊີວິດມັກ ໄປຫລິ້ນສະຖານທີ່ບັນເທີງ ຊຶ່ງເປັນບ່ອນທີ່ມີ ຄວາມສ່ຽງສູງ.

ຫລັງຈາກຢູ່ໃນກຸ່ມສ່ຽງ ແຕ່ຜູ້ເສັຽຊີວິດ ກໍບໍ່ໄດ້ໄປສເນີຕົວ ກັບທີມຄົ້ນຫາຜູ້ທີ່ເຄີຍໄປສະຖານທີ່ສ່ຽງ. ຜູ້ເສັຽຊີວິດບໍ່ມີອາການຫຍັງຈົນ ຮອດວັນທີ 10 ພຶສພາ ຜູ້ເສັຽຊີວິດຈຶ່ງໄດ້ໄປກວດ ສຸຂພາບຢູ່ໂຮງໝໍກອງທັບ 103 ນະຄອນຫຼວງວຽງຈັນ ດ້ວຍອາການແໜ້ນໜ້າ ເອິກ, ຫາຍໃຈຍາກ ແລະ ເມື່ອຍ ຊຶ່ງໃນເວລານັ້ນ ຍັງບໍ່ທັນມີໄຂ້. ປວັດຜູ້ເສັຽຊີວິດບໍ່ທັນຈະແຈ້ງ ແລະ ຜູ້ກ່ຽວໄປປິ່ນປົວຢູ່ຜແນກ ສຸກເສີນທົ່ວໄປ.

ມາຮອດກາງຄືນວັນທີ 12 ພຶສພາ ຫາ ຕອນເຊົ້າ ວັນທີ 13 ພຶສພາ ອາການຂອງຜູ້ເສັຽຊີວິດຊົງຕົວ, ບໍລິມາດອາກາດຢູ່ໃນປອດຢູ່ທີ່ 50-70 ເປີເຊັນ ແລະ ຜູ້ເສັຽຊີວິດ ມີອາການ ກະວົນກະວາຍ ອຸນຫະພູມ ສູງຂຶ້ນ 38 ອົງສາ, ແລະ ຄົນເຈັບກໍເຂົ້າອາການໜັກຂຶ້ນ ແລະ ໄດ້ເສັຽຊີວິດ ໃນເວລາ 15 ໂມງ 45 ນາທີ ຂອງ ວັນທີ 13 ພຶສພາ.

ນອນຈາກນີ້ ຜູ້ເສັຽຊີວິດມີປວັດ ເປັນເບົາຫວານ ແລະຄວາມດັນສູງ ຈຶ່ງເຮັດໃຫ້ເສັຽຊີວິດໄວຂຶ້ນ, ດຣ ບົວເທບ ພູມິນ ຮອງຫົວໜ້າ ກົມປິ່ນປົວ ແລະ ຟື້ນຟູໜ້າທີ່ການ ກະຊວງ ສາທາຣະນະສຸຂ ໄດ້ກ່າວຕໍ່ສື່ມວນຊົນ ໃນວັນທີ 14 ພືສພາ ວ່າ:

"ຜູ້ກ່ຽວຈັດຢູ່ໃນກຸ່ມຜູ້ອາຍຸນ້ອຍ ອາຍຸພຽງ 29 ປີ ປວັດຂອງຜູ້ກ່ຽວນີ້ ແມ່ນບໍ່ສຳຜັດກັບຜູ້ຕິດເຊື້ອເບີ 59 ແຕ່ວ່າຜູ້ກ່ຽວນີ້ໄດ້ໄປ ສະຖານທີ່ ທີ່ທາງເຮົາໄດ້ປະກາດວ່າ ເປັນສະຖານທີ່ ມີຄວາມສ່ຽງສູງເນາະ ລະພາຍຫລັງທີ່ຜູ້ກ່ຽວ ຢູ່ໃນກຸ່ມສ່ຽງນັ້ນແລ້ວ ຜູ້ກ່ຽວກະບໍ່ໄດ້ອອກ ມາສເນີຕົວເນາະ."

ໃນມື້ດຽວກັນເອເຊັຽເສຣີ ພຍາຍາມຕິດຕໍ່ຫາຄອບຄົວ ຂອງຜູ້ເສັຽຊີວິດ ເພື່ອສອບຖາມປວັດຂອງຜູ້ກ່ຽວ ແຕ່ບໍ່ສາມາດຕິດຕໍ່ໄດ້.

ເຈົ້າໜ້າທີ່ຄະນະສະເພາະກິດ ຄວບຄຸມໂຄວິດ-19 ນະຄອນຫຼວງວຽງຈັນ ທ່ານນຶ່ງໄດ້ກ່າວຕໍ່ເອເຊັຽເສຣີ ໃນມື້ດຽວກັນວ່າຜູ້ກ່ຽວໄປປົວ ຢູ່ໂຮງໝໍ 103 ໂດຍທີ່ບໍ່ຮູ້ຕົວວ່າຕິດ ເຊື້ອໂຄວິດ-19 ແລະ ເຈົ້າໜ້າທີ່ຈຶ່ງເອົາ ພະນັກງານແພດ-ໝໍ ຈຳນວນ 10 ຄົນ ຢູ່ຜແນກສຸກ ເສີນໄປກັກຕົວ 14 ວັນ.

"ບຸກຄົນຫວ່າງຢ່ານີ້ ໄປກວດກະບໍ່ໄດ້ເວົ້າ ເລື່ອງກວດໂຄວິດ ກໍໄປກວດຢູ່ພາຍນອກ ທົ່ວໄປນີ້ນ່າ ສຸກເສີນທົ່ວໄປຫັ້ນ ບໍ່ຮູ້ວ່າຕົວເອງ ເປັນໂຄວິດ ແລ້ວເຂົ້າໄປຢູ່ສຸກເສີນ ທົ່ວໄປຫັ້ນ ບໍ່ຮູ້ວ່າ ຕົວເອງເປັນຕົວໂຄວິດ ແລ້ວເຂົ້າໄປ ຢູ່ສຸກເສີນ ບາດນີ້ເພື່ອຄວາມປອດພັຍ ກະເລີ່ຍວ່າ ເອົາແພດເຂົ້າກັກຕົວໝົດ ເພື່ອຄວາມປອດພັຍ ແພດຫັ້ນແຫຼະ."

ຕໍ່ກັບເຫດການທີ່ມີຄົນລາວເສັຽຊີວິດ ຍ້ອນໂຄວິດ-19, ຊາວລາວຈຳນວນນຶ່ງ ກໍຮູ້ສຶກເສັຽໃຈ ແລະ ຫັນມາປ້ອງກັນຕົວເອງດ້ວຍການ ໃສ່ຜ້າອັດປາກດັງ, ບໍ່ໄປຊຸມແນວ ແລະ ເວັ້ນໄລຍະຫ່າງ ແລະ ຮຽກຮ້ອງໃຫ້ທາງການກວດກາໃຫ້ເຂັ້ມງວດຂຶ້ນ.

"ສ່ວນຫຼາຍຂະເຈົ້າກະຮູ້ຈັກ ປ້ອງກັນຕົວເອງ ຜູ້ໃດມັນກະຢ້ານເດ້ ເຂົາຢາກມັນປະມາດນ່າ ຄືຕົວໃນເມືອງແທ້ ເຂົາກະປະຕິບັດໄດ້ດີຢູ່ ກະບໍ່ໄດ້ມີການຊຸມແຊວ ບໍ່ມີການລະເມີດ ກົດລະບຽບແບບແມ່ນຫຍັງ ເຂົາກະປະຕິບັດໄດ້ດີ ກະບໍ່ໄດ້ມີການຊຸມແຊວ ບໍ່ມີການລະເມີດ ກົດລະບຽບ ແມ່ນຫຍັງເຂົາກະປະຕິບັດ ໄດ້ດີ ຕື່ນຕົວຢູ່. "

ຊາວລາວຜູ້ນຶ່ງ ຢູ່ແຂວງບໍ່ແກ້ວ ໄດ້ກ່າວຕໍ່ເອເຊັຽເສຣີ ໃນວັນດຽວກັນ ວ່າຫລັງຈາກຮູ້ຂ່າວວ່າ ມີຄົນລາວເສັຽຊີວິດ ກໍປ້ອງກັນຕົວເອງ ບໍ່ອອກໄປໃສມາໃສ.

"ຄົນນຶ່ງລະເດ້ລາວ ເສັຽຊີວິດ ຖືວ່າທັມມະດາໄດ໋ ວັກຊີນເຂົ້າມາແລ້ວ ກະພາກັນໄປສັກວັກຊີນ, ແບບເຂັ້ມແບບປິດເສັ້ນທາງ ຢູ່ໃຜ ຢູ່ມັນແບບບໍ່ມີພີ່ມີນ້ອງ ໂທຫາກັນເອົາ."

ຊາວແຂວງສວັນນະເຂດ ທ່ານນຶ່ງ ໄດ້ກ່າວຕໍ່ເອເຊັຽເສຣີ ໃນມື້ດຽວກັນວ່າ ຫລັງຈາກທີ່ຮູ້ຂ່າວ ກໍເປັນກັງວົນຫລາຍ ໄດ້ປິດທາງ ເຂົ້າອອກບ້ານ.

"ປິດໝົດ ກະເປັນຕາຢ້ານຫັ້ນແລ້ວ ກະຢາກໜັກໄດ໋ ເຮົາແຮງປະເທດນ້ອຍ ຫັ້ນນ່າ ຄັນຊິເວົ້າ."

ອີງຕາມຂໍ້ມູນຈາກຄະນະສະເພາະກິດ ຄວບຄຸມໂຄວິດ-19 ໃນວັນທີ 14 ພຶສພາ ພົບວ່າມີຈຳນວນຄົນໄດ້ຮັບການກວດວິເຄາະຫາ ເຊື້ອໂຄວິດ-19 ທັງມົດ 200,000 ປາຍຄົນ. ພົບຜູ້ຕິດເຊືອສະສົມ ເກືອບ 1,500 ຄົນ ແລະ ຕົວເລກຜູ້ຕິດເຊື້ອຍັງຈະເພີ່ມຂຶ້ນອີກ, ໃນນັ້ນເສັຽຊີວິດ 2 ຄົນ- ມີຄົນລາວ 1 ຄົນ ແລະ ຄົນວຽດນາມ 1 ຄົນ, ປິ່ນປົວເຊົາແລ້ວ 500 ປາຍຄົນ, ກຳລັງປິ່ນປົວ ແລະ ຕິດຕາມອາການ ຢູ່ໂຮງໝໍເກືອບ 1,000 ຄົນ.

ມາເຖິງປັດຈຸບັນ ມີຄົນໄດ້ສັກວັກຊີນແລ້ວ ຈຳນວນ 563,000 ປາຍຄົນ - ໃນນັ້ນ ສັກເຂັມທີ 1 ຈຳນວນ 474,982 ຄົນ ແລະ ເຂັມທີ 2 ຈຳນວນ 88,483 ຄົນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ