2 ຊາຍໄທຍ 1 ຍິງລາວ ລັກຂ້າມມາ ລາວ

ອຸ່ນແກ້ວ ສຸກສະຫວັນ
2021-04-22
Share
2 ຊາຍໄທຍ 1 ຍິງລາວ ລັກຂ້າມມາ ລາວ ສູນຖແລງຂ່າວໂຄວິດ-19 ແຂວງໜອງຄາຍ ທີ່ພົບວ່າມີ ຜູ້ຕິດເຊື້ອມາແຕ່ ລາວ 3 ຄົນ ທີ່ເປັນຜູ້ຊາຍໄທຍ 2 ຄົນ ແລະ ແມ່ຍິງລາວ 1 ຄົນ
ສູນຖແລງຂ່າວ ໂຄວິດ-19 ແຂວງໜອງຄາຍ

ເຈົ້າໜ້າທີ່ຕຳຣວດໄທຍ ຢືນຢັນວ່າພົບຜູ້ຊາຍໄທຍ 2 ຄົນ ແລະ ແມ່ຍິງລາວ 1 ຄົນ ລັກຂ້າມມາລາວ ຜ່ານຊ່ອງທາງ ທັມມະຊາດ ຕາມຊາຍແດນລາວ-ໄທຍ ແລະ ແຜ່ເຊື້ອໂຄວິດ-19 ຢູ່ລາວ ຫລັງຈາກທັງ 3 ຄົນ ມີອາການໄຂ້ ແລ້ວມາປິ່ນປົວ ຢູ່ໂຮງໝໍແຂວງ ໜອງຄາຍ ໃນວັນທີ 16 ເມສາ ແລະ ຖືກກວດພົບວ່າ ຕິດໂຄວິດ-19. ເຈົ້າໜ້າທີ່ຕຳຣວດໄທຍ ຜູ້ທີ່ຂໍສງວນຊື່ ແລະ ຕຳແໜ່ງ ໄດ້ກ່າວຕໍ່ເອເຊັຽເສຣີ ໃນວັນທີ 22 ເມສາ ວ່າ:

"ກັບມາກໍຄືຄົນທຳອິດຫັ້ນຕິດເຊື້ອໂຄວິດ-19 ກ່ອນ ຄົນທີສອງ ທີ່ໄປນຳກັນກໍຕິດເຊື້ອນຳ ແລະ ແມ່ຍິງລາວ ທີ່ມານຳກັນກໍຕິດເຊື້ອ ຕື່ມອີກ ລວມຕິດ 3 ຄົນ ແຕ່ພວກເຂົາເຈົ້າບໍ່ແຈ້ງ ລົງລາຍລະອຽດ ແລະ ເວລາທີ່ເດີນທາງ ວ່າເປັນຜູ້ລັກລອບເຂົ້າມາ ແບບຜິດກົດ ໝາຍ, ລາຍລະອຽດ ແລະ ເວລາທີ່ເດີນທາງ ກໍຄື ມາພົບຢູ່ແຄມທາງ ແບບຂໍ້ມູນຍັງສັບສົນຢູ່ ຈົນມື້ກ່ອນ ຜູ້ທີ່ຕິດເຊື້ອໂຄວິດ-19 ຢູ່ລາວ ທາງພວກເຮົາກໍເລີຍຮູ້."

ທ່ານກ່າວຕື່ມວ່າ ຖ້າວ່າຜູ້ຕິດເຊື້ອ ໄດ້ຮັບການປິ່ນປົວ ຈົນເຊົາດີແລ້ວ ເຈົ້າໜ້າທີ່ຕຳຣວດ ກໍຈະມີການສອບສວນ ເພີ່ມກ່ຽວກັບ ລາຍລະອຽດການເດີນທາງ ຂອງທັງ 3 ຄົນ ແລະ ກໍຈະມີການດຳເນີນ ຄະດີພວກເຂົາ ຕາມກົດໝາຍຕໍ່ໄປ.

ຈົນມາເຖິງວັນທີ 22 ເມສາ, ເຈົ້າໜ້າທີ່ໄທຍ ຍັງບໍ່ໄດ້ສົ່ງຂໍ້ມູນກ່ຽວກັບ ລາຍລະອຽດ ວັນ ແລະ ເວລາ ຂອງການເດີນທາງຂອງທັງ 3 ຄົນ ໃຫ້ແກ່ເຈົ້າໜ້າທີ່ລາວ.

ເອເຊັຽເສຣີ ໄດ້ຕິດຕໍ່ຫາເຈົ້າໜ້າທີ່ ສຳນັກງານສາທາຣະນະສຸຂ ແຂວງໜອງຄາຍ ເພື່ອຖາມຂໍ້ມູນເພີ່ມເຕີມ ກ່ຽວກັບຜູ້ຕິດເຊື້ອ ທັງ 3 ຄົນ, ແລະ ເຈົ້າໜ້າທີ່ ໃຫ້ຂໍ້ມູນໃນເບື້ອງຕົ້ນວ່າ ຜູ້ຊາຍໄທຍ ຄົນທີ 1 ອາຍຸ 24 ປີ ອາຊີບ ພະນັກງານບໍຣິສັດໃນກຸງເທບ, ຜູ້ຊາຍ ໄທຍ ຄົນທີ 2 ອາຍຸ 30 ປີ ອາຊີບພະນັກງານ ທຸຣະກິດ ອອນລາຍ ແລະ ຄົນທີ 3 ເປັນແມ່ຍິງລາວ ອາຍຸ 26 ປີ ເປັນຊາວເມືອງ ໄຊເສດຖາ ນະຄອນຫລວງວຽງຈັນ ແຕ່ ເຈົ້າໜ້າທີ່ປະຕິເສດ ທີ່ໃຫ້ລາຍລະອຽດ ເພີ່ມເຕີມ.

ເຈົ້າໜ້າທີ່ ຄະນະສະເພາະກິດຄວບຄຸມ ໂຄວິດ-19 ກ່າວວ່າມາຮອດປັດຈຸບັນ ຍັງບໍ່ໄດ້ຮັບຂໍ້ມູນກ່ຽວກັບ ວັນ ແລະ ເວລາຂອງການ ເດີນທາງຂອງຜູ້ຊາຍໄທຍ ທັງສອງຄົນ ແລະ ແມ່ຍິງລາວ 1 ຄົນ ຈາກເຈົ້າໜ້າທີ່ໄທຍ ແລະ ທາງການລາວ ກໍຕ້ອງການຂໍ້ມູນ ດັ່ງກ່າວ.

"ເຮົາຢາກໄດ້ຂໍ້ມູນເຈົ້າ ຖ້າເປັນໄປໄດ້ຫັ້ນນະ ເພາະວ່າເຂົາຂ້າມມາລາວ ຕັ້ງແຕ່ວັນທີ 9 ອອກໄປແມ່ນວັນທີ 17 ເບາະ ເຮົາຢາກ ຮູ້ວ່າເວລາລາວເຂົ້າມາລາວ ຫັ້ນ ລາວໄປທ່ຽວ ໃສແດ່ ປັດຈຸບັນນີ້ ມັນກໍມີເຄສ ເພີ່ມຂຶ້ນຫລາຍເນາະ."

ກ່ຽວກັບເລື່ອງນີ້ ຊາວລາວ ທ່ານນຶ່ງກ່າວວ່າ ຫລັງຈາກຮູ້ຂ່າວ ຜູ້ຊາຍໄທຍ 2 ຄົນ ແລະແມ່ຍິງລາວ 1 ຄົນ ລັກຂ້າມມາລາວ ແລ້ວ ແຜ່ເຊື້ອໂຄວິດ-19 ກໍຢາກໃຫ້ພາກສ່ວນກ່ຽວຂ້ອງ ດຳເນີນການຕຳກົດໝາຍ ພ້ອມທັງເພີ່ມມາຕການປ້ອງກັນ ຕາມຊາຍແດນ.

"ຢາກໃຫ້ທາງການສອບສວນຫັ້ນແຫລະ ຢາກໃຫ້ທັງ 2 ປະເທດນະ ຊ່ວຍໆກັນ ຕັກເຕືອນກັນຕາມລະບຽບບ້ານເມືອງ ຂອງແຕ່ລະ ປະເທດຫັ້ນລະ ເຮົາກະບໍ່ຢາກໃຫ້ມັນເກີດເນາະ ບາງຄົນກະ ຮູ້ເທົ່າບໍ່ເຖິງການແດ່ ແຕ່ບາງຄົນຮູ້ແລ້ວ ກະຍັງລັກຂ້າມບໍ່ຖືກຕ້ອງ ຢູ່ກະມີ."

ໃນຂນະດຽວກັນ ຊາວລາວອີກທ່ານນຶ່ງ ກ່າວວ່າ ພາກສ່ວນກ່ຽວຂ້ອງ ຄວນດຳເນີນຄະດີ ກັບທັງ 3 ຄົນ ທີ່ຂ້າມມາ ເຮັດໃຫ້ເກີດ ການແຜ່ເຊື້ອ ທີ່ເຮັດໃຫ້ເກີດຜົນກະທົບຕາມມາ.

"ເຫັນຂ່າວຢູ່ ກະແລ້ວແຕ່ເພິ່ນແຫລະ ມັນກະກະທົບກະເທືອນໄປໝົດ ກະທົບກັນໝົດ ລະເສຖກິດຫຍັງຫລາຍຢ່າງ ຊ້ວງນີ້ ສະຖານະການບໍ່ດີປານໃດ."

ຫລ້າສຸດ ໃນວັນທີ 22 ເມສາ, ກະຊວງປ້ອງກັນປະເທດ ໄດ້ອອກແຈ້ງການ ເພີ່ມທະວີມາຕການສະກັດກັ້ນ ແລະ ກຽມຄວາມພ້ອມ ຮອບດ້ານ ເພື່ອຕ້ານໂຄວິດ-19. ກະຊວງປ້ອງກັນ ປະເທດ ມີການວາງກຳລັງເຈົ້າໜ້າທີ່ ຢ່າງເຂັ້ມງວດ ແລະ ລາດຕະເວນ ຕາມ ຊາຍແດນ ເພື່ອປ້ອງກັນການລັກລອບ ເຂົ້າເມືອງ ຊຶ່ງຖ້າຜູ້ໃດລັກລອບເຂົ້າມາ ແບບຜິດກົດໝາຍ ຈະຖືກເຈົ້າໜ້າທີ່ດຳເນີນຄະດີ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ