ຜູ້ຕິດເຊື້ອໂຄວິດ-19 ຄົນທີ 59 ທ່ຽວຫຼາຍບ່ອນ

ໄຊຍາ
2021-04-21
Share
ຜູ້ຕິດເຊື້ອໂຄວິດ-19 ຄົນທີ 59 ທ່ຽວຫຼາຍບ່ອນ ເຈົ້າໜ້າທີ່ ແຂວງສວັນນະເຂດ ເຝົ້າຍາມຝັ່ງ ບໍ່ໃຫ້ມີຜູ້ລັກລອບ ຂ້າມນໍ້າຂອງ ເຂົ້າມາລາວ
ນັກຂ່າວພົລເມືອງ

ປະຊະຊົນລາວ ຕ່າງກໍແຕກຕື່ນ ນັບຕັ້ງແຕ່ຕົ້ນເດືອນເມສາ ຜ່ານມາ ມີຜູ້ຕິດເຊື້ອໂຄວິດ ເພີ່ມຂຶ້ນ ເລີ່ມແຕ່ກໍຣະນີ 49 ຈົນມາເຖິງ 60 ສ່ວນຫລາຍແມ່ນຕິດມາຈາກໄທຍ. ທັງຄົນງານລາວ ທີ່ກັບມາສລອງປີໃໝ່ ແບບຖືກຕ້ອງ ແລະ ບໍ່ຖືກຕ້ອງ. ພ້ອມນີ້ ກໍຣະນີທີ 59 ແລະ 60 ກໍກ່ຽວພັນກັບໄທຍ. ດັ່ງກໍຣະນີທີ 59 ເປັນກໍຣະນີທີ່ຄົນແຕກຕື່ນ ຫຼາຍກ່ອນໝູ່ ຍ້ອນການເຄື່ອນໄຫວ ເຊິ່ງລັກເຂົ້າມາທາງ ແຂວງສວັນນະເຂດ ຈົນມາທ່ຽວຢູ່ ນະຄອນຫລວງວຽງຈັນ. ດັ່ງຄະນະສະເພາະກິຈ ຄວບຄຸມພຍາດໂຄວິດ-19 ໄດ້ຖແລງຂ່າວຢັ້ງຢືນ ຕໍ່ ສື່ມວລຊົນ ເມື່ອວັນທີ 20 ເມສາ ວ່າ:

"ຂໍ້ມູນການຕິດເຊື້ອ ຂອງ ຄົນເຈັບສອງຄົນ ທີ່ ເຮົາກວດພົບ ຜູ້ທຳອິດນິແມ່ນ ເປັນເພດຍິງອາຍຸ 25 ປີ ສັນຊາດລາວ ອາຊີບນັກ ສຶກສາ ປັຈຈຸບັນຢູ່ບ້ານໂພນສະຫວ່າງ ເມືອງຈັນທະບູລີ ນະຄອນຫລວງວຽງຈັນ ມາຮອດວານນີ້ ຜູ້ກ່ຽວມີອາການລະມາກວດ ກັບພວກເຮົາເນາະ, ຜູ້ກ່ຽວມີອາການໄຂ້ໄອ ແລະ ອິດເມື່ອຍຖອກທ້ອງ ເພາະວ່າຜູ້ກ່ຽວຕິດເຊື້ອ ຈາກ ຄົນໄທຍລັກລອບເຂົ້າມາ ປະເທດຂອງພວກເຮົາ ລະມາຕິດໃສ່ຜູ້ກ່ຽວ."

ສຳລັບກໍຣະນີ 60 ກໍແມ່ນເພດຍິງອາຍຸ 28 ປີ ສັນຊາດລາວ ອາຊີບແມ່ເຮືອນ ປັຈຈຸບັນ ແມ່ນຢູ່ບ້ານນາຊອນ ເມືອງນາຊາຍທອງ ນະຄອນຫຼວງວຽງຈັນ ກໍແມ່ນມາຈາກຸງເທບ ປະເທດໄທຍ ລັກຂ້າມມາ ຜິດກົດໝາຽ.

ຄະນະສະເພາະກິດ ໄດ້ກ່າວຕື່ມວ່າ ກໍຣະນີ 59 ເປັນນັກສຶກສາອາຍຸ 25 ປິ ຜູ້ກ່ຽວເຮັດທຸຣະກິດຮ້ານອາຫານ. ສ່ວນການເຄື່ອນໄຫວ ຂອງຜູ້ກ່ຽວໃນໄລຍະ ກ່ອນຕິດເຊື້ອໂຄວິດ-19ກໍໄດ້ມີການພົວພັນ ກັບເອື້ອຍຮັກ ແລະ ຊາຍໄທຍສອງຄົນ ທີ່ລັກລອບເຂົ້າມາທາງ ແຂວງສວັນນະເຂດ ເມື່ອ ວັນທີ 07 ເມສາ ໂດຍມີເອື້ອຍຮັກ ເປັນຜູ້ຮັບຕ້ອນ.

ພໍມາເຖິງວຽງຈັນ ເອື້ອຍຮັກ ກໍພາຄົນໄທຍ ໄປພັກຢູ່ໂຮງແຮມເຈືອງ 2 ຈາກນັ້ນກໍໄປທ່ຽວ ວັດສີເມືອງ, ກິນເຂົ້າຢູ່ຮ້ານອາຫານ FUNNY89, ໄປທ່ຽວ ວອດຄລັບ, ຄາຣາໂອເກະ 8188, ໄປຮ້ານນວດ 1111.

ມາຮອດວັນທີ 17 ເມສາ ເອື້ອຍຮັກຂອງຜູ້ກ່ຽວໄດ້ສົ່ງຊາຍໄທຍ ກັບປະເທດເຊິ່ງຂ້າມທາງ ບ້ານໝາກນາວ ເມືອງຫາດຊາຍຟອງ ແລ້ວຂຶ້ນເຮືອໄປທ່າບໍ່ ແຂວງຫນອງຄາຍ ປະເທດໄທຍ ຈາກນັ້ນເອຶ້ອຍຮັກ ໂທບອກວ່າທັງສາມຄົນ ຕິດພຍາດໂຄ ວິດ-19.

ສ່ວນກໍຣະນີ ທີ 59 ຕາມຂໍ້ມູນເບື້ອງຕົ້ນ ແມ່ນບໍ່ໄດ້ໄປທ່ຽວ ກັບກຸ່ມເອື້ອຍຮັກ ຕັ້ງແຕ່ວັນທີ 13 ເມສາ ແລ້ວ. ຈົນມາກວດພົບໃນ ວັນທີ 19 ເມສາ ວ່າຕິດເຊື້ອພຍາດ ໂຄວິດ-19 ຕອນນີ້ເຂົ້າຮັບການປິ່ນປົວ ຢູ່ໂຮງໝໍ 150 ຕຽງ. ໂດຍຜູ້ກ່ຽວໄດ້ສຳພັດໃກ້ຊິດ ທັງໝົດ 35 ຄົນ.

ກໍຣະນີ 59 ຊາວນະຄອນຫຼວງວຽງຈັນ ຕ່າງກໍວິພາກວິຈານ ວ່າຜູ້ກ່ຽວ ບໍ່ມີຄວາມຮັບຜິດຊອບ ແລະ ຍັງສ້າງຄວາມເດືອດຮ້ອນ ໃຫ້ກັບປະຊາຊົນ ເຊິ່ງຜູ້ກ່ຽວກໍໄດ້ ອອກມາຊີ້ແຈງ ຕໍ່ກັບປະຊາຊົນຜ່ານ ເຟສບຸກ ມີບາງຕອນໄດ້ກ່າວວ່າ:

"ເອື້ອຍຮັກຫັ້ນເພິ່ນວ່າ ເປັນຄົນໄທຍ ມາຢູ່ລາວ ໄດ້ເດືອນປາຍແລ້ວ, ຕິນ່າກະຖາມວ່າ ເຂົາເຈົ້າບໍ່ໄດ້ຕິດໂຄວິດ ອີ່ຫຍັງຕີິ້, ລາວ ກະວ່າບໍ່ ບໍ່ໄດ້ຕິດເຂົາເຈົ້າຫາກໍໄປ ກວດມາບໍ່ເຊື້ອ ແລະມີຮູບຜົລຂອງການກວດມາ ແຕ່ໄທຍ ເບິ່ງພ້ອມ. ເຊິ່ງວ່າຕີນ່າເຫັນໂຕຈີງ ເຮົາກະຖືວ່າບໍ່ພົບວ່າມີເຊື້ອໂຄວິດ ເນາະເຮົາກໍໂອເຄ. ບໍ່ມີຄວາມພົວພັນ ກັບສອງຄົນໄທຍນັ້ນ ເລີຍມີແຕ່ເອື້ອຍຮັກ ຄົນດຽວທີ່ຕິດ ນ່າຮູ້ຈັກເນາະ."

ຕໍ່ເຫດການດັ່ງກ່າວ ປະຊາຊົນຊາວ ນະຄອນຫລວງວຽງຈັນ ຈຳນວນຫລາຍຮູ້ສຶກກັງວົນ ຫລາຍຕໍ່ກັບບັນຫາທີ່ເກີດຂຶ້ນ. ເພາະການ ຣະບາດຮອບນີ້ແມ່ນໜັກກວ່າຮອບຜ່ານມາ ເພາະ ມີຫລາຍກໍຣະນີເກີດຂຶ້ນ ໃນໄລຍະເວລາອັນສັ້ນໆ ດັ່ງປະຊາຊົນຊາວນະຄອນຫຼວງ ວຽງຈັນ ໃຫ້ຄວາມເຫັນວ່າ.

"ການຣະບາດຄັ້ງທີສອງເນາະ ບາງທີມັນອາດເປັນຕາຢ້ານອັນຕະລາຍ ກວ່າຄັ້ງທຳອິດທີ່ຜ່ານມາ ເພາະວ່າໂຕສາຍພັນໃໝ່ ບາງຄົນ ອາດຕິດເຊື້ອແຕ່ບໍ່ຮູ້ໂຕ ລະກະບໍ່ສະແດງ ອາການ ກະມີໂຕນີ້ເຮົາເປັນຫ່ວງ. ກະຖືວ່າຝາກໃຫ້ທຸກຄົນຣະວັງ ແລະ ປ້ອງກັນຮັກ ຊີວິດຢ່າຄິດທ້າທາຍ ຕໍ່ໂຄວິດ-19."

ສ່ວນມາຕການການປ້ອງກັນ ຕາມແນວຊາຍແດນ ທີ່ມີການລັກລອບເຂົ້າມານັ້ນທາງການລາວ ແມ່ນເນັ້ນໃສ່ຊາຍແດນລາວ-ໄທຍ ແມ່ນໍ້າຂອງ. ເພາະວ່າໂດຍສ່ວນຫລາຍ ຄົນງານລາວ ຫລື ວ່າຄົນໄທຍ ຈະໃຊ້ຊ່ອງທາງນີ້ ລັກລອບເຂົ້າມາ. ດັ່ງເຈົ້າໜ້າທີ່ ໄດ້ ກ່າວວ່າ.

"ກະໄດ້ຍິນຂ່າວທາງ ຊຽງຣາຍ ຊຽງແສນ ມີພຍາດວ່າຊັ້ນສະ ໃນນາມສ່ວນໂຕ ພວກເຮົາໄດ້ປະກາດຍຸຕິ ໄລຍະນຶ່ງກ່ອນໄດ້ໂຈະ ບໍ່ໃຫ້ເອົາເຮືອກາບອອກ. ບໍ່ໃຫ້ເຄື່ອນໄຫວ ເລີຍນ່າ ເພິ່ນຢ້ານຄົນລັກລອບເຂົ້າມາ. ໄລຍະຜ່ານມາກໍມີຄົນລັກລອບ ເຂົ້າຫັ້ນນ່າ ເຈົ້າຫນ້າທີ່ ເພິ່ນເຫັນລັກຂ້າມເຮືອກາບນ້ອຍນີ້ນ່າ. ຄືດຽວກັບປະເທດໄທຍ ຫັ້ນແຫລະປິດຊາຍແດນ ບໍ່ໃຫ້ຂ້າມໝົດ ບໍ່ໃຫ້ຄົນລາວ ຢູ່ໄທຍ ຂ້າມມາເລີຍນ່າ ພວກເຮົາເຮັດວຽກຊາຍແດນ ຕາມປົກກະຕິ ກະບໍ່ຢາກໃຫ້ຄົນໄທຍ ຄົນລາວໄປຢູ່ໄທຍ ລັກຂ້າມມາຫັ້ນນ່າ ເພິ່ນບໍ່ແມ່ນບໍ່ຢາກ ໃຫ້ເຂົ້າ. ເພິ່ນກະໃຫ້ເຂົ້າຕາມຊ່ອງທາງ ທີ່ມີຢູ່ດ່ານສາກົລ ກະມີຊ່ອງທາງ ໃຫ້ເຂົ້າກະຕາມຣະບຽບ ໂຄວິດ ຫັ້ນແຫລະ."

ການຣະບາດເຂົ້າມາລາວຊຸດນີ້ ທັງໝົດແມ່ນມາຈາກປະເທດໄທຍ ທັງເຂົ້າມາແບບຖືກກົດໝາຽ ແລະ ຜິດກົດໝາຽ. ແຕ່ຈາກ ຂໍ້ມູນເບື້ອງຕົ້ນ ທີ່ທາງການລາວຣາຍງານອອກມາແມ່ນ ລັກລອບເຂົ້າມາເປັນສ່ວນຫຼາຍ. ດັ່ງກໍຣະນີທີ 59 ນີ້ຕາມການບອກເລົ່າ ຂອງຜູ້ຕິດເຊື້ອ ແລະ ການສອບສວນການເຄື່ອນໄຫວນັ້ນຖືວ່າມັນສ້າງຜົລກະທົບເປັນວົງກ້ວາງເຮັດໃຫ້ ນະຄອນຫຼວງວຽງຈັນ ໄດ້ຮັບຜົລກະທົບຢ່າງໜັກ.

ໃນນີ້ທາງຮອງເຈົ້າຄອງນະຄອນຫລວງວຽງຈັນ ໄດ້ອອກຄຳສັ່ງ ໃຫ້ປິດຊົ່ວຄາວສະຖານທີ່ ທີ່ມີຄວາມສ່ຽງຕໍ່ການແຜ່ເຊື້ອພຍາດ ໂຄວິດ-19 ຢູ່ນະຄອນຫລວງວຽງຈັນ ນັບແຕ່ວັນທີ 20 ເມສາ ຫາ 04 ພືສພາ.

ສ່ວນຄະນະເສຖສາດ ແລະ ບໍຣິຫານທຸຣິກິຈ ມະຫາວິທຍາລັຍ ແຫ່ງຊາດ ໄດ້ອອກແຈ້ງການດ່ວນ ເລກທີ 596 ລົງວັນທີ 20 ເມສາ ໃຫ້ປະຕິດບັດ ການຮຽນ ຜ່ານທາງອອນລາຍ. ມີວິທຍາລັຍ ລາວ-ອາເມຣິກັນ ກໍປິດຊົ່ວຄາວ, ວັດສີເມືອງງົດ ບໍ່ໃຫ້ຍາດໂຍມເຂົ້າ ທໍາບູນ ແລະ ທຸຣະກິຈ ບາງແຫ່ງ ໄດ້ປິດກິຈການຊົ່ວຄາວ ແລະ ຍັງມີອີກຫລາຍ ເມືອງເຊັ່ນ ເມືອງສອງຄອນ ແຂວງສວັນນະເຂດ, ເມືອງລະຄອນເພັງ ແຂວງສາລະວັນ ສັ່ງປິດ 3 ບ້ານ ແລະ ເມືອງໂຂງ ແຂວງຈຳປາສັກ ເປັນຕົ້ນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ