ຊາວຈີນ 2 ຄົນ, ແມ່ຍິງລາວ 1 ຄົນ ຖືກຈັບໃນຂໍ້ຫາຄ້າມະນຸດ

6 ເດືອນ ຕົ້ນປີ 2024 ຕໍາຫຼວດ ພະແນກຕ້ານການຄ້າມະນຸດ ປກສ ແຂວງຫຼວງນໍ້າທາ ສາມາດຈັບຜູ້ຖືກກ່າວຫາ ໃນຂໍ້ຫາຄ້າມະນຸດ ເປັນຄົນຈີນ ເພດຊາຍ 2 ຄົນ ແລະ ຄົນລາວ ເພດຍິງ 1 ຄົນ ມາດໍາເນີນຄະດີຕາມກົດໝາຍລາວໄດ້ ພ້ອມຊ່ອຍກຸ່ມສ່ຽງ ແລະຜູ້ຖືກເຄາະຮ້າຍຈາກການຄ້າມະນຸດ ໄດ້ທັງໝົດ 8 ຄົນ ໃນນັ້ນ ແບ່ງເປັນເດັກນ້ອຍແມ່ຍິງ, ແມ່ຍິງລາວ ແລະຜູ້ຊາຍ ທັງໝົດ 7 ຄົນ ແລະເດັກນ້ອຍແມ່ຍິງ ຫວຽດນາມ ອາຍຸຕໍ່າກວ່າ 18 ປີ 1 ຄົນ, ອີງຕາມຂໍ້ມູນ ຈາກ ປກສ ແຂວງຫຼວງນໍ້າທາ ແລະຄວາມເວົ້າ ຂອງ ພັທ ລາດສະຫວ່າງ ປຣະຈິດທໍາ ຮອງຫົວໜ້າຫ້ອງຕໍາຫຼວດ ແຂວງຫຼວງນໍ້າທາ.

ສະເພາະ ຄະດີຄ້າມະນຸດ 1 ຄະດີ ມີຜູ້ຖືກກ່າວຫາ 3 ຄົນ ແບ່ງເປັນຄົນຈີນ ເພດຊາຍ ຜູ້ເປັນຫົວໂປ່ໂຕການ 2 ຄົນ ແລະຄົນລາວ ເພດຍິງ ຜູ້ເປັນນາຍໜ້າ ຫາແມ່ຍິງລາວ ແລະເດັກນ້ອຍແມ່ຍິງລາວໃຫ້ຄົນຈີນ ແລະເປັນຜູ້ແປພາສາ 1 ຄົນ ແມ່ນຖືກດໍາເນີນຄະດີຕາມກົດໝາຍລາວ ແລະຖືກກັກຂັງ ຢູ່ແຂວງຫຼວງນໍ້າທາ ເພື່ອລໍຖ້າຄໍາຕັດສິນຂອງສານ ພາຍຫຼັງ ຜູ້ຖືກກ່າວຫາທັງໝົດ ສ້າງຄວາມເສຍຫາຍ ຜ່ານສື່ສັງຄົມອອນລາຍ ໂດຍການນໍາເອົາເດັກນ້ອຍແມ່ຍິງລາວ ອາຍຸຕໍ່າກວ່າ 18 ປີ ແລະ ແມ່ຍິງລາວ, ຜູ້ຊາຍລາວ ອາຍຸຫຼາຍກວ່າ 18 ປີ ມາບັງຄັບໃຫ້ມີເພດສໍາພັນກັນ ແລ້ວໄລ້ສົດ ຢູ່ເຮືອນພັກ ແຂວງຫຼວງນໍ້າທາ ແລ້ວເຜີຍແຜ່ຄີບນັ້ນ ລົງສື່ສັງຄົມອອນລາຍ, ຕາມຄວາມເວົ້າ ຂອງຄະນະກໍາມະການ ຕ້ານການຄ້າມະນຸດ ແຂວງພາກເໜືອ ຜູ້ທີ່ 1 ກ່າວຕໍ່ວິທຍຸເອເຊັຽເສຣີ ໃນວັນທີ 6 ສິງຫາ ນີ້ວ່າ:

“ນິຍາມຄ້າມະນຸດ ມັນຈະມີຫຼາຍເນາະ ຖ່າຍຮູບພາບ ແລ້ວສ້າງຄວາມເສຍຫາຍ ຜ່ານສື່ອອນລາຍ ມັນຈະຢູ່ໃນຫັ້ນຫັ້ນນ່າ ຜູ້ຖືກເຄາະຮ້າຍ ຈະໄປແຈ້ງຕໍາຫຼວດເອງ ເພາະວ່າເຂົາເຈົ້າ ທົນບໍ່ໄດ້ເນາະ ແບບຖືກບັງຄັບ ບໍ່ໃຫ້ອອກໄປອີ່ຫຍັງປະມານນີ້ນ່າ ແລ້ວເຂົາລັກລອບແບບ ໄປແຈ້ງຄວາມແບບນີ້ ບາດໄດ້ເວລາອອກມານອກຫັ້ນນ່າ ແລ້ວໄປແຈ້ງຕໍ່ເຈົ້າໜ້າທີ່ຕໍາຫຼວດ.”

ຄະນະກໍາມະການ ຕ້ານການຄ້າມະນຸດ ແຂວງພາກເໜືອ ຜູ້ທີ່ 1 ຜູ້ດຽວກັບຂ້າງເທິງ ກ່າວຕື່ມວ່າ ເດັກນ້ອຍແມ່ຍິງລາວ, ແມ່ຍິງລາວ ແລະຜູ້ຊາຍລາວ ສ່ວນຫຼາຍ ບໍ່ເຕັມໃຈ ໃຫ້ຄົນຈີນບັງຄັບ ໃຫ້ມີເພດສໍາພັນ ແລ້ວໄລ້ສົດນໍາກັນ ແຕ່ພວກເຂົາເຈົ້າ ຖືກຕົວະມາເຮັດວຽກນີ້, ດັ່ງທ່ານກ່າວວ່າ:

“ບາງຄົນຫັ້ນ ແມ່ນເຂົາເຈົ້າໃຫ້ມາເປັນເດັກເສີບ ຢູ່ຮ້ານອາຫານ ເງິນເດືອນໃຫ້ 10 ລ້ານ (ກີບ) ໃຫ້ໄປເປັນເດັກເອັນ (Entertain) ຈະເອົາເງິນໃຫ້ ເດືອນໜຶ່ງ 20 ລ້ານ (ກີບ) ແຕ່ວ່າ ໂຕຈິງມາ ຖ້າວ່າ ເຂົາເຈົ້າຂຶ້ນໄລ້ສົດ ເທື່ອໜຶ່ງລະແມ່ນ ຖ້າໄດ້ຮ່ວມເພດ 2 ແສນ (ກີບ) ຫາ 3 ແສນ (ກີບ) ຖ້າບໍ່ໄດ້ຮ່ວມເພດ ແສນໜຶ່ງ ແຕ່ໄລຍະຂອງເວລາການໄລ້ສົດນີ້ແມ່ນ ຜູ້ໜຶ່ງ 1-2 ຊົ່ວໂມງ ນັບແຕ່ຕອນແລງ 7 ໂມງ ນີ່ ຮອດຕອນເຊົ້າ 2 ໂມງ.”

ສໍາລັບເດັກນ້ອຍແມ່ຍິງຫວຽດນາມ ອາຍຸຕໍ່າກວ່າ 18 ປີ 1 ຄົນນັ້ນ ແມ່ນຜູ້ກ່ຽວ ລັກຂ້າມມາ ຈາກປະເທດມຽນມາ ແລ້ວມາຂໍຄວາມຊ່ອຍເຫຼືອ ຈາກພົນລະເມືອງດີ ຢູ່ແຂວງຫຼວງນໍ້າທາ ແລ້ວພາຍຫຼັງສືບສວນ-ສອບສວນ ຈຶ່ງຮູ້ວ່າ ຜູ້ກ່ຽວ ເປັນຜູ້ຖືກເຄາະຮ້າຍ ຈາກການຄ້າມະນຸດ ຍ້ອນຜູ້ກ່ຽວ ຖືກຕົວະຍົວະ ຈາກກຸ່ມແກ້ງຫວຽດນາມ ໄປເຮັດວຽກ ທີ່ມຽນມາ ແລ້ວລັກໜີອອກມາລາວໄດ້, ດັ່ງຄະນະກໍາມະການ ຕ້ານການຄ້າມະນຸດ ແຂວງພາກເໜືອ ຜູ້ທີ່ 2 ກ່າວວ່າ:

“ເຂົ້າໄປທາງມຽນມາພຸ້ນ ແລ້ວອອກມາທາງບ້ານເຮົາ ຫວ່າງເດືອນແລ້ວ ລາວກໍ່ມາຮ້ອງຂໍ ພົນລະເມືອງດີຫັ້ນ ມາສົ່ງຜູ້ກ່ຽວ ກໍ່ຖືວ່າຜູ້ກ່ຽວ ບໍ່ມີເອກກະສົງ ເອກກະສານອີ່ຫຍັງ ກໍ່ເລີຍຊອກຖາມຜູ້ກ່ຽວ ໂອ້ຍ...ຂ້ອຍມາຈາກມຽນມາ ວ່າຊັ້ນແຫຼະ ຂ້ອຍຖືກຕົວະຍົວະຫຼອກລວງ ໄປມຽນມາ ແຕ່ວ່າ ພາກສ່ວນໃດຕົວະ ເຮົາບໍ່ຮູ້ເນາະ ຜູ້ກ່ຽວກະຈົນເອົາຕົວຫຼົບ ຜູ້ກ່ຽວຫາກລັກມາເດ້ ໄປຮອດພຸ້ນກໍ່ຖືກ ຖືວ່າ ເບື້ອງເຖົ້າແກ່ບໍ່ບັງຄັບ ແບບລັກສະນະ ຈໍາກັດທີ່ຢູ່ອາໄສ ຈໍາກັດການເຄື່ອນໄຫວ.”

ຄະນະກໍາມະການ ຕ້ານການຄ້າມະນຸດ ແຂວງພາກເໜືອ ຜູ້ທີ່ 2 ຍັງກ່າວຕື່ມວ່າ ສ່ວນການຊ່ອຍເຫຼືອກຸ່ມສ່ຽງ ຈາກການຄ້າມະນຸດ 1 ຄົນ ແມ່ນເຈົ້າໜ້າທີ່ ສາມາດສະກັດກັ້ນ ບໍ່ໃຫ້ພົນລະເມືອງຂອງຕົນ ຕົກເປັນຜູ້ຖືກເຄາະຮ້າຍ ຈາກການຄ້າມະນຸດ ຢູ່ປະເທດຈີນ ແລະມຽນມາ ໄດ້ກ່ອນ, ດັ່ງນາງ ກ່າວວ່າ:

“ກໍາລັງຈະເຄື່ອນໄຫວ ພວກເຮົາກໍ່ເລີຍສະກັດກັ້ນ ແຕ່ວ່າປາຍທາງ ມັນສິແມ່ນແນວໃດ ແຕ່ວ່າ ຕົ້ນທາງນີ້ ກໍ່ລັກສະນະ ຊັກຊວນກັນ ເອີ່..ຈະໄປຫຼີ້ນໄປຫຍັງບໍ່ ຢູ່ເຂດອື່ນຫັ້ນເນາະ ປະເທດໃກ້ຄຽງຫັ້ນນ່າ ແຕ່ວ່າ ເຂົ້າມາເບິ່ງ ກໍ່ພຶດຕິກໍາ ໃນການເຄື່ອນໄຫວ ກໍ່ຕີລາຄາເນາະ ບໍ່ທັັນແມ່ນວ່າ ຄ້າມະນຸດແທ້ໆເນາະ ລັກສະນະກໍາລັງເຄື່ອນໄຫວຊື່ໆ.”

ເຖິງຢ່າງໃດກໍ່ຕາມ ຄະນະກໍາມະການ ຕ້ານການຄ້າມະນຸດ ແຂວງພາກເໜືອ ຜູ້ທີ່ 3 ກ່າວວ່າ ຍ້ອນຄວາມທຸກຍາກ ແລະ ປະເທດລາວ ປະສົບບັນຫາເງິນກີບເຟີ້ ຈຶ່ງເຮັດໃຫ້ເຍົາວະຊົນ, ໄວໜຸ່ມລາວ ພາກັນປະລະການຮຽນ ເພື່ອຊອກຫາວຽກເຮັດ ແຕ່ໃນນັ້ນ ຈໍານວນໜຶ່ງ ກໍ່ຖືກຕົວະໄປເຮັດວຽກ ຈົນກາຍເປັນຜູ້ຖືກເຄາະຮ້າຍ ຈາກການຄ້າມະນຸດ, ດັ່ງນາງກ່າວວ່າ:

“ຍ້ອນຄວາມທຸກຄວາມຍາກ ກະເອົາເງິນມາລໍ້ຫັ້ນແຫຼະ ເສດຖະກິດ ບ້ານເມືອງເຮົາ ປັດຈຸບັນນີ້ ໄພເງິນເຟີ້ຫັ້ນ ມັນເປັນສາເຫດຫຼັກ ທີ່ວ່າເຮັດໃຫ້ຄ່າຄອງຊີບ ມິຫຍັງຖີບໂຕຂຶ້ນສູງເນາະ ເຮັດໃຫ້ເດັກນ້ອຍ ຜູ້ບໍ່ມີເງິນຫັ້ນນ່າເນາະ ຈະມາຊົມໃຊ້ ເຂົາກໍ່ເຮັດທຸກວິທີທາງເນາະ ທີ່ວ່າຈະໄດ້ເງິນຫັ້ນແຫຼະ.”

ນອກນັ້ນ ປີ 2023 ທີ່ຜ່ານມາ ທາງການ ແຂວງຫຼວງນໍ້າທາ ສາມາດຊ່ອຍເຫຼືືອຜູ້ຖືກເຄາະຮ້າຍ ແລະກຸ່ມສ່ຽງ ຈາກການຄ້າມະນຸດ ທັງໝົດ 16 ຄົນນັ້ນ ສ່ວນໃຫຍ່ເປັນເດັກນ້ອຍແມ່ຍິງລາວ ເປັນຄົນຊົນເຜົ່າ ອາຍຸຕໍ່າກວ່າ 18 ປີ ມາຈາກຫຼາຍແຂວງຂອງລາວ ເປັນຕົ້ນ ແຂວງຫຼວງນໍ້າທາ, ສະຫວັນນະເຂດ, ຈໍາປາສັກ, ຫຼວງພະບາງ, ອຸດົມໄຊ, ໄຊຍະບູລີ, ຊຽງຂວາງ ແລະ ແຂວງຫົວພັນ, ໂດຍພວກເຂົາເຈົ້າ ຖືກກຸ່ມຄົນບໍ່ດີ ຕົວະແອບແຝງເຂົ້າມາທ່ອງທ່ຽວ ແລ້ວກໍ່ຊອກຫາເດັກນ້ອຍແມ່ຍິງລາວ ຕາມເຮືອນຊານ ເພື່ອສູ່ຂໍ ໄປເປັນເມຍຢູ່ຈີນ ດ້ວຍສິນສອດຂອງໝັ້ນຈໍານວນຫຼາຍ ແຕ່ພໍເດັກນ້ອຍແມ່ຍິງລາວ ໄປຮອດຈີນ ພັດຖືກບັງຄັບໃຫ້ນອນນໍາຜູ້ຊາຍຄົນອື່ນ ແລະ ຂາຍຕໍ່ໃຫ້ຜູ້ຊາຍຈີນຜູ້ອື່ນ ຫຼືບາງກໍລະນີ ຜູ້ຊາຍຈີນ ທີ່ເວົ້າ, ຂຽນ ອ່ານພາສາຊົນເຜົ່າໄດ້ ກໍ່ຈະຕິດຕໍ່ຫາເດັກນ້ອຍແມ່ຍິງລາວ ຄົນຊົນເຜົ່າ ຜ່ານສື່ສັງຄົມອອນລາຍ ແລ້ວໂອນເງິນໃສຫ້ແລ່ນເອກກະສານ ໄປເປັນເມຍຢູ່ຈີນ ແລ້ວພວກນາງ ກໍ່ຕົກເປັນຜູ້ຖືກເຄາະຮ້າຍກໍ່ມີ ລວມໄປເຖິງ ບາງກໍລະນີ ຖືກກຸ່ມຄົມບໍ່ດີ ຕົວະໄປເຮັດວຽກ ແລ້ວໄປຂາຍບໍລິການທາງເພດ ດ້ວຍການຊັກຊວນ ເລ່ຫຼ່ຽມຫຼາຍວິທີການ ເຮັດໃຫ້ຜູ້ທີ່ຮູ້ເທົ່າບໍ່ເຖິງການ ຕົກເປັນເຫຍື່ອຂອງການຄ້າມະນຸດ ຢູ່ປະເທດມຽນມາ ນໍາດ້ວຍ, ອີງຕາມຂໍ້ມູນ ຈາກ ປກສ ແຂວງຫຼວງນໍ້າທາ ເມື່ອວັນທີ 13 ພຶດສະພາ 2024.