ເຂດພິເສດ ສາມຫຼ່ຽມຄຳ ມີອາຊຍາກັມ ຫຼາຍຢ່າງ ລາວຄວບຄຸມບໍ່ໄດ້

ທ່ານ ຊູວິດ ກະມົນວິສິດ ອະດີຕນັກການເມືອງໄທຍ ກ່າວວ່າ ເຂດເສຖກິຈ ພິເສດ ສາມຫຼ່ຽມຄຳ ຢູ່ແຂວງບໍ່ແກ້ວ ສປປ ລາວ ເປັນສະຖານທີ່ ທີ່ມີກຸ່ມກໍ່ອາຊຍາກັມ ຫຼືມາເຟັຍຫຼາຍ.

ທ່ານກ່າວວ່າ:

“ມາເຟັຍທັງໝົົດ ທີ່ເຂົ້າມາໃນປະເທດໄທຍ, ກັມພູຊາ, ລາວ, ພະມ້າ ແລະ ຟີລິບປິນສ໌. ຈະສັງເຫດເຫັນວ່າ ຈີນຕ່າງໆເຫຼົ່ານີ້ ເຂົ້າໄປໃນປະເທດ ທີ່ມີລະບົບອ່ອນແອ, ມີຄໍຣັບຊັ່ນ ຫຼືການສໍ້ຣາສບັງຫຼວງຫຼາຍ ໃນໝູ່ຣັຖກອນ. ຈີນ ທີ່ເຮັດທຸຣະກິຈສີເທົາ-ສີດຳ ຈະບໍ່ໄປປະເທດ ທີ່ມີກົດໝາຍເຂັ້ມແຂງ ເຊັ່ນສິງກະໂປຣ໌, ມາເລເຊັຽ ຫຼືປະເທດ ທີ່ມີລະບົບ ທີ່ໂປ່ງໃສ ພຽງພໍ.”

ເຂດເສຖກິຈ ພິເສດ ສາມຫຼ່ຽມຄຳ ເປັນເຂດພິເສດ ທີ່ຖືກຄອບຄຸມ ດ້ວຍກຸ່ມຄົນຈີນ ທີ່ເອີ້ນວ່າ ໜ່ວຍສະເພາະກິຈ; ເຈົ້າໜ້າທີ່ລາວ ບໍ່ສາມາດເຂົ້າໄປໃກ້ໄດ້ເລີຍ; ຜູ້ໃດມີບັນຫາຫຍັງ ພາຍໃນເຂດ ເສຖກິຈພິເສດ ກໍຕ້ອງໂທຫາ ໜ່ວຍສະເພາະກິຈ ດັ່ງກ່າວ.

ດັ່ງຜູ້ຍິງລາວຄົນນຶ່ງ ທີ່ເຮັດວຽກ ຢູ່ເຂດເສຖກິຈ ພິເສດ ສາມຫຼ່ຽມຄຳ ແລະທີ່ເວົ້າ ເປັນພາສາໄທຍ ກັບວິທະຍຸ ເອເຊັຽ ເສຣີ ເພາະຢ້ານບໍ່ມີຄວາມປອດພັຍວ່າ:

“ສົມມຸດວ່າ ຖ້າຢູ່ໃນເຂດເສຖກິຈ ພິເສດ ສາມຫຼ່ຽມຄໍາ ແລະຖ້າມີເຣື່ອງ ກໍຕ້ອງໂທໄປຫາ ໜ່ວຍສະເພາະກິຈ ໂດຍກົງ. ຕຳຣວດນອກ ຫຼືຕຳຣວດລາວ ທີ່ຢູ່ນອກ ກໍຈະຊ່ອຍຫຍັງບໍ່ໄດ້ ກໍຍ້ອນວ່າ ຂະເຈົ້າບໍ່ໄດ້ຄຸມຢູ່ບ່ອນນັ້ນ. ຂ້າງໃນນັ້ນ ກໍຈະເປັນສະເພາະກິຈ ຫຼືຍາມ ທີ່ເບິ່ງແຍງເທົ່ານັ້ນ ຕຳຣວດພາຍນອກ ຈະຊ່ວຍອີຫຍັງບໍ່ໄດ້ເລີຍ.”

ເຈົ້າໜ້າທີ່ຕຳຣວດລາວ ຢູ່ເມືອງຕົ້ນເຜິ້ງ ແຂວງບໍ່ແກ້ວ ຊຶ່ງເປັນບ່ອນເຂດເສຖກິຈ ພິເສດ ສາມຫຼ່ຽມ ຕັ້ງຢູ່ ກໍກ່າວໃນວັນທີ່ 21 ພຶສຈິກາ 2022 ກັບວິທະຍຸ ເອເຊັຽ ເສຣີ ໃນທຳນອງດຽວກັນວ່າ ຖ້າຄົນງານລາວ ຫຼືຄົນງານຕ່າງປະເທດ ທີ່ເຮັດວຽກ ຢູ່ເຂດເສຖກິຈ ພິເສດ ສາມຫຼ່ຽມຄຳ ຕ້ອງການການຊ່ວຍເຫຼືອ ກໍຕ້ອງຕິດຕໍ່ ກັບໜ່ວຍສະເພາະກິຈ ເຂດເສຖກິຈ ພິເສດ ສາມຫຼ່ຽມຄຳ ເທົ່ານັ້ນ ເພາະວ່າ ເຈົ້າໜ້າທີ່ລາວ ຫຼືຕຳຣວດລາວ ບໍ່ມີສິດ, ບໍ່ມີອຳນາດ ທີ່ຈະເຂົ້າໄປແກ້ໄຂຫຍັງໄດ້ ໃນເຂດດັ່ງກ່າວ.

ດັ່ງເຈົ້າໜ້າທີ່ ຕຳຣວດລາວ ທ່ານນັ້ນ ໄດ້ກ່າວຕື່ມວ່າ:

“ເອີ້! ປົກກະຕິຢູ່ຫັ້ນ ມັນກໍມີໜ່ວຍງານ ສະເພາະກິຈ ຂອງເພິ່ນເດ່. ມັນກໍມີໜ່ວຍ ສະເພາະກິຈ ຂອງເພິ່ນປະຈຳຢູ່ຫັ້ນ ແລ້ວມີຫຍັງ ເພິ່ນກໍແກ້ໄຂຢູ່ພາຍໃນຫັ້ນເອົາ. ຫຼັງຈາກນນັ້ນແລ້ວ ກໍຣາຍງານມາ ຕາມຂັ້ນຕອນຢູ່ຫັ້ນ. ມີຫຍັງເພິ່ນກໍແກ້ໄຂ ຢູ່ພາຍໃນຫັ້ນ. ຖ້າມັນເຫຼືອບ່າກວ່າແຮງ ມັນຕ້ອງໄປຮອດຂັ້ນເທິງ.”

ຜ່ານມາ ຄົນລາວ ແລະຄົນຕ່າງປະເທດ ຫຼາຍຄົນ ເຂົ້າໄປເຮັດວຽກ ເປັນຜູ້ຕົ້ວະຕົ້ມຄົນອື່ນ ຫຼື ສແກມເມີ້ຣ໌ (Scammers) ຢູ່ເຂດເສຖກິຈ ພິເສດ ສາມຫຼ່ຽມຄຳ; ເຈົ້າໜ້າທີ່ລາວ ບໍ່ເຄີຍເຂົ້າໄປກວດກາ ແລະດຳເນີນຄະດີ ກັບບໍຣິສັດຈີນ ທີ່ເຮັດຜິດກົດໝາຍນັ້ນ ຈັກເທື່ອ.

ດັ່ງຊາວລາວ ອີກຄົນນຶ່ງ ທີ່ເຮັດວຽກ ຢູ່ໃນເຂດເສຖກິຈ ພິເສດ ແຫ່ງນີ້ ກ່າວກັບວິທະຍຸ ເອເຊັຽ ເສຣີ ໃນມື້ດຽວກັນນີ້ວ່າ:

“ຫົວໜ້າບໍຣິສັດຫັ້ນ ເພິ່ນຊິຈັບໄປປັບໃໝ ຫຼືອີຫຍັງຫັ້ນ ກໍມີແຕ່ຫົວໜ້າ ເຂົາເປັນຄົນອອກໜ້າ ຫົວໜ້າບໍຣິສັດຄົນຈີນຫັ້ນນ່າ. ໃນສາມຫຼ່ຽມນີ້ ບໍ່ມີການຖືກຈັບດອກ ມີແຕ່ຢູ່ນອກພຸ້ນ ຂະເຈົ້າບໍ່ໃຫ້ສິດ ເຂົ້າໄປຄົ້ນເດ່ ເປັນໃນເຂດທີ່ວ່າ ຂະເຈົ້າຫວງຫ້າມ ບໍ່ໃຫ້ຄົນນອກເຂົ້າ-ອອກ.”

ໃນໄລຍະ 2-3 ເດືອນທີ່ຜ່ານມາ ຣັຖບານຫຼາຍປະເທດ ໄດ້ຊົດຊ່ວຍພົລເມືອງ ຂອງພວກເຂົາເຈົ້າ ຫຼາຍຄົນ ທີ່ຖືກຕົ້ວະຍົ້ວະ ໄປເຮັດວຽກເປັນ ສແກມເມີ້ຣ໌ (Scammers) ຢູ່ເຂດເສຖກິຈ ພິເສດ ສາມຫຼ່ຽມຄຳ. ຄົນງານລາວ ຢູ່ໃນເຂດພິເສດນັ້ນ ກໍເຫັນວ່າ ບັນຫາການຕົ້ວະຕົ້ມ ດັ່ງກ່າວ ຕ້ອງໃຊ້ເວລາດົນນານ ໃນການແກ້ໄຂ ເພາະວ່າ ຢູ່ເຂດເສຖກິຈ ພິເສດສາມຫຼ່ຽມຄຳ ມີຫຼາຍບໍຣິສັດ ທີ່ເຮັດຜິດກົດໝາຍ ຂອງລາວ

ສ່ວນນັກຊ່ຽວຊານ ກ່ຽວກັບລາວ ສຶກສາ ທີ່ບໍ່ປະສົງບອກຊື່ ແລະສຽງ ອະທິບາຍວ່າ ພາຍໃນເຂດເສຖກິຈພິເສດ ສາມຫຼ່ຽມຄຳ, ທາງການລາວ ໄດ້ໃຫ້ອຳນາດ ທາງດ້ານເສຖກິຈ ແກ່ນັກລົງທຶນຈີນ ຢ່າງເຕັມທີ່. ສ່ວນການຄຸ້ມຄອງ ເຣື່ອງຄວາມໝັ້ນຄົງ ຍັງຄົງເປັນອຳນາດ ຂອງທາງການລາວຢູ່; ແຕ່ທັງ 2 ຝ່າຍ ຍັງບໍ່ທັນຕັ້ງຫ້ອງການ ຄວາມໝັ້ນຄົງ ໃນເຂດເສຖກິຈ ພິເສດ ດັ່ງກ່າວນີ້ເທື່ອ.

ທ່ານ ຊູວິດ ກະມົນວິສິດ ອະດີຕ ນັກການເມືອງໄທຍ ກ່າວກັບ ວິທະຍຸ ເອເຊັຽ ອີກວ່າ ທ່ານ ຈ້າວເຫວີ່ຍ ປະທານ ບໍຣິຫານ ເຂດເສຖກິຈ ພິເສດສາມຫຼ່ຽມຄຳ ຕ້ອງໄດ້ຮັບການສນັບສນຸນ ຈາກຜູ້ມີອຳນາດ ຈຶ່ງສາມາດ ເຮັດທຸຣະກິຈ ແລະເຊົ່າດິນ ເປັນເວລາດົນນານໄດ້.

ທ່ານ ກ່າວວ່າ:

“ຈ້າວເຫວີ່ຍ ຈະບໍ່ສາມາດເປີດ ຫຼືເຈຣະຈາ ກັບຣັຖບານລາວໄດ້ 99 ປີ ຖ້າບໍ່ມີເບື້ອງຫຼັງ ຫຼືຜູ້ໃຫຍ່ສນັບສນຸນ. ຈ້າວເຫວີ່ຍ ເປັນເຈົ້າມື ກາສິໂນ ຄົນນຶ່ງ. ການຈະໄປເຈຣະຈາ ກັບຣັຖບານລາວ ແລ້ວເຊົ່າໄດ້ 99 ປີ, ແລ້ວພັທນາທັງເມືອງ ທີ່ມີທັງທ່າເຮືອ ແລະສນາມບິນ, ສິ່ງຕ່າງໆເຫຼົ່ານີ້ ຕ້ອງມີຄົນຢູ່ເບື້ອງຫຼັງ.”

ເມື່ອວັນທີ່ 1 ຕຸລາ 2022, ດຣ. ບົວຄົງ ນາມມະວົງ ເຈົ້າແຂວງ ແຂວງບໍ່ແກ້ວ ໄດ້ມອບຫຼຽນໄຊ ພິລາອາດຫານ ຊັ້ນ 2 ໃຫ້ແກ່ທ່ານ ຈ້າວເຫວີ່ຍ ເພື່ອເປັນການຍ້ອງຍໍ ສັນຣະເສີນທ່ານ ຈ້າວເຫວີ່ຍ ທີ່ໄດ້ປະກອບສ່ວນ ເຂົ້າໃນວຽກງານ ປ້ອງກັນຄວາມສງົບ ແລະປ້ອງກັນຊາຕ.