ແມ່ຍິງລາວ 7 ຄົນ ຖືກຈັບຢູ່ໄທ ຂໍ້ຫາຂາຍບໍລິການທາງເພດ

ວັນທີ 4 ເດືອນເມສາ ປີ 2024 ທີ່ຜ່ານມາ ກອງບັງຄັບການ ປາບປາມການຄ້າມະນຸດ ປະເທດໄທ ນໍາກໍາລັງຕໍາຫຼວດ ເຂົ້າຈັບ ທ້າວ ກຽດ ເປັນຄົນສັນຊາດໄທ ເຈົ້າຂອງຮ້ານຄາຣາໂອະເກະ ແລະນາງ ນິສາກອນ ເປັນຄົນສັນຊາດລາວ ທີ່ເຮັດວຽກເປັນຜູ້ເກັບເງິນ ຫຼື ແຄັດເຊຍ ແລະເປັນເມຍ ຂອງເຈົ້າຂອງຮ້ານຄາລາໂອະດັ່ງກ່າວ ພ້ອມດ້ວຍ ແມ່ຍິງລາວ ອາຍຸ 21-36 ປີ ທັງໝົດ 7 ຄົນ ຢູ່ຮ້ານຄາລາໂອເກະ ໃນພື້ນທີ່ ໝູ່ 1 ເມືອງບາງປະກົງ ແຂວງຊະເຊີງເຊົາ ພາຍຫຼັງຮ້ານຄາລາໂອເກະດັ່ງກ່າວນັ້ນ ລັກລອບ ເປີດສະຖານບໍລິການບັນເທີງ ແລະມີການຂາຍບໍລິການທາງເພດ.

ສະເພາະແມ່ຍິງລາວ ທັງໝົດ 7 ຄົນ ທີ່ຖືກຕໍາຫຼວດຈັບ ໃຫ້ການຍອມຮັບໃນຊັ້ນຕໍາຫຼວດວ່າ ພວກກ່ຽວເຂົ້າມາປະເທດໄທ ໃນຖານະນັກທ່ອງທ່ຽວ ແລະບໍ່ມີໃບອະນຸຍາດເຮັດວຽກ ແຕ່ຢ່າງໃດ ທາງຕໍາຫຼວດ ຈຶ່ງແຈ້ງຂໍ້ກ່າວຫາ “ເປັນບຸກຄົນຕ່າງດ້າວ ເຮັດວຽກໂດຍບໍ່ມີໃບອະນຸຍາດເຮັດວຽກ.”, ຕາມຄວາມເວົ້າ ຂອງພັນຕໍາຫຼວດເອກ ພັດທະນະພົງ ສີພິນເພາະ ຜູ້ກໍາກັບການ 2 ກອງບັງຄັບການປາບປາມ ການຄ້າມະນຸດ ກອງບັນຊາການ ຕໍາຫຼວດສອບສວນກາງ ສໍານັກງານຕໍາຫຼວດແຫ່ງຊາດ ປະເທດໄທ ກ່າວຕໍ່ວິທຍຸເອເຊັຽເສຣີ ໃນວັນທີ 8 ເມສາ ນີ້ວ່າ:

“ປົກກະຕິ ບຸກຄົນຕ່າງດ້າວ 3 ສັນຊາດ ຄື: ກໍາປູເຈຍ, ລາວ, ມຽນມາ ທາງປະເທດໄທ ຍົກເວັ້ນໃຫ້ເຮັດວຽກໄດ້ ໃນປະເພດວຽກກໍ່ສ້າງ ແຕ່ວຽກປະເພດສາວຄາລາໂອເກະ, ນັ່ງດີ້ງ, ນັ່ງໃຫ້ບໍລິການໃນຮ້ານອາຫານ ຫຼື ຮ້ານບັນເທີງ ມັນເຮັດບໍ່ໄດ້ ບໍ່ໄດ້ຮັບອະນຸຍາດໃຫ້ເຮັດ ຖ້າເຂົ້າມາໃນລັກສະນະນີ້ ຖ້າເປັນຄົນຕ່າງດ້າວ ກໍຈະຖືກຈັບ ໃນຂໍ້ຫານີ້.”

ທ່ານກ່າວຕື່ມວ່າ ການເຂົ້າຈັບໃນເທື່ອນີ້ ແມ່ນຕໍາຫຼວດກອງບັງຄັບການ ປາບປາມການຄ້າມະນຸດ ໄດ້ແຝງໂຕເປັນລູກຄ້າ ເຂົ້າໄປໃຊ້ບໍລິການ ພາຍໃນຮ້ານດັ່ງກ່າວ ຕໍ່ມາ ແມ່ຍິງລາວ ຊື່ວ່າ ນາງມິ້ນ (ນາມສົມມຸດ) ມາສະເໜີຂາຍບໍລິການທາງເພດ 2,000 ບາດ ໂດຍທາງຮ້ານ ຈະໄດ້ສ່ວນແບ່ງ 400 ບາດ ແລະຫັກຄ່າໂຮງແຮມ 280 ບາດ ຈາກນັ້ນ ເຈົ້າຂອງຮ້ານຈະຂີ່ລົດຈັກ ພາໄປສົ່ງຢູ່ໂຮງແຮມ ເພື່ອຮ່ວມມີເພດສໍາພັນ.

ສ່ວນໂທດ ຂອງຜູ້ຖືກກ່າວຫາ ແມ່ຍິງລາວ ທັງໝົດ 7 ຄົນ ທີ່ເຮັດຜິດໃນເທື່ອນີ້ ຈະຖືກປັບໃໝ ແລະຖືກຄຸກ ແຕ່ສ່ວນຫຼາຍແລ້ວ ຊັ້ນສານບໍ່ປັບໃໝ ແລະຈໍາຄຸກ ໃນກໍລະນີເຮັດຜິດແນວນີ້ ແຕ່ຈະສົ່ງໃຫ້ຕໍາຫຼວດກວດຄົນເຂົ້າເມືອງ ຜັກດັນພວກກ່ຽວກັບປະເທດລາວ ຈາກນັ້ນ ຕໍາຫຼວດກວດຄົນເຂົ້າເມືອງ ກໍຈະບັນທຶກຂໍ້ມູນຂອງພວກກ່ຽວ ວ່າບໍ່ອະນຸຍາດໃຫ້ກັບເຂົ້າມາເຮັດວຽກໃນປະເທດໄທ, ດັ່ງຜູ້ກໍາກັບການ 2 ກ່າວວ່າ:

“ປົກກະຕິ ກໍຄື ນໍາກໍາລັງຕໍາຫຼວດ ໄປກວດຮ້ານບັນເທີງ ແລ້ວເຮົາພົບຄວາມຜິດ ໃນຂະນະທີ່ ເຂົາເຈົ້າເຮັດວຽກຢູ່ ມັນກໍຈະເປັນຄວາມຜິດ ຕາມພະລາດຊະບັນຍັດ ການເຮັດວຽກຂອງຄົນຕ່າງດ້າວ ເຊິ່ງເປັນວຽກທີ່ຫ້າມ ບໍ່ໃຫ້ຄົນຕ່າງດ້າວເຮັດ ຈຶ່ງມີໂທດປັບໃໝເງິນບໍ່ເກີນ 1 ໝື່ນບາດ ແລ້ວຄາດວ່າ ມີໂທດຈໍາຄຸກ ບໍ່ເກີນ 2 ເດືອນ ແຕ່ສ່ວນຫຼາຍແລ້ວ ສານຈະພິຈາລະນາລໍລົງອາຍາ ແລ້ວຫາສານພິຈາລະນາ ບໍ່ໄດ້ປັບໃໝເງິນ ກໍຈະສົ່ງໃຫ້ຈຸຕໍາຫຼວດ ກວດຄົນເຂົ້າເມືອງ ຜັກດັນສົ່ງກັບປະເທດລາວ ຈາກນັ້ນ ຕໍາຫຼວດກວດຄົນເຂົ້າເມືອງ ກໍຈະບັນທຶກຂໍ້ມູນພວກກ່ຽວກໍຄື ແມ່ຍິງລາວ ທັງ 7 ຄົນ ວ່າ ແບກລິດ (Blacklist).”

ຂະນະທີ່ ອີງຕາມພະລາດຊະບັນຍັດຄົນເຂົ້າເມືອງ ລະບຸວ່າ ຄົນຕ່າງດ້າວທີ່ເຮັດວຽກ ໂດຍບໍ່ມີໃບອະນຸຍາດເຮັດວຽກ ຈະຖືກຫ້າມຂໍອະນຸຍາດເຮັດວຽກ ພາຍໃນ 2 ປີ ນັບແຕ່ມື້ທີ່ໄດ້ຮັບໂທດ, ອີງຕາມຂໍ້ມູນ ຈາກບໍລິສັດນໍາຄົນຕ່າງດ້າວ ມາເຮັດວຽກໃນປະເທດໄທ.

ສ່ວນເຈົ້າຂອງຮ້ານ ແລະຜູ້ເກັບເງິນ ຫຼືແຄັດເຊຍ ຈະຖືກລົງໂທດ ຕາມພະລາດຊະບັນຍັດ ປ້ອງກັນ ແລະປາບປາມການຄ້າປະເວນີ, ດັ່ງພັນຕໍາຫຼວດເອກ ພັດທະນະພົງ ກ່າວວ່າ:

“ອັນນີ້ ກໍເປັນຄວາມຜິດ ຕາມພະລາດສະບັນຍັດ ປ້ອງກັນ ແລະປາບປາມ ການຄ້າປະເວນີ ກໍຄື ມີໂທດເປັນທຸລະຈັດຫາ ເພື່ອຄ້າປະເວນີ ມີໂທດຈໍາຄຸກ ຕັ້ງແຕ່ 1 ປີ ເຖິງ 20 ປີ ທັງເມຍຂອງລາວນໍາ ທີ່ເປັນຄົນລາວ ທີ່ເຮັດວຽກເປັນຜູ້ເກັບເງິນ ຫຼືແຄັດເຊຍນໍາດ້ວຍ ແຕ່ວ່າ ເທື່ອທໍາອິດ ເຮົາໄດ້ຄັດແຍກແມ່ຍິງລາວ ທີ່ມາເຮັດວຽກ ເປັນສາວຄາລາໂອເກະ ແອບແຝງຂາຍບໍລິການທາງເພດ ແມ່ນເປັນຜູ້ເສຍຫາຍຄ້າມະນຸດຫຼືບໍ່ ກໍປະກົດວ່າ ທຸກຄົນອາຍຸກາຍ 20 ປີໝົດແລ້ວ ແລະບໍ່ມີຜູ້ໃດ ທີ່ຖືກບັງຄັບ ຫຼືຕົວະຍົວະ ມາຂາຍບໍລິການທາງເພດ ກໍເລີຍບໍ່ເປັນຄວາມຜິດເລື່ອງຄ້າມະນຸດ ເຈົ້າຂອງຮ້ານ ກໍເປັນຄວາມຜິດ ເລື່ອງເປັນທຸລະຈັດຫາ ເພື່ອຄ້າປະເວນີ.”

ປັດຈຸບັນ ເຈົ້າໜ້າທີ່ຕໍາຫຼວດ ຈາກສະຖານີຕໍາຫຼວດ ເມືອງບາງປະກົງ ທ່ານໜຶ່ງ ຢັ້ງຢືນວ່າ ແມ່ຍິງລາວທັງ 7 ຄົນ ທີ່ເປັນພວກຖືກກ່າວຫານັ້ນ ຍັງຢູ່ສະຖານີຕໍາຫຼວດ ເມືອງບາງປະກົງ ເພື່ອລໍຖ້າຜັກດັນກັບປະເທດລາວ, ດັ່ງທ່ານກ່າວວ່າ:

“ມື້ທີ່ຈັບ ມັນເປັນມື້ວັນທີ 4 ເດືອນເມສາ ຊ່ວງກາງຄືນ ຂ້ອຍກວດບັນທຶກປະຈໍາວັນ ແລ້ວເປັນປະຈໍາວັນ ຂໍ້ທີ 1 ຂອງມື້ວັນທີ 4 ເດືອນເມສາ ແມ່ຍິງລາວ ພວກຖືກກ່າວຫານີ້ ຍັງຢູ່ທີ່ ສະຖານີຕໍາຫຼວດເມືອງບາງປະກົງ ລໍຖ້າຜັກດັນ ກັບປະເທດລາວ ອີງຕາມຂໍ້ມູນ ຈາກເຈົ້າໜ້າທີ່ສານ ສົ່ງຟ້ອງສານແລ້ວ ກຽມຜັກດັນພວກເຂົາເຈົ້າ ກັບປະເທດລາວ.”

ຊາວລາວຈໍານວນໜຶ່ງ ຮູ້ກົດໝາຍວ່າ ຫາກເຂົ້າມາເຮັດວຽກຢູ່ໄທ ໂດຍບໍ່ມີໃບອະນຸຍາດເຮັດວຽກ ຈະຖືກຈັບ ແລະຖືກກົດໝາຍໄທ ບໍ່ໃຫ້ເຂົ້າປະເທດໄທ ແຕ່ພວກເຂົາເຈົ້າ ກໍຍັງຕັດສິນໃຈມາເຮັດວຽກຢູ່ໄທ ໂດຍບໍ່ມີໃບອະນຸຍາດເຮັດວຽກ ຍ້ອນການເຮັດວຽກຢູ່ໄທ ໂດຍມີໃບອະນຸຍາດເຮັດວຽກ ຈາກນາຍຈ້າງຄັກແນ່ ຈະເຮັດໃຫ້ຄົນງານລາວຈໍານວນໜຶ່ງ ບໍ່ສາມາດຂໍລາອອກຈາກວຽກໄດ້ ຫາກວຽກຖືກກົດໝາຍນັ້ນ ຖືກເອົາລັດເອົາປຽບ, ດັ່ງໄວໜຸ່ມລາວ ອາຍຸ 24 ປີ ຈາກແຂວງສະຫວັນນະເຂດ ທີ່ເຂົ້າມາເຮັດວຽກ ຢູ່ບາງກອກ ປະເທດໄທ ຜູ້ໜຶ່ງ ກ່າວໃນມື້ດຽວກັນນີ້ວ່າ:

“ນ້ອງມີແຕ່ພາດສະປອດ ແຕ່ວ່າເພິ່ນຈັບໄດ້ ກໍ່ຖືວ່າ ແບນ ບໍ່ໃຫ້ເຂົ້າປະເທດໄທ, ເວລາເຮົາເຮັດບັດແລ້ວ ເອີ່ ຖ້າວ່າເຮົາຢູ່ບໍ່ໄດ້ແລ້ວ ແລ້ວເຮົາອອກ ມັນອອກຍາກ ທາງລູກຈ້າງຄືກັນ ຄັນງານມັນຍງບໍ່ຊົວ ບໍ່ຢາກເຮັດປານໃດ ແບບວ່າເຮົາສິຢູ່ໄດ້ດົນບໍ່ ຫຼືວ່າ ເຮົາຢູ່ບໍ່ໄດ້ດິນ ເຮົາຕ້ອງຢູ່ເຮັດໄປແບບ ລອງໄປຈັກ 5 ເດືອນ ຫຼືວ່າ ປີໜຶ່ງ ເຮົາຈັ່ງໝັ້ນໃຈວ່າເຮົາເຮັດ ແລ້ວເຮົາຢູ່ໄດ້ຕະຫຼອດ ເຮົາຈັ່ງຕັດສິນໃຈ ເຮັດ (MOU) ໄດ້.”

ບໍ່ດົນທີ່ຜ່ານມາ ໃນວັນທີ 3 ເດືອນມີນາ ປີ 2024 ແມ່ຍິງລາວ ຊື່ວ່າ ນາງແພ (ນາມສົມມຸດ) ອາຍຸ 18 ປີ ເປັນຄົນຈາກເມືອງໂຂງ ແຂວງຈໍາປາສັກ ເຮັດວຽກເປັນຜູ້ເບິ່ງແຍງຜູ້ສູງອາຍຸ ຢ່າງຖືກກົດໝາຍ ໄດ້ຕັດສິນໃຈອອກຈາກເຮືອນຫຼັງໃຫຍ່ ແລ້ວປີນຮົ້ວສູງເກືອບ 2 ແມັດ ໄປຫາຕໍາຫຼວດ ສະຖານີຕໍາຫຼວດເມືອງອຸດອນທານີ ປະເທດໄທ ເພື່ອຂໍຄວາມຊ່ອຍເຫຼືອ ພາຍຫຼັງນາງ ຖືກນາຍຈ້າງ ທີ່ເຮັດວຽກເປັນທ່ານໝໍ ເຮັດອະນາຈານ, ກັກຂັງ, ຂົ່ມຂູ່, ບໍ່ອະນຸຍາດໃຫ້ລາອອກ, ຍຶດພາດສະປອດ ແລະໃບອະນຸຍາດເຮັດວຽກ.