ແມ່ຍິງລາວ ທີ່ຕິດຢູ່ສູນສະແກມເມີຂອງຈີນ ໃນປະເທດພະມ້າ ຍັງລໍຖ້າການຊ່ວຍເຫຼືອ

ນາງ ນໍ້າທິບ (ຊື່ສົມມຸດ) ປັດຈຸບັນ ອາຍຸເກີນ 18 ປີ ຄົນແຂວງພາກເໜືອຂອງລາວ ທີ່ຖືກຕົວະໄປເຮັດວຽກສະແກມເມີ ຢູ່ບໍລິສັດຈີນ ໃນປະເທດພະມ້າ ເປັນເວລາ 2 ປີແລ້ວນັ້ນ ຍັງລໍຖ້າການຊ່ວຍເຫຼືອຢູ່. ນາງໄດ້ສົ່ງຂໍ້ຄວາມເຖິງນັກຂ່າວວິທຍຸເອເຊັຽເສຣີ ໃນມື້ວັນທີ 26 ພະຈິກ 2024 ນີ້ ເພື່ອຂໍຄວາມຊ່ວຍເຫຼືອ ໂດຍເວົ້າວ່າ ການເປັນຢູ່ຂອງນາງ ຢູ່ໃນສະພາບທໍລະມານຫຼາຍຢ່າງ ເປັນຕົ້ນ ຖືກທໍາຮ້າຍຮ່າງການ ຖ້າເຮັດວຽກບໍ່ໄດ້ຕາມເປົ້າໝາຍ. ນາງເວົ້າວ່າ: 

“ທໍລະມານທີ່ສຸດ ມີຄົນລາວບາງສ່ວນ ຖືກຂາຍໄປກໍາພູຊາ ຂ້ອຍບໍ່ຢາກໄປ ຊ່ວຍເຫຼືອຂ້ອຍແດ່ ພວກຂ້ອຍເຮັດວຽກຕອນຄໍ່າ ຖືກຕີ ຖືກລົງໂທດທຸກມື້  ຂ້ອຍເດ ທີ່ຖືກນໍາມາຂາຍຢູ່ພະມ້າ ຄືບໍ່ມີໃຜມາຊ່ວຍແດ່.”

ແລະຜູ້ເປັນແມ່ຂອງນາງ ນໍ້າທິບ ທີ່ຂໍສະຫງວນຊື່ ແລະສຽງ ກໍໄດ້ຢືນຢັນຕໍ່ວິທຍຸເອເຊັຽເສຣີ ໃນມື້ວັນທີ 27 ພະຈິກນີ້ວ່າ ລູກສາວຂອງນາງ ຖືກຕົວະໄປເຮັດວຽກສະແກມເມີຢູ່ປະເທດພະມ້າແທ້, ໄດ້ຖືກໃຫ້ເຮັດວຽກ ແຕ່ 10 ຊົ່ວໂມງ ເຖິງ 19 ຊົ່ວໂມງຕໍ່ມື້ ໂດຍບໍ່ໄດ້ຮັບເງິນເດືອນ ແລະຖືກນາຍຈ້າງຄົນທໍາອິດ ທີ່ເປັນຄົນຈີນ ທໍາຮ້າຍຮ່າງກາຍ ແລະລູກສາວຂອງນາງ ຖືກຂາຍໄປໃຫ້ບໍລິສັດຈີນ ອີກແຫ່ງໜຶ່ງ ຍ້ອນນາງເຮັດວຽກບໍ່ໄດ້ຕາມເປົ້າໝາຍຂອງເຂົາ. ນາງເວົ້າວ່າ:

”ໝົດທາງສູ້ແລ້ວ ແມ່ນີ້. ນາງຮ້ອງໄຫ້ ແຕ່ບໍ່ຮູ້ວ່າ ຈັກຊິເຮັດແນວໃດ, ເງິນເດືອນກໍບໍ່ໄດ້, ມີແຕ່ເຂົາເອົາເງິນມາໃຫ້ຈ່າຍ ເດືອນລະ 2,000 – 3,000 ບາດເທົ່ານັ້ນ, ຕອນທີ່ລູກສາວຂອງນາງ ເຮັດວຽກຢູ່ບ່ອນເກົ່າຫັ້ນ ເມື່ອຕອບແຊັດບໍ່ໄດ້ ເຂົາສິເອົາໄຟຟ້າຊ໋ອດ, ແຕ່ມາເຮັດວຽກຢູ່ບ່ອນ  ໃໝ່ນີ້ ຍັງບໍ່ທັນຖືກຈັກເທື່ອ.” 

ແມ່ຂອງນາງ ນໍ້າທິບ ເວົ້າຕໍ່ໄປວ່າ ລູກສາວຂອງນາງ ບໍ່ໄດ້ສະໝັກໃຈໄປເຮັດວຽກສະແກມເມີ ແຕ່ຖືກນາຍໜ້າ ທີ່ເປັນຄົນລາວຕົວະ ວ່າໄປເຮັດວຽກໂຮງງານ ຢູ່ປະເທດໄທ. ແຕ່ພໍນາງໄປຮອດໄທແລ້ວ ກໍຖືກນາຍໜ້າຕົວະຕໍ່ ໂດຍເວົ້າວ່າ ຈະໃຫ້ເງິນສົດ ຈໍານວນ 2,500,000 ກີບ ເປັນການຄໍ້າປະກັນວ່າ ເມື່ອໄປເຮັດວຽກຢູ່ພະມ້າແລ້ວ ຈະໄດ້ເງິນຄ່າຈ້າງແນ່ນອນ. ຈາກນັ້ນ ລູກສາວຂອງນາງ ກໍຖືກພາຂ້າມໄປພະມ້າ ຜ່ານຊ່ອງທາງທໍາມະຊາດ, ບໍ່ໄດ້ຜ່ານດ່ານກວດຄົນເຂົ້າເມືອງໄທ-ພະມ້າ. ນາງເວົ້າຕື່ມອີກວ່າ:

”ຄ່າເອກກະສານບ່ອນນີ້ ບ່ອນນັ້ນ, ຊື້ຢູ່ ຊື້ກິນ ຄ່າປີ້ຍົນ ຄ່າປີ້ລົດ ໄປຫາບ່ອນນີ້ ເຂົາເຈົ້າກໍວ່າໃຫ້ປະກອບເອກກະສານໂຕນີ້ ໂຕນັ້ນ ບ່ອນໃດກໍວ່າ ຊິໄດ້ ກໍຫາຍໄປ ບ່ອນໃດກໍຫວັງວ່າຊິໄດ້ ກໍແລ່ນໄປໝົດ ທຸກສິ່ງທຸກຢ່າງບໍ່ມີຫຍັງ ບໍ່ຄືບໜ້າອີ່ຫຍັງ”. ນາງກັງວົນນໍາວ່າ ຖ້າລູກສາວຂອງຕົນ ບໍ່ໄດ້ຮັບການຊ່ວຍເຫຼືອຢ່າງໄວວາ ກໍຢ້ານວ່າ ນາງຈະຖືກຂາຍໄປບໍລິການທາງເພດ ຢູ່ປະເທດກໍາປູເຈຍ ອັນຈະເຮັດໃຫ້ການຊ່ວຍເຫຼືອນັ້ນ ຍາກຫຼາຍຂື້ນ.”

ກ່ຽວກັບເລື່ອງທີ່ວ່ານີ້ ເຈົ້າໜ້າທີ່ ກະຊວງປ້ອງກັນຄວາມສະຫງົບ ນາງໜຶ່ງເວົ້າວ່າ ການຊ່ວຍເຫຼືອຜູ້ຖືກເຄາະຮ້າຍ ຈາກການຄ້າມະນຸດ ແບບຖືກຕົວະໄປເຮັດວຽກສະແກມເມີ ຢູ່ປະເທດພະມ້າ ມີຄວາມຫຍຸ້ງຍາກແທ້ ຍ້ອນບ່ອນທີ່ຜູ້ເຄາະຮ້າຍ ເຮັດວຽກນັ້ນ ເປັນບ່ອນທີ່ລັດຖະບານພະມ້າ ບໍ່ສາມາດເຂົ້າເຖິງໄດ້ ດັ່ງທີ່ນາງເວົ້າວ່າ:

”ສ່ວນຫຼາຍນໍ ເຂົາເຈົ້າໄປນ່າ ເຂົາເຈົ້າຈະໄປຢູ່ໃນເຂດພິເສດຂອງພະມ້າ ແລ້ວພວກຕໍາຫຼວດພະມ້າ ກໍເຂົ້າໄປໃນເຂດນັ້ນບໍ່ໄດ້ ທາງລັດຖະບານມຽນມາໃຫ້ຄໍາຕອບເຮົາມາແບບນີ້ແຫຼະ ລະພູດທີ່ວ່າ ຊ່ວຍມາໄດ້ຫັ້ນນະ ກໍຄືເຂົາເຈົ້າລັກໜີອອກມາຈາກເຂດນັ້ນໄດ້ ແລ້ວຄ່ອຍມາຂໍຄວາມຊ່ວຍເຫຼືອຈາກຕໍາຫຼວດມຽນມາ ແລ້ວຕໍາຫຼວດມຽນມາ ຈຶ່ງມາສົ່ງກັບຄືນມາປະເທດເຮົາຫັ້ນນະ”

ເພື່ອຂໍຮູ້ກ່ຽວກັບຄວາມຄືບໜ້າ ຂອງການຊ່ວຍເຫຼືອຄົນລາວ ທີ່ຕົກເປັນເຫຍື່ອຂອງການຄ້າມະນຸດ ຢູ່ປະເທດພະມ້າທີ່ວ່ານັ້ນ ວິທຍຸເອເຊັຽເສຣີ ໄດ້ຕິດຕໍ່ໄປຫາສະຖານທູດລາວ ປະຈໍາປະເທດພະມ້າ ແລະເຈົ້າໜ້າທີ່ຕໍາຫຼວດ ທີ່ກ່ຽວຂ້ອງຂອງລາວ, ແຕ່ບໍ່ມີການຕອບກັບຂໍ້ຄວາມ ແລະບໍ່ຮັບໂທລະສັບແຕ່ຢ່າງໃດ.

ປັດຈຸບັນ ຍັງມີຄົນລາວ 19 ຄົນ ໃນຈໍານວນຄົນຕ່າງປະເທດທັງໝົດ 110 ຄົນ ທີ່ຕົກເປັນເຫຍື່ອຂອງການຄ້າມະນຸດ ຢູ່ປະເທດພະມ້າ ຂໍໃຫ້ທາງການລາວຊ່ວຍເຫຼືອ ໃຫ້ພວກຕົນໄດ້ອອກຈາກສູນສະແກມເມີແຫ່ງໜຶ່ງ ຢູ່ເມືອງເມຍວະດີ ຍ້ອນຍັງຖືກກັກຂັງ ທໍລະມານຮ່າງກາຍຢູ່.

ເມື່ອທ້າຍເດືອນຕຸລາທີ່ຜ່ານມານີ້ ເຄືອຂ່າຍພາກປະຊາສັງຄົມ ເພື່ອຊ່ວຍເຫຼືອຜູ້ຕົກເປັນເຫຍື່ອຂອງການຄ້າມະນຸດ (Civil Society Network for Victim Assistance in Human Trafficking) ໄດ້ສົ່ງຈົດໝາຍເຖິງ ຍານາງ ແພທອງທານ ນາຍົກລັດຖະມົນຕີໄທ, ເຖິງກະຊວງທີ່ກ່ຽວຂ້ອງ ແລະຄະນະກໍາມະການສິດທິມະນຸດສະຍະຊົນແຫ່ງຊາດໄທ ເພື່ອຮຽກຮ້ອງຂໍຄວາມຊ່ວຍເຫຼືອ.