ສະຖາບັນຂົງຈື້ ຈະເປີດຫລັກສູດ ປະຣິນຍາໂທ ສອນເປັນພາສາຈີນ

ສະຖາບັນຂົງຈື້ຂອງຈີນ ຢູ່ທີ່ມະຫາວິທຍາໄລແຫ່ງຊາຕລາວ ມີແຜນຈະເປີດສອນລະດັບປະຣິນຍາໂທ ເປັນພາສາຈີນ. ຫລັກສູດນີ້ຈະຖືກຮັບຮອງ ຈາກກະຊວງສຶກສາທິການ ແລະກິລາ ຂອງລາວ ເພື່ອເຮັດໃຫ້ລະບົບການຮຽນການສອນ ຫລັກສູດປະຣິນຍາໂທ ເປັນໄປຕາມລະບຽບຂອງກະຊວງ.

ດັ່ງເຈົ້າໜ້າທີ່ ກະຊວງສຶກສາທິການ ແລະກິລາ ທ່ານນຶ່ງກ່າວຕໍ່ວິທຍຸ ເອເຊັຽ ເສຣີ ໃນມື້ວັນທີ 8 ສິງຫານີ້ວ່າ:

“ທາງຫົວໜ້າສະຖາບັນຂົງຈື້ ມະຫາວິທຍາໄລແຫ່ງຊາຕເນາະ ເພິ່ນມີແຜນວ່າຊິຮ່ວມມື ກັບສະຖາບັນຂົງຈື້ພາສາຕ່າງປະເທດ ແລະວັທນະທັມຂອງຈີນ ຢູ່ປັກກິ່ງຫັ້ນ ແລ້ວບາດນີ້ ເພິ່ນຊິມີການສອນພາສາຈີ ລະດັບປະຣິນຍາໂທແຕ່ວ່າຍັງບໍ່ເຫັນເພິ່ນເອົາຫລັກສູດມາໃຫ້ເບິ່ງ.”

ທ່ານກ່າວຕື່ມວ່າ ຫລັກສູດການສອນທີ່ວ່ານັ້ນ ໃນເບື້ອງຕົ້ນນີ້ ຍັງບໍ່ມີຂໍ້ສລຸບວ່າ ຈະເປີດສອນວິຊາໃດແດ່, ແຕ່ກະຊວງສຶກສາທິການ ແລະກິລາຂອງລາວ ຕ້ອງການໃຫ້ເນັ້ນໃສ່ການສອນພາສາຈີນ ເພື່ອໃຫ້ນັກສຶກສາ ທີ່ຮຽນຈົບອອກມາເປັນຄຣູສອນພາສາຈີນ ຢູ່ຕາມແຂວງຕ່າງໆໄດ້. ປັດຈຸບັນ ການຮຽນພາສາຈີນ ທັງຢູ່ໃນສະຖາບັນຂົງຈື້ແຫ່ງມະຫາວິທຍາໄລແຫ່ງຊາຕລາວ ແລະສະຖາບັນສອນພາສາຈີນຂອງເອກກະຊົນ ໄດ້ຮັບຄວາມນິຍົມຫລາຍ ເພາະນັກທຸຣະກິຈຈີນ ທີ່ເຂົ້າມາລົງທຶນຢູ່ລາວຫລາຍພັນໂຄງການນັ້ນ ຕ້ອງການຄົນລາວເຮັດວຽກນໍາ ເພື່ອຫລຸດຜ່ອນຄົນງານທີ່ນໍາເຂົ້າມາຈາກຈີນ.

ດັ່ງທີ່ທ່ານກ່າວວ່າ:

“ປັດຈຸບັນນີ້ເນາະຄັນລະດັບພາສາຈີນນີ້ ແມ່ນໄຜກະຕ້ອງການຫລາຍໂດຍສະເພາະ ປະເທດລຸ່ມແມ້ນໍ້າ ຂອງເຮົາເນາະ ມີເຂດການຄ້າລະຫວ່າງຈີນ-ໄທຍ ຈີນ-ລາວ ລາວ-ໄທຍ ຈັ່ງຊີ້ນ່າ ຄົນມາຮຽນ ແນວໂນ້ມດີຫລາຍ ເພາະວ່າມັນຈົບພາສາມາແລ້ວ ຂ້ອນຂ້າງຈະມີວຽກເຮັດ 100%.”

ອີງຕາມຣາຍງານ ຂອງສະຖາບັນຂົງຈື້, ໃນປີ 2022 ມີຊາວໜຸ່ມລາວສມັກຮຽນພາສາຈີນ ຢູ່ສະຖາບັນນີ້ຫລາຍກວ່າ 400 ຄົນ ແລະມີທຶນການສຶກສາໃຫ້ນັກສຶກສາລາວ  60 ທຶນຕໍ່ປີ. ນັກສຶກສາລາວ ທີ່ຮຽນຢູ່ສະຖາບັນຂົງຈື້ ຈະໄດ້ຮຽນຢູ່ລາວ 2 ປີ ແລະຈະໄດ້ສິດພິເສດໄປຮຽນຕໍ່ຢູ່ຈີນອີກ 2 ປີ.

ສົກຮຽນປີ 2023-2024 ນີ້ ມີຜູ້ສມັກເຂົ້າຮຽນມະຫາວິທຍາໄລແຫ່ງຊາຕລາວ 5,710 ຄົນ (ບໍ່ລວມສາຍ ວິທຍາສາດ). ໃນຈໍານວນນີ້ ລົງທະບຽນຮຽນພາສາຈີນ 2,133 ຄົນ, ຮອງລົງມາແມ່ນພາສາອັງກິດ 1,714 ຄົນ, ວິຊາບໍຣິຫານທຸຣະກິຈທົ່ວໄປ 1,541 ຄົນ ແລະວິຊາອື່ນໆ.

ເຈົ້າໜ້າທີ່ສະຖາບັນຂົງຈື້ ທີ່ມະຫາວິທຍາໄລແຫ່ງຊາຕລາວ ກ່າວວ່າ ປັດຈຸບັນ ສະຖາບັນຂົງຈື້ ເປີດສອນ 2 ວິຊາໃນລະດັບປະຣິນຍາຕຣີ ຄືການຝຶກທັກສະການຮຽນການສອນພາສາຈີນ ແລະການສອນພາສາຈີນ; ຜູ້ຮຽນສໍາເຣັດຈະໄດ້ເປັນຄຣູ ຢູ່ພື້ນທີ່ຫ່າງໄກສອກຫລີກ ແລະຢູ່ເຂດທີ່ມີຄວາມຕ້ອງການ ຄຣູສອນພາສາຈີນ ແລະເປັນນັກແປພາສາ ຫລື ທີ່ປຶກສາທຸຣະກິດໃຫ້ຄົນຈີນ.

ດັ່ງທີ່ທ່ານກ່າວຕໍ່ວິທຍຸ ເອເຊັຽ ເສຣີ ໃນມື້ດຽວກັນນີ້ວ່າ:

“ດຽວນີ້ພວກເຮົາມີແຕ່ປຣີນຍາຕຣີ ເຈົ້າ ປະຣິນຍາໂທ ແມ່ນມີແຜນຢູ່ແຕ່ວ່າ ເພິ່ນຍັງບໍ່ທັນໄດ້ຈັດຕັ້ງໄດ້ເທື່ອເນາະ ດຽວນີ້ມີແຕ່ປຣິນຍາຕຣີ ເປັນພາສາຈີນທົ່ວໄປກະມີ ບາງເທື່ອກະອາຈເປັນຄຣູກະມີເນາະ ເພາະວ່າດຽວນີ້ຫັ້ນ ຢູ່ລາວເຮົາຍັງບໍ່ທັນມີປຣິນຍາໂທ ພາສາຈີນເທື່ອ.”

ຊາວລາວຜູ້ນຶ່ງ ຢູ່ນະຄອນຫລວງວຽງຈັນເວົ້າວ່າ ເຄີຍສມັກຮຽນພາສາຈີນ ຫລັກສູດບຸກຄົນທົ່ວໄປ ໃນສະຖາບັນຂົງຈື້ເມື່ອປີ 2021 ເພື່ອຮູ້ພາສາຈີນຂັ້ນພື້ນຖານ ໃນການດໍາເນີນທຸຣະກິຈ ແລະຕິດຕໍ່ສື່ສານກັບຄົນຈີນຢູ່ລາວ. ມີບາງຄົນຮຽນເພື່ອໄປຮຽນຕໍ່ຢູ່ຈີນ, ບາງຄົນກໍຮຽນເພື່ອຮຽນຕໍ່ມະຫາວິທຍາໄລ.

“ຮຽນແບບຮູ້ພື້ນຖານພາສາຈີນ ແລ້ວກະເວົ້າໄດ້ປາກເປັນ ບາງຄົນກະຕຽມພື້ນຖານຊິໄປຮຽນຢູ່ຈີນ ບາງຄົນກະຕຽມພື້ນຖານໄວ້ໄປຕໍ່ມະຫາໄລ ແລ້ວແຕ່ແຕ່ລະຄົນຕ່າງກັນ.”

ນັກສຶກສາລາວຜູ້ນຶ່ງ ຢູ່ມະຫາວິທຍາໄລແຫ່ງຊາຕລາວ ເວົ້າເຖິງສະຖາບັນຂົງຈື້ເປີດສອນພາສາຈີນ ສໍາລັບຄົນທົ່ວໄປ ແລະສອນໃນລະດັບປະຣິນຍາຕຣີວ່າ ໄດ້ຮັບຄວາມນິຍົມຫລາຍສົມຄວນ ຊຶ່ງແຕ່ລະຄົນກໍມີເປົ້າໝາຍແຕກຕ່າງກັນໄປ, ບາງຄົນກໍຕ້ອງ ການເປັນຄຣູສອນພາສາຈີນ, ບາງຄົນກໍຕ້ອງການເຮັດທຸຣະກິຈ ຫລືບາງຄົນຮຽນເພື່ອໄປເຮັດວຽກນໍາບໍຣິສັດຈີນຢູ່ລາວ.

“ມັນຂຶ້ນກັບບາງຄົນແດ່ ບາງຄົນກະມາຮຽນເອົາພື້ນຖານໄປຮຽນຕໍ່ ເສັງເຂົ້າມະຫາໄລເນາະ ບາງຄົນກະເນັ້ນເອົາພາສາຈີນຢ່າງດຽວ ໄດ້ພາສາຈີນແລ້ວກະໄດ້ເຮັດວຽກເລີຍກະມີ ແປໄດ້ແລ້ວກະເຮັດວຽກໄດ້ແລ້ວກະສື່ສານໄດ້.”

ແລະນັກສຶກສາລາວອີກຜູ້ນຶ່ງ ກໍເວົ້າເຖິງການຮຽນການສອນພາສາຈີນ ຢູ່ສະຖາບັນ ຂົງຈື້ແລະສະຖາບັນສອນພາສາຈີນໃນນະຄອນຫລວງວຽງຈັນວ່າ ໄດ້ຮັບຄວາມນິຍົມຫລາຍ, ພໍ່ແມ່ຜູ້ມີຖານະໝັ້ນຄົງ ກໍສົ່ງລູກຫລານມາຮຽນພາສາຈີນຢູ່ໃນສະຖາບັນຕ່າງໆ ເພາະຂະເຈົ້າເຊື່ອວ່າ ການເວົ້າ, ການອ່ານ ແລະການຂຽນພາສາຈີນໄດ້ ຈະຊ່ອຍໃຫ້ຊອກວຽກເຮັດໄດ້ງ່າຍ ແລະມີໂອກາດຫລາຍ ຍ້ອນຢູ່ລາວຕອນນີ້ ທຸຣະກິຈຂອງຄົນຈີນຢູ່ລາວມີຫລາຍ, ແຕ່ຍັງຂາດເຂີນຄົນງານ.

“ໄປຮຽນໃຊ້ໃນການເຮັດວຽກເພາະວ່າມັນເປັນຫລັກສູດແບບສົນທະນາ ອ່ານເວົ້າຂຽຟັງໝົດເລີຍຫັ້ນນ່າ ຕອນນີ້ຢູ່ລາວຫັ້ນພາສາຈີນແມ່ນສໍາຄັນຫລາຍຫັ້ນນ່າ.”     

ນັກທຸຣະກິຈຈີນ ເຂົ້າມາລົງທຶນໃນລາວຫລາຍເປັນອັນດັບ 1, ມີໂຄງການລົງທຶນໄປແລ້ວ 933 ໂຄງການ, ເປັນມູນຄ່າ 16.4 ຕື້ໂດລ້າຣ໌ສະຫະຣັຖ, ອີງຕາມຂໍ້ມູນຂອງກະຊວງແຜນການ ແລະການລົງທຶນ. ໂຄງການຂນາດໃຫຍ່ ທີ່ມີມູນຄ່າສູງ ກໍມີໂຄງການທາງຣົຖໄຟລາວ-ຈີນ, ໂຄງການເຂື່ອນໄຟຟ້າ, ໂຄງການພັທນາເຂດເສຖກິຈພິເສດ, ໂຄງການທາງດ່ວນລາວ-ຈີນ, ໂຄງການຂຸດຄົ້ນແຮ່ທາດ ແລະໂຮງຈັກໂຮງງານ ທີ່ມີຢູ່ທົ່ວປະເທດລາວ.

ທ່ານ ຫວັງອີ້ ປະທານທີ່ປຶກສາ ດ້ານນະໂຍບາຍຕ່າງປະເທດຂອງຈີນ, ອະດີດຣັຖມົນຕຣີການຕ່າງປະເທດ ໄດ້ມາຣັຖກິຈທີ່ປະເທດລາວ ໃນມື້ວັນທີ 13 ແລະ 14 ຕຸລາ 2020 ທີ່ຜ່ານມາ ແລະໄດ້ປະກາດວ່າ ພ້ອມໃຫ້ການຊ່ອຍເຫລືອທຸກດ້ານແກ່ລາວ ແລະມີການເຊັນສັນຍາຮ່ວມມືກັນຫລາຍດ້ານ ເພື່ອຂຍາຍການພົວພັນ ຮ່ວມມືລະຫວ່າງ 2 ປະເທດ ລາວ-ຈີນ.