ຈີນ ຊ່ອຍພາຫະນະ 79 ຄັນ ແກ່ລາວ ຮັບໃຊ້ ກອງປະຊຸມອາຊຽນ

ລັດຖະບານຈີນ ມອບລົດຈໍານວນ 79 ຄັນໃຫ້ກະຊວງປ້ອງກັນປະເທດ ເມື່ອວັນທີ 8 ເມສານີ້ເພື່ອໃຊ້ໃນການເປັນປະທານອາຊຽນຂອງ ສປປລາວ ໃນປີ 2024 ນີ້. ໃນຈໍານວນນັ້ນ ມີລົດຕູ້ 25 ບ່ອນນັ່ງ, ລົດຈິບ, ລົດເກງ, ລົດແພດ ແລະ ລົດສະຫລາມ.

ການຊ່ວຍເຫລືອຄັ້ງນີ້ ບໍ່ແມ່ນຄັ້ງທໍາອິດທີ່ລັດຖະບານຈີນ ໄດ້ຊ່ວຍເຫລືອລາວໃນການກະກຽມ ແລະດໍາເນີນກອງປະຊຸມໃຫຍ່ອາຊຽນ. ອີງຕາມຄໍາເວົ້າຂອງເຈົ້າໜ້າທີ່ທີ່ກ່ຽວຂ້ອງ ກະຊວງປ້ອງກັນປະເທດຕໍ່ວິທຍຸເອເຊັຽເສຣີ ໃນມື້ວັນທີ 22 ເມສານີ້.

“ຜ່ານມາເພິ່ນກໍເຄີຍຊ່ວຍຢູ່່ ເພິ່ນກໍມາຊ່ວຍລົດແພດ ລົດອີ່ຫຍັງນີ້ລະ ລົດເປີດທາງບໍ່ອີ່ຫຍັງຕ່າງໆ ຫັ້ນນ່າ ຮັບໃຊ້ແຂກທີ່ມາປະຊຸມບ່ອນອາຊຽນນີ້ນ່າ ຕະຫລອດປີນີ້ມັນກໍມີຫລາຍກອງປະຊຸມແຕ່ລະພາກສ່ວນ ແຕ່ລະກະຊວງແຕ່ລະຊົງເຂດໄຜມັນເນາະ ມັນກໍຈະມີການຈັດປະຊຸມ ຂົງເຂດສື່ມວນຊົນ ຖແຫລງຂ່າວກໍມີ ຂົງເຂດອຸດສາຫະກໍາການຄ້າ ຂົງເຂດປກສ ປ້ອງກັນຄວາມສະຫງົບ ກໍມີ.”

ກ່ຽວກັບເລື້ອງນີ້ ຊາວລາວຜູ້ນຶ່ງເວົ້າວ່າ ເປັນເລື່ອງດີ ທີ່ຈີນ ໄດ້ມອບພາຫານະໃຫ້ລາວໃນການເປັນເຈົ້າພາບອາຊຽນໃນປີນີ້ ແຕ່ບໍ່ແມ່ນວ່າ ລາວຈະຍົກຊັບສິນໃດນຶ່ງໃຫ້ຈີນ ແລະຢາກໃຫ້ລັດຖະບານ ນໍາໃຊ້ລົດທີ່ໄດ້ຮັບນັ້ນໃນວຽກກອງປະ ຊຸມ ບໍ່ແມ່ນຈະນໍາໄປໃຊ້ເພື່ອຜົນປະໄຫຍດຂອງຄົນໃດຄົນນຶ່ງ.

“ຄວາມຈິງແທ້ທີ່ວ່າເຫັນເຂົາເຈົ້າມາຊ່ວຍນີ້ ຖ້າວ່າມັນໄດ້ຜ່ານທູດຜ່ານຂອງຊາດລາວ ຖືກຕາມກົດໝາຍກໍເປັນການດີ ຄັນວ່າມາຊ່ວຍເຫລືອເປັນບາງອົງການ ມັນກໍເປັນການດີ ຄັນວ່າບໍ່ຄົບທຸກພາກສ່ວນ ກໍຕ້ອງເອົາລົດໂຕນັ້ນໄປໃຊ້ໃຫ້ເກີດປະໂຫຍດສູງສຸດ ຢູ່ໃນປະເທດ ແລ້ວກໍຫລິກລ້ຽງການທີ່ຈະຍົກຊັບສິນໃດນຶ່ງ ໃຫ້ກັບປະເທດເຂົາເຈົ້າ.”

ທ່ານເວົ້າວ່າ ຈີນແລະຫວຽດນາມ ເປັນປະເທດທີ່ມີສ່ວນຊ່ວຍເຫລືອລາວ ໃນດ້ານການເມືອງ ແລະເສດຖະກິດຫລາຍກວ່າໝູ່. ສ່ວນໄທ ຈະຊ່ວຍເຫລືອ ຫລືສົ່ງເສີມດ້ານການທ່ອງທ່ຽວຫລາຍກວ່າ. ສໍາລັບການຊ່ວຍເຫລືອຈາກສະຫະຣັຖອາເມລິກາ ທ່ານເວົ້າວ່ານັ້ນ ອາດບໍ່ແນ່ນອນ ຍ້ອນຢູ່ໄກກັນຫລາຍ.

ພ້ອມດຽວກັນນີ້ ປະຊາຊົນລາວອີກຜູ້ນຶ່ງ ກໍເວົ້າເຖິງການມອບລົດໃຫ້ລາວ ບໍ່ຢາກໃຫ້ຮັບ ມັນເປັນການດີໃນໄລຍະສັ້ນ ທີ່ລາວເປັນເຈົ້າພາບກອງປະຊຸມອາຊຽນເທົ່ານັ້ນ. ແຕ່ຫາກເບິ່ງໄປໃນໄລຍະຍາວແລ້ວ ການຊ່ວຍເຫລືອຈາກຈີນແມ່ນມີຂໍ້ເສັຽຫລາຍກວ່າ ຍ້ອນເມື່ອລາວໄດ້ຮັບ ການຊ່ວຍເຫລືອຈາກຈີນ ລາວກໍອາດຈະຕ້ອງມີອັນແລກປ່ຽນ ຫລືມີສິ່ງຕອບແທນໃຫ້ຈີນຄືນ ແລະຜູ້ທີ່ໄດ້ຮັບຜົນຫະໂຫຍດກໍມີແຕ່ນັກການເມືອງ, ສ່ວນປະຊາຊົນ ແມ່ນມີແຕ່ເສຍ.

“ທີ່ຈິງແລ້ວບໍ່ຢາກຮັບ ບໍ່ຢາກໃຫ້ຮັບເພາະວ່າຍິ່ງຮັບ ຍິ່ງຕິດໜີ້ຫລາຍ ການຮັບຫຍັງຄິດວ່າມັນມີຂໍ້ຂໍ້ດີບໍ່ ກໍມີຂໍ້ດີຢູ່ແລ້ວ ແຕ່ວ່າສ່ວນມາກມັນຈະມີຂໍ້ເສັຽສໍາລັບປະຊາຊົນ ແຕ່ວ່າສໍາລັບການເມືອງຈະເປັນຂໍ້ດີ ນັກການເມືອງມັນຈະເປັນຂໍ້ດີ ຂໍ້ດີລະເນາະ ເວລາຊ່ວຍເຫລືອລ້າໆ ເຂົາຈະໄດ້ແມ່ນບໍ່.”

ກ່ຽວກັບເລື່ອງທີ່ວ່ານີ້ ອາຈານ ອະດິສອນ ເສມແຍ້ມ ຈາກສະຖາບັນ ເອເຊຍສຶກສາ ຈຸລາລົງກອນ ມະຫາວິທະຍາໄລ ຂອງໄທຍ ໃຫ້ທັດສະນະວ່າ ການຊ່ວຍເຫລືອຈາກຈີນຄັ້ງນີ້ບໍ່ແມ່ນຄັ້ງທໍາອິດ. ດັ່ງນັ້ນ ການຊ່ວຍເຫລືອຄັ້ງນີ້ຈຶ່ງບໍ່ແມ່ນເລື້ອງໃໝ່, ເປັນການຊ່ວຍເຫລືອດ້ານເຕັກນິກ ໃນການເປັນເຈົ້າພາບກອງປະຊຸມ.

ທ່ານວ່າ: “ມັນກໍແມ່ນຄວາມຊ່ວຍເຫລືອດ້ານເຕັກ ນິກ ໃນການເປັນເຈົ້າພາບ ຊຶ່ງມັນບໍ່ແມ່ນຄັ້ງທໍາອິດ ປົກກະຕິຈີນໃຫ້ການຊ່ວຍ ເຫລືອມາດົນແລ້ວ ການປັບປຸງພູມີທັດ ເຊັ່ນ ປະຕູໄຊ, ຖນົນອີ່ຫຍັງຕອນທີ່ລາວເປັນເຈົ້າພາບກອງປະຊຸມ ASEM ບາງຢ່າງແມ່ນການໃຫ້ຄວາມຊ່ວຍ ເຫລືອດ້ານອຸປະກອນ, ດ້ານຝຶກອົບຮົມ, ດ້ານເຕັກນິກຕ່າງໆພວກນີ້ ລາວກໍເປີດຮັບການຊ່ວຍເຫລືອຈາກທຸກປະເທດ ມັນເປັນເລື້ອງທີ່ຈີນໃຫ້ເປັນປົກກະຕິຢູ່ແລ້ວ ແຕ່ເຮົາກໍຕ້ອງເບິ່ງວ່າສິ່ງຂອງທີ່ຈີນໃຫ້ ມັນກໍແມ່ນຂອງຈີນເນາະ.”

ເມື່ອກ່ອນໜ້ານີ້ ຄືໃນເດືອນມິນາ 2024 ຈີນກໍມອບຮັບເຄື່ອງຊ່ວຍເຫລືອໃຫ້ລາວ ໃນການເປັນປະທານອາຊຽນ ໃນນັ້ນມີລົດ 77 ຄັນ, ອຸປະກອນໄອທີ ແລະກ້ອງບັນທຶກພາບ.

ນອກຈາກຈີນແລ້ວ ຫວຽດນາມກໍໄດ້ຊ່ວຍເຫລືອລາວ ໃນການກະກຽມກອງປະ ຊຸມສຸດຍອດອາຊຽນຄັ້ງທີ 44 ຄືຊ່ວຍລົດ 50 ຄັນໃຫ້ກະຊວງປ້ອງກັນຄວາມສະຫງົບ. ລົດທີ່ວ່ານັ້ນ ເປັນລົດຂອງຫວຽດນາມເອງ. ໃນນັ້ນກໍມີລົດວິນຟາສ (Vinfast) ປະເພດລົດ SUV ລຸ້ນ VF8, ເປັນລົດໄຟຟ້າ 20 ຄັນ ແລະ ລົດຈັກມ້າຂາວ (HONDA CB 500X) 30 ຄັນ.

ນອກຈາກຈີນແລະຫວຽດນາມແລ້ວ ກໍຍັມີອີກຫລາຍປະເທດທີ່ໃຫ້ການຊ່ວຍ ເຫລືອລ້າແກ່ລາວ ເປັນຕົ້ນ ຍີ່ປຸ່ນ ທີ່ໄດ້ມອບລົດເກງໂຕໂຍຕ້າໄຮບຣິດ 33 ຄັນ ອຸປະກອນໄອທີ ມູນຄ່າທັງໝົດ 3.5 ລ້ານໂດລາສະຫະຣັຖ ເພື່ອປັບປຸງວຽກງານການສື່ສານແລະລະບົບອິນເຕີແນັຕ ໃຫ້ທັນສະໃໝ. ໄທ ກໍໃຫ້ການຊ່ວຍເຫລືອ ເປັນເງິນສົດ  5 ລ້ານບາດ ສໍາລັບສ້ອມແປງອາຄານກຽດຕິຍົດ ຢູ່ສນາມບິນວັດໄຕ ນະຄອນຫຼວງວຽງຈັນ. ແລະເກົາຫລີໃຕ້ ກໍໃຫ້ການຊ່ວຍ ເຫລືອ ເປັນລົດເກງ 2 ຄັນ, ລົດຕູ້ 6 ຄັນແລະອຸປະກອນໄອທີ ມູນຄ່າທັງໝົດ 1 ລ້ານໂດລາສະຫະລັດ.

ເມື່ອກ່ອນໜ້ານີ້ ໃນທ້າຍປີ 2023 ທີ່ຜ່ານມາ ຕົວແທນຂອງລັດຖະບານ ສະຫະຣັຖອະເມຣິກາ ກໍໄດ້ເຂົ້າພົບກັບຕົວແທນ ຂອງລັດຖະບານລາວ ແລະໃຫ້ຄໍາໝັ້ນວ່າ ຈະຊ່ອຍສນັບສນູນ ເພື່ອໃຫ້ການເປັນປະທານອາຊຽນຂອງລາວ ໃນປີ 2024 ນີ້ປະສົບຜົນສໍາເຣັດ.