ດໍາຣັດໃໝ່ ຍິ່ງຄວບຄຸມ ພາກປະຊາສັງຄົມ ຫຼາຍຂຶ້ນ

ສິດ​ນີ
2018-01-22
Share
f-gov ສໍານັກງານ ນາຍົກຣັຖມົນຕຣີ ທີ່ ນະຄອນຫຼວງວຽງຈັນ
screen captured

ຣັ​ຖ​ບານ​ລາວ ອອກ​ດຳ​ຣັດ​ໃໝ່ ​ວ່າ​ດ້ວຍ ​ສ​ມາ​ຄົມ ຊຶ່ງຈະ​ຄວບ​ຄຸມ ​ແລະ ​ຈຳ​ກັດ ​ການ​ເຮັດ​ວຽກ ​ແລະ ​ການ​ເຄື່ອນ​ໄຫວ ຂອງ​ສ​ມາ​ຄົມ ​ໃນ​ລາວ​ ຫລາຍຂຶ້ນກວ່າ​ເກົ່າ ຍ້ອນ​ມີ​ ການ​ກຳ​ນົດ ​ທັງ​ຫລັກ​ການ, ​ຣະ​ບຽບ​ການ ແລະ ​ມາ​ຕ​ການ ​ກາ​ນ​ເຄື່ອນ​ໄຫວ ​ແລະ ​ການ​ເຮັດ​ວຽ​ກ ​ຂອງ​ສ​ມາ​ຄົມ ​ໃນ​ລາວ ຢ່າງ​ເຄັ່ງ​ຄັດ, ພ້ອມ​ທັງ ​ການ​ຮັບ​ເອົາ ​ຊັບ​ສິນ​ ແລະ ​ທຶນ ​ຈ​າກ​ພາຍ​ໃນ​ ແລະ ​ຕ່າ​ງ​ປະ​ເທດ, ດັ່​ງ​ເຈົ້າ​ໜ້າ​ທີ່​ ເຮັດ​ວຽກ​ ກັບ​ອົງ​ການ ​ພາກ​ປະ​ຊາ​ສັງ​ຄົມ ທ່​ານນຶ່ງ ​ກ່າວ​ຕໍ່​ ເອ​ເຊັຽ​ເສ​ຣີ​ ເມື່ອບໍ່​ດົນ​ ມານີ້​ວ່າ:

“ເພິ່ນ​ວ່າ ​ຖ້າ​ຂໍ​ນຳ​ ຕ່າງ​ປະ​ເທດ ຕ້ອງ​ຂຽນ​ຄຳ​ຮ້ອງ ​ບົດ​ສ​ເນີ​ ຜ່ານ​ຣັ​ຖ​ບານ​ກ່ອນ, ຣັ​ຖ​ບານ​ເຫັນ​ດີ ລະ​ຈັ່ງ​ໄປ​ສ​ເນີ​ ຕ່າງ​ປະ​ເທດ ອັນ​ນີ້​ ກະ​ມີ​ ຄວາມ​ຫຍຸ້ງ​ຍາກ ​ຫັ້ນ​ແຫຼະ. ທີ່​ຜ່ານ​ມາ ​ກະ​ຫຍຸ້ງ​ຍາກ ​ຢູ່​ແລ້ວ ຂ​ນາດ​ຕ່າງ​ປະ​ເທ​ດ ​ອະ​ນຸ​ມັດ​ແລ້ວ ໄປ​ຂໍ​ ບົດ​ບັນ​ທຶກ ​ຄວາມ​ເຂົ້າ​ໃຈ ກະ​ເກືອບ​ປີ ​ຈັ່ງ​ໄດ້ ຖື​ວ່າ ​ມີ​ຄວາມ​ຫຍຸ້ງ​ຍາກ ​ຢູ່​ແລ້ວ.”

ມາ​ຕ​ຣາ 59 ໄດ້​ບົ່ງ​ບອກ ​ເຖິງ​ການ​ຄຸ້ມ​ຄອງ ​ສ​ມາ​ຄົມ ຊຶ່ງ​ທາງ​ການ​ລາ​ວ ​ໄດ້​ກຳ​ນົດ ​ໃຫ້​ຣັ​ຖ​ບານ ​ເປັນ​ຜູ້​ຮັບ​ຜິດ​ຊອບ ໂດຍມອບ​ໃຫ້​ ຕັ້ງ​ແຕ່ ​ອຳ​ນາ​ດ​ ການ​ປົກ​ຄອງ​ບ້ານ ​ໄປ​ຮອດ​ ອຳ​ນາດ​ບໍ​ຣິ​ຫານ​ ຂັ້ນ​ກະ​ຊວງ ເປັນ​ຜູ້​ປະ​ຕິ​ບັດ ຮວມ​ທັງ ​ອົງ​ການ​ ແນວ​ລາວ​ສ້າງ​ຊາດ ເປັນ​ຜູ້​ຕິດ​ຕາມ ​ຄວບ​ຄຸມ, ດັ່ງ ດ​ຣ ບຸນ​ທອນ ຈັນ​ທະ​ລາ​ວົງ-ວິ​ເຊີ, ປະ​ທານ​ພັນ​ທະ​ມິດ ​ເພື່ອ​ປະ​ຊາ​ທິ​ປະ​ຕັຍ ​ໃນ​ລາວ ​ທີ່​ມີ​ສູນ​ກາງ ​ຢູ່​ປະ​ເທດ​ເຢັຽ​ຣະ​ມັນ, ​ກ່າວ​ຕໍ່​ເອ​ເຊັຽ​ເສ​ຣີ ໃນ​ມື້​ວັນ​ທີ 21 ມົກ​ຣາ ປີ 2018 ນີ້​ວ່າ:

“ເພິ່ນອອກດໍາຣັດ ແບບນີ້ ມີການວາງແຜນ ຈໍາກັດ ເຄັ່ງຄັດ. ກະຊວງທະບວງກົມ ຕ່າງໆ ຄື ກະຊວງພາຍໃນ, ກະຊວງການເງິນ, ກະຊວງປ້ອງກັນ ຄວາມສງົບ, ກະຊວງ ການຕ່າງປະເທສ ແລະ ການກວດການີ້ ຕັ້ງແຕ່ ຂັ້ນສູກາງ, ຂັ້ນແຂວງ, ຂັ້ນເມືອງ ຈົນເຖິງ ຂັ້ນບ້ານ, ອັນນີ້ ກະແມ່ນ ສະແດງເຖິງ ການໃຊ້ອໍານາດ ຜະເດັດການ ຢ່າງຮ້າຍແຮງ ໃນການປາບປາມ ປະຊາຊົນ.”

ເວົ້າ​ສ​ເພາະ​ສິດ ​ແລະ​ ໜ້າ​ທີ່​ ຂອງ​ກະ​ຊວງ​ຕ່າງ​ປະ​ເທດ ທີ່​ດຳ​ຣັດ ​ກຳ​ນົດ​ໄວ້​ ຢູ່​ໃນ​ມາ​ຕ​ຣາ 64 ແມ່ນກວດ​ກາ​ ການ​ພົວ​ພັນ​ ແລະ​ ການ​ຮັບ​ທຶນ ຊັບ​ສິນ ​ຈາກ​ຕ່າງ​ປະ​ເທດ ​ແລະ ​ພາກ​ສ່ວນ​ອື່ນໆ​ ມາ​ໃຊ້​  ໃນ​ໂຄງ​ການ​ຕ່າງໆ ​ຂອງ​ສ​ມາ​ຄົມ. ນອກ​ຈາກ​ນັ້ນ, ​ທາງ​ການ​ລາວ ​ກໍ​ໄດ້​ວາງວົງ​ລ້ອມ ​ການ​ເຄື່ອນ​ໄຫວ ​ຂອງ​ສ​ມາ​ຄົມ ​ຫລາຍໆ​ຢ່າງ ​ເພື່​ອ​ບັງ​ຄັບ​ໃຫ້​ ສ​ມາ​ຄົນ ​ຢູ່​ພາຍ​ໃຕ້​ ການ​ຊີ້​ນຳ ຂອງ​ຜູ້ນຳ ​ພັກ​ປະ​ຊາ​ຊົນ​ ປະ​ຕິ​ວັດ​ລາວ ​ທຸກ​ຢ່າງ.

ດຳ​ຣັດ ​ວ່າ​ດ້ວຍ ​ສ​ມາ​ຄົມ ສ​ະບັບ​ໃໝ່ ປີ 2017 ນີ້​ ແມ່ນ​ໃຊ້​ແທນ​ ສະ​ບັບ​ ປີ 2009 ຄື​ ພາຍ​ຫລັງ ​ທີ່​ໃຊ້​ຄວບ​ຄຸມ ​ແລະ ​ຈຳ​ກັດ​ການ​ຈັດ​ຕັ້ງ ​ແລະ ​ການ​ເຄື່ອນ​ໄຫວ ​ຂອງ​ສ​ມາ​ຄົມ​ນັ້ນ ​ມາ​ໄດ້ 8 ປີ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ