ຜູ້ຂ້ານັກທຸຣະກິຈຈີນ ຖືກຈັບ ແລ້ວ

ສຸພັດຕາ
2018-09-07
ອີແມວລ໌
ຄໍາເຫັນ
Share
ພິມ
ເຈົ້າໜ້າທີ່ ຕຳຣວດລາວ ເຂົ້າລວບຕົວ ຄົນຮ້າຍໄດ້ 1 ຄົນ ທີ່ຕລາດຊັງຈ່ຽງ ໃນນະຄອນຫຼວງວຽງຈັນ
ເຈົ້າໜ້າທີ່ ຕຳຣວດລາວ ເຂົ້າລວບຕົວ ຄົນຮ້າຍໄດ້ 1 ຄົນ ທີ່ຕລາດຊັງຈ່ຽງ ໃນນະຄອນຫຼວງວຽງຈັນ
ຮູປພາບຈາກ : ຂ່າວ ພັຍສັງຄົມ

ເມື່ອວັນທີ 5 ກັນຍາ ຜ່ານມານີ້ ເຈົ້າໜ້າທີ່ຕຳຣວດລາວ ສາມາດຈັບຄົນຮ້າຍໄດ້ 1 ຄົນ ທີ່ລົງມືສັງຫານເພື່ອຊິງຊັພ ທ່ານ ໄຊຊະນະ ຍົດສະຫວັດ ຫຼື ທ່ານ ລີ ຈ້າວເຜິງ ນັກທຸຣະກິຈຈີນ ສັນຊາດລາວ ທີ່ມີຊື່ສຽງ. ຄົນຮ້າຍແມ່ນຄົນສັນຊາດຈີນ ຖືກຈັບໄດ້ທີ່ ຕລາດຊັງຈ່ຽງ ໃນນະຄອນຫຼວງວຽງຈັນ, ຕາມຄຳເວົ້າຂອງເຈົ້າໜ້າທີ່ ກົມໃຫຍ່ຕຳຣວດ ຕໍ່ວິທຍຸເອເຊັຍເສຣີ ໃນວັນທີ 7 ກັນຍາ ວ່າ:

“ແມ່ນຈັບໄດ້ແລ້ວຢູ່ລາວນີ້ແຫຼະ ຢູ່ນະຄອນຫຼວງ ຢູ່ຊັງຈ່ຽງ ຄົນຈີນຄືກັນ ໃຫ້ເຂົາສືບສວນ-ສອບສວນ ເອົາຂໍ້ມູນ.”

ທ່ານກ່າວຕື່ມວ່າ ສຳລັບຊື່ຂອງຄົນຮ້າຍ ແລະຄຳຮັບສາຣະພາບຂອງຂະເຈົ້ານັ້ນ ຍັງບໍ່ສາມາດເປີດເຜີຍ ໃຫ້ຮູ້ໄດ້ເທື່ອ ຍ້ອນກຳລັງຢູ່ໃນ ຣະຫວ່າງການສອບສວນ ຊື່ງຈະມີການຖແລງຂ່າວ ການຈັບກຸມ ຢ່າງເປັນທາງການໃນໄວໆນີ້ ເນື່ອງຈາກເປັນ ຄະດີໃຫຍ່ ທີ່ຕຳຣວດໃຫ້ ຄວາມສົນໃຈ, ສ່ວນຄົນຮ້າຍທີ່ຮ່ວມກໍ່ເຫດອີກ 1 ຄົນທີ່ກຳລັງຫຼົບໜີຢູ່ນັ້ນ ທາງເຈົ້າໜ້າທີ່ຕຳຣວດ ກໍກຳລັງຊອກຄົ້ນຫາ ຕິດຕາມຈັບຢູ່.

ກ່ອນໜ້ານີ້ ໝູ່ຄົນໃກ້ຊິດຂອງທ່ານ ລີ ຈ້າວເຜິງ ກ່າວຕໍ່ວິທຍຸເອເຊັຍເສຣີ ວ່າຫຼັງເກີດເຫດຄາຕກັມດັ່ງກ່າວ ທາງຄອບຄົວແລະຄົນໃກ້ຊິດ ຂອງ ທ່ານ ລີ ຈ້າວເຜິງ ໄດ້ປະສານໄປຫາ ເຈົ້າໜ້າທີ່ຕຳຣວດລາວ ຮວມທັງຕຳຣວດຈີນ ໃຫ້ຊ່ອຍກັນຕາມລ່າຄົນຮ້າຍ ທີ່ລົງມືກໍ່ເຫດ ພ້ອມທັງມີເງິນ 2 ແສນໂດລາ ສະຫະຣັຖ ໃຫ້ແກ່ຜູ້ທີ່ຮູ້ຂໍ້ມູນ ຂອງຄົນຮ້າຍນັ້ນ.

ເຫດຄາຕກັມດັ່ງກ່າວ ເກີດຂຶ້ນເມື່ອວັນທີ 12 ສິງຫາ 2018 ຢູ່ໃນເຮືອນຂອງ ທ່ານ ລີ ຈ້າວເຜິງ ຢູ່ບ້ານວັດໄຕທົ່ງ ເມືອງສີໂຄດຕະບອງ ຄົນຮ້າຍໄດ້ໃຊ້ປືນຍິງ ທ່ານໃນຫ້ອງນອນ ແລະ ກວາດເອົາຊັພສິນ ຈຳນວນຫຼວງຫຼາຍໄປນຳ ໂດຍກ້ອງວົງຈອນປິດ ສາມາດຈັບຮູບ ຄົນຮ້າຍໄດ້ ສອງຄົນ ທີ່ໃສ່ໝວກປິດບັງໃບໜ້າ ຊ່ອຍກັນຂົນກະເປົ໋າບັນຈຸເຄື່ອງມີຄ່າ ຫຼົບໜີໄປ.

ທ່ານ ລີ ຈ້າວເຜິງ ເປັນນັກທຸຣະກິຈ ທີ່ມີຊື່ສຽງໃນລາວ ແລະເປັນເຈົ້າຂອງໂຮງແຮມຕີ້ຫາວ ຊຶື່ງຕັ້ງຢູ່ໃຈກາງນະຄອນຫຼວງວຽງຈັນ.

ຄໍາເຫັນ (2)
Share

(

ຕໍ່າລວດລາວຈັບຄົນຮ້າຍຂ້າຄົນຈີນໄດ້ ແຕ່ຈັບຄົນຮ້າຍທີ່ລັກພາຕົວ ທ່ານສົມບັດສົມພອນ ທີ່ເປັນຄົນລາວບໍ່ໄດ້, ອັນນີ້ໄຫ້ພີ່ນອ້ງປະຊາຊົນລາວ ຄິດເອົາເບິ່ງວ່າມັນເກີດອີຫັຽງຂື້ນ ຢູ່ໃນປະເທດຂອງພວກເຮົາ ທັ້ງໆທີ່ພວກເຮົາເປັນເຈົ້າຂອງ ປະເທດຊາດ ທີ່ແທ້ຈິງ, ອັນນີ້ສະແດງໄຫ້ເຫັນຢ່າງແຈ້ງຂາວແລ້ວວ່າ ພວກເພີ່ນບໍ່ໄດ້ປົກປ້ອງສິດທິ ຂອງພວກເຮົາເລີຍ ແລະເພີ່ນພາກັນປົກປ້ອງ ແລະໄຫ້ສິດຄົນຊາດອື່ນຫຼາຍກ່ວາຄົນລາວ ໃນປະເທດທີ່ບໍແມ່ນຄານະຍາດ ຂອງພວກເພີ່ນ, ສະນັ້ນປະຊາຊົນລາວເຮົາ ທົ່ວປະເທດ ທີ່ສະແຫວງຫາຄວາມເປັນທັມ,ຄວາມຍຸຕິທັມ,ຄວາມສເມີພາບ,ເອກກະລາດ,ປະຊາທິປະຕັຍທົ່ວປະເທດ ໄຫ້ພາກັນຄິດ ແລະພິຈາລະນາເບີ່ງແລະຢ່າໜີ້ງຢູ່ດຽວດາຍ,ຈົ່ງຊ່ວຍກັນເຮົາຈຶ່ງຈະຜ່ານອຸບປະສັກ ອັນທີ່ພວກເຮົາບໍ່ປາຖນາໄຫ້ໝົດໄປ!ສູ້ໆໆໆ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 26, 2018 07:05 AM

(

Who cares ?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Sep 18, 2018 08:05 AM

ເຕັມຫນ້າ