ຣັຖບານລາວຕັ້ງກັມການ ສອບສວນ ເຂື່ອນແຕກ

ຈໍາປາທອງ
2018-08-09
ອີແມວລ໌
ຄໍາເຫັນ
Share
ພິມ
ກອງປະຊຸມຣັຖບານ ສມັຍວິສາມັນ ໄດ້ໄຂຂຶ້ນໃນວັນທີ 6 ຫາ 7 ສິງຫາ 2018 ຢູ່ ສຳນັກງານນາຍົກຣັຖມົນຕຣີ ຊຶ່ງໄດ້ແຕ່ງຕັ້ງ ທ່ານ ບຸນທອງ ຈິດມະນີ ເປັນຫົວຫນ້າຄນະ ສືບສວນ-ສອບສວນ ເຫດເຂື່ອນແຕກ
ກອງປະຊຸມຣັຖບານ ສມັຍວິສາມັນ ໄດ້ໄຂຂຶ້ນໃນວັນທີ 6 ຫາ 7 ສິງຫາ 2018 ຢູ່ ສຳນັກງານນາຍົກຣັຖມົນຕຣີ ຊຶ່ງໄດ້ແຕ່ງຕັ້ງ ທ່ານ ບຸນທອງ ຈິດມະນີ ເປັນຫົວຫນ້າຄນະ ສືບສວນ-ສອບສວນ ເຫດເຂື່ອນແຕກ
Screen captured : https://www.facebook.com/ThonglounSISOULITH/photos/rpp.900160450095095/1661847633926369/?type=3&theater

ຣັຖບາລ ສປປລາວ ແຕ່ງຕັ້ງຄນະກັມການສອບສວນ ຫາສາເຫດ ທີ່ເຮັດໃຫ້ເຂື່ອນເຊປຽນ-ເຊນໍ້ານ້ອຍເເຕກ ອັນສົ່ງຜົລກະທົບຢ່າງຮ້າຍແຮງ ຕໍ່ປະຊາຊົນ ເມືອງສນາມໄຊ ແຂວງອັດຕະປື ຫຼາຍພັນຄົນແລະຊັພສິນຢ່າງຫຼວງຫຼາຍ ໂດຍແມ່ນ ທ່ານ ບຸນທອງ ຈິດມະນີ ຮອງນາຍົກ ຣັຖມົນຕຣີ, ປະທານກວດກາ ສູນກາງພັກ ປະຊາຊົນປະຕິວັດລາວ ເປັນຫົວໜ້າ.

ເຈົ້າໜ້າທີ່ກະຊວງຊັພຍາກອນທັມຊາດ ແລະສິ່ງແວດລ້ອມ ກ່າວກ່ຽວກັບເຣຶ່ອງນີ້ຕໍ່ວິທຍຸເອເຊັຍເສຣີ ໃນມື້ວັນທີ 9 ສິງຫານີ້່ວ່າ:

"ຄນະກັມການທີ່ແຕ່ງຕັ້ງຂຶ້ນມາ ຍ້ອນຄວາມໂປ່ງໃສເນາະ ກໍຄືຈະມີການກວດໂຄງການໃຫ້ ທ່ານ ບຸນທອງ ເປັນຜູ້ດູແລ ກວດສອບທັງໝົດ ວ່າເຫດການມັນເກີດຂຶ້ນແນວໃດເນາະ ເປັນຫຍັງມັນຈຶ່ງເກີດຂຶ້ນ ແລ້ວແມ່ນໃຜມີສ່ວນຮູ້ສ່ວນເຫັນ ກັບຄວາມຜິດພາດເຫດການ ນີ້ບໍ່ ອິຫຍັງ ປະມານນີ້ຫັ້ນນະ ຍ້ອນຕາມທີ່ໄປລົມກັບຊາວບ້ານ ຊາວບ້ານບາງຄົນນໍ ກໍບອກວ່າ ພວກພະນັກງານຢູ່ເຂື່ອນຫັ້ນນະຮູ້ແລ້ວວ່າ ເຂື່ອນມັນຈະ ແຕກນໍ ກໍເລີຍພາກັນໜີ ຂະເຈົ້າໜີໄປກ່ອນ ກ່ອນມັນຈະເກີດເຫດຫັ້ນນະ ກໍຄືຈະມີການກວດສອບແລ້ວ ຈະສລຸບຄວາມເປັນຈິງອອກມາອີກ ເທື່ອນຶ່ງ."

ນາງກ່າວຕື່ມວ່າ ການກວດສອບບັນຫາດັ່ງກ່າວ ຈະເລີ້ມປະຕິບັດງານນັບແຕ່ມື້ທີ່ນໍ້າບົກລົງ, ຄນະກັມການດັ່ງກ່າວ ປະກອບດ້ວຍເຈົ້າໜ້າທີ່ ກະຊວງພລັງງານແລະບໍ່ແຮ່ ກະຊວງຊັພຍາກອນທັມຊາດ ແລະສິ່ງແວດລ້ອມ ກະຊວງວິທຍາສາດ ແລະເທັກໂນໂລຈີ ແລະຈະມີຜູ້ຕາງໜ້າ ຈາກຣັຖບາລເກົາຫລີໃຕ້ ແລະໄທ ຊຶ່ງເປັນຣັຖບາລຂອງ ບໍຣິສັດລົງທຶນສ້າງເຂື່ອນ ແລະທັງຈະມີນັກວິຊາການ ດ້ານເທັກນິກຈາກອົງການ ຈັດຕັ້ງສາກົນ ເຂົ້າຮ່ວມພິສູດນໍາດ້ວຍ.

ການກວດສອບນັ້ນ ນາງເວົ້າວ່າຈະກວດກາໂຄງສ້າງເຂື່ອນຢ່າງລະອຽດທຸກຈຸດ ເພື່ອໃຫ້ຮູ້ວ່າສາເຫດເຂື່ອນແຕກນັ້ນ ເປັນຍ້ອນຫຍັງກັນແທ້, ຈະກວດສອບເຣຶ່ອງການແຈ້ງເຕືອນ ກ່ອນເຂື່ອນຈະແຕກນັ້ນ.

ເວົ້າເຖິງການກວດກາເຂື່ຶອນ ນາງບອກວ່າປັດຈຸບັນ ຣັຖບາລໃຫ້ພາກສ່ວນທີ່ກຽ່ວຂ້ອງ ກວດກາມາຕຖານໂຄງສ້າງເຂື່ອນທຸກເຂື່ອນໃນລາວ ທັງທີ່ກໍາລັງກໍ່ສ້າງ ແລະກໍ່ສ້າງແລ້ວ ແລະບໍ່ອະນຸມັດ ໃຫ້ໂຄງການສ້າງເຂື່ອນໃໝ່ຊົ່ວຄາວ ດັ່ງທີ່ນາງກ່າວວ່າ:

"ເຫດການນີ້ເກີດຂຶ້ນແລ້ວ ທ່ານນາຍົກແຈ້ງວ່າ ຈະມີການກວດສອບ ທຸກເຂື່ອນ ໃນປະເທສລາວ ກໍຄືຢຸດບໍ່ເອົາໂຄງການໃໝ່ມາ ແຕ່ວ່າມີ ການກວດສອບໂຄງການນຶ່ງໂຄງການ ທີ່ກໍາລັງກໍ່ສ້າງ ; 2-ແມ່ນໂຄງການທີ່ເຊັນສັນຍາແລ້ວ ແຕ່ບໍ່ທັນສ້າງກໍຄື ຈະມີການກວດສອບ ໂຄງການທັງໝົດ ແຕ່ວ່າໂຄງການໃໝ່ທີ່ສເນີມານີ້ນະ ຫວ່າງນີ້ເພິ່ນຈະບໍ່ຮັບເອົາ ຈະກວດສອບຕົວທີ່ມີຢູ່ກ່ອນນີ້."

ການແຕ່ງຕັ້ງຄນະກັມການສອບສວນ ຫາສາເຫດ ເຂື່ອນເຊປຽນ-ເຊນໍ້ານ້ອຍແຕກ ແລະແຈ້ງການໃຫ້ກວດກາຄືນ ທຸກເຂື່ອນໃນລາວນີ້ ໄດ້ປະກາດຢູ່ໃນກອງປະຊຸມຣັຖບາລ ປະຈໍາເດືອນສິງຫາ 2018 ໃນອາທິດນີ້ ໂດຍມີ ທ່ານ ທອງລຸນ ສີສຸລິດ ນາຍົກຣັຖມົນຕຣີ ເປັນປະທານ.

ຄໍາເຫັນ (3)
Share

(

ການກວດສອບທີ່ຈະແຈ້ງທີ່ສຸດ ໃນການກວດສອບຂອງທ່ານນັ້ນມັນຕ້ອງ ໃຫ້ມີປະຊາຊົນຜູ້ທີ່ບໍລິສຸດ ແລະຜູ້ຫວັງດີຕໍ່ປະເທດຊາດທີ່ແທ້ຈິງ ໄດ້ເຂົ້າຮ່ວມໃນການກວດສອບເຂື່ອນທົ່ວປະເທດ ມັນຈຶ່ງຈະມີການເຊື່ອຖືໄດ້ 100 ເປີເຊັນ ທ່ານເຖິງແມ່ນວ່າ ອົງການກວດສອບຂອງສາກົນທີ່ມີສ່ວນນັ້ນ ພວກເຂົາເຈົ້າກໍຍັງຖືກກີດກັນໃນບາງກໍລະນີ ເຊັ່ນ, ການກວດສອບຂອງເຂົາເຈົ້ານັ້ນມີເພືອງແຕ່ໃຫ້ຄໍາແນະນໍາ ແລະເຄື່ອງມືໄຊ້ ໃນການກວດສອບເທົ່ານັ້ນ ແລະກີດກັນບໍ່ໃຫ້ເຂົາເຈົ້າ ເຂົ້າຮ່ວມໃນການກວດສອບ ນໍາໄດ້ ແລະອັນນີ້ມີຄວາມໝາຍວ່າແນວໃດ? ພວກຂອ້ຍປະຊາຊົນສາມັນ ຈະເຊື່ອໄດ້ແນວໃດວ່າ ມັນບໍຣິສຸດເພາະວ່າພວກທ່ານໄດ້ຕົວະ ແລະລອກລວງປະຊາຊົນມານັບຫຼາຍສິບແລ້ວ, ປະຈຸບັນນີ້ເບື່ອຈົນຫົວສິແຕກຢູ້ແລ້ວທ່ານ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 28, 2018 08:40 AM

ລາວ

ຈາກ ລາວ

ເລີ້ອງການກວດສອບວ່າໂປ່ງໃສຫຼືບໍ່ນັ້ນ ຜູ້ນໍາຂອງພວກເຮົານັ້ນ ມັນປິດຫູປິດຕາປະຊາຊົນລາວໄດ້ມາຕະລອດ ຈົນຮອດປະຈຸບັນນີ້ ປະຊາຊົນເຮັດຖືກເວົ້າຖືກ ພວກເພີ່ນຊໍ້າວ່າຜິດ ຄັນເພີ່ນເຮັດຜິດເວົ້າຜິດ ຊໍ້າວ່າມັນຖືກຕ້ອງແລ້ວ ເພາະນະໂຍບາຍ ຫຼືທິດສະດີຂອງມາກເລນີນ ໂອ້ຍເບື່ອເບື່ອແນວຄິດຂອງພວກເຈົ້າເດ, ພວກຂອ້ຍລາວເກີດໄໝ່ ແລະຍຸກໄໝ່ບໍ່ຄືແນວນັ້ນອືກແລ້ວ ອັນນີ້ນັບຕັ້ງແຕ່ກໍ່ຕັ້ງ ພັກແນວລາວມ້າງຊາດຂື້ນມື້ທໍາອິດ ເພີ່ນກະຂຽນຄໍາຂວານຂື້ນປ້າຍ ສີແດງສີຂາວວ່າ ສາທາຣະນະລັດ, ປະຊາທິປະໄຕ ແລະຄໍາວ່າປະຊາທິປະໄຕ ມັນໄປເຮັ້ຽຖືມໃສ? ແລະວັດຖະນາຖາວອນເດຢູ່ໃສ ແລະປະຊາຊົນເປັນເຈົ້າເດ!


ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 28, 2018 08:19 AM

ຊາວລາວຈາກແຂວງອັຕະປື

ຈາກ ອັຕະປື ສປປ ລາວ

ຍ້ອນພັກແລະຣັຖບານ ສປປ ລາວ ຍາມໃດກໍຢືດໝັ້ນໃນຫລັກການປິດລັບ ປະຊາຊົນມາຕລອດຫລາຍສິບປີແລ້ວ. ພວກເພິ່ນຮູ້ຈັກລ່ວງໜ້າແລ້ວວ່າ ເຂື່ອນເຊປ່ຽນ ເຊນໍ້ານ້ອຍຈະແຕກ ແຕ່ບໍ່ຍອມເປີດເຜີຽ ຈຶ້ງເຮັດໃຫ້ປະຊາຊົນ ປະສົບກັບໄພພິບັດ ແຕ່ຜູ້ດຽວ. ປານໃດພວກທ່ານຈະປ່ຽນທັດສະນະ ຜະເດັດການກັມະຊີບທີ່ລ້າສະໄໝແລ້ວ?. ເປັນຫຍັງພັກປະຊາຊົນຈຶ່ງຢືດໝັ້ນທິດສະດີ ຂອງມັກ- ເລນິນ? ພວກທ່ານ ຍົກຍ້ອງກະສັດລາວ ທີ່ອົງກາດກ້າຫານ ເຊັ່ນເຈົ້າຟ້າງຸມ ເຈົ້າໄຊຍະເສດຖາທິຣາດ ເຈົ້າອານຸວົງ ແລ້ວເປັນຫຍັງພວກທ່ານບໍ່ຄົ້ນຄ້ວາ ແລະຖອດຖອນເອົາທິສະດີ ແລະບົດຮຽນຂອງວິຣະບຸຣຸດເລົ່ານີ້ ມາໃຊ້ໃນການນໍາພາປະເທດຊາຕຕໍ່ໆໄປ?


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Aug 13, 2018 07:56 AM

ເຕັມຫນ້າ