ເດັກຍິງ, ແມ່ຍິງລາວ ສ່ຽງເປັນເຫຍື່ອຄ້າມະນຸດ ຍ້ອນຕົວະແຕ່ງດອງ

ຮອບ 1 ປີ ທີ່ຜ່ານມາ, ມີຄະດີການຄ້າມະນຸດເກີດຂຶ້ນ ຢູ່ໃນປະເທດລາວ ຫຼາຍຄະດີ, ແຕ່ເມື່ອເຈາະຈົງ ລົງໄປແລ້ວ ຄະດີການຄ້າມະນຸດ ທີ່ກ່ຽວຂ້ອງ ກັບການແຕ່ງດອງ ກັບຄົນຕ່າງປະເທດ ແບບຕົວະຊົວະ ກໍເລີ່ມມີໃຫ້ເຫັນ ຫຼາຍຂຶ້ນເຊັ່ນກັນ. ສະເພາະແຂວງສະຫວັນນະເຂດ ກໍເກີດຂຶ້ນ 1 ຄະດີ. ໃນນັ້ນ ມີຜູ້ຖືກກ່າວຫາ 3 ຄົນ ປະກອບດ້ວຍ ຜູ້ຊາຍສັນຊາດຈີນ 2 ຄົນ ແລະ ແມ່ຍິງສັນຊາດລາວ ຫຼືນາຍໜ້າ 1 ຄົນ, ມີຜູ້ຖືກເຄາະຮ້າຍ ເປັນເດັກຍິງລາວ ອາຍຸປະມານ 14 ປີ ຈຳນວນ 1 ຄົນ. ປັດຈຸບັນ, ຜູ້ຖືກກ່າວຫາທັງໝົດ ໄດ້ຖືກປ່ອຍໂຕ ເປັນອິດສະຫຼະພາບ ພາຍຫຼັງຜູ້ເປັນແມ່ ຂອງຜູ້ຖືກເຄາະຮ້າຍ ໄປເຊັນລຶບລ້າງ ຂໍ້ກ່າວຫາ ທີ່ຜູ້ຖືກກ່າວຫາທັງໝົດ ຕວົະແຕ່ງດອງ ກັບລູກສາວຕົນເອງ, ຕາມຄວາມເວົ້າ ຂອງເຈົ້າໜ້າທີ່ ຄະນະກຳມະການ ຕ້ານການຄ້າມະນຸດ ປະຈຳແຂວງພາກໃຕ້ ທ່ານໜຶ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 26 ກັນຍາ ນີ້ວ່າ:

“ແມ່ລາວໄປເຊັນ ແບບປິດລັບກັບເຂົາຫັ້ນແຫຼະ ແລ້ວເຂົາເຈົ້າ ກໍໃຫ້ຄ່າອີ່ຫຍັງມາ ແລະ ກໍລຶບລ້າງບ່ອນວ່າ ຖ້າວ່ານາງອັນນີ້ ບໍ່ຄືນໄປຫາເຂົາ ແລ້ວເຂົາຊິເອົາເງິນ ຈຳນວນທີ່ເຂົາມອບຄ່າດອງ ໃຫ້ຄືນ, ແຕ່ວ່າ ພາຍຫຼັງທີ່ແມ່ລາວ ໄປຍິນຍອມ ແລ້ວເຂົາບໍ່ເອົາອີກ, ເງິນຄ່າດອງຫັ້ນ.”

ເດັກຍິງລາວ ອາຍຸປະມານ 14 ປີ ຜູ້ນີ້ ຖືກປະເມີນວ່າ ເປັນຜູ້ເຄາະຮ້າຍ ຈາກການຄ້າມະນຸດ ຍ້ອນວ່າ ລາວຖືກຕວົະແຕ່ງດອງ, ລາວຖືກສັກຢາ ບໍ່ໃຫ້ຮູ້ສຶກໂຕ ແລ້ວມີຜູ້ຊາຍຫຼາຍຄົນ ມາຮ່ວມມີເພດສຳພັນກັບລາວ ຈົນເຮັດໃຫ້ລາວ ມີບັນຫາສຸຂພາບ. ດັ່ງເຈົ້າໜ້າທີ່ ຄະນະກຳມະການ ຕ້ານການຄ້າມະນຸດ ປະຈຳແຂວງພາກໃຕ້ ຜູ້ດຽວກັບຂ້າງເທິງ ຂະຫຍາຍຄວາມ ໃຫ້ແຈ້ງຕື່ມວ່າ:

“ເພິ່ນມາຂໍ ໂດຍມາປົງຄ່າສິນສອດ, ຄ່າດອງ, ຄ່າຫຍັງ, ຫັ້ນແຫຼະ ໃຫ້ກັບແມ່ລາວ, ໂດຍທີ່ວ່າ ອຳນາດການປົກຄອງເຮົາ ບໍ່ໄດ້ເຂົ້າຮ່ວມນຳເນາະ ພາຍຫຼັງທີ່ວ່າປົງແລ້ວ ກໍແມ່ນເອົາໄປນອນ ຢູ່ບ້ານພັກ. ຜູ້ທີ່ມານອນນຳລາວ ຢູ່ບ້ານພັກ ບໍ່ແມ່ນຜູ້ທີ່ແຕ່ງງານກັບລາວ. ຖືວ່າ ຢູ່ໃນບ້ານພັກ 2 ຄືນ ຕື່ນເຊົ້າມາ ແລ້ວເຂົາກໍເອົາເມືອນະຄອນຫຼວງ ແລ້ວກໍປ່ຽນກັນນອນ, ໂດຍທີ່ວ່າ ເຂົາເຈົ້າສັກຢາ ອີ່ຫຍັງໃຫ້ ລາວບໍ່ຮູ້ສຶກໂຕຫັ້ນແຫຼະ. ຫຼັງຈາກມາຊ່ອຍແລ້ວ ເພິ່ນກໍກວດ ເອົາຫຍັງແລ້ວ ເອົາຢາໃຫ້ລາວກິນ ເພາະວ່າ ອັນຊ່ອງຄອດເນາະ ຫຼືວ່າມົດລູກລາວ ມັນເນົ່າ.”

ຊີວິດ ຂອງເດັກຍິງລາວ ອາຍຸປະມານ 14 ປີ ຜູ້ນີ້, ຫຼັງຈາກໄດ້ຮັບການຊ່ອຍເຫຼືອ ຈາກເຈົ້າໜ້າທີ່ນັ້ນ, ລາວກໍໄດ້ກັບໄປຮຽນຕໍ່ ຈົນຮອດຊັ້ນ ມ.4 ແລ້ວກໍມາເຮັດວຽກ ເປັນພະນັກງານ ຂາຍຍນ້ຳມັນລົດ ຢູ່ເຂດບ້ານ ເນື່ອງຈາກຄອບຄົວ ມີຖານະທຸກຍາກ. ດັ່ງເຈົ້າໜ້າທີ່ ຄະນະກຳມະການ ຕ້ານການຄ້າມະນຸດ ປະຈຳແຂວງພາກໃຕ້ ຜູ້ດຽວກັບຂ້າງເທິງ ຂະຫຍາຍຄວາມ ໃຫ້ແຈ້ງຕື່ມວ່າ:

“ຜູ້ກ່ຽວຮຽນຮອດຊັ້ນ ມ.4 ປີແລ້ວນີ້ເນາະ ພາຍຫຼັງທີ່ວ່າ ຮອດປີໃໝ່ລາວ ແລ້ວຜູ້ກ່ຽວ ຂໍກັບບ້ານ, ໂດຍທີ່ວ່າ ແມ່ລາວ ເປັນຄົນໄປຮັບປະກັນ ເຊັນເອົາມາຈາກໂຮງຮຽນ, ແຕ່ວ່າ ມາແລ້ວ ຜູ້ກ່ຽວບໍ່ຂໍໄປຮຽນຕໍ່. ດຽວນີ້, ແມ່ນມາຂາຍນ້ຳມັນ ຢູ່ໃນບ້ານ, ແຕ່ວ່າອີງໃສ່ຄອບຄົວ ເຂົາກໍບໍ່ມີ ຄືວ່າແຫຼະເນາະ ເດັກນ້ອຍ ມັນຜ່ານຈຸດນີ້ໄດ້ ມັນກໍຊິຂ້ອນຂ້າງ ດື້ແດ່ໜ້ອຍໜຶ່ງ ເພາະວ່າ ຕອນໄປຮຽນຫັ້ນ ບາງເທື່ອ ເດັກນ້ອຍຢາກພາໝູ່ໄປທົ່ວທີບ ພາໝູ່ໄປກິນນ້ຳກະທ້ອມ. ພວກເຮົາກໍຕິດຕາມ ເປັນພິເສດແຫຼະເນາະ.”

ປັດຈຸບັນ, ຢູ່ແຂວງສະຫວັນນະເຂດ ຍັງບໍ່ໄດ້ຍິນຫາງສຽງ ຈາກປະຊາຊົນ ພົບເຫັນກຸ່ມຄົນຈີນ ເຂົ້າມາຊອກຫາ ແມ່ຍິງລາວ ໄປເປັນເມຍ ເນື່ອງຈາກພາກສ່ວນທີ່ກ່ຽວຂ້ອງ ໄດ້ເຝົ້າລະວັງ ກໍລະນີການແຕ່ງດອງແອບແຝງ, ໂດຍການລົງໂຄສະນາ ໃຫ້ຄວາມຮູ້ ດ້ານກົດໝາຍ ແກ່ພໍ່ແມ່ປະຊາຊົນ ເມື່ອລົງພາກສະໜາມ ເຮັດວຽກສາທາ, ສຶກສາ ໃນແຕ່ລະບ້ານ. ອີງຕາມຂໍ້ມູນ ຈາກກອງບັນຊາການ ປກສ ແຂວງສະຫວັນນະເຂດ.

ຂະນະດຽວກັນ, 6 ເດືອນ ຂອງປີ 2024 ນີ້, ກໍມີຜູ້ຊາຍ ຈາກປະເທດຈີນ, ຫວຽດນາມ ແລະ ໄທ ເຂົ້າມາແຂວງໄຊສົມບູນ ແລ້ວລັກແຕ່ງດອງ ກັບແມ່ຍິງລາວ 64 ກໍລະນີ, ໂດຍບໍ່ຜ່ານທາງການລາວ ແລະ ໂດຍສ່ວນໃຫຍ່ ສະເໜີເງິນຄ່າດອງໃຫ້ສູງ ແລະ ນິຍົມເລືອກ ແມ່ຍິງລາວ ອາຍຸຕ່ຳກວ່າ 18 ປີ ໄປເປັນເມຍ, ເຊິ່ງເຫດການທັງໝົດ 64 ກໍລະນີນີ້ ຄະນະກຳມະການ ຕ້ານການຄ້າມະນຸດ ແຂວງໄຊສົມບູນ ສາມາດສະກັດກັ້ນ ບໍ່ໃຫ້ຈັດພິທີແຕ່ງດອງ ໄດ້ທັນ. ດັ່ງເຈົ້າໜ້າທີ່ ຄະນະກຳມະການ ຕ້ານການຄ້າມະນຸດ ປະຈຳແຂວງພາກເໜືອ ນາງໜຶ່ງ ກ່າວວ່າ:

“ທາງໄທເຮົາ ໄດ້ແກ້ໄຂທັນເຫດການ ສຶກສາອົບຮົມ ໄປຕາມລະບຽບການ ຂອງກົດໝາຍ. ຄັນຊິມີຄົນຕ່າງປະເທດ ເຂົ້າມາເຄື່ອນໄຫວຕ່າງໆເນາະ ລະເຮົາຊິມີພື້ນຖານ ຂອງພວກເຮົາ ໃນການຕິດຕາມ. ຢູ່ໃນບັນດາບ້ານ ເຂດຊົນນະບົດ ຢູ່ຫ່າງໄກສອກຫຼີກເນາະ ເຂດທີ່ວ່າ ດ້ອຍການສຶກສາ ເຂົ້າໄປພົວພັນ ມາແຕ່ງດອງ ກັບຄົນຕ່າງປະເທດ ອີ່ຫຍັງ.”

ຍານາງກ່າວຕື່ມວ່າ ຖ້າວ່າຜູ້ກ່ຽວ ທີ່ລັກແຕ່ງດອງ ກັບແມ່ຍິງລາວ ທີ່ອາຍຸຄົບມາດຕະຖານ ແລະ ຜູ້ກ່ຽວ ເຂົ້າມາລາວ ແບບຖືກຕ້ອງແລ້ວນັ້ນ, ທາງການລາວ ກໍຈະປະກອບເອກະສານ ເຮັດໃຫ້ພວກເຂົາເຈົ້າ ສາມາດແຕ່ງດອງກັນໄດ້, ແຕ່ໃນ 64 ກໍລະນີນີ້ ສ່ວນຫຼາຍແລ້ວ ບໍ່ສາມາດປະກອບເອກະສານ ແຕ່ງດອງກັນໄດ້ແລ້ວ ຍ້ອນອາຍຸແມ່ຍິງລາວ ທີ່ຈະແຕ່ງດອງ ນຳຜູ້ຊາຍຕ່າງປະເທດ ຍັງເປັນເຍົາວະຊົນ. ຫຼ້າສຸດນີ້, ຄະນະກຳມະການ ຕ້ານການຄ້າມະນຸດ ແຂວງໄຊສົມບູນ ພວມຕິດຕາມ ແລະ ຮິບໂຮມຂໍ້ມູນ ການເຄື່ອນໄຫວ ຂອງກຸ່ມຄົນຕ່າງປະເທດນີ້ ເພື່ອເອົາມາດຳເນີນການ ຕາມຂະບວນການ ຂອງກົດໝາຍ.

ເຈົ້າໜ້າທີ່ ຄະນະກຳມະການ ຕ້ານການຄ້າມະນຸດ ຂັ້ນເມືອງ ແຂວງໄຊສົມບູນ ທ່ານໜຶ່ງ ກ່າວວ່າ ປັດຈຸບັນ, ກໍຍັງໄດ້ຍິນ ກຸ່ມແມ່ຍິງ ເວົ້າຕໍ່ໆກັນວ່າ ພາຍໃນແຂວງ ມີເຫດການຜູ້ຊາຍຈີນ ມາຊອກເອົາແມ່ຍິງລາວ ໄປເປັນເມຍ, ໂດຍໃຫ້ເງິນພໍ່ແມ່ ຫຼືຜູ້ປົກຄອງ ຈຳນວນຫຼັກຮ້ອຍລ້ານກີບ ແລ້ວເອົາແມ່ຍິງລາວ ໄປເລີຍ, ບໍ່ໄດ້ມີພິທີແຕ່ງດອງ ແລະ ບໍ່ໄດ້ຜ່ານທາງການລາວ, ເຊິ່ງແມ່ຍິງລາວ ສ່ຽງ ທີ່ຈະຕົກເປັນຜູ້ຖືກເຄາະຮ້າຍ ຈາກການຄ້າມະນຸດ. ດັ່ງທ່ານກ່າວວ່າ:

“ຮູ້ຕໍ່ໆທີ່ວ່າ ແມ່ຍິງເຮົາເວົ້າຕໍ່ໆກັນ, ຫັ້ນນ່າ. ແຕ່ວ່າ ບໍ່ໄດ້ແຕ່ງ ລັກສະນະເຂົາເອົາເງິນໃຫ້, ຊີ້ນ່າ 100 ລ້ານບໍ່ 150 ລ້ານບໍ່, ຈັ່ງຊີ້ນ່າ ແລ້ວໄປນຳເຂົາເຈົ້າເລີຍ ທີ່ວ່າພໍ່ແມ່ພໍໃຈ. ອັນນີ້ກໍສ່ຽງກໍ ກ່ຽວກັບການຄ້າມະນຸດ ເຂົາເຈົ້າເອົາ, ເຂົາເຈົ້າກໍລັກເອົາເດ້, ເຂົາເຈົ້າບໍ່ໄດ້ວ່າ ແຕ່ງດອງໄດ໋. ເອົາພໍ່ແມ່ ພີ່ນ້ອງ 2-3 ຄົນ 4-5 ຄົນ ມາ, ແລ້ວກໍແມ່ນເອົາເງິນໃຫ້ ແລ້ວກໍໄປເລີຍ, ເຂົາບໍ່ໄດ້ເຮັດດອງ ເຮັດຂວັນໄດ໋. ເຂົາເຂົ້າເປົ້າໝາຍ ແບບວ່າ ເດັກນ້ອຍນັກຮຽນເນາະ ແລ້ວກໍຊົນເຜົ່າ, ທຸກຍາກ.”

ພ້ອມດຽວກັນນີ້, ໃນໄລຍະ 1 ປີທີ່ຜ່ານມາ, ຄະນະກຳມະການ ຕ້ານການຄ້າມະນຸດ ແຂວງສະຫວັນນະເຂດ ໄດ້ເຂົ້າຊ່ອຍເຫຼືອ ຜູ້ຖືກເຄາະຮ້າຍ, ຜູ້ທີ່ຢູ່ກຸ່ມສ່ຽງ, ຜູ້ທີ່ດ້ອຍໂອກາດ ໄດ້ທັງໝົດ 121 ຄົນ. ໃນນັ້ນ, ສ່ວນຫຼາຍ ຖືກຕວົະໄປຂາຍແຮງງານ ໃນລັກສະນະ ທີ່ມີຄວາມຕັ້ງໃຈ ຈະໄປເຮັດວຽກ ຮ້ານອາຫານ ແລະ ຮ້ານກິນດື່ມ, ແຕ່ສຸດທ້າຍ ຖືກບັງຄັບ ໃຫ້ຂາຍບໍລິການທາງເພດ. ດັ່ງເຈົ້າໜ້າທີ່ ແຂວງສະຫວັນນະເຂດ ນາງໜຶ່ງ ກ່າວວ່າ: 

“ກະມີແຕ່ 12-13 ປີ ແບບວ່າ ເຂົາເຈົ້າມາເຮັດວຽກ ຢູ່ຮ້ານອາຫານ, ຮ້ານຂາຍເຂົ້າປຽກ ຫຼືວ່າຮ້ານກິນດື່ມ, ສ່ວນຫຼາຍ, ແຕ່ວ່າ ຮ້ານເຂົ້າປຽກ ກໍບໍ່ຄ່ອຍ. ສ່ວນຫຼາຍ ມາຕ່າງແຂວງ ບໍ່ແມ່ນພາຍໃນແຂວງ. ຜູ້ທີ່ຖືກຜົນກະທົບ ແຂວງຫຼວງພຣະບາງບໍ່. ສ່ວນຫຼາຍ ເຂົາເປັນຄົນຊົນເຜົ່າຫັ້ນແຫຼະ ກໍຄອບຄົວນີ້ແຫຼະເນາະ ທາງດ້ານເສດຖະກິດນີ້ແດ່, ຈັ່ງເຮັດໃຫ້ໄດ້ຮັບຜົນກະທົບ.”

ເຖິງຢ່າງໃດກໍຕາມ, 2 ປີທີ່ຜ່ານມາ ຢູ່ເມືອງຜາອຸດົມ ແຂວງບໍ່ແກ້ວ ກໍມີຜູ້ຊາຍຈີນ ເຂົ້າມາພັກເຊົາ ຢູ່ພາຍໃນເມືອງ ໄດ້ວ່າຈ້າງ ນາຍໜ້າຄົນລາວ ແລະ ຈີນ ຊອກຫາແມ່ຍິງລາວ ອາຍຸກາຍ 18 ປີ ໄປເປັນເມຍ, ໂດຍສະເໜີໃຫ້ແຕ່ງດອງ ຕາມຮີດຄອງ, ໃຫ້ຄຳ ແລະ ໃຫ້ເງິນ 150 ລ້ານກີບ. ແຕ່ຫຼັງຈາກນັ້ນ, ແມ່ຍິງຜູ້ນີ້ ພັດຖືກຜົວຈີນ ບັງຄັບໃຫ້ນອນ ກັບພໍ່ຜົວ ແລະ ຂາຍບໍລິການທາງເພດ ໃຫ້ຜູ້ຊາຍຄົນອື່ນ.

ຕໍ່ເຫດການດັ່ງກ່າວ ເຮັດໃຫ້ວັນທີ 17 ກັນຍາ 2024 ທີ່ຜ່ານມາ, ຫ້ອງການຍຸຕິທຳ ເມືອງຜາອຸດົມ ເລັ່ງລົງເຄື່ອນໄຫວ ໂຄສະນາ ເຜີຍແຜ່ກົດໝາຍ ການປະກອບເອກະສານ ຂໍແຕ່ງດອງ ລະຫວ່າງພົນລະເມືອງລາວ ກັບຄົນຕ່າງປະເທດ ໃຫ້ກັບປະຊາຊົນ ບ້ານດອນສະຫວັນ 57 ຄົນ ເພື່ອທີ່ຢ່າງໜ້ອຍ ກໍໃຫ້ການຈັດຕັ້ງ ຂັ້ນທ້ອງຖິ່ນ ໄດ້ຮັບຮູ້ນຳ ແລະ ສາມາດມີຂໍ້ມູນ ຊ່ອຍເຫຼືອໄດ້ ຖ້າຫາກເກີດເຫດບໍ່ດີ  ເກີດຂຶ້ນກັບ ພົນລະເມືອງລາວ. ສະບາຍດີ.