ໄທວິຈັຍ ສາຍເຫດທີ່ນໍ້າຂອງ ບົກແຫ້ງລົງ

ນັກວິຊາການໄທ ເວົ້າວ່າ ສາຍເຫດທີ່ ເຮັດໃຫ້ນໍ້າ ໃນແມ່ນໍ້າຂອງ ບົກແຫ້ງລົງ ຜິດປົກກະຕິນັ້ນ ແມ່ນຍ້ອນ ອຸນຫະພູມ ຂອງໂລກ.
ວຽງໄຊ
2010-02-24
ອີແມວລ໌
ຄໍາເຫັນ
Share
ພິມ

ຂ່າວທ້ອງຖິ່ນ ແຈ້ງໃຫ້ຊາບວ່າ ໃນຂນະທີ່ ຫລາຍຝ່າຍ ຕ່າງເຫັນ ພ້ອມກັນວ່າ ປີນີ້ ນໍ້າໃນລຳ ແມ່ນໍ້າຂອງ ແຫ້ງໄວ ແລະ ຫລາຍກວ່າປົກກະຕິ ຍ້ອນຈີນ ໄດ້ກັກນໍ້າ ໄວ້ໃນອ່າງ ເໜືອເຂື່ອນຂນາດໃຫຍ່ 4 ແຫ່ງກັ້ນ ແມ່ນໍ້າຂອງ ໃນດິນແດນ ຂອງຕົນ ແຕ່ມີ ນັກວິຊາການໄທ ຜູ້ນຶ່ງ ຊໍ້າພັດບໍ່ເຫັນ ພ້ອມນຳຄຳເຊື່ອ ດັ່ງກ່າວ.

ຮອງສາສດາຈານ ອານົນ ສນິດວົງ ນະ ອາຍຸທຍາ ຜູ້ອຳນວຍການ ສູນຈັດການ ຄວາມຮູ້ດ້ານ ການປ່ຽນແປງ ຂອງພູມິອາກາດ ຂອງກະຊວງ ວິທຍາສາຕ ແລະເທັກໂນໂລຍີ ຂອງໄທ ກັບເຫັນວ່າ ການທີ່ນໍ້າ ໃນແມ່ນໍ້າຂອງ ລົດລົງນັ້ນ ບໍ່ກ່ຽວກັບການ ທີ່ຈີນກັກນໍ້າ ໃນອ່າງເໜືອເຂື່ອນທັງ 4 ແຫ່ງ ດັ່ງທີ່ຄົນ ສ່ວນຫລາຍເຂົ້າໃຈ ແຕ່ເກີດຈາກ ການທີ່ໃນປີ ຜ່ານມາ ອຸນຫະພູມ ທົ່ວໂລກຕໍ່າກວ່າ ປົກກະຕິ ມີຫລາຍປະເທດ ຕ້ອງປະສົບ ກັບພາຍຸຫິມະ ອັນສົ່ງຜົນໃຫ້ນໍ້າ ໃນແມ່ນໍ້າຂອງ ແຂງຕົວ ເປັນນໍ້າກ້ອນ ສະສົມຢູ່ ພື້ນດິນ ອີກທັງໃນ ລະຍະນີ້ ແມ່ນຣະດູແລ້ງ ເຮັດໃຫ້ ປາຣິມານນໍ້າ ໃນແມ່ນໍ້າຂອງ ຕໍ່າລົງ.

ທ່ານກ່າວ ຕໍ່ໄປວ່າ ໃນຣະຫວ່າງ ເດືອນມິຖຸນາ ຫາ ເດືອນຕຸລາ ຄາດວ່າ ປາຣິມານນໍ້າ ໃນແມ່ນໍ້າຂອງ ຈະເພີ້ມສູງຂຶ້ນ ເພາະປີນີ້ ອຸນຫະພູມ ຂອງໂລກ ຈະສູງຂຶ້ນ ກວ່າປົກກະຕິ ເປັນຜົນຈາກ ປະກົດການ El Nino ເຮັດໃຫ້ ເມື່ອເລີ້ມເຂົ້າ ຣະດູຮ້ອນ ນໍ້າກ້ອນທີ່ ສະສົມໄວ້ ພື້ນແມ່ນໍ້າຂອງນັ້ນ ລະລາຍ ອອກມາຫລາຍ ອີກທັງໃນຊ່ວງ ເວລາດັ່ງກ່າວ ເປັນຊ່ວງຕໍ່ ຣະຫວ່າງ ຣະດູຮ້ອນ ກັບຣະດູຝົນ ຈຶ່ງຈະສົ່ງ ຜົນ ໃຫ້ນໍ້ານອງ ຂຶ້ນຫລາຍ.

ຄາດວ່າ ໃນອະນາຄົດ ຣະດັບ ຂອງນໍ້າ ໃນແມ່ນໍ້າຂອງ ຈະລົດລົງໄປ ເລື້ອຍໆ ເນື່ອງຈາກ ພາວະໂລກຮ້ອນ ແລ ະປາຣິມານ ຂອງຕົ້ນໄມ້ ໃນເຂດ ລຸ່ມແມ່ນໍ້າ ທີ່ລົດໜ້ອຍຖອຍລົງ ທ່ານກ່າວ ໃນທີ່ສຸດ.

ເຕັມຫນ້າ