ພຍາດຫູໝູກໍ່າ ອາຈຣະບາດ ຂຶ້ນໄດ້ອີກ

ພຍາດຫູໝູກໍ່າ ອາຈຣະບາດ ຂຶ້ນໄດ້ອີກ ໃນເຂດ ນະຄອນຫລວງ ວຽງຈັນ ຍ້ອນວ່າໝູ ບາງຈໍາພວກ ບໍ່ໄດ້ສັກຢາ ກັນພຍາດ.
ໂພໄຊສວັດ
2010-08-24
ອີແມວລ໌
ຄໍາເຫັນ
Share
ພິມ

ປັດຈຸບັນນີ້ ສະພາບການ ຣະບາດ ຂອງພຍາດ ຫູໝູກໍ່າ ໃນເຂດ ນະຄອນຫລວງ ວຽງຈັນ ໄດ້ເບົາບາງລົງ ຕາມລາຍງານ ຂ່າວທ້ອງຖິ່ນ ໃນມື້ວັນ ຈັນ ທີ 23 ສິງຫາ 2010 ແຕ່ໜ່ວຍງານ ກ່ຽວຂ້ອງ ຍັງວິຕົກວ່າ ເຊື້ອພຍາດ ດັ່ງກ່າວ ອາຈຣະບາດ ຄືນໃໝ່ອີກໄດ້ ຍ້ອນວ່າເຈົ້າຂອງ ຟາມລ້ຽງໝູ ຫລາຍບ່ອນ ບໍ່ເອົາໃຈໃສ່ ໃຫ້ການຮ່ວມມື ໃນການສັກຢາ ກັນເຊື້ອໂຣກ ດັ່ງກ່າວ.

ເຈົ້າໜ້າທີ່ຈາກ ຜແນກຣະບາດ ວິທຍາສັຕວະແພດ ກົມລ້ຽງສັດ ແລະການປະມົງ ກະຊວງກະສິກັມ ແລະປ່າໄມ້ ໄດ້ເປີດເຜີຍ ຕໍ່ສື່ມວລຊົນ ທ້ອງຖິ່ນວ່າ: “ມີຄວາມເປັນ ໄປໄດ້ສູງວ່າ ພຍາດຫູໝູກໍ່າ ອາດຈະຄືນມາ ຣະບາດໃໝ່ອີກ ເຖິງວ່າ ປັດຈຸບັນນີ້ ອັດຕຣາການ ຕາຍຂອງໝູ ຈະຫລຸດໜ້ອຍລົງ ແລ້ວກໍຕາມ ແລະຍັງມີບາງ ຟາມທີ່ມີ ໝູຕາຍ ບໍ່ຮູ້ສາເຫດ ມື້ນຶ່ງ 5 ຫາ 7 ໂຕ ແຕ່ບໍ່ຍອມໃຫ້ ການຮ່ວມມື ສັກຢາກັນ ຕໍ່ຕ້ານ ເຊື້ອໂຣກໃຫ້ໝູ ເຖິງວ່າທາງ ການກ່ຽວຂ້ອງ ຈະພຍາຍາມ ຊັກຊວນ ໃຫ້ຮ່ວມໃນ ການສັກຢາກັນ ແຕ່ເຈົ້າຂອງຟາມ ກໍມີຄວາມ ເຊື່ອໝັ້ນ ໃນການປິ່ນປົວ ຂອງຕົນເອງ. ຍ້ອນເຫດນີ້ ຈຶ່ງເຮັດໃຫ້ ການຊ່ວຍເຫລືອ ແລະເຝົ້າລະວັງ ຂອງທາງການ ມີຄວາມຍາກ ລຳບາກຕື່ມຂື້ນ.

ທີ່ຜ່ານມາ ທາງການໄດ້ ເອົາມາຕການ ເຂັ້ມງວດ ໂດຍສະເພາະ ແມ່ນຟາມທີ່ຍັງ ມີໝູຕາຍຢູ່ ບໍ່ໃຫ້ຂາຍ ຫລືເຄື່ອນຍ້າຍໝູ ຢ່າງເດັດຂາດ ຫາກຝ່າຝືນ ກໍຈະຖືກ ລົງໂທດ ຕາມທີ່ໄດ້ ກຳນົດໄວ້ ຢ່າງບໍ່ມີ ຍົກເວັ້ນ ໃດໆທັງໝົດ.

ພຍາດຫູໝູກໍ່າ ຍັງບໍ່ມີການ ແຜ່ຣະບາດ ຢູ່ບ່ອນອື່ນ ເລີຍໃນລາວ ນອກຈາກເຂດ ນະຄອນຫລວງ ວຽງຈັນ ບ່ອນດຽວເທົ່ານັ້ນ. ພຍາດດັ່ງກ່າວ ນີ້ເລີ້ມຣະບາດ ມາແຕ່ເດືອນ ມິຖຸນາ ຈົນຮອດ ສິງຫາ 2010 ນີ້. ເຖິງປັດຈຸບັນນີ້ ມີໝູຕາຍ ທັງໝົດ ປະມານ 3,466 ໂຕ ແລະ ຍັງຕິດເຊື້ອຢູ່ 379 ໂຕ. ພຍາດ ຫູໝູກໍ່າ ໄດ້ແຜ່ຣະບາດ ໃນ 30 ຟາມ ປັດຈຸບັນນີ້ 28 ຟາມພົ້ນຂີດ ອັນຕະລາຍແລ້ວ ຍັງເຫລືອແຕ່ 2 ຟາມ ທີ່ທາງກາງ ຍັງຕິດຕາມ ເຝົ້າລະວັງ ແລະຊ່ວຍເຫລືອ ຢ່າງໃກ້ຊິດ.

ເຕັມຫນ້າ