ລາຍງານວ່າ ເຄື່ອງໝາຍ ຍີ່ຫໍ້ ສິນຄ້າ ນົມຝຸ່ນ ກາໝີ ທີ່ມີຮູບກາຕູນ ທາຣົກໝີ ຢູ່ໃນອ້ອມແຂນ ແລະ ຢູ່ໃນທ່າ ກິນນົມແມ່ ເປັນເຄື່ອງໝາຍ ອັນດຽວກັນ ກັບເຄື່ອງໝາຍ ຍີ່ຫໍ້ສິນຄ້າ ທີ່ໃຊ້ ຕິດໃສ່ ນົມຝຸ່ນ ສໍາລັບ ປົນໃສ່ ກາເຟ ຊື່ງບໍ່ເໝາະສົມ ສໍາລັບ ບໍາຣຸງ ສຸຂະພາບ ຂອງເດັກນ້ອຍ ທົ່ວໄປ ແລະ ທາຣົກ ທີ່ໃຫ່ຽກ່ວາ 6 ເດືອນ ຂື້ນໄປ.
ໃນເຄື່ອງໝາຍ ດັ່ງກ່າວ ມີຂໍ້ຄວາມ ຕັກເຕືອນ ຢ່າງຄັກແນ່ ວ່າ ນົມຝຸ່ນ ກາເຟ ຄຣີມເມີ້ ນີ້ ບໍ່ແມ່ນ ຜລິຕພັນ ໃຊ້ທົດແທນ ນົມແມ່. ຂໍ້ຄວາມຕັກເຕືອນນີ້ ເປັນພາສາອັງກິດ ພາສາໄທ ແລະ ພາສາລາວ, ແຕ່ວ່າ ອັຕຣາ ຄົນກືກໜັງສື ໃນລາວ ໂດຍສະເພາະ ໃນເຂດຊົນະບົດ ຍັງສູງຢູ່ ຈື່ງບໍ່ສາມາດ ເຂົ້າໃນໄດ້ໝົດ.
ທ່ານ Hubert Barennes ແລະ ເພື່ອນຮ່ວມງານ ຈາກສະຖາບັນ ການແພດ ປະເທດຮ້ອນ Francophonie ຢູ່ ສປປ ລາວ ໄດ້ທໍາການສໍາຣວດ ເຣື້ອງນີ້ ເພາະວ່າ ເດັກນ້ອຍ ໃນລາວ ທີ່ເຂົ້າໂຣງພະຍາບານ ຍ້ອນເປັນໂຣກ ຂາດອາຫານ ແມ່ນເນື່ອງມາຈາກ ລ້ຽງລູກດ້ວຍ ນົມຝຸ່ນ ກາໝີ ສໍາລັບປົນໃສ່ກາເຟ ໂດຍສະເພາະ.
ຈາກ ການສໍາພາດ ແພດທາຣົກ 26 ຄົນ ທີ່ເຮັດວຽກ ຢູ່ໃນ 8 ແຂວງ ຂອງລາວ ເມື່ອປີ 2006 ແລະການເກັບກໍາ ຂໍ້ມູນ ຂອງແພດ ທີ່ສອບຖາມ ຊາວບ້ານ ພົບວ່າ ນົມຝຸ່ນ ຍີ່ຫໍ້ ກາໝີ ສໍາລັບ ປົນໃສ່ ກາເຟ ເປັນທີ່ ຮູ້ຈັກກັນ ຢ່າງກ້ວາງຂວາງ, ທຸກຄົນ ກໍເຊື່ອວ່າ ແມ່ນອັນດຽວກັນ ກັບນົມຝຸ່ນ ຍີ່ຫໍ້ ກາໝີສໍາລັບ ໃຫ້ທາຣົກ ກິນ ກໍເລີຽ ເອົານົມນີ້ ໃຫ້ລູກກິນ.
ຄົນສ່ວນຫລາຍແລ້ວ ແທນທີ່ ຈະອ່ານ ຄໍາແນະນໍາ ທີ່ຂຽນລົງ ໃນເຄື່ອງໝາຍ ຍີ່ຫໍ້ການຄ້າ ພັດຖືເອົາຕາມຮູບ ກາໝີ ກໍເລີຽ ພາກັນເອົານົມຝຸ່ນ ກາໝີ ສໍາລັບປົນໃສ່ ກາເຟ ໃຫ້ລູກກິນ, ອັນນີ້ ແພດວ່າ ມັນແມ່ນຕົ້ນເຫດນື່ງ ທີ່ພາໃຫ້ເດັກນ້ອຍ ໃນລາວ ຈໍານວນຫລວງຫລາຍ ເປັນໂຣກ ຂາດອາຫານ.
