ບໍຣິສັດຂຸດບໍ່ແຮ່ ການາດາແລະລາວ ເຊັນສັນຍາ

ບໍຣິສັດ CNP ຂອງລາວ ເຊັນສັນຍາ ຈະຕັ້ງ ບໍຣິສັດ ຂື້ນຮ່ວມກັບ ບໍຣິສັດ Amanta ຊຶ່ງເປັນບໍຣິສັດ ຂຸດຄົ້ນບໍ່ແຮ່ ຂອງການາດາ.
ອະວາຣີ
2010-02-25
ອີແມວລ໌
ຄໍາເຫັນ
Share
ພິມ

ບໍຣິສັດຮ່ວມ ດັ່ງກ່າວ ຈະສຳຣວດ ແລະຂຸດຄົ້ນບໍ່ທອງ ຫລາຍໆແຫ່ງຕື່ມ ໃນລາວ ໃນນັ້ນ ບໍຣິສັດ Amanta ຈະມີຫຸ້ນສ່ວນ 80 ສ່ວນຮ້ອຍ ສ່ວນບໍຣິສັດ CNP ຈະມີຫຸ້ນ 20 ສ່ວນຮ້ອຍ. ພາຍໃຕ້ຂໍ້ຕົກລົງ ດັ່ງກ່າວ ບໍຣິສັດ Amanta ຈະມີໜ້າທີ່ ຮັບຜິດຊອບ ໃນການ ບໍຣິຫານ ແລະ ຊອກຫາເງິນທຶນ ເພື່ອສຳຣວດ ແລະ ຂຸດຄົ້ນ ສ່ວນບໍຣິສັດ CNP ນັ້ນຈະມີໜ້າທີ່ ວິ້ງເຕັ້ນ ເອກກະສານ ເຊັ່ນປະກອບ ຄຳຮ້ອງ ຂໍອະນຸຍາດ ຈາກຣັຖບານລາວ ດັ່ງນີ້ເປັນຕົ້ນ.

ປັດຈຸບັນ ບໍຣິສັດ CNP ມີໃບອະນຸຍາດ ສຳຣວດ ແລະ ຂຸດຄົ້ນບໍ່ແຣ່ ສາມແຫ່ງ ໃນແຂວງອຸດົມໄຊ ແຕ່ລະແຫ່ງ ມີພື້ນທີ່ກວ້າງ ປະມານ 16 ຕາຕະລາງ ກິໂລແມັດ. ສ່ວນບໍຣິສັດ Amanta ນັ້ນກຳລັງ ສຳຣວດ ແລະຂຸດຄົ້ນບໍ່ທອງ ຢູ່ແຂວງ ຫລວງນ້ຳທາ.

ຕໍ່ໄປ ບໍຣິສັດຮ່ວມ ຂອງສອງ ບໍຣິສັດນີ້ ຈະຍື່ນຄຳຮ້ອງ ຂໍອະນຸຍາດ ຂຍາຍການສຳຣວດ ແລະຂຸດຄົ້ນ ບໍ່ທອງ ໃຫ້ກວ້າງຂວາງ ອອກເປັນ 500 ຕາຕະລາງ ກິໂລແມັດ ໃນພາກເໜືອ ຂອງລາວ.

ທ່ານ Gerald Wright ປະທານບໍຣິສັດ Amanta ກ່າວວ່າ ທ່ານມີຄວາມຍິນດີ ທີ່ໄດ້ຮ່ວມ ວຽກງານກັບ ບໍຣິສັດ CNP ຊຶ່ງເປັນບໍຣິສັດ ທີ່ມີຊື່ສຽງຢູ່ລາວ ແລະ ຫວັງວ່າ ບໍຣິສັດ ດັ່ງກ່າວ ຈະຊ່ວຍເຮັດໃຫ້ ບໍຣິສັດ ຂອງທ່ານ ກາຍເປັນບໍຣິສັດ ນຳໜ້າໃນການ ສຳຣວດບໍ່ແຮ່ ໃນລາວ.

ເຕັມຫນ້າ