ການຟື້ນຟູ ປ່າໄມ້ ໃນອະນາຄົດ

ນັກວິຊາການ ດ້ານປ່າໄມ້ ກ່າວເຖິງ ວິທີ ການຟື້ນຟູ ປ່າໄມ້ ໃນອະນາຄົດ ເພື່ອຮັກສາ ສະພາບແວດລ້ອມ.
ຈະເຣີນສຸກ ຣາຍງານ
2008-07-08
ອີແມວລ໌
ຄໍາເຫັນ
Share
ພິມ

ປັດຈຸບັນ ສປປລາວ ​ມີ​ໂຄງການ ການ​ຟື້ນ​ຟູ ປ່າ​ໄມ້ ​ໂດຍ​ໄດ້​ຮັບ ການສນັບ​ສນູນ ຈາກ​ໜ່ວຍ​ງານ ​ພາກຣັຖ ​ແລະ ​​ເອກ​ຊົນ, ຊຶ່ງ​ນັກ​ວິຊາ​ການ ​ປ່າ​ໄມ້ ທ່ານນຶ່ງ ສະ​ແດງ ຄວາມ​ເຫັນ ກ່ຽວ​ກັບ ​ໂຄງການ ຟື້ນ​ຟູ ປ່າ​ໄມ້ ຕ່າງໆ ທີ່​ເກີດ​ຂຶ້ນ ​ໃນ ສປປລາວ ວ່າ:

“ປູກ​ປະ​ເພດ ພືດອຸດ​ສາ​ຫະກັມ ​ແຕ່​​​ເຈົ້າ ກໍ​ໄດ້​ຕັດ​ໄມ້ ​ແລະ​ ມາ​ປູກ​ໃໝ່ ຕາມ​ທັສນະ ຂອງ​ທາງ​ດ້ານ ວິຊາ​ການ ຂອງ​ສິ່​ງ​ແວດ​ລ້ອມ, ປ່າ​ໄມ້ ທີ່​ມີ​ແລ້ວ ມັນ​ຫລາຍ​ແລ້ວ, ນັບ​ມີ​ຕົ້ນ​ໄມ້​ໃຫຍ່​ແລ້ວ ບໍ່​ຢາກໃຫ້​ຕັດ ຢາກ​ໃຫ້​ຮັກສາ​ໄວ້ ​ແລະ ກໍ​ໄປ​ປູກ ທີ່ອື່ນ ທີ່​ມີ​ຕົ້ນ​ໄມ້ ທີ່​ບໍ່​ສົມບູນ​ແບບ​.”

ທ່ານ ກ່າວ​ຕື່ມ​ວ່າ ປັດຈຸບັນ ມີ​ການ​ສັມປະທານ ພື້ນ​ທີ່ດິນ ​ໃຫ້​ກັບ ບໍຣິສັດ ຂອງ​ຈີນ ທີ່​ເຂົ້າ​ໄປ ລົງທຶນ ​ໃນ​ລາວ ​ຫລາຍພໍ​ສົມຄວນ, ຊຶ່ງ​ເຮັດ​ໃຫ້ ມີ​ການ​ຖາງ​ປ່າ ​ເພື່ອ​​ປູກ ພືດ​ອຸດສາຫະກັມ ​ເຊັ່ນ ຕົ້ນຢາ​ງ ພາລາ, ​ໄມ້​ເກສນາ ​ແລະ ​ໄມ້​ສັກ, ຊຶ່ງ​ການ​ກະທໍາ​ ດັ່ງກ່າວ ​ເຮັດ​ໃຫ້​ປ່າ​ໄມ້ ທີ່​ເຄີຍ​ມີ​ຢູ່ ​​ໝົດ​ສິ້ນ​ໄປ.

ປັດຈຸບັນ, ​ເຖິງ​ແມ່ນວ່າ ປ່າ​ໄມ້ ​ໃນ ສປປລາວ ຖືກ​ທໍາລາຍ ຢ່າ​ງຫລວງຫລາຍ, ຊຶ່ງ ​ເກີດ​ຜົນ​ກະທົບ ຕໍ່ສະພາບ ພູມ​ອາກາດ ​​ໃນ​ທົ່ວ​ໂລກ, ຮວມທັງ ຄວາມ​ສົມ​ດຸນ ​ໃນ​ດ້ານ​ອື່ນໆ ​ອີກ​ດ້ວຍ. ທ່ານ ກ່າວ​ເຖິງ ການ​ແກ້​ໄຂ ບັນຫາ ສິ່ງ​ແວດ​ລ້ອມ ​ໃນ​ປັດຈຸບັນ ວ່າ:

“ກ່ຽວ​ກັບ ການພັທນາ ສິ່ງ​ແວດ​ລ້ອມ ຕ້ອງ​ຍຸຕິ ​ໃນ​ການ​ທໍາ​ປ່າ​ໄມ້ ຢ່າງ​ຊິ້ນ​ເຊີງ.”

​ເຖິງ​ແມ່ນວ່າ ທາງຣັຖບານ ຈະ​ອອກ​ກົດໝາຍ ຕ່າງໆ ກ່ຽວ​ກັບ ການ​ຫ້າມ​ບຸກລຸກ ປ່າ​ສງວນ​ແຫ່ງ​ຊາດ, ການ​ລັກລອບ ຕັດ​ໄມ້ ຫລື ການ​ຄ້າ​ໄມ້​ເຖື່ອນ, ​ແຕ່​ວ່າ ບັນຫາ ຕ່າງໆ ກ່ຽວ​ກັບ ​ເຣື້ອງນີ້ ກໍ​ຍັງ ຄົງ​ເປັນ​ບັນຫາ ທີ່​ຍັງ ​ບໍ່​ມີ​ທາງ​ສາມາດແກ້​ໄຂ ​ໃຫ້​ໝົດ​ໄປ​ໄດ້ ຈາກ ສປປລາວ.

ທ່ານ ສລຸບ ​ໃນ​ຕອນ​ທ້າຍ ວ່າ ການ​ບຸກລຸກ ປ່າ​ໄມ້ ​ໃນ​ປັດຈຸບັນ​ນີ້ ຈະ​ເພີ້​ມ ຄວາມ​ຮຸນ​ແຮງ ຫລາຍ​ຂຶ້ນ, ຊຶ່ງ​ສາມາດ ​ປ້ອງ​ກັນ​ໄດ້ ​ໂດຍ ​ເຮັດ​ຫລັກ​ໝາຍ ​​ຫລື ​ເຄື່ອງໝາຍ ​ໃຫ້​ຊັດ​ເຈນ ​ເພື່ອ​ບອກ​ໃຫ້​ຮູ້ ວ່າ ​ເປັນ​ເຂດ​ປ່າ ປະ​ເພດ​ໃດ. ການ​ແກ້​ໄຂ ບັນຫາ​ນີ້ ສໍາຄັນ ທີ່​ສຸດ ຢູ່​ທີ່​ການ​ປະຕິບັດງານ ຂອງ​ເຈົ້າ​ໜ້າ​ທີ່ ພາກຣັດ ທີ່​ເປັນ​ໄປ​ດ້ວຍ​ ຄວາມ​ຊື່ສັດ ຕໍ່ໜ້າ​ທີ່, ​ເ​​ອົາຈິງ​ເອົາຈັງ ​ແລະ ປະຕິບັດ ຕາມ​ກົດໝາຍ.

ເຕັມຫນ້າ