ໂຄງກາຣ ໂຮງໄຟຟ້າລິກໄນຕ໌ ເມືອງຫົງສາ

ໂຄງກາຣ ໂຮງໄຟຟ້າລິກໄນຕ໌ ເມືອງຫົງສາ ແຂວງ ໄຊຍະບູຣີ ກຳລັງຕຣຽມ ກາຣເຊັນສັນຍາ ຊື້ຂາຍ ກັບກາຣໄຟຟ້າ ຝ່າຍຜລິຕ ແຫ່ງປະເທສໄທຽ ຫລື Egat ທີ່ຈະມີຂຶ້ນ ໃນເດືອນ ກຸມພາ ນີ້ ແລະ ທາງບໍຣິສັທ ກໍຢູ່ໃນຣະຫວ່າງ ເກັບກຳຂໍ້ມູລ ຕ່າງໆ ຂອງປະຊາຊົນ ທີ່ຈະໄດ້ ຮັບຜົລກະທົບ ຈາກໂຄງກາຣ ດັ່ງກ່າວ ດັ່ງເຈົ້າໜ້າທີ່ ແຜນກພລັງງານ ແລະ ບໍ່ແຮ່ ປະຈຳ ແຂວງໄດ້ ກ່າວວ່າ:

“ເຂົາເຈົ້າເຊັນ CA ແລ້ວ ສັນຍາກໍ່ສ້າງ ແຕ່ວ່າ ເຈຣະຈາ ຂາຍໄຟນີ້ ເຂົາເຈົ້າ ກໍເຈຣະຈາ ຄັ້ງໜຶ່ງແລ້ວ ມັນມີກາຣ ເໜັງຕິງ ໃນກາຣ ກໍ່ສ້າງເນາະ ແລ້ວເຂົາເຈົ້າ ຍັງເຈຣະຈາ ກັນຕື່ມຢູ່ບໍ? ເຂົາຕົກລົງ ຊື້ແລ້ວ ແຕ່ວ່າເຂົາ ເຈຣະຈາ ເຣື່ອງຣາຄາກັນ”.

ທ່ານໄດ້ແຈ້ງ ເພີ່ມວ່າ ກາຣເຊັນສັນຍາ ກໍ່ສ້າງ ມີຂຶ້ນແຕ່ ເດືອນພຶສຈິກາ 2009 ຜ່ານມາ ແລະມີກາຣ ລົງນາມ ໃນບັນທຶກ ຄວາມເຂົ້າໃຈ ຫລື MOU ກາຣຮັບຊື້ ໄຟຟ້າຈຳນວນ 1400 ເມກະວັຕ. ແຕ່ວ່າກາຣ ກະຕຣຽມ ເຊັນສັນຍາ ຊື້ຂາຍ ຣະຫວ່າງກັນ ໃນເດືອນກຸມພາ ນີ້ນັ້ນ ອາຈມີກາຣ ເຈຣະຈາ ປັບຣາຄາໃໝ່ ກໍເປັນໄດ້ ຍ້ອນທາງ ບໍຣິສັທ ປະສົບກັບ ບັນຫາ ວິກິຕ ເສຖກິຈໂລກ. ພ້ອມດຽວກັນ ທາງບໍຣິສັທ ກໍຄາດວ່າ ຈະຂາຍ ໄຟຟ້າຈຳນວນ 100 ເມກະວັຕ ໃຫ້ກັບ ກາຣໄຟຟ້າລາວ ແລະອີກ 75 ເມກະວັຕ ເພື່ອນຳໃຊ້ ໃນໂຄງກາຣ.

ຢ່າງໃດກໍຕາມ ຕາມແຜນຂອງ ກາຣດຳເນີນ ວຽກງານນັ້ນ ທາງໂຄງກາຣ ໄຟຟ້າລິກໄນຕ໌ ຈະສາມາດ ເຣີ່ມກາຣກໍ່ສ້າງ ໃນທ້າຍປີ 2010 ແລະຈະໃຫ້ແລ້ວ ສຳເຣັຈພາຍໃນປີ 2015 ໂດຽເປັນກາຣ ລົງທຶນຮ່ວມກັນ ຣະຫວ່າງ ບໍຣິສັທ ບ້ານປູຈຳກັດ (ມະຫາຊົນ) ກັບບໍຣິສັທ ຣາຊບຸຣີ ຂອງໄທຽ ຝ່າຍລະ 40% ແລະອີກ 20% ເປັນຂອງ ຣັຖວິສາຫະກິຈ ຖືຫຸ້ນ ສປປລ.