ປະຊາຊົນ ເປັນຫ່ວງ ກັບການຂຸດຄົ້ນ ແຮ່ທາດ

ປະຊາຊົນລາວ ສະແດງຄວາມເປັນຫ່ວງ ນໍາການອະນຸຍາດ ໃຫ້ບໍຣິສັດ ຕ່າງປະເທດ ຂຸດຄົ້ນ ບໍ່ແຮ່ ຫລາຍເກີນໄປ.
ມະນີຈັນ ຣາຍງານ
2008-11-19
ອີແມວລ໌
ຄໍາເຫັນ
Share
ພິມ

ການອະນຸຍາດໃຫ້ນັກລົງທຶນຈາກຕ່າງປະເທດ ແລະ ພາຍໃນ ຂຸດຄົ້ນ ຊັພຍາກອນ ທັມຊາດ ເປັນແຮ່ທາດ ຕ່າງໆ ໃນລາວ ຫລາຍເກີນໄປ ແລະ ຍັງຈະສືບຕໍ່ ເພີ່ມຂຶ້ນໄປເລື້ອຍ ຖ້າບໍ່ມີ ການຍັບຍັ້ງ ຢ່າງຈິງຈັງຈາກມວນຊົນ, ຕາມຄໍາເວົ້າ ຂອງ ນັກວິຊາການລາວ ທ່ານນຶ່ງ ທີ່ບໍ່ສົງອອກນາມ.

ທ່ານເວົ້າວ່າ ບໍ່ຊາບວ່າ ມີການຄົ້ນຄ້ວາ ລະອຽດ ແນວໃດບໍ່ກ່ຽວກັບບັນຫານີ້ ເພາະໃນຍະ ທີ່ຜ່ານມາ  ມີຫລາຍ ກິຈການຂຸດຄົ້ນບໍ່ແຮ່ ເຮັດໃຫ້ ປະເທດລາວ ເສັຽຜົນປະໂຫຍໂດຍໄດ້ຮັບສ່ວນແບ່ງ ຕໍ່າກວ່າ 40​ ເປີເຊັນ ຂອງຜົນກໍາໄຣ, ມີ 18 ກິຈການ ທີ່ບໍ່ສ້າງຜົນປະໂຫຍດ ຫຍັງເລີຍ ແລະອີກ 71 ກິຈການ ກໍມີທ່າອ່ຽງ ຄ້າຍຄືກັນນີ້.

ທາງກະຊວງ ແຜນການແລະ ການລົງທຶນພ້ອມດ້ວຍ ກະຊວງພະລັງງານ ແລະ ບໍ່ແຮ່ ບໍ່ຍອມຮັບວ່າເປັນຄວາມຜິດຂອງຕົນ ຝ່າຍດຽວໂດຍອ້າງວ່າ ກ່ອນການອະນຸຍາດ ລົງທຶນ ໄດ້ຮ່ວມກັນ ພິຈາຣະນາແລ້ວ ກັບອໍານາດການປົກຄອງ ແລະ ຂະແໜງການ ຕ່າງໆ ທີ່ກ່ຽວຂ້ອງ.

ການສົ່ງອອກ ແຮ່ທາດ ສ້າງຣາຍຮັບ ອັນດັບ​ນຶ່ງ ​ແກ່ລາວ ໃນປັດຈຸບັນ ທົດແທນ ຣາຍຮັບ ຈາກການສົ່ງ​ ​ໄມ້ອອກ ທີ່ຄອງອັນດັບນຶ່ງ ໃນຍະ ທີ່ຜ່ານມາ. ​ແລະ ທີ່ສໍາຄັນ ຕ້ອງເນີ ໃຫ້ທາງຣັຖບານ ຄົ້ນຄ້ວາເຖິງຜົນໄດ້ຜົນເສັຽ ຢ່າງລະອຽດ ຖີ່ຖ້ວນ ກ່ອນຈະອະນຸຍາດ ໃຫ້ຂຸດຄົ້ນ. ຖ້າບໍ່ຈໍາເປັນ ຕ້ອງຮັກສາໄວ້ເປັນມູນມໍຣະດົກ ແກ່ຄົນຮຸ່ນຫລັງ ຊຶ່ງຢູ່ໃນຍຸກ ທີ່ປະເທດລາວ ອາດມີຄວາມສາມາດ ແລະເຂັ້ມແຂງພໍ ທີ່ຈະຂຸດຄົ້ນ-ນໍາ​​ໃຊ້ ດ້ວຍຕົນເອງ ຢ່າງມີປະສິດທິພາບ ທີ່ສຸດ.

ມາ​​ເຖິງປັຈຸບັນນີ້ ຣັຖບານລາວ ໄດ້ອະນຸຍາດໃຫ້ນັກລົງທຶນ ຂຸດຄົ້ນບໍ່ແຮ່ທັງໝົດ 116 ບໍຣິສັດ ຮວມມີ 196 ກິດຈະການ -​ເພີ່ມຂຶ້ນ ຈາກເດືອນຜ່ານມາ 4 ກິຈການ. ໃນນັ້ນ ເປັນການລົງທຶນຂອງຕ່າງປະເທດ 74 ບໍຣິສັດ -​ເພີ່ມຂຶ້ນ 3 ບໍຣິສັດ -ມີ110ກິດຈະການ -​ເພີ່ມຂຶ້ນ 5 ກິຈການ. ສ່ວນເຫລືອນັ້ນ ເປັນການລົງທຶນ ຂອງນັກລົງທຶນພາຍໃນ ຊຶ່ງສ່ວນໃຫຍ່ ເປັນອຸດສະະ​ກໍາ ຂນາດນ້ອຍ. ​ໃນຈໍານວນການລົງທຶນທັງໝົດ ມີພຽງ 34 ບໍຣິສັດເທົ່ານັ້ນ ທີ່​​ໄດ້ ເຂົ້າສູ່ການຂຸດຄົ້ນ ໃນພາກຕົວຈິງແລ້ວ.


ຄໍາເຫັນ (0)
Share
ເຕັມຫນ້າ