ລາວໄທຮ່ວມອະນຸຮັກ ຊັພຍາກອນທັມມະຊາດ

ກະຊວງ ຊັພຍາກອນນໍ້າ ແລະ ສິ່ງແວດລ້ອມ ລາວ-ໄທ ຈະຈັດຕັ້ງ ໂຄງການ ອະນຸຮັກ ຊັພຍາກອນ ທັມມະຊາດ ຮ່ວມກັນ 9 ໂຄງການ ມູນຄ່າ 86 ລ້ານບາດ.
ໂພໄຊສວັດ
2010-10-14
ອີແມວລ໌
ຄໍາເຫັນ
Share
ພິມ

ກົດຟັງສຽງ

ຜົນການ ປຶກສາຫາລື ທະວິພາຄີ ລະດັບຣັຖມົນຕຣີ ເຣື້ອງການຮ່ວມມື ອະນຸຮັກ ຊັພຍາກອນນ້ຳ ແລະສິ່ງແວດລ້ອມ ຄັ້ງທີນຶ່ງ ລະຫວ່າງວັນທີ 24 ຫາ 26 ມິຖູນາ 2010 ຢູ່ນະຄອນຫລວງ ວຽງຈັນ ສປປລາວ, ສລຸບໄດ້ວ່າ ຣັຖມົນຕຣີ ປະຈຳສຳນັກ ນາຍົກຣັຖມົນຕຣີ ສປປລາວ ແລະ ຣັຖມົນຕຣີ ຊັພຍາກອນນ້ຳ ແລະ ສິ່ງແວດລ້ອມ ຂອງໄທ ໄດ້ປຶກສາຫາລື ຊອກຫາວິທີ ແລະ ການຮ່ວມມືຢ່າງໃກ້ຊິດ ເພື່ອດຳເນີນການ ພັທນາຊັພຍາກອນນ້ຳ ແລະ ສິ່ງແວດລ້ອມ ຢ່າງຍືນຍົງ.

ກອງປະຊຸມລະຫວ່າງ ຣັຖມົນຕຣີ ຂອງສອງປະເທດ ໄດ້ພິຈາຣະນາ ປະເດັນທີ່ຮີບດ່ວນ 4 ເຣື້ອງເພື່ອໃຫ້ ກະຊວງຊັພຍາກອນນ້ຳ ແລະ ສິ່ງແວດລ້ອມ ນຳໄປປະຕິບັດ ການ ຄື:

1-ການຄວບຄຸມມົລພິດ ແລະ ເທັກໂນໂລຍີ ສິ່ງແວດລ້ອມ ນຳນວນ 3 ໂຄງການ ຊຶ່ງຈະໃຊ້ ງົບປະມານ 69 ລ້ານບາດ.

2-ການຈັດການ ກັບພັຍພິບັດ ຈໍານວນ 1 ໂຄງການ ຊຶ່ງຈະໃຊ້ ງົບປະມານ 10 ລ້ານບາດ.

3-ການຈັດແຜນການ ແລະນະໂຍບາຍ ປົກປັກຮັກສາ ຊັພຍາກອນ ທັມມະຊາດ ແລະ ສິ່ງແວດລ້ອມ ຈໍານວນ 3 ໂຄງການ ຊຶ່ງຈະໃຊ້ ງົບປະມານ 4 ລ້ານ 5 ແສນບາດ.

4-ການປ່ຽນແປງ ສະພາບພູມີອາກາດ ນຳນວນ 2 ໂຄງການ ຊຶ່ງຈະໃຊ້ ງົບປະມານ 2 ລ້ານ 5 ແສນບາດ. ຮວມທັງໝົດ 9 ໂຄງການ ຕົກເປັນເງິນກວ່າ 86 ລ້ານບາດ.

ຈໍານວນເງິນ ທັງໝົດນີ້ ຝ່າຍຣັຖບານໄທ ພ້ອມທີ່ຈະຊ່ວຍເຫລືອ ແລະສນັບສນູນ. ໃນມື້ວັນທີ 28 ກັນຍາ 2010 ຜ່ານມາ ຄນະຣັຖມົນຕຣີໄທ ໄດ້ ພິຈາຣະນາ ອະນຸມັດ ງົບປະມານ ດັ່ງກ່າວ. ເຈົ້າໜ້າທີ່ຈາກ ກະຊວງ ຊັພຍາກອນນ້ຳ ແລະ ສິ່ງແວດລ້ອມໄທ ກ່າວກ່ຽວກັບເຣື້ອງ ນີ້ວ່າ:

"ທາງກະຊວງ ຊັພຍາກອນ ທັມມະຊາດ ໄດ້ຂໍອະນຸມັດ ຈາກ ຄຣມ ຮຽບຮ້ອຍແລ້ວ ແລະກໍໄດ້ຮັບ ອະນຸມັດແລ້ວ ໃຫ້ໄປດຳເນີນ ຄວາມຮ່ວມມື ກັບລາວ ເພາະປະເດັນ ທີ່ເຮົາໄດ້ຂໍເຂົ້າ ໄປຫາທາງ ຄຣມ ມັນເປັນຜົນກະທົບ ຂ້າມພົມແດນ".

ກຳນົດຂອງການ ດໍາເນີນງານ ຂອງໂຄງການທັງໝົດ ຕ້ອງໃຫ້ເປັນ ຮູບປະທັມ ພາຍໃນ 3 ປີ ແລະໃຫ້ເລີ້ມ ພາຍໃນທ້າຍປີ 2010 ນີ້.

ເຕັມຫນ້າ