ສາທາຣະນະສຸຂຕຣຽມ ຄວາມພ້ອມເພື່ອອາເຊັມ

ຜແນກ ສາທາຣະນະສຸຂ ນະຄອນຫລວງ ວຽງຈັນ ເປີດເຜີຽ ວ່າທາງການ ໄດ້ເພີ້ມຄວາມ ເອົາໃຈໃສ່ ນໍາຄວາມ ສະອາດ ດ້ານອາຫານ ແລະ ທີ່ພັກ ອາສັຍ ເພື່ອຮອງຮັບ ແຂກ ຕ່າງປະເທດ ທີ່ ຈະເຂົ້າຮ່ວມ ກອງປະຊຸມ
ອາເຊັມ ຄັ້ງທີ່ 9 ທີ່ຈະມີຂື້ນ ໃນຕົ້ນເດືອນ ພືສຈີກາ ນີ້. ທາງການ ໄດ້ສົ່ງ ພະນັກງານ ອອກກວດກາ ຮ້ານອາຫານ ຕ່າງໆ ເພື່ອແນະນໍາ ການປຸງແຕ່ງ ອາຫານ ທີ່ສະອາດ ແລະ ຖືກຫລັກ ອະນາມັຍ ພ້ອມທັງ ອອກໜັງສື ຢັ້ງຢືນ ໃຫ້ຮ້ານອາຫານ ທີ່ຜ່ານ ການກວດກາ. ຕາມລາຍງານ ຈາກ ນະຄອນຫລວງ ວຽງຈັນ ທີ່ອ້າງຕາມ ການເປີດເຜີຽ ຂອງ ທ່ານ ດຣ. ພອນປະເສີດ ອະນຸພົງ ຮອງຫົວໜ້າ ຜແນກ ສາທາຣະນະສຸຂ ນະຄອນຫລວງ ວຽງຈັນ.

ທາງຜແນກ ສາທາຣະນະສຸຂ ວ່າ ການກວດກາ ຮ້ານອາຫານ ແລະ ທີ່ ພັກອາສັຍ ໃນລະຍະ ຜ່ານມາ ພົບເຫັນວ່າ ການປຸງແຕ່ງ ອາຫານ ຢູ່ຕາມ ໂຮງແຮມ ແລະ ໃນຮ້ານອາຫານ ຫລາຍແຫ່ງ ຍັງບໍ່ ສະອາດພໍ ມີບາງ ຮ້ານ ປຸງແຕ່ງ ອາຫານ ທີ່ມີສານ ຄໍລາມິນ ເຈືອປົນຢູ່ນໍາ ຊື່ງອາດເປັນ ອັນຕຣາຍ ຕໍ່ສຸຂພາບ ຂອງ ຜູ້ບໍຣິໂພກ.

ນອກຈາກ ກວດກາ ການປຸງແຕ່ງ ອາຫານ ແລ້ວ ເຈົ້າໜ້າທີ່ ໄດ້ກວດກາ ຮ້ານກິນດື່ມ ໂຮງງານ ຜລິດນໍ້າດື່ມ ໂຮງງານ ຜລິດນໍ້າກ້ອນ ສໍາລັບ ການກວດກາ ໂຮງແຮມ 158 ແຫ່ງນັ້ນ ເຈົ້າໜ້າທີ່ ວ່າ 79%  ຖືກຕ້ອງຕາມ ຫລັກ ອະນາມັຍ ການກວດກາ ຮ້ານອາຫານ  97  ແຫ່ງ ມີພຽງແຕ່  59%  ຜ່ານການກວດກາ ຮ່ວມທັງ ກວດກາ ສຸຂພາບ ຂອງ ພະນັກງານ ໃນແຕ່ລະ 6 ເດືອນ ການນຸ່ງຊຸດ ກັນເປື້ອນ ຂອງ ພະນັກງານ ປຸງແຕ່ງ ອາຫານ ລະບົບ ກໍາຈັດ ຂີ້ເຫຍື່ອ ແລະ ສິ່ງໂສໂຄກ ຫ້ອງນໍ້າ ຊາຍ ແລະຍິງ ຕຣອດຮອດ ຫ້ອງລະບາຍ ນໍ້າ ໂສໂຄກ.